سندويش التوشكا


         وصفة : منى                 2007/08/12                 20 تعليقات
سندويش التوشكا

سندويش التوشكا أو الطوشكا أطيب سندويشات في المطبخ السوري , بكم دقيقة بتتحضر و رح تاكليها و تاكلي صابيعك وراها , خبز تازة , لحمة متبلة , و جبنة داييبة , في اشهى من هيك , مممم
تتبيلة الحمة بتختلف من بيت لبيت , ممكن تبليها ببهارات السجق , ممكن تبليها بشوية توم و كاري . أنا بتبلها ببهارات حلب المشكلة و بس , بحس هي الطريقة أطيب الشي , طبعاً التتبيلات التانية كمان بتعطي طعمة يمممي , بس مع هيك وصفات بحب دوماً البساطة .
ممكن تستعملي كتير انواع جبنة , جبنة حلب المسنرة , جبنة عكاوي , جبنة موتزاريلا , جبنة تشيدر , شو بتحبي . اليوم أنا مستعملة جبنة موتزاريلا مع جبنة عكاوي .
أصول الوصفة نها تنشوى على الفحم , مع كاسة شاي ع الفحم بتطلع غير شكل , بس للسرعة ممكن تشويها على سخانة السندويش , و إذا مقطوعة عندكن الكهربا اشويها ع التيفال :)
بالصحة و الهنا

- المقادير:
نصف كيلو لحمة غنم مدهنة قليلاً
جبنة مقطعة شرائح رقيقة أو مبشورة ( ممكن استعمال جبنة عكاوي أو تشدر أو موزاريبلا أو جبنة حلب المسنرة )
نصف ملعقة صغيرة بهار مشكل
نصف ملعقة صغيرة بهارات السجق الجاهزة ( اختياري )
ملعقة كبيرة فليفلة حمراء ناعمة حلوة أو حرّة حسب الزوق , أو دبس فليفلة
رشة صغيرة قرفة

خبز عربي
ملح قليل , مراعاة لملوحة الجبنة
- طريقة التحضير:
1 - تدعك اللحمة مع البهار و القرفة و الفليفلة الحمراء و بهارات السجق في حال استعمالها و القليل من الملح مراعاة لملوحة الجبنة .

2 - تقسم أرغفة الخبز إلى نصفيين ثم تمد طيقة من اللحمة في أرغفة الخبز المقسمة .

اللحمة المتبلة ممدودة في السندويشات

3 - توزع الجبنة فوق اللحمة بحيث تغطيها .

توزع الجبنة المبشورة على اللحمة

4 - تكرر العملية حتى الانتهاء من كل الكمية كل السندويشات

5 -تشوى سندويشات التوشكا على سخانة السندويش أو في صينية تيفال على نار متوسطة و تقلب على الوجهيين حتى تنضج اللحمة و تذوب الجبنة و يمكن شويها أيضاً على الفحم فتأخذ نكهة لذيذة جداً . تشوى السندويشات على الفحم أو على سخانة السندويش أو على التيفال

التعليقات

  1. بدور 12 August 2007

    انتي مصرة كل يوم تجوعيني قبل ما أروح عالبيت :grin
    يسلمو إيديكي عنجد شي كتير كتير طيب و مشهي من الشكل بس, فشلون رح يكون الطعم :zzz

  2. منى 13 August 2007

    كل ما جعت بتاكل أطيب ;)

    تسلمي على زووءك و كلامك الحلو

    نور الموقع بدور :)

  3. سارونات 12 October 2008

    السلام عليكم و رحمة الله و بركاته
    يا فرحتي انا بالجبنة البيضااختي منى بينفع نستعمل جبنة مثلثات نقطعها شرائح او بستعمل الجبنةالبيضالكبيرة الطويلة اللي يسهل تقطيعها لشرائح
    السندويش مبينتو طيب و شكلو كتير حلو
    اختي منى بدي اعرف كمية اللحم هي كم سندويش عملتلك لان راح ساوي بس كمية صغيرة تحتى احسب حسابي و كمان لازم صينية تيفال ما بينفع صينية عادية او راح تلزق و هل فينا نحطن فوق ورق المنيوم تحتى نتفادى انهم يلزقو او يحترقو
    جازاك الله خيرا اختي منى و جعله في ميزان حسناتك
    بالتوفيق
    سلام

