حلى الغريبة الاستبوليية


         وصفة : منى                 2010/09/23                 35 تعليقات
حلى الغريبة الاستبوليية

دوما أصدقاء المدرسة هنن أحلى رفقة و أحلى ناس ممكن تتعرفي عليهم . أنك تشوفي انسانة ما كل يوم لمدة 6 سنين و أحيانا 12 سنة و تبقوا بعدها رفقة , بغض النظر عن الزلازل الي ممكن تمر فيها أيا علاقة , هادا معناها أن صداقتكم حقيقية و رح تبقى العمر كله .

شو هو الصديق ؟

برأيي هو الشخص الي ممكن أحكيله كل شي عن أيا شي و أنا واثقة و عرفانة أن الكلام الي انحكى رح يبقى هون و ما اسمعه بعد شوي من فلان و علان هادا أولا . تانياً إذا شاف المود عندي فوق أو تحت ما رح يفهمني غلط و رح يعرف ان الصبية ممكن تحكي شي و هي عم تقصد عكسه أو بتحكي بس لتحكي , لتحس أن الشخص الي ادامها معها و انها مو لحالها بوج هل العالم , ما بدها سبب منطقي لتفسير الامور لان المنطق هو أبعد شي عن العالم الي حوالينا و لا بدها حلول , بدها بس تفضفض و لما بدها حل تبقى بدبر راسها أو تطلب المساعدة .

شو ما قسيت الدني بيبقى هون متل شي ثابت بحياتي ممكن ما يكون دوما تحت عيوني بس هو موجود . هلا انا طلعت بهل الدنيا بصديقة واحدة من هل النوع و الي جمعنا شي غريب و قصة تعارفنا أغرب و كان أحلى هدية ممكن تقدملي ياها الصدفة . دوما هدايا الصدفة أحلى شي بيصير معنا في الحياة .

منرجع لأول الحديث , أصدقاء المدرسة من أعز الأصدقاء و الوصفة اليوم لواحدة من أعز رفقاتي بالمدرسة , نور . دقت هل الحلى بأخر مرة اجتمعنا فيها عندها و مع أن أنا دايقتوا كتير قبل بس عندها كان غير . المشكلة بالانواع الي كنت دوقها أن حلوها زيادة و لقمة واحدة أو لقمتين رح ترفع نسبة السكر بدمك لحتى ما تبقي تشوفي بعيونك . عند نور كان مميز , حلاوة على أصولها و نكهة اللوز ما أطيبها . هي هي الوصفة الي بدي ياها . بعد ما عطتني الوصفة اكتشفت السر . كل الوصفات التانية كانت محضرة بكريم الشانتييه البودرة و هادا فيه نسبة حلاوة منيحة و مع حلاوة الغريبة رح تكون النتيجة حلوة كتير . أما نور فحضرتها بالكريم فريش , مممم في شي فيه كريم فريش و ما بيكون طيب ! انا حضرتها على طريقة نور بس ضفت عليها شوكولا لأن نكهة الشوكولا مع نكهة اللوز بيكملوا بعض و بيعطونا حلى مميز كتير بيدوب في التم متل ألذ أيس كريم .

للي ما بيعرفوا شو هي الغريبة الاستبولية هي نوع من الحلويات المشهورة عنا بحلب , بتتحضر ببياض البيض و اللوز المطحون و بتجي على تلات انواع , سادة و محشية باللشوكوا و محشي بهريسة اللوز . لهل الوصفة ما المفروض تشتري أفخر نوع متوفر بالسوق . ايا نوع وسط بيمشي حاله بس المهم ان تكون تازة .

خبرية حلوة , هل الوصفة من أسهل الوصفات الي رح تحضريها , يا دوب عشر دقايق و بتكون بالفريزر جاهزة و بعدها طالعيها و زينيها و قدميها للضيوف الي بتحبيهم و بس .

شكرا كتير نور للوصفة , سلم دياتك و ديات غادة و هالة

بالصحة و الهنا



ليتر كريما سائلة
علبة قشطة أو قمير
1 كيلو غريبة استنبولية سادة
شوكولا على حليب أو شوكولا سوداء حوالي 200 إلى 250 غ أو أكثر حسب الرغبة
لوز مقشور و مجروش ( اختياري )



• تخفق الكريما حتى تنتفخ و تشتد . تضاف علبة القشطة و تخفق ثم تترك جانباً .

