اخت منى انابدي جائزة ما ضل حدا بعرفو وبيحكي عربي الا عطيتو اسم الموقع وشوقتو يفوت يسجل الكل عجبون وفي اخت قالتلي من وين طلعتي بهالموقع تحفة :grin

الله يبارك فيكي وينعاد عليكي وعالاخوات بالخير با رب انا معكون كل يوم بفتح بس لا شوف شو منزلتيلنا وصفات مميزة بس بسبب ضيق الوقت وولادي كانو مرضى فما في مجال اكتب بس بالبال دايما وانا عم امزح ما بدي جائزة ولا شي اصلا لازم نحن نعطيكي جائزة بيكفي عم نعزبك ونطلب وتعطينا من وقتك يا عسل :grin

ايه الجمال ده والله روعه روعه

ماشاء الله عليكى تسلم ايدك

السلام عليكم و رحمة الله و بركاته
:zzz :grin :cry :cry هاي حلتي لما شفت الوصفة هاي هي الوصفة اللي عم دور عليها و فرحت كتير فيها بس هلأ انا ما عرفت ازا قصدك على لحم غنم او بقر او الاثنين بينفعو و انا شفت الوصفة من قبل بالتلفزيون بس ما اعرتها انتباهي لان ما كان وارد اني ساويها ومن شوي كنت عم دور بالنت على الروستو و اللي لقيتو هو roast beef و دورت على roast lamb و لقتيها موجودة و كمان لقيت انو ممكن استعمال Entrecôte و هذا تعريفو في ويكيبيديا
http://en.wikipedia.org/wiki/Entrec%C3%B4te
اذا ال entrecote اللي بالخروف بينفع يعني خلصت المشكلة لاني بعرفو
انا عم استوضح الامر لاني بدي استعمل لحم كبش العيد للوصفة ازا ممكن
بعرف تعبتك معي اختي منى و ازا زتيتيني من الشباك بهاللحظة ما حدا راح يلومك :cry بس انطري شوي تحتى اكتب وصيتي
و هالوصفة بدا صور توضيحية للي اول مرة بيساووها متلي و انا عم دور على صور بس ازا فيكي وقتا تساويها بالمستقبل تحطي صور توضيحية بيكون كتير منيح
بالتوفيق
سلام

السلام عليكم و رحمة الله وبركاته
:grin يخليلي ياكي اختي منى
طيب لكان اجلنا الوصفة حتى تتضح الرؤية و اعرف اي جزء ينفع للروستو و ان شاء الله لما تساوي هالوصفة بالمستقبل بدي ياكي تعمليليها فوتوسيشن كاملة من الاول للاخر و تصوري القطعة و هي نية تحتى نتعرف عليها :grin لانها شخصية مهمة
طيب بدي اسال عن قطعة الستيك اللي بتنعمل مع المشروم و بينحط عليه مرق تحتى يتكون gravy و بتحطيه بالاخير مع شرائح المشروم و الغريفي فوقهااز بتعرفيها يا ريت تقوليلي و كمان اي طرق تانية لتقديم شرائح اللحم راح كون كتير ممنونة لان امالي كانت معلقة على الروستو:cry
اختي منى شو رايك متل ما ساويتي برمضان جزء للاطباق اللي بتقترحيها لرمضان تساوي نفس الشي للعيد :zzz و هيك اللي بيدور عوصفات للعيد بيلاقيها بسهولة شو قلتي
بالتوفيق
سلام

السلام عليكم و رحمة الله و بركاته
يخليلي ياكي اختي منى و ربنا يجازيك كل خير
و ناطرة وصفاتك المميزة سواء قبل العيد او بعده
بالتوفيق
سلام

السلام عليكم و رحمة الله و بركاته
بتعرفي اختي منى مرات سارونات من كتر ما بتكون متحمسة للوصفة بتقرا الاشياء و كانها ما قرتهم
الله يهديني انت كاتبة بالرد انو هاللحم من الفخذ و انا قريت الرد من قبل و مع هيك ما بعرف كيف سالتك اذا هو نفسه entrecote اللي هو اللحم اللي بين الضلوع بدي قتلة على هالعملة
المهم اذا فيكي بدي بس توصفيهولي كيف بيكون بعرف عم تقل عليك بس دورت على صور و ما لقيت و انا مصرة ساويه من لحم خروف العيد :sigh و راح ظلني حاول لاقيه و ساويه حتى اخر فرصة
بالتوفيق
سلام

