تندوري القرنبيط


         وصفة : منى                 2012/03/02                 18 تعليقات
تندوري القرنبيط

وصفة كتير كتير طيبة , و اولادي الي بالعادة ما بياكلو القرنبيط ابدا , حبوها .. جوجو قالتلي انو ما كانت متخيلة انو طعمة القرنبيط المطبوخ ممكن يكون هل الاد طيبة , و مروان قال اذا بطبخه دوما هيك رح ياكل منه دوما , و انا رح قلك انو وصفة يممي و سهلة و تتبيلتها غنية و مستاهلة تجربيها

بالصحة و الهنا




حبة قرنبيط , متوسطة الحجم و مقطعة لزهرات
حبة بصل صغيرة , مقطعة جوانح
2 ملعقة كبيرة زيت , أنا استعملت زيت زيتون

تتبيلة التندوري :

كوب لبن
حبة بصل صغيرة , مبشورة
3 فص ثوم , مهروس
2 ملعقة كبيرة زيت , أنا استعملت زيت زيتون
2 ملعقة كبيرة عصير ليمون
ملعقة كبيرة زنجبيل طازج , مبشور
ملعقة صغيرة فليفلة حمراء ناعمة
ملعقة صغيرة كمون
ملعقة صغيرة كزبرة ناشفة
نصف ملعقة صغيرة غرام ماسالا
نصف ملعقة صغيرة ملح
ربع ملعقة صغيرة كركم




• يسلق القرنبيط لمدة دقيقتان أو ثلاثة فقط ثم يرفع من الماء المغلي و يوضع في ماء بارد , يراعى أن ينضج و يبقى صلباً في الوقت نفسه و هذا سر الوصفة . تصف الزهرات في صينية فرن مدهونة .

• يقلب البصل في الزيت حتى يشقر و يوزع على القرنبيط .

• تخلط تتبيلة التندوري و توزع على الزهرات , تخبز في الفرن لمدة 10 – 15 دقيقة , تقدم ساخنة أو فاترة مع الخبز العربي .

التعليقات

  1. dentamaniac 6 March 2012

    تسلم دياتك يا منى
    عندي زهره مبارح اشتريتها:) للتجريب على الغدا اليوم

  2. منى 6 March 2012

    بانتظار رايك و ان شاء الله تكون على زووءك ;)

  3. تورتاية بالكريز 6 March 2012

    نفسي يامنمون بعد ماتعملي كل الخطوات بدل ماتحطيه في الصينية تضعيها بالبيض و تبدريها بالطحين الممزوج بالبهارات وتقليها والله طعمها جميل جدا من باب التغيير وعلى اد مابشوف وصفات بالنت بحس طبخاتك معمولة بحب ورقي ماشاء الله ربنا يسعدك حبيبة قلبي

  4. منى 7 March 2012

    شكرا ام ياسمين لكلامك الي دوما احلى من العسل :zzz

    ان شاء الله رح جرب فكرتك باقرب وقت , شكرا الك لاغناء الوصفة

  5. jwan 7 March 2012

    يسعد مساك ست منى والله يعطيك ألف عافية على كل ابداعاتك ( تسلملي عينك شو فنانة مشاء الله عليك والله يحميك )
    ست منى جربت وصفتك وهي بالفرن وطبقت كل شي بحذافيره و الريحة بتفلج بس صارلها أكتر من ساعة بالفرن وماعم تستوي والله مابعرف شو بدي اعمل دليني الله يخليك :cry

  6. منى 7 March 2012

    هلا جوان :)
    نورتي الموقع حبيبة قلبي و شرفتيه و هادا رد كنت مستنيته من زمان ;)

    ممممم معناها سلقتي القرنبيطات لمدة قليلة , المفروض ان القرنبيط يستوي و بنفس الوقت يبقى صلب لحتى ما يطلع هالط , بقى اتوقع انت قللتي من سلقه , هلا ما بقي ادامك غير انو تخليه كمان شوي بالفرن , بس التبلة رح تنشف لهيك زيدي شوي مي مغلية ;)

  7. شكلس 7 March 2012

    ابنك اسمو مروان الله يخليلك ياه يارب انا زوجي اسمو مروان وانا وياه من عاشقين القرنبيط بكل طرقو وهي الطريقة على التجريب فورا اول ما جيب قرنبيط بس منوش شو هي غرام ماسالا ؟؟؟

  8. آرام 8 March 2012

    يسلم إيديك أخت منى .. أنا بحب القرنبيط وعجبتني هالوصفة
    بس ناقصني بهارات الغرام ماسالا .. يا ترى ممكن نستغني عنها ولا بتتغير الطعمة كتير!!