• يغلف قالب كبير بنايلون . يفصل جزئيي الغريبة عن بعضهما البعض . تذوب الشوكولا على حمام مائي .

• تصف طبقة من الغريبة في القالب المغلف . تمد طبقة من الكريما فوق الغريبة و يرش اللوز في حال استخدامه ثم تمرر الشوكولا المذوبة على شكل زيكزاك .

• تكرر الطبقات حتى تنتهي الكمية على أن تكون أخر طبقة من الكريما . يوضع القالب في الفرير طول الليل .

• عند التقديم يخرج القالب من الفريزر و ينزع ورق النايلون و توضع في طبق التقديم . تبشر كمية من الشوكولا و تنثر على الوجه ثم يقدم القالب فوراً .


  • وصفات تانية ممكن تعجبك


التعليقات

  1. ام محمد 23 September 2010

    يسلم دياتك يامنى على الوصفة الشهية
    بس للاسف مافي عنا بالسعوديةغريبة استنبولية :roll الشكر الك ولرفقاتك وعن جد يامنى بهل الايام كتير صعب يلاقي الانسان صديق وفي ومخلص
    كلامي ليس تشاؤم بس من واقع اعيش فيه على كل الاحوال تحياتي الك ولغيث وام نور :)

  2. غيث 23 September 2010

    السلام عليك كيفك ميمو والاحباب اللي بالموقع كتير اشتقت لكم كل عام وانتم بالف خير عن رمضان والعيد وكل المناسبات ولو اجت تهنئتي متأخرة بس والله كنت بسورية والكومبيوتر هناك راسو وجعو والنت على اضربين والوقت ضيق برمضان يا دوب شفت ناسي واهلي وعالمي وخلصت الاجازة ما فضيت للنت ابدا وخاصة اني كان صاير لي سنتين ما نزلت اجازة يعني العالم كلها بدها تشوفنا ومشتاقة لنا لذلك اعطيت اجازة للنت والكومبيوتر سافرت اول رمضان وعيدت وصار لي يوم رجعانة واول شي فتت على موقعي الغالي اسفة طولت عليكم وشكرا منى على هالحلى بس للاسف متل ما قالت الاخت الغالية والعزيزة على قلبي ام محمد ما في هنا بالسعودية غريبة وانا قد ما اكلتها بسورية بالضيافات ما خطر لي اجيب منها لاني شبعتها عيد ومناسبات ووو لذلك تؤجل لنزلة سورية وبالنهاية شكرا منى وام محمد العزيزة اللي دوما بتتذكرني بالسلام وبقلها فيك الخير وتسلمي على ذوقك وين انت بالسعودية انا بالرياض

  3. tota2010 23 September 2010

    مرحبا منون زمان على حلوياتك وحكياتك العسل بس احنا كمان ما عنا هاي الغريبة ما بينفع شي بدالها او منقدر نسويها في البيت؟ :?
    انا فكرتها ليدي فنجرز :zzz ما بتزبط فيها؟؟
    وبعدين هاي رح اعتبرها عيدية العيد :roll
    كل عام وانتم بخير وتقبل الله طاعاتكم جميعا :)

  4. tota2010 23 September 2010

    صحيح وشغلة تانية انا وعدتك بوصفات ممكن تنفع لرمضان بس ما قدرت ابعتهم لأني انشغلت كتيييير برمضان وسافرنا بإجازة العيد :zzz
    سامحييييييينا يا أحلى قمررررررر :)

  5. ام محمد 24 September 2010

    حمد لله على سلامتك يا غيث
    انا ساكنة بالخبرياريت لو كنا بنفس البلد
    كتير حابة اتعرف عليكي :)

  6. om nabeel 24 September 2010

    تسلم يمناك اكلة شهية كتير
    وانا بحب هاغريبة كتير

  7. snow whit 24 September 2010

    صباح الخير

    اول ماشفت الصورة قلت بروح اطبق الآن اكيد

    بس في أشياء حبيت استفسر عنها قبل

    الكريمة السائلة ماعرفتك قصدك مثلا كريمة الخفق ؟؟

    الغريبة مااتوقع هنا عندنا يصير اصلح غريبة العادية واستخدمها او اذا تعرفي طريقة الغريبة اللي ذكرتيها تدرجيها :)

    موفقة أختي :zzz

  8. منى 25 September 2010

    هلا ام محمد :)
    الله يسلمك حبيبتي و يخليكي

    بهل الايام صعب نلاقي رفيق منيح و هي مو نظرة تشاؤمية هي الحقيقة للاسف و اذا طلعنا بشخص واحد ثقة منكون محظوظيين :roll

