دجاج كريم بريمافيرا


         وصفة : منى                 2008/08/12                 24 تعليقات
دجاج كريم بريمافيرا




2 صدر دجاج مخلى من الجلد و العظم
ملعقة كبيرة خل
ملعقة كبيرة زبدة
3 – 4 ملعقة كبيرة زيت زيتون
نصف ملعقة صغيرة فلفل أبيض
حبة كبيرة بصل
2 فص كبير ثوم
حبة متوسطة فليلفة حمراء
حبة متوسطة فليلفة خضراء
حبة متوسطة باذنجان
حبة متوسطة كوسا
نصف كوب بازلاء خضراء أو مثلجة
نصف كوب فطر
4 – 5 ورقة حبق أو القليل من الحبق الجاف
كوب و نصف مرق
كوب كريم سائل

• يقطع الدجاج لعيدان ثم ينقع بالخل حتى تحضير بقية الخضار .

• يفرم البصل لجوانح و يفرم الثوم أو يهرس , تقطع بقية الخضار لعيدان طويلة و يستخدم الباذنجان من دون تقشير .

• تقلب جميع الخضار بزيت الزيتون على نار متوسطة لمدة 8 – 10 دقائق ثم ترفع جانباً.

• في نفس المقلاة تذوب الزبدة ثم تضاف عيدان الدجاج و الفلفل الابيض تقلب على نار قوية حتى تصبح ذهبية من الطرفيين .

• يضاف المرق و الحبق المفروم و يغطى القدر و يترك ليغلي لمدة 10 دقائق ثم تضاف الخضار و تترك لتغلي خمس دقائق أخرى .

• أخيرا يضاف الكريم و تهدى النار و يغلى لبضع دقائق أخرى ثم تقدم مع الفيتوتشيني و يمكن أن يرش الوجه بالجبنة البارمزان و المزيد من الحبق .

أفكار و تنويعات :

• يمكن أن يستبدل الكريم بكوبان من عصير البندورة المصفاة , يضاف العصير مع المرق و تتابع الوصفة كالسابق .

• إذا بقي القليل من الوصفة ليوم التالي , يمكن أن تستخدم كحشوة لفطيرة تعد بالباف باستري , تمد العجينة على القالب ثم تغطى بالبريمافيرا و بعدها ترش الجبنة و أخيرا تمد طبقة ثانية من الباف باستري و يدهن الوجه بالبيض و تخبز حتى تنضج العجينة و تحمر .

• و أخر فكرة أن هذا الطبق يمكن تحضيره بباقي الدجاج المشوي من يوم سابق .
  • وصفات تانية ممكن تعجبك


التعليقات

  1. رندوش 14 August 2008

    مشكوره منى عزيزتي
    فعلا طبق ربيعي شهي تسلمي يا رب

  2. منى 14 August 2008

    هلا رندوشة يا قمر :)
    كلك زووء حبيبتي و الشكر ليك على الطلة الحلوة الي بتنوري فيها

  3. أم الهدى 23 September 2008

    تسلم دياتك منونة طبق بيشهي بس عندي سؤال هلق في فرق بين الحبق والريحان ولا نفس الشي واذا في فرق فيا ريت من بعد أمرك تقوليلي كيف أميز بينهموبالنسبة للكريما مو هي كريما الخفق
    وشكرا كتير الك حبيبتي وتقبل الله صيامك وطاعتك

  4. منى 23 September 2008

    مية هلا أم هدى بعد زمان القمر الحلو ما بان :) كل سنة و انت بخير و سلامة.

