تسقية بسمنة ( تسقية ببدوة )


         وصفة : منى                 2018/10/26                 4 تعليقات
تسقية بسمنة ( تسقية ببدوة )

IMG_3324
تسقية بسمنة ( تسقية ببدوة )

امبارح واليوم امطار متل السيل في حلب ..الجو ولا احلى من هيك وصبحية يوم الجمعة .. في احلى من هيك صحن لهيك يوم وهيك جو ؟

من حوالي السنة أو أكتر كنت في البيت عبفتل متل ما اغلب ستات البيوت بيقضوا يومهم ، الراديو كانت على شي اذاعة من الاذاعات ، فجاة اتذكرت راديو مونت كارلو قلت يا ترى ممكن أأقدر أطالعها . والله تركت كل شي من ايدي ودورت عليها ولقيتها.

صوتها ما كان صوت اذاعة عادي, كان صوت طفولتي والراديو الاسود العتيق الي في بيت اهلي ..المذيعة كانت عبتعمل مقابلة مع صبية , وانا كنت سبحانة في بجر عميق من الحنين ..فجاة صار الكلام مألوف وشدني شوي شوي لحتى رجعت وعيت.. كان الحكي عن الطبخ وبالاخص عن مبادرة قاموا فيها مجموعة من المدونات العربيات لحفظ تراثنا الغني من الوصفات العربية الاصيلة ، وكملت الصبية : صاحبة الفكرة منى صابوني الي اسست الجروب ، هون انا وصلت على السقف من النطة الي نطيتها .. أن شو هل الصدفة الي خلتني أدور على اذاعة صار عشر سنين اذا ما كان أكتر ما سمعتها وفي اللحظة المناسبة على الظبط :D

بداية نكهة عربية كان في سنة 2014 بقصة، كان في جروب تصوير مهم كتير مختص بتصوير الطعام وفيه ناس من كل العالم, بتنزل واحدة وصفة الدقة الغزاوية وبتكتب تعريف عنها انها السلطة الاسرائيلية, بتحكي واحدة من الصبايا الفلسطينيات ان هي سلطة غزاوية، بتقوم ادارة الجروب بتطالعها هي ومجموعة كبيرة من العربيات الي ناقشوا الاسرائيلية .. انا وصلت ماخرة ما حضرت كل الي صار , بس فتحت الجروب فهمت كل الكركبة الي صارت .
وصراحة انا من زمان كنت حابة اعمل جروب يجمعنا نحن المدونات العربيات , بس ما كنت عبقدر نظم افكاري كيف ممكن نجتمع وننظم امورنا وهيك .. اقترحت عليهم الفكرة ، وافقوا فورا .
الاسم الاول الي اخترته كان : على مائدة مستديرة . بس بعد التصويت فضل اغلبية الاعضاء ان يكون في كلمة “عربي” اشارة لاهم ما يميز مجموعتنا ، و هيك صار. اخترنا وصفة الدقة الغزاوية طبقناها كلياتنا . وبموعد محدد من الشهر نشرنا الوصفة وغرقنا الدنيا بالصور وقصة الوصفة وتفاصيلها . وبعدها صرنا كل شهر نعمل نفس الشي

كان في حماس كتير وبالبداية كان في اسماء مهمة جدا في الجروب , ولكن منهم مااستمروا ومنهم ما قدروا الالتزام ومنهم اشتغلوا على الجروب وكانوا عبيشتغلوا على مشروعهم الخاص بكل امانة وحماسة وعطاء . بعد شوي صار قطع للنت عن حلب ونحن حرفيا انقطعنا عن العالم الخارجي ومابقى اي وسيلة تواصل .. بهل الوقت كانت الغالية نسرين رحال ماسكة الجروب متل الام الحنونة المنظمة ..وصراحة رح اعترف ان هي السبب لاستمرار الفكرة و لان في كتير ناس بيجيهم افكار حلوة و بيبدوا فيها .. الكلام على الاستمرار ..والاستمرار كان بفضل رب العالمين وفضل نسرين .

وبما اني عدت الي التدوين ( ان شالله ) فلازم اجدد نشاطي في المجموعة . ووصفة هل الشهر ( للصدفة الجميلة ) كانت وصفة شامية : وصفة التسقية ببدوة لعائشة ميداني , وانا كنت كتير مشتهية اتعلمها بالتفصيل . لان كل ما كنت أسال يقولولي حمص حب وحمص عادي وشوية لبن وشوية ليمون .. يعني اعملها على النظر .. وبالنسبة لوصفة بسيطة فهاد شي صعب وخصوصي لما ما يكون الطبق جزء من .
عيلتي و شي تربيت عليه .

بالنسبة الي كان اكتر شي جديد هو كمية اللبن وعصير الليمون و الطحينة , لو اعملها على ذوقي كنت قلت كتير كمية اللبن و الليمون وكنت كترت الطحينة , بس مع الالتزام بالوصفة وتطبيقها اكتشفت ان الكمية مناسبة تماما وان هل الحمضية هو شي طيب كتير و تقليل الطحينة خلى الوصفة مميزة عن الفتة الي بعملها بالعادة . وشغلة تانية كمان مختلفة هو استعمال الخبز من دون تحميص , حتى لما كنت عبحضر الوصفة قليت خبز في مرحلة الاعداد لاكتشف بعد ما قرات الوصفة مرة تانية ان مافي داعي للقلي , خسارة اني كنت صورت الوصفة بالخبز المقلي وما كان في مجال اعيد الصورة .. ( يرجى اعتبار الخبز ني وتغميض العيون عن اللون الذهبي الجميل للخبز في الصورة ) ..واخر شي هو ان مافي كمون في الصلصة .. طبعا فكرت ان الكمون سقط سهوا ، بس بعدها طلع ان الوصفة ما بدها كمون .