  9. tota2010 25 September 2010

    مرحبا منون اذا ممكن بدي اسألك بدي اشتري خفاقة كهربا للكيك فقلت اسألكم صبايا ايش احسن نوع من تجربتكم وشو بتنصحوني وشو ما بتنصحوني
    ومنونة لو سمحتي ممكن أعرف شو نوع الخفاقة اللي عندك واذا ما فيها غلبة لو صورة صغيرة لأنه نزلت عالسوق والأنواع كتييير وبتحير :x
    وآخر سؤال انه لازم تكون مضاربها سميكة أحسن والا مش مشكلة حتى لو كانوا رفيعين بيخفقوا الكيك منيح؟؟ :?
    وآسفة جدا عالإطالة وشكرا مسبقااااا :)

  10. اماني 25 September 2010

    كل عام وجميع اخواتنا بالموقع بخيراشتقنا لوصفاتك الحلوة يا ست منى وانا كمانن عايشة بالسعودية بس بالمدينة المنورة فبضم صوتي للاخوات غيث و ام محمد انه هون مافي من هي الغريبه بس اكيد بس انزل على حلب رح جيب منها وانشالله باول اجازة لان مبين على الوصفة كتير طيبة ويسلم تمك ياست منى بجد بهل الايام ماعاد تلاقي صديق صدوق واذا لاقيتي بكون من النوادر

  11. نور الأسلام 25 September 2010

    :eek السلام عليكم ياالله يامنى ما احلا منظرها شي بشهي يسلمو اديك كتير كتير شو رايك بس انزل سوريا زورك وتذوقيني ياها :roll الحمدلله على السلامه غيث والله اشتقنا لسوريا كتير

  12. غيث 26 September 2010

    الله يسلمكم يا احلى صبايا بالموقع وبحب اقول لكم كلكم ذوق وجمعتكم احلى جمعة وكلنا مدينين لمنى بهذه اللمة الحلوة والله يديم المحبة والالفة يا رب وانا كتير مشتهية اتعرف على كل اخت بالموقع عن قرب بس الله كريم والدنيا صغيرة ما احد بيعرف ايمتى ربنا بيحقق هالشي وشكرا للجميع وخاصة كل مين سلمت على او سألت عني ومرة تانية كلكم ذوق :)

  13. سانتاريتا 27 September 2010

    تسلم ايديكي بما انو انا راجعة من الاجازة وجايبة معي كيلو غريبة اسطنبولية اكيد بدي اجربها لانها عجبتني كتير كتير كتير تسلم ايدك يامنى
    وفي اخت كانت عم تسال ع احسن نوع خلاطات كاتو انا حابة اعرف كمان لانو ناوية اشتري خفاقة بقاعدة بدل ما اضل ماسكتها بايدي

  14. منى 28 September 2010

    هلا غيوثة :)
    كل عام و انت بالف الف خير و الحمد لله على السلامة , ان شاء الله اتهنيت بسفرتك ؟ طولتي الغيبة عن اهلك , سنتين كاملات :roll
    ايه اكيدة ما رح تفضي للنت و اذا صار و فضيتي رح يبل النت قلبك بسرعته و طولة اتصاله و الصفحات المفتوحة و الي مو محجوبة يعني شغلة تحفة و اثرية و ما بقي منها الا عنا :grin

    يلا ان شاء اله خيرها بغيرها و اذا صحلك ان شاء الله تجربيها ;)

  15. منى 28 September 2010

    هلا ام نبيل :)
    الله يسلمك و يحفظك , نورتينا اختي

    و انا كان بحب الغريبة كتير و خصوصا الي فيها شوكولا و هادا النوع الوحيد الي باكله من الضيافات :zzz

  16. ream 29 September 2010

    مرحبا منى كيفك؟كتير شتقنا لوصفاتك الشهية
    بدي أسئلك عن الكريما الي بتستخدميها واذا ممكن تحطيلنا صورة العلبة-وكمان سؤال تاني ممكن نضيف الجبنة لهل وصفة وشكرا كتير

  17. منى 30 September 2010

    هلا ريم :)
    تشتاق الك العافية اختي :)

    الكريما الي استعملها كل مرة نوع شكل , بس اكتر الشي استعمل الفرنسية الي بيكون مكتوب على علبتها elle . ما جيبها ببقى بحط صورة الها ;)