    الحبق هو الريحان ما في فرق بينهم و الكريما هي الكريما فريش , مية هلا و لا بقى تغيبي عنا كتير يا جميل ;)

  5. أم الهدى 24 September 2008

    تسلم دياتك على هالطبق البارحة جربتو كتير طيب عنجد روعة واستعملت ويبينق كريم ، بس في شغلة انت ما ذكرت شو هي البهارات يلي منضيفها أنا ضفت كاري وزنجبيل وبهار مشكل وفي شغلة هلق الطبق بطلع منو مرق ولا بس شوية صوص لأنو طلع معي شوية مرق فاستعملت معكرونة فتوشيني سلقتها نص سلق وأضفتها بعدين للدجاج لتكمل استوائها وتشربت المرق
    كتير لذيذة
    وشكرا كتير على ذوقك ولطفك كلك ذوق

  6. منى 24 September 2008

    هناا و عوافي يا حق:) هي ما بدها صوص كتير بس اذا بتحبي تكتري الصوص على كيفك ;) و البهارات بيكفي البهار المشكل مع الحبق و اضافاتك كمان لذيذة كتيير ;)

    اضافة الفتوتشيني بالطريقة الي قلتيها اكيد خلتها بتجنن , هنا يا حق و الشكر الك لتجربتك وصفاتي ;)

  7. سارونات 7 October 2008

    السلام عليكم و رحمة الله و بركاته
    جازاك الله خيرا اختي منى وصفة مميزة و فيها دجاج و خضار يعني كاملة مكملة
    اختي منى هي ما بتتقدم لحالها مو هيك يعني لازمها معكرونة
    كتير فرحت لما قلتي فينانستبدل الكريم بعصيرالبندورة المصفاة و ان شاء الله بساويها بهالطريقة بس هيك ما راح يطلع هاللون الجميل بقى فينا نستبدل الكريم بحليب و كم الكمية
    بالتوفيق
    سلام

  8. منى 8 October 2008

    فيك تقدميها مع فيتوتشيني و هيك بيصير طبق ايطالي مية على مية و فيك تقدميها مع رز و هيك بيصير ااقرب على زوءنا العربي ;) و انا بجبه بالكريم أكتر و ممكن تستعملي حليب , دوبي ملعقة صغيرة نشاء بكاسة حليب و أضيفيها للصوص عوض الكريما بس حركي بسرعة لحتى ما تتكتل , برايي اطيب من صوص البندورة ;)

  9. سارونات 10 October 2008

    ألسلام عليكم و رحمة الله و بركاته
    كتير حلو هيك لكان ان شاء الله بجربا بالحليب و مرة تانية بصوص البندورة
    بدجي استوضح شي اختي منى شو قصدك بصدر الدجاجة يعني الصدر كله او نصف الصدر اللي يقدم للفرد كحصة من الاكل بعرف سؤال غريب :x بس حبيت اتأكد
    بالتوفيق
    سلام

  10. سارونات 12 October 2008

    السلام عليكم و رحمة الله و بركاته
    بعرف سؤال غريب اختي منى شكلك صرتي هيك لما قريتيه :upset :x :eek بعد ما تفوقي من الصدمة انا ناطرتك :zzz
    بالتوفيق
    سلام

  11. منى 13 October 2008

    :grin هلا أختي , بقصد فيه نصف الصدر الكبير الكامل , الدجاجة الها صدران هنن الي رح يلزمونا للوصفة ;)

  12. سارونات 15 October 2008

    السلام عليكم و رحمة الله و بركاته
    تسلملي هالضحكة اختي منى ان شاء الله دايما شكرا كتير على التوضيح انا قطعت الدجاج لعيدان و حطيتي بالفريزر لوقت تطبيق الوصفة
    لساتني عم فكر ازا بساويها مع رز مفلفل او معكرونة فيتوتشيني مع اني مايلة اكتر للفيتوتشيني مشان يكون الطبق ايطالي مئة بالمئةو راح ساوي متل الاخت ام هدى ازا طلعت الصلصة كتير بس ازا ما طلعت كتير كيف بساوي المعكرونة و شو بضيفلها بدي اعرف طريقتك ازا ممكن
    بالتوفيق
    سلام

  13. منى 16 October 2008

    اختي انا ما بغير شي بالوصفة متل ما هي و بقدمها مع رز أو معكرونة و الصوص بيكفي لتغليف المعكرونة , إذا حابة تزيي الصوص اكتر ممكن تزيدي كمية الكريم , بس شو انا متاكدة هل الفكرة ما رح تعجبك :eek

