السلام عليكم ورحمة الله وبركاته

هي قصتي مع هالسبانخ قصة، وبضل بدعي لمنى عليها.
بزمانو من شي سنتين، وبأول زواجي، ولسه كنت ببيت أهلي، جوزي طلب اطبخلو سبانخ.
وقبلها ما كنت اعمل سبانخ غير مع البيض المقلي، واصلا ما كتير منعمل بالبيت أكل شرقي لأن بدو وقت ورواق وكنا كل واحد بشغلو وما لحقت اتعلم من ماما – يلي تعلمت بدورها الاكل الشرقي عأصولو من حماتها.
قلتلها لأمي شو بدي ساوي؟ شرحتلي بكلمتين أن اللحمة بتنقلى وبينحط فوقها سبانخ مع الحباشات والحمض وصلى الله وبارك.
وجوزي … جاي من عيلة مأصّلة، طبخات وقصص والسفرة دايماً مشكلة منوعة.
حطيت هالسبانخ أدامي، وعملت شلون ما طلع معي.
جوزي وهو عم ياكلها، عم يتشردأ بين اللقمة والتانية، ويتذكر خواتو وأهلو بالخير ويترحم عإيام العزوبية ههههه.
راحت إيام واجت ايام، من شهرين سافرت لعند جوزي واستقريت عندو، وقلتلو بيوم من الايام: بدي ساويلك سبانخ اليوم ! (طبعا بعد ما فتحت هالصفحة). وهو بين أن يقول ضميرو أن مابدو، وبين أن ما يزعلني، قلي: (أوكي).
ويا عيني بعد هداك الغدا …. صار يقلي كلما نروح نتسوق: ( أخدتي سبانخ ؟؟؟ ) هههههه.
وصار عملتها شي عشر مرات، وبدي ساويها قلت فوت قلها لمنوشة يسلمو إيديكي :zzz

وتذكرت نكتة :
هادا كان في واحد بزنس مان كتير كتير كتير جنتل وهيك مسافر على بلد تاني ودخل على مطعم الأوتيل يلي فيه، طبعا 5 نجوم والله حيو. قلو للجرسون: ( بتجبلي صحن بطاطا مقلية، نصها محروق ونصها مو مستوي، وبتقلي: خود كول يا كلب !!! )
وطلبات الزبون أوامر، إجا هالجرسون المسكين وبعد ما تشهد وقرأ دعاء التوفيق، جبلو البطاطا وقلو بكل اشمئزاز : (خووووود كول يا كهلللب!! )
والزلمة أكل وانسبط كتير كتير وتركلو بقشيش أكتر من سعر الأكلة ، وهو عم يروح، استوقفو الجرسون وقلو : يعني ما تواخذني بعد أذنك أول مرة بتلقى هيك طلب، ما بتحكيلي شو قصتو ؟
ابتسم الزلمة وقلو: لا ولا شي 8) بس اشتقت لأكل مرتي.

والسلام عليكم