    لا لا ضيفي الجبنة , لشو , مو ناقصها دسامة :)

  18. منى 30 September 2010

    هلا tota :)
    كل سنة و انت بالف الف خير , عيد سعيد عليك و على كل عيلتك
    مممم , هلا فينا نعملها بالبيت و بتطلع منيحة , بس ما خطرلي جرب هل الوصفة بالغريبة الي عاملتها بالبيت . الليدي فنجرز بتصير اكيد بس بدها شوية سكر مع الكريم و كمان لازم تبليها شوي بالحليب لحتى تطلع طرية :zzz

    أسفة ما نتبهت على سؤالك بردك التاني ,
    الخلاط الي استعمله هو من ماركة بوش بس هو عندي من زمان و هلا في كتير شي احسن و اجدد و لو بدي انصحك رح انصحك بماركة كنوود .
    المهم بايا محضرة رح تشتريها ان تكون استطاعتها قوية و انا افضل ان ما تكون كل القطعة على موتور واحد , لا قدر الله انتزع الموتور بتروح كل القطع على الكب

    المفروض ان الخفاقة يكون فيها اكتر من مضرب , لا لازم ما يكون المضرب الي رح استعمله للكيك رقيق و الا رح ياخد وقت طويل لحتى يصير البيض متل ما بدي :)
    يلا عم استنى وصفات طيبة منك ;)

  19. منى 30 September 2010

    هلا سنو وايت :)
    الكريما السائلة هي كريمة الخفق نفسها الي تصير كريما لمن نخفقها
    ما يصير الغريبة العادية , اذا رب العالمين يسر ببقى بنزل طريقة الغريبة الاستنبولية :)

    مية ها فيك اختي

  20. منى 30 September 2010

    هلا اماني :)
    و انت بالف الف خير حبيبتي , ان شاء الله بس تامني الغريبة تجربيهم ;)

    صج اماني , صعب صعب صعب نلاقي , هي شغلة بدها شغل من الطرفيين لحتى يوصلوا بالعلاقة لمستوى حلو , الله يجعل ايامنا كلها خير و صدق و محبة

  21. منى 30 September 2010

    هلا نور :)
    مو تكرم عيونك , انت وصلي و انا بحضرلك اطيب قالب

    كل سنة و انت بالف الف خير :zzz

  22. منى 30 September 2010

    هلا سانتارينا :)
    ان شاء اله تجربيها و تطلع مستاهلة و على زووءك

    انا خفاقتي من نوعية بوش , منيحة , بس الها عندي زمان و هلا كتير في اشيا احدث , بقى ما فيني انصحك بنوع معين :roll

  23. tota2010 1 October 2010

    شكرا كتير حبيبتي عالنصيحة بس هي خفاقة بوش اللي بتحكي عنها اللي بتيجي مع الهراسة (الخلاط العامودي) اللي حاطة صورتهم مع بعض في تحضير القشطة ولا انا غلطانة يعني مش نفسها؟ :?
    تاني شي بدي احكيلك انه ماركة بوش من الماركات المنيحة لأني لما رحت محل ادوات الكهربا وسألت صاحب المحل عن احسن نوعيات حكالي بوش وكينوود وما بعرف كمان نوعية شو اسمها :x
    بس المشكلة التانية انه لكل نوع اكتر من موديل وكلهم بحيروا وهيك ضعت فيهم :cry
    شي تاني لما شفت المضارب شي رفيع وشي سميك سألته حكالي ما بتفرق مع انه النوعية الغالية كانت مضاربها ارفع وانتي هيك خوفتيني :eek
    معلش منون بعرف طولت كتيييير عليكي ودوختك بأسئلتي :upset
    بس انا كتييير محتارة وخايفة اشتري شي واندم عليه :sigh
    واخر شي ياعمري اذا ما فيها غلبة تجاوبيني ع كل الاستفسارات وبكون بجد ممنونة منك كتيييير :)

  24. رنا 3 October 2010

    كتيييييييييييييييير طيبة بس مافي هون غريبة استانبولية للاسف
    دائما منى مبدعة يسلمو ايديكي انتي وصديقاتك والله يديم صداقتكم :p

  25. منى 3 October 2010

    شكرا رنونة :) من زووءك يا قمر ;)