  4. منى 13 October 2008

    هلا اختي :) لا اكيد ما بينفع جبنة المثلثات , و الجبنة البيضاء الي حكيتي عليها أظن انها بتنفع :roll , الكمية على التحديد ما بذكر بس ممكن 3 أرغفة عربي من الحجم الوسط , بس مو متاكدة , أختي لازم التيفال لان رح تلزق , مو ضروري صينية اذا عندك طواية بيصير و إذا كان و لا بد ممكن تجربيها على صينية عادية بس عينك تبقى عليها , انا مو مجربتها ;)

  5. رندوش 1 June 2009

    :p :cry :x ما شاء الله بيشهي رائع

  6. منى 1 June 2009

    هلا رنوشة :)
    لا حبيبتي مسحي دمعاتك , يلا أحلى سندويش توشكا لعيونك خلال دقيقتين او تلاتة و سخن كمان ;)

  7. رندوش 1 June 2009

    جربتها يا منى تسلمي بتشهي ممممممم
    الله يبارك فيك يا رب :grin

  8. هادينة 18 March 2010

    يسلمو منى مشي الحال تفعل التسجيل امبارحة جربت هالاكلة عملت نص السندوشات توشكا ونصهم ماريا شو طلعو طيببين مع صحن تبولة وعصير زكرتيني بحلب وايام حلب :zzz صار كتير جربت وصفات يعطيك العافية يا شطورة

  9. منى 23 March 2010

    هلا هادينة :)
    الف صحة و هنا و عافية يا رب بكل لقمة , الله يعافيك و يخليك يا رب ;)

  10. violet 4 May 2010

    بس هيك يعني مابدا بندورة ما بندورة
    بتذكر انو يمكن اكلت منها مرة كان الها خضار
    عكل يمكن مخربطة ويسلمو كتير

  11. منى 6 May 2010

    هديك الماريا الي بدها بندورة ما بندورة ;)

  12. رغد غسان علاء الدين 27 February 2011

    ممم من الوجبات المغرية والشهية جدا..أنا بعملها بنفس الطريقة لكن ما خطرتلي فكرة القرفة..رح جربها انشالله..تسلم إيديكي يا شطورة الشطورات :)

    • ديما 22 March 2014

      يمي يمي مبين عليها بتشهي لازم جربا طب ليش ما بندخنا بالفحم بعد ما نعملا عالغاز شلون بتطلع ؟؟؟؟؟

      • منى 23 March 2014

        جربيها و ما بتندمي دمدوم :)
        لان هي طيابتها من النار ع الاكل فوراً , إذا حنستنى نبخرها يمكن تبرد االسندويشة و ما بتعود كتير طيبة

    • ديما 23 March 2014

      ممممممممم مزبوط كلامك :) أحلى منى بالكون يسلمو اديكي :)

      • منى 23 March 2014

        الحلا انتي , و الله منورة :)

    • منى 23 March 2014

      اي رغود جربيها و متاكدة رح تحبيها :)

  13. منى 27 February 2011

    الله يسلمك رغودة حبيبتي و منور قسم السندويشات بطلتك :zzz

  14. Mouzhira Antakli 22 March 2014

    ذكرتيني بهالاكله يامنى اكيد كتييييييييير شهيه بس بتكون اطيب مع لحمة وجبنة وخبز حلب

    صدقيني غير شكل . مافي اطعم ولا اطيب من اكل حلب .

    • منى 23 March 2014

      اي و الله مزهرة , لان لحمتنا غير نكهة و بهارنا غير طعم و جبنتنا ما في منها , مااا في متل حلب

تقييم الوصفة
عاديةقد أحضرهاجيدةممتازةأكثر من رائعة (4 votes, average: 5.00 out of 5)