السلام عليكم و رحمة الله و بركاته
يخليلي ياكي اختي منى
انا قصدي بالوصف هو توصفيلي القطعة اللي منستخدمها للروستو يعني بتكون سميكة كتير او متوسطة
و هي بتنلف عبعضها و بعدين نلفها بالخيط متل فخذ الخروف الكامل اوهي قطعة مو عريضة و ما بتنلف عبعضها و انما فقط يلف الخيط عليها
ما بعرف اذا فهمتي علي اختي منى او لا

السلام عليكم و رحمة الله و بركاته
يخليلي ياكي اختي منى نعم وضحت الفكرة
ربنا يجازيك الجنة ان شاء الله
و كتير فرحت لان راح تساويه بهالشهر ان شاء الله و ناطرة صور الوصفة على احر من الجمر
ربنا يوفقك و يسهل دربك
سلام

السلام عليكم و رحمة الله و بركاته
:cry :cry :cry :cry اختي منى اللي صار ما كان لا عالبال و لا عالخاطر بعد ما فرحت كتير لان عرفت شكلو و كل شي و راحو لعند اللحام تحتى يقط الفخذ و يعطينا الروستو و انا عم حظر حالي عاساس راح ساويه بس شو جابولي معاهم يا حسرتي جابوه متبل و ملفوف و مو هيك بس الا كمان ملفوف بما بعرف شو لية الخروف اسمها او شحم الخروف المهم شي ابيض و لو تشوفي حالتي انصدمت :eek يعني بعد كل هالحماس و الانتظار هيك يصير و الله ما عم بعرف شو ساوي يعني هلا انا اما الامر الواقع و صحيت على كابوس و هلأ ماعم بعرف شو بدي ساوي
دورت بالنت عوصفة تكون ملفوفة باللية او الشحم بس ما لقيت
اللحام قال حطوها بطنجرة و غطوها بالماء و خلوها تغلي و تغلي و بعدين صفوها من الماء و حطوها بصينية بالفرن و كل شوي حطولها من المرقة اللي صفيتوها حتى تنضج
ما بعرف ما حسيتو منطقي اني حطها و اغمرها بالمي عطول من دون تشويح او شي و بنفس الوقت ما بعتقد بينفع تتشوح لانها مغلفة باللية او الشحم )) اختي منى اللية بيكوةنها لونها ابيض بيشبه الشحم مو هيك ))
المهم هلأ بدي ياكي اختي منى تساعديني تأعرف كيف اطبخه لهالروستو و كمان الاخوات اللي معنا بالموقع اذا مجربينها لهالطريقة ان شاء الله تدخلي بسرعة اختي منى و تلحقيني قبل ما ساويها
ناطرتكم
بالتوفيق
سلام

سلامات منى
هل المقابل الإنكليزي لهذه الوصفة هو
Roasted Beef
وهل أستطيع تحضير شرحات الدجاج بنفس الطريقة أم هناك طريقة مختلفة لتحضير ال:
Roasted Chicken
وشكراً سلفاً

السلام عليكم و رحمة الله و بركاته
اختي منى ما حكيتلك اللي صار المرة الماضية الحمد لله مرت على خير و اللي انقذني هو الغريفي و لولاه يمكن كانت انتزع كل شي لان عطى للوصفة برستيج خصوصا اني اضطريت اقطعها مباشرة و ما طلع الشكل كتير حلو لان كان العرق مفتوح من النص و محشي المهم الحمد لله الغريفي خلا الوصفة ناحجة جدا و جميلة و لذيذة دعيتلك و عطول عم بدعيلك و ان شاء الله ربنا يستجيب لدعائي
هلأ اناجابولي عرق روستو لحم بقري بوزن 1 كيلو و ضروري ساويه بكرا مشان بعد بكرا
هالمرة راح ساويه على طريقتك لهيك محتاجة اسألك عن اشياء ضروري و راح اكتب الاسئلة بالرد الجاي

السلام عليكم و رحمة الله و بركاته
شو قلتني اختي منى بعرف عم عذبك معي انا بعد 3 ساعات و نصف ان شاء الله راح ساويه ان شاء الله تلحقي علي قبل ما ساويه و حتى لو ما لحقتي اكتبيلي الاجوبة لان راح احتاجهم للمرات الجاية
اناراح اتوكل على الله و ساويه و الله يستر
بالتوفيق
سلام

