صلصة الشوكولا


         وصفة : منى                 2008/11/23                 27 تعليقات
صلصة الشوكولا


علبة قشطة أو ثلاث أرباع كوب كريم فريش
200 غ شوكولا سادة أو على حليب من نوعية ممتازة
2 ملعقة كبيرة سكر بني





• تترك علبة القشطة لتبقى بحرارة الغرفة قبل استعمالها .

• توضع الشوكولا في قدر صغير و يملئ ربع قدر أكبر منه بالماء , يجب أن لا يمس القدر الذي يحتوي على الشوكولا بالماء المغلي و إلا تكتلت الشوكولا و أصبح لونها باهتاً .

• يبعد قدر الشوكولا و يترك الماء ليغلي ثم تهدى النار و توضع على أخف حرارة ممكنة , أقل من نار الشمعة لو ممكن .

• توضع الشوكولا و الكريما و السكر في القدر الصغير فوق الماء التي تغلي بهدوء و تحرك بملعقة معدنية , بالنسبة لي خصصت ملعقة خشبية للحلويات لأن الخشب يمتص النكهة و إذا استخدمنا ملعقة واحدة للكل ستصبح نكهة صوص الشوكولا كطعم أخر وصفة استخدمت لتحريكها تلك الملعقة .

• تترك الشوكولا لمدة دقيقتان أو ثلاث دقائق أو حتى يذوب أغلب الشوكولا مع التحريك , تبعد عن النار مع الاستمرار بالتحريك حتى تذوب كل الشوكولا , أبعدنا الصوص عن النار قبل أن تذوب الشوكولا بالكامل لأن بقية الشوكولا ستذوب بحرارة الشوكولا الذائبة و بهذه الطريقة نضمن الحصول على صوص ناعم و نضمن عدم تكتل الشوكولا و تغير لونها بسبب الحرارة الزائدة .

• يستخدم الصوص ساخناً أو فاتراً حسب الرغبة فوق الكريب أو الأيس كريم أو مع كيك شوكولا . و أحبه كثيراً مع الفريز .

أفكار و تنويعات :


• يحضر الصوص الأبيض بنفس الطريقة تماماً مع استبدال الشوكولا السوداء بشوكولا بيضاء و السكر البني بسكر عادي .

• يمكن الاحتفاظ بالصوص في مرطبان محكم الإغلاق في البراد و عند الحاجة يسخن بنفس طريقة التحضير أي من دون أن يمس الماء المغلي الصوص .
  • وصفات تانية ممكن تعجبك


التعليقات

  1. رنا 26 November 2008

    ياعيني ياعيني شو هالصورة الررررررروووعة
    بس للاسف الطقس بللش يبرد والبوظة صارت بتأذي هالاوقت خصوصي هون لانه الجو متقلب الصبح شوب والمسا برودة …
    بس بالنسبة للصلصة كتير رائعة واسهل من التوفي بكتير ….هداك كتير بيفزز العصب :grin
    انشالله رح جربها باسرع وقت ولو اني مشغولة هاليومين بالامتحانات والسفر :cry

  2. ام دانية 26 November 2008

    يسلم هل الديات يارب انا كتير بحب هيك صلصات بس للاسف بتضر البوظة بهل الوقت وخصوصا على التلجات الي عنا والله برد كتير والله يعطيكي الف عافية على هل الوصفات الي منزلتيا والله شي بشهي :zzz وكتير حابة جرب اليقطين بالطحينة لانو منظرا مغري كتير يارب تنجح كمان ناوية ان شاءالله اجرب الارنبيط مع تتبيلتك الخاصة ;) وخصوصا انو عندي ارنبيط كل يوم بدخل على الموقع وبتفرج على هل الاكلات الطيبة :cry وصرت اشتهي على كلشي بتنزلي مشاء الله عليكي بركي بنعدا منك شوي وبصير اعرف اعمل هيك اكلات :sigh

  3. منى 26 November 2008

    هلا رنونة :)
    اي معك حق هلا الجو برد , انا محضرة الوصفة من شهر و نص بس ما كان عم يصحلي ان نزلها :roll
    معك حق اسهل من التوفي بس كمان التوفي حباب بس بده مين يفهم عليه :grin
    الله يوفقك بامتحاناتك و السفر و خبريني شو بيصير معك

  4. منى 26 November 2008

    هلا ام دانية :)
    اكيد هلأ بالمانيا برد كتير , اتهنوا بالتلجات نحنا ما من شوفه الا بالسنة مرة 8)

    ان شاء الله بتنجع معك كل الوصفات لان سهلة و مو مستاهلة , و تبقى اذا جربتي شي خبريني , سلام لاخواتك ;)