  26. منى 3 October 2010

    هلا توتا :)
    لا هي غير شي , هي لوحد و التاية لوحد

    شوفي انتي حددي شو بدك , مثلا ارتحتي لماركة فلان , حددي ميزانيتك , بعدها دوري على هل الاساس و الخيارات رح تخف , و انا أنحكك ان تكون القطعة تقيلة , ان الغالي هون سعره فيه و هي رح تروح معك عمر ان شاء الله ;)

    هلا كل خفاقة رح يجي معها اتر من شكل مضارب , شي للعجين و شي للبيض , لهيك في مضارب رفيعة و مضارب أتخن و مضارب فيها أسلاك أكتر

    انت خدي وقتك و دوري بالنت على مهلك و اسالي رفقاتك و أكتر من بياع لحتى ترتاحي لواحدة معينة

    ايا سؤال تاني من عيوني :zzz

  27. tota2010 4 October 2010

    الله يخليلي اياك يا احلى منوش في الدنياوالله انا ما الي غنى عنك :)
    يعني انا ما خليت منتدى ولا موقع الا وبحبشت فيه بس كلهم بيقولوا كينوود الكبيرة زي اللي عند منال بس قلت حرام لأنه صراحة انا عندي كينوود فود بروسيسر ستيل تقيلة وفيها كل شي حتى كمان مضرب بيض بس كتير رفيع ما بينفع لاكتر من هيك ورحت اشتري هراسة (خلاط عامودي) عجبني موديل مولينكس كان عند اهلي بيجي العمود ستيل بينفع للساخن وبآخره جلد او مطاط عشان ما تجرح التيفال ومعاها خفاقة ومطحنة صغيرة وبما انه خفاقتها ما بتنفع فانا رح اشتري الآلتين انشالله :upset
    شو رأيك وعنجد آسفة عم بتعبك بس أنا كان نفسي بالكبيرة عشان معها عجانة بس قلت عندي اللي بيغني وبنفس الوقت الباقي اسهل بالضب مزبوط يا عسل؟ :zzz
    أبوووووس روحو انا :roll

  28. tala11 8 November 2010

    ماشالله حولك يا منى انت متل الزبدية الصيني من وين مادقيناك بترني يعني هالحلى بجنن واكيد طعمتو بتجنن
    بس الغريبة الاستنبولية ما في عنا منا
    مافي طريقة لحتى نعملا بالبيت!!!!!! :sigh

  29. منى 8 November 2010

    هلا تالا :)
    من زووءك اختي , الله يديم المعروف دوما

    هلا فينا نعملها بالبيت و يا ريت لو يصحلي نزلها للوصفة قريب :roll صار وعدت فيها اكتر من اخت و ما عم ااقدر نزلها

  30. منى 8 November 2010

    هلا توتا:)
    معك حق , شغلة بتطوش ة بتحير :roll

    شوفي انتي ادرى بالشي الي بيلزمك بس الكينوود الكبيرة بدها عيلة كبيرة و حتى بالنسبة الي و شغلي شفتها كتيرة , ما عدى شغلى المحل الكبير الي بدها تشغله , ما بعرف انا عني ما كتير ارتحتلها مع انها كانت عاجبتني كتير

    موفقة ان شاء الله

  31. رغد غسان علاء الدين 31 January 2011

    منى حبيبتي..شو هي الكريما السائلة؟؟ وبالنسبة للشوكولا السودة انا ما بحبها..لأنو مرّة..إنو شو؟؟ فينا نستبدلها بشي تاني.,,ولما قلتي نصف الغريبة بالقالب..نصفها عالجوانب صح؟؟

  32. imabeer77 22 September 2011

    السلام عليكم اختنا الغالية منى
    اسالك بالله اذا تقدري تحكيلنا مقادير وطريقة مزبوطة للهريسة انا جربت البسبوسة الي في الموقع وما زبطت معي
    الله يجزيك كل خير :cry

  33. منى 23 September 2011

    تكرم عيونك حبيبتي رح حط طريقتي بالهريسة و ان شاء الله بتكون على زووءك :)

  34. imabeer77 24 September 2011

    ان شاء الله يا منى ينكتب الك بتعبك في الموقع أجرين:أجر “العلم الذي ينتفع به” وأجر” الصدقة الجارية” عن كل من قرأ وانتفع واستفاد تذكري يا غالية انك تجددي النية.. والله لا يضيع أجر المحسنين.

  35. منى 24 September 2011

    امين يا اختي :)
    بتعرفي ردك متل النسمة الباردة بالحر , الله يجزيك الخير ;)

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)