السلام عليكم و رحمة الله و بركاته

الحمدلله لحقتي عليي قبل ما ساويه و قريت الاجوبة ربنا ينولك كل اللي في بالك و تكون الجنة دارك و دار كل مؤمن يا رب
الجزر كمان قطعتو متل ما قلتي يعني 4 سم
اللحم هلأ بالفرن و ايدي على قلبي
المهم بدي اسالك لما بحطو بالفرن الماء المغلي بصبو فوقو او بحطو بس بالصينية و كمان نفس الشي لما ضيف الماء ضيفو فوق اللحم تحتى يتشرب اللحم الماء او بس بالصينية
سلام

السلام عليكم و رحمة الله و بركاته
رجعت مرة تانية :grin
اختي منى انا ما حطيت الملح متل ما قلتي ما بعرف هيك صح او الملح سقط سهوا و ما كتبتيه يعني امتى منحطو
وهلا بما اني ما حطيتو فهل برش الشرائح بالملح قبل ما سخنها في الغريفي او ما بضيف ملح ابدا و بكتفي بالغريفي
بالتوفيق
سلام

السلام عليكم و رحمة الله و بركاته
:cry :cry :cry لا حول و لا قوة الا بالله كل مرة بقول بدا تضبط بيصير شي
بعد ما نضج اللحم و طالعتو من الفرن و حطيتو تحتى يبرد شوي مشان حطو بالبراد شو اكتشفت القطعة مو قطعة و مفلفوفة عطول و انما قطعة طويلة و ملفوفة انا ما بين معي هالشي لان جابوها ملفوفة بالخيط بس و ما فيها شي تاني و انا ساويت كل شي متل ما قلتي يعني الشي الوحيد اللي ما ساويتو هو لف الخيط على القطعه لان جابوها ملفوفة
و هلأ ما عم بعرف كيف بدي قطع القطع بكرا ما اح يطلع شكلهم حلو شو بدي ساوي
سلام

السلام عليكم و رحمة الله و بركاته
يخليلي ياكي اختي منى ردك خلاني اتمسك بالامل
اختي منى مرقت على خير و الحمد لله و القطع طلع شكلهم حلو انا فكرت راح ينفتحو بس لا طلع الشكل بيجنن و مع الغريفي و الخضر سوتيه شكل الطبق طلع تحفة فنية الحمد لله و الشكر لك لانك ساعدتيني ما فيني ساوي شي غير اني ادعيلك يا احلى أخت بالدنيا :zzz
بفضل شرحك المفصل و اجابتك عن اسئلتي خليتي كل شي سهل و عن جد عم قول للي بدهن يجربو الوصفة ما يترددو لانها سهلة حتى ما بتستعميلي اواني كتير تحتى بعدين تغسليها استغربت كتير مبارحة ان بعد ما خلصت ما كان في اواني كتير و كتير فرحت عادة لما بساوي طبخة كل المطبخ بينعجق و بطالع كل الملاعق و الطوايات و المقالي :grin
و اذن بالنسبة لتحضيره فيكون سريع و سهل و بسيط بس هالمرة واجهت مشكلة مع الغريفي ما صار سميك مع انو بالمرة الماضية بسرعة صار سميك شوي مع اني ساويت الرو بالمقادير المذكورة حتى اني كترت شوي طحين تحتى يطلع اسمك بس ما عرفت ليش ما صار سميك
حتى بعدين ضفتلو شوية نشاء تحتى مسك شوي ما عرفت شو المشكلة
انا القطع طلعت عندي من برا بنية اما من جوا فاللون بني فاتح و شايفة بالصورة انو من جوا بني قاتم يا ترى كيف بحصل على هاللون لان باللون اللي بالصورة بقدر قدمو من غير غريفي تحتى تطلع طعمة اللحم كاملة لان في اللي بيحبو ياكلو الشريحة من دون غريفي و يستمتعو بطعمها

بالتوفيق
سلام

السلام عليكم اخت منى

أولا ربي يعطيك ألف عافية

السؤال ممكن نجيب قطعة الروستو ونحليها بافريزة للوقت يلي بدنا نحضرها ولا لزم تكون تازة دغري نحضرها

ممكن ننقعها بالخل والتتبيلة لليوم التالي ولا بس ساعة ولا ساعتين

بالنسبة للخردل تقصدين الموجود بعلبة صفراء ويباع مثل الكتشب

بالنسبة للملح لم تضعيه لا بتتبيلة اللحمة ولا بالمرقة مت تضفينه

لما بدنا نضع الروستو بالبراد بدنا نصفيه من مرقته هتي ينشف لليوم الثاني ونخلي المرقة على جنب صح

شكرا