  14. سارونات 19 October 2008

    السلام عليكم و رحمة الله و بركاته
    اختي منى ما تواخزيني عندي سؤال كمان بتعرفي اسئلتي المزعجة اللي بتطلعلي كل ما اقرا الوصفة بيطلع سؤال جديد قلتي انك بتقدميها مع رز بس ما قلتي رز مفلفل لهيك خطر على بالي انك يمكن ساويتي للرز متل ما ساوت اختي ام الهدى للفيتوتشيني مع ان للرز بعتقد كمية الصوص ما راح تكفي و كمان لو كان هيك كنت ذكرتي خطوة اضافة الرز بعرف اني عم اسأل و عم جاوب بنفس الوقت بس حبيت اتأكد منك مشان كون مطمنة
    ربنا يوفقك و يسهل دربك اختي
    بالتوفيق
    سلام

  15. منى 21 October 2008

    هلا اختي , الرز مفلفل عادي متل العادة بتقدميه بجنبه

  16. نوارة 16 September 2009

    ياي يا ميمو كتير كتير طيبة اناكنت اعملها بغير صوص(ماء وطحين و صويا) بس ما كنت احبها كتير
    هادا الصوص بجنن

  17. منى 16 September 2009

    هناااا و الف الف عافية نوارة , يا ستي الايتاليانو غير شكل ;)

  18. dentamaniac 7 October 2009

    تسلم الايادي يا منى
    انا عملتها مبارح و طلعت رووووووووووووووووعه
    زوجي (اللي ما بيعجبه العجب) عجبته كتير و قالي بتشبه كتير اللي بيقدمها مطعمه المفضل

    8)

  19. منى 7 October 2009

    هلا دكتورتنا الحلوة :)
    هادا ابو الشباب عندك متل ابو الشباب عندي الهيئة , بقى الحمد لله انها عجبته و الف صحة و هنا على البك و البه يا رب :zzz

  20. راشا 20 December 2009

    مرحبا يا جماعة.. مرحبا منى… الله يعطيكي العافية على هالموقع اللي بيفتح النفس.. بصراحة من زمان بتابع هالغروب بس اليوم حبيت اشترك فيه وهي أول مرة بكتب تعليق.. وبعدين أنا اسمي رشا مو راشا بس المشكلة انو اسم المستخدم مأخدود مشان هيك اضطريت على هالاسم..
    بالنسبة لهالاكلة اليوم عملتا وطلعت كتير طيبة وكلن حبوها.. بس المشكلة انو أنا ما كتير عم بتحمل طعمة كريمة الطبخ التقيلة.. يعني عم حب ضيفا بس كتييير دسمة.. شلون الواحد بيقدر يخففا يعني يخفف من طعما الدسم بالاكل؟ مشكورة اخت منى :)

  21. منى 21 December 2009

    هلا رشا :) نورتي اختي و شرفتي

    اختي ممكن تستبدلي الكريما بمزيج من الحليب مع ملعقة صغيرة كورن فلاور, هلا النكهة مو نفسها اكيد , بس طيبة و اخف
    ;)

  22. آرام 9 October 2011

    مرحبا أخت منى،
    حابب جرب هالوصفة وعندي كل مكوناتها، بس مذكور بطريقة التحضير (يضاف المرق والبهارات) وبالمكونات ما في أي بهارات! شو البهارات اللازمة للوصفة؟

  23. منى 9 October 2011

    شكرا كتير لان بتقرا الوصفات و بتنبهني للي بيسقط سهوا

    انا بس استعمل الفلفل الابيض و عم ضيفه صايرة مع الدجاج وقت بقليه , هلا بعدل الوصفة , شكرا للتنبيه :)

  24. آرام 9 October 2011

    والله توقعت هيك .. قلت لحالي دجاج وكريما بدهم فلفل أبيض .. فما حطيت غيره .. وخلصت الطبخة وشبعت من ساعتين 8)
    لذيذة كتير هالوصفة، بس غشيت فيها شوي، ما حطيت حبة كوسا وحطيت بدالها حبتين بانجان :)

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)