  9. منى 8 March 2012

    ممكن تستعمل الكاري بدالها , انا جربتها مرة فيها و كانت كتير طيبة , الوصفة فوق لخلطة التندوري الاصلي :)

  10. jwan 8 March 2012

    تسلميلي ياست الذوق والله يخليلنياك ياحق
    المهم تسلم ايدك على هالأكلة جد بدون مجاملة هي أحسن طريقة لأكل القرنبيط حتى زوجي الي بعتبرو من أنصر الكلاسيكية ومابحب التجديد أكل منها ونزل فيها ياهالك يامالك ( أحلى شي فيها مافي ريحة قلي الي بتبقى معشقة بالبيت و خاصة المطبخ لأكتر من يوم ) :) :) :)
    المهم ياستي كلامك صح لأني يادوب فورت عليه غلوة وحدة خفت يرتخي القرنيط المهم غطيتو بورق الألمنيوم ورجعت خلطت تبلة من أول وجديد ووزعتها بس نقصت الغرام ماسالا وحطيت بدالو كاري بس أنا متأكدة أنو شغل دياتك أكيد أطيب
    شكرا 

  11. jwan 8 March 2012

    حقك على كل شوي بطلعلك بس مالي غير تحن علي بجواب شافي عندي سؤال :
    ياترى خلطة التندوري هي بتصير لدجاج كمان ؟؟؟

  12. منى 8 March 2012

    عوافي و مية الف هنا و صحة , و انا ممنونة ثقتك في و تجربتك الوصفة و انت رسميا اول مين جربها :zzz

    اي اكيد هي الخلطة بتطلع مع الدجاج رائعة ;)

  13. jwan 10 March 2012

    جد كتير مبسوطة لأني أول من جربها وبيني وبينك الحكي والله العظيم لو أكون شايفة الوصفة في أي مكان تاني أو حدا مجربها غيرك مابظن اني رح أتحمس ساويها بس جد أنا عندي ثقة تكاد تكون شبة عمياء بكل وصفاتك المتميزة صرت اذا بدي فكر بطبخة اليوم بأركد وبفتح لقمة طيبة وأتصفح لوقت مالاقي ضالتي المنشودة حتى زوجي كتير مبسوط وكل ماجرب أكلة جديدة بقولي المقولة الشهيرة ( اتحسن طبخك ياحورية والله يخليلنا لقمة طيبة ) :zzz

    بقى ياست منى من قلبي بقولك شكراً والله يحفظيك لبيتك وعيلتك ويحميك مشاء الله عليك

  14. ghonah 14 March 2012

    السلام عليكم
    كتير طيبة الوصفة و انا اول مرة بسمع فيها بس بجد يمي لزيزة كتير …
    هلأ بعد ما طالعتها من الفرن طالعت مي ليش؟ كيف فيني اتجنب هالشي بالمرة الي جاي
    يسلموا ايديكي شي لزيز فعلا :zzz

  15. فستق و بندق 24 March 2012

    بارك الله بك مبين على الوصفة لذيذة بس اذا امكن حرارة الفرن على كم نضعها ؟ وهل يبقى سائل بالصينية من نخرجها من الفرن
    تسلم ايدك جزاك الله خيرا

  16. منى 5 April 2012

    هلا اختي :)
    بحطها على 180 درجة مئوية و رح يكون في سائل بسيط في الصينية , منغس فيه ;)

  17. منى 5 April 2012

    هلا غنى :)
    صحتين و الف هنا و عافية , مبسوطة انك جربتيها
    ممكن تخلي القرنبيط يصفى اكتر من المي قبل ما تبيله بالخلطة , مو المفروض يطالع مي ابدا ;)

  18. منى 5 April 2012

    هلا جوان :)
    لو تعرفي كلامك هاد اديه بيعطيني ثقة , جد ممنوتك كتيركتير لكلامك و لثقتك في و دعواتك و الله يباركلك بابو الشباب و تبقي دوما بعيونه الملكة ;)

تقييم الوصفة
عاديةقد أحضرهاجيدةممتازةأكثر من رائعة (2 votes, average: 5.00 out of 5)