انا التزمت بالوصفة حرفيا ، ما عدا تفصيلة واحدة ، وهي اني صفتيت الحمص بمصفاية ناعمة بعد الطحن ، حتى يكون الصوص ناعم .. انت ممكن تستغني عن هل الخطوة او ممكن تستعملي حمص جاهز وبهي الطريقة بتصير الوصفة ولا اسهل من هيك

موعدنا اسبوع القادم باذن الله ، لا تحرموني من تعليقاتكم

صحة وهنا

المقادير :

4 كيلو حمص حب جاف
معلقة صغيرة بيكربونات الصوديم

البدوة:
2 كوب حمص مسلوق
1 ونصف كوب مسبحة ( الوصفة مكتوبة تحت )
1 كوب لبن زبادي
ربع كوب عصير ليمون
ملح
3-4 فص ثوم مهروس
خبز عربي

للوجه:
2-3 ملعقة كبيرة سمنة حسب الرغبة
صنوبر او كاجو أو لوز اي نوع مكسرات

للتزيين:
حمص حب وحبات رمان

المسبحة:
1 كوب حمص مسلوق
ربع كوب ماء سلق الحمص
ربع كوب عصير ليمون
ربع كوب طحينة
ملح
3 مكعبات ثلج
الطريقة:
1- يغسل الحمص الجاف جيدا ثم يغمر بالماء البارد ويترك طول الليل حتى تتفتح الحبات وتنتفخ.
2- في اليوم التالي يغسل مرة أخرى ثم يضاف الملح وبيكربونات الصوديم و الزيت ويغمر في الماء ثم يسلق حتى ينضج تماماً، الوصفة تتطلب 4 كوب حمص مسلوق . يمكن الاحتفاظ بباقي الحمص في وعاء محكم الاغلاق في قسم التجليد في الثلاجة .
3 - في حال استخدام الحمص المعلب يغسل ويغمر بالماء ويسلق من ربع الى نصف ساعة حتى تصبح الحبة طرية جدا.
4-طريقة المسبحة : نضع في محضرة الطعام الحمص و مرق السلق وعصير الليمون ونطحن الكل جيدا حتى يصبح الحمص ناعما جدا .
5- نصفي الحمص في مصفاة ناعمة للتخلص من القطع الصغيرة, هذه المرحلة اختيارية .
6 - يعاد الكل الى محضرة الطعام ويضاف الثلج والحينة والملح ونخلط جيدا. اذا كانت المسبحة متماسكة جدا يمكن اضافة بضع ملاعق من الماء .
7- تحفظ المسبحة في البراد و تبقى صالحة لمدة 3 ايام.
8 - تحضير البدوة : تقلب المسبحة واللبن و الليمون والثوم والملح جيدا.
9- يسخن كوبان من الحمص المسلوق مع كوبان من المرق . نقطع الخبز باليد لقطع صغيرة ( اي نفته) ونضعه في طبق التقديم . تقريبا نحسب لكل شخص كمشة خبز مفتوت .
10- نضيف حوالي النصف كوب من مرق الحمص على الخبز حتى يصبح الخبز طري . نضيف الحمص المسلوق ونقلب . نضيف ثلثي البدوة ونقلب . نوزع باقي البدوة على الوجه ونسويها بالملعقة . نزين بالرمان والحمص والكمون والفليفلة الحمراء الرش .
11- نضع السمنة في مقلاة على النار ونحمص فيها اللوز او الصنوبر في حال استخدامهم وعندما تسخن جيدا نصبها على وجه الفتة.
12- تقدم فورا مع المخللات والبصل اليابس او الاخضر وتؤكل من الطبق الرئيسي .

التعليقات

  1. نونا 29 October 2018

    كلامك واسلوبك رائع
    المقدمة كتير شدتني
    الله يوفقك ويعطيكي العافية يارب
    انا جربت الكوكيز وطلع رائع
    بس استغنيت عن الكاكاو وعملتو بطحين لانو بحبو سادة

    • منى 1 November 2018

      صحتيين والف الف هنا على الكوكيز
      وشكرا لانك فرات المقدمة الطويللللة كلها وتركتي نعليقك :)

      الكوكيز السادة اله عيارات مختلفة شوي

      منورة

  2. الهامو 2 November 2018

    واو مدام منى يسلمو ايديكي الصورة بتشهي
    تذكرت بهالوصفة ايام الدراسة بالشام وريحة الشام
    ع فكرة بدي اقلك نيال عيلتك عليكي ذوق واحساس راقي وانا شخصيا بين الاحرف تبعك عم اتعلم كتير شغلات غير الطبخ
    تقبلي تحياتي

    • منى 2 November 2018

      الله يسلمك الهامو العزيزة :)
      ان شالله بتعيشي وتتذكري ، وعلى فكرة طعمتها ذكرتني بسفرة قديمة اخدنا ياها بابا للشام وبصحن تسقية اكلناه بمطعم صغير هونيك

      شكرا الك على كلامك .. تعيشي وتتعلمي وتكوني دايما فوق

تقييم الوصفة
عاديةقد أحضرهاجيدةممتازةأكثر من رائعة (1 votes, average: 5.00 out of 5)