حمص بالطماطم المجففة


         وصفة : منى                 2011/02/17                 9 تعليقات
حمص بالطماطم المجففة

خبرتكم قبل أن كتب الطبخ و الوصفات ببتمشى لعندي و بتجي لباب بيتي من دون عذاب أو حتى بحث و تدوير , لما بمسك كتاب طبخ و بحس ان فيه عاطفة و حب بحس فورا ان وصفاته رح تطلع معي طيبة شو ما كانت نوعيته .


هلا عم احكي هل الحكي بعد ما وصلتني نسخة عن مجلة فتافيت عدد رمضان الي مر من حبيبة قلبي و مصدر كتبي الاكبر ضحى . و مع ان مو من عادتي ان أقرا كلمة الناشر , بس هل المرة قراتها و هي للسيد يوسف الديب , بس بديت قراءة السطور , سطر ورا سطر , عرفت ان قناة متل فتافيت لازم يكون وراها شخص متل يوسف الديب , حب و شغف و تقدير . عن جد جاي على بالي اكتب كل المقدمة هون لحتى تستمتعوا بقرائتها متل ما استمتعت انا . رح اقتبس من المقدمة و قول ” و لو كان هنالك زراً في لوحة مفاتيحي للتصفيق لكنت ضغطت عليه الان ” برافو لقناة فتافيت هل التميز برافو ان قدمت الطبخ لستات البيوت على انه متعة مو على انه واجب .برافو لان بجد خليتي كل ست بيت تستمتع و هي عم تحضر وجبة لعيلتها أو لضيوفها . شكرا كمان لان فتحت مجال للشيفات العرب يأثبتوا تميزهم و أهميتهم متلهن متل بقية شيفات العالم .

العدد مميز و حلو و فيه افكار مهمة بتغني ايا ست بيت لو كانت مبتدئة أو متمرسة و على اعتباري من اشد المعجبين بالحمص كانت أول وصفة جربتها هي بالحمص , ما بعرف لايا شيف على التحديد بس الي بعرفه انها طيبة كتير كتير و لونها بيشهي و طعمتها و لا أطيب .


الوصفة الأصلية ما فيها طحينة و انا جربتها بطحينة و من دونها و بالطريقتين الوصفة مميزة و سهلة و كمان جربت ضيف شوية لبن و طلعت يممممم . المميز بالوصفة هو اضافة الثوم المشوي مع الطماطم المجففة و هادا برأي سر الوصفة و الي خلاها مميزة و غير عن بقية الوصفات . أخر الشي المقادير و الطريقة الموجودة في وصفتي هي غير مقادير فتافيت , انا لطشت الفكرة من المجلةو عدلت بقية الوصفة , استعملت حمص حب و على هل الاساس كملت لحتى طلعت طعمتها متل ما بحب و كمان كتبتها بالتفصيل الممل لحتى اذا واحدة حبت تجربها تلاقي جواب لكل سؤال بيخطر على بالها



شكرا فتافيت





كوب حمص مجفف
4 – 5 شريحة طماطم مجففة محفوظة بالزيت , ترفع من الزيت و تفرم
راس ثوم
2 – 3 ملعقة كبيرة عصير ليمون
2 – 3 ملعقة كبيرة زيت زيتون
2 ملعقة كبيرة لبن ( اختياري )
ملعقة صغيرة طحينة
ربع ملعقة صغيرة كمون





1 - ينقع الحمص بالماء البارد و الملح لمدة 12 ساعة . في اليوم التالي يغسل و يغمر بالماء البارد و يوضع على نار متوسطة , بعد أن يغلي ترفع الرغوة البيضاء و تضاف نصف ملعقة صغيرة كربونات الصوديم و تهدى النار و يغطى القدر و يترك حتى ينضج تماماً و تظهر قشور الحمص على الوجه يصفى و يترك حتى يبرد , لتسهيل الوصفة يمكن استعمال عبوات الحمص الجاهزة .
2 - يحمى الفرن على درجة حرارة 150 درجة مئوية . تبعد فصوص الثوم عن بعضها البعض من دون أن تقشر . توضع في طبق صغير و ترش بالملح و الفلفل و القليل من زيت الزيتون ثم تخبز في الفرن لمدة 20 دقيقة أو حتى يتحمص القشر و تطرى الفصوص . يقلب الثوم مرتان او ثلاثة أثناء الشوي . يترك الثوم حتى يبرد ثم يضغط كل فص بلطف لإخراج لبه .
3 – توضع كل المقادير في محضرة الطعام و تمزج حتى الحصول على مزيج كريمي ناعم و يضاف القليل من مرق سلق الحمص إذا دعت الحاجة .
4 – يزين بالمزيد من حبات الحمص أو البقدونس المفروم و يقدم مع الخبز الساخن .

التعليقات

  1. lma1986 17 February 2011

    تسلم ايدك هالاكلة بتزكرني بامي كتير طيبة

  2. أم نوران 17 February 2011

    ماشاء الله اكلة كتييير طيبة و ما قصرتي لما كتبتي كل التفاصيل لحتى ما نصرعك بالاسئلة يا خيتو شو بدنا نعمل انتي حبابة و كريمة و نحنا كماعين ما صدقنا :grin
    يعني و الله قد ما دعينالك ما بتكفي و لا بتوفي وصفاتك بتبيض الوج و ما في وصفة جربتا من عندك وما زبطت معي ماشاء الله ,من كاتويات و طبخات و سلطات الله يعطيكي العافية ويخليلك و لادك و جوزك و يبعتلكن ايام كويسة … ;)

  3. ream 18 February 2011

    يمممممي شو شكلها بشهي
    وصفة كتير مميزة وغير شكل عن الحمص العادي أنا رح جرب أعملها بالبندورة الي جففتها بس طلعت مالحة معي-لذلك رح جرب هل وصفة بكمية بندورة أقل -تسلم ايديكي

  4. آرام 19 February 2011

    مرحبا أخت منى
    ألف شكر إلك للوصفة الجديدة، والرائعة بالتأكيد متل كل وصفات لقمة طيبة. رح جربها بأقرب وقت ممكن لأن حالياً مو باقي عندي بندورة مجففة للأسف، جربت مرة أشتريها جاهزة من المول بس ما عجبتني.

  5. ream 19 February 2011

    اليوم حضرته وتغير شكل عن الحمص بطحينة وطيب تسلم ايديكي

  6. منى 22 February 2011

    الله يسلم امال :) مية هلا فيك

  7. منى 22 February 2011

    هلا ام نوران :)
    شو تصرعوا راسي , دا ردودكم هي الي بتنعنش الموقع و الله :zzz

    ابوس روحك على هل الدعوات الكريمة من اخت كريمة , الله يخليك انت كمان و تبقي بصحة و عافية و خير انت و كل عيلتك , فردا فردا و الله يرزقلك ابو الشباب رزق طيب و حلال و كله بركة

  8. منى 22 February 2011

    هلا ريم :)
    الف الف صحة و هنا و عافية و متل ما قلتي هي غير الحمص العادي , الحمد لله انها عجبتك , هنا

  9. منى 22 February 2011

    هلا اخي ارام :)
    ان شاء الله تجربها و تعجبك و بصراحة انا متلك ما عجبتني ابدا الموجودة هون , بس اذا في حدا طالع على تركيا ممكن توصيه لان عم تجي منيحة كتير و طيبة و لونها بيشهي

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)