سلطة نيسواز


         وصفة : منى                 2007/11/08                 4 تعليقات
سلطة نيسواز

أو سلطة نيس الفرنسية من السلطات اللذيذة و المغذية و الي فيك تعتبريها وجبة خفيفة لحالها . هي بتتحضر من تشكيلة لذيذة من الخضار إو بينضاف الهن البيض و التونا و فيك كمان تضيفيلها شوية كبار أو فجل مقطع لشرائح أو خيار مقطع لشرائح حسب ما بتشتهي نفسك

بالطريقة الفرنسية الأصلية بتتحضر إما بشرائح الانشوفي أو بشرائح التونا الطازجة الي منتبلها بملح و فلفل أسود و بعدها نقليها في شوية الزيت في مقلاة غير لاصقة على الوجهيين حتى تستوي , بس على اعتبار ان هون بحلب ما في هيك حكي ابدا , رح استخدم التونا المعلبة فيكي تقلبي لمقادير مع بعضها متل ايا سلطة عادية , بس بعد التجربة شفت أن ترتيب الخضار حتى يكون كل نوع على حدة أحلى و ارتب .

بالصحة و الهنا




حفنة أو حفنتان من الفاصولياء الخضراء الرفيعة ( اللوبيا الخضراء )
2 حبة متوسطة بطاطا
علبة تونا
نصف كوب من الزيتون الأسود المخلى من النواة
2 حبة بندورة متوسطة الحجم
3 – 4 بيض مسلوق

صوص التتبيل :

ملعقة كبيرة خردل ديجون
2 ملعقة كبيرة خل
ملعقة كبيرة عصير ليمون
ربع كوب زيت زيتون
رشة ملح
ملعقة كبيرة أوريغانو أو حبق أو ربع كوب من الحبق الطازج المفروم ( اختياري )





• يسلق البيض بشكل جيد ثم يوضع تحت الماء البارد و يقشر و يقطع أرباع أو إلى نصفين و يرش بالقليل من الفلفل الأسود .

• تغمر البطاطا بالماء البارد المملح ثم تسلق لمدة 20 دقيقة أو حتى تنضج , تقشر و تقطع مكعبات أو شرائح .

• تنظف الفاصوليا و تزال عروقها ثم تقطع إلى نصفين , تملأ طنجرة أخرى بالماء المملح و يترك الماء حتى يغلي ثم تضاف حبات الفاصولياء و تسلق لمدة خمس دقائق أو حتى تستوي من دون أن تفقد قرمشتها ثم ترفع من الماء المغلي و توضع مباشرة في ماء مثلج كي تحافظ لى لونها الأخضر الجميل .

• تقطع البندورة إلى أرباع و يمكن استخدام حبات صغيرة جداً من البندورة و قسمها لقسمين .

• تصفى التونا من الزيت ثم ترتب الخضار و التونا و الزيتون و البيض في طبق التقديم .

• تمزج مقادير الصلصة جيداً ثم تسكب فوق السلطة و تقدم فوراً .





التعليقات

  1. آرام 3 June 2009

    مشكورة أخت منى على الوصفة .. ومع أني شفتها من بداية تعرفي عالموقع بس ما كان عندي وقتها كل المكونات وبعدين نسيتها، أو بالأحرى انشغلت عنها بالوصفات الكتيرة التانية الي كانت مكوناتها متوفرة. ونفس الشي صار معي بوصفات كتيرة غيرها هلأ عم أتذكرها. يعني متل ما قالت إحدى الأخوات .. الرصة الي أكلناها بخصوص السلطة جابت نتيجة :grin
    جربت الوصفة البارحة .. بس قطعت البطاطا مكعبات بالأول بعدين سلقتها حتى تحافظ على شكلها. طبعاً ما كانت بالنسبة إلي صحن سلطة، كانت وجبة كاملة. الوصفة لذيذة جداً، بيعجبني هيك نوع من الأطباق، والفرنسيين عموماً ذواقين بالأكل.
    خردل ديجون أول مرة بجربه، طعمته لذيذة، عملت بحث في الموقع عن وصفات تانية إله فما لقيت غير صلصة الباربكيو، عندك فكرة أختي عن أي وصفات تانية بيدخل فيها خردل ديجون، أو ممكن أستخدمه بأي وصفة فيها خردل عادي :?

  2. منى 10 June 2009

    مية هلا اخي ارام , و لو اعرف أن هل الرصة كانت رح تشجع لتجريب السلطات المغمورة , كنت رصيتها من زمان :)

    الف هنا و عافية و صحة على السلطة و كلامك مزبوط , هي وجبة كاملة و متكاملة و لما تكون موجودة على السفرة احس ما بقى بده شي جنبها

    اخي خردل ديجون ممكن تستعمله لكتير وصفات و مبدأيا ممكن تستعمله في وصفات السلطات الي بدها خردل عادي , بس ان شاء الله رح نزل وصفات جديدة و فيها خردل ديجون .

    اخر الشي اسفة للتاخر بالرد , و وصحتين و عافية على النيسواز

  3. TENDERNESS 15 July 2009

    والله تشكيلة هالخضار حلوة ، بدي اسأل شو في طبخات ممكن نعملها من اللوبياء الخضراء لانها متوفرة عنا هالايام وملينا من اللوبياء برز :?

  4. منى 19 July 2009

    مممم , رح نزل الك طبخة خصوصية بالفاصوليا , اسمها فاصوليا ببرغل و انا عني بموووت عليها , ان شاء الله بنزلها اليوم او بكرة اذا ربنا يسر ;)

تقييم الوصفة
عاديةقد أحضرهاجيدةممتازةأكثر من رائعة (1 votes, average: 4.00 out of 5)