  5. Eman 26 November 2008

    رائع كتير هالصوص وعجبتني فكرة استخدامه للكريب ..
    إذا كان الآيس كريم مو مناسب لههذا الجو .. ممكن تعملوه للكريب وهيك بصير مناسب لجو الشتا ويشعرك بالدفئ ..استمتعوا فيه .. :zzz (ما خرجي أعمل دعاية :grin )

    رنا انت كمان مسلفرة وعندك امتحانات ؟ شو عم تدرسي ؟

  6. رنا 27 November 2008

    ايه ياستي عندي امتحانات ياايمان انا تزوجت عالامارات وكنت سنة اولى ادب انكليزي ودرست التانية والتالتة وهلأ الرابعة وعم سافر بالامتحانات بس رح يكون سفري انشالله بعد العيد الكبير بس هالمرة رح يكون صعب واصعب من كل مرة اولا لانها اخر سنة وتانيا لانه بنتي عمرها سنة وتلات شهور وانا هلأ حامل شهر :upset بقا شفتي كم بطيخة حاملة بأيد وحدة ؟؟؟بس امانة تدعولي لانه الدعاء بظهر الغيب مستجاب

  7. سلاف 27 November 2008

    الله يوفقك وييسرلك رناا00
    الصوره عم تحكي عن حالها00 شيئ بشهي 00 يسلم ايديكي منى بكره معزومه عالغدا وان شاء الله رح ساوي كاتو التفاح وأخده معي بس عندي سؤال بصير استغني عن كربونات الصودا؟ وممكن استخدم صوص الشوكلا بدل التوفي ولا التوفي اطيب ؟؟
    تسلميلي منى عم استنى ردك 00

  8. souha 27 November 2008

    هلا منى :)
    تسلمي لقلبي هدا الصوص إلي كان بدي يا إنشاء الله بجربو بأقرب فرصة مع الكريب و بخبرك شو بيصير معي
    ;)
    بس فينا بالنسبة للكريب نستخدم مقلاية ستالنس لأنو ما عندي تيفال :roll
    و الله يجزيك الخير

  9. منى 27 November 2008

    هلا امولة :)
    تمام هو مو للايس كريم بس انا حبيت قدمه بهل الطريقة :zzz
    يا ستي خرجك و نص , شو تستلمي قسم الدعاية و الاعلان في الموقع 8)

  10. منى 27 November 2008

    هلا رنونة :)
    الله يقومك بالسلاامة و يوفقك بالدراسة و تتخرجي متل الصلاة على النبي
    دعوة اخت لاختها بظهر الغيب , لا تنسي تخبريني شو بيصير معك و ايا مواد ,, اااااااييه أحلى ايام و الله ايام الجامعة , مع اولاد كمان . كنت سميها التعب اللذيذ :zzz

  11. منى 27 November 2008

    هلا سلاف :)
    الله يسلمك حبيبتي و بالهنا , ان شاء الله بتنبسطوا
    بيصير تستغني عن البيكربونات , هيك رح تضيفي لكل كوب من الطحين ملعقة صغيرة بيكنغ بودر .
    فيك تزينيها بصوص الشوكولا بس الاطيب بصوص التوفي او من دون صوص ابدا , انا زوجي بيحبها سادة من دون تزيين ;)

  12. منى 27 November 2008

    هلا سهى :)
    ان شاء الله تجربيه و تحبيه , الصراحة مو مجربة الكريب الا بالتيفال , اتوقع ان بيصير بس مو مجربة , يعني مو مضمون :roll

  13. Eman 28 November 2008

    الله يعينك يا رنا ،الحمل صعب جدا مع الامتحان .. :sigh
    أنا حالتي قريبة منك ، نازلة ليلة العيد على حلب .. وعندي بنوتة عمرها 6 شهور و حاليا أنا سنة ثالثة شريعة ، كنت سابقا بالإمارات وهلأ حاليا بأميركا ..متل بعض ما في فرق كتير :grin

    منوشة :موقعك ما بده دعاية الصورة لحالها ألى دعاية وتنطق بالمحتوى اللذيذ !!
    :p

  14. منى 29 November 2008

    طولي بالك أمولة , ان شاء الله ربنا بيسرها و بيمر الامتحان متل الصلاة على النبي

    رح تنور حلب هيئتها على هل العيد , احلى بنات نازلات

    طمنيني عنك بعد الامتحانات ;)

  15. Eman 29 November 2008

    إن شاء الله رح خبرك بالنتائج وطمنك أختي الغالية .. يعلم الله كم احبك وأحترمك .. وفعلا أعتبرك أختي الكبيرة ..الله يحفظلنا ياك ويحفظلنا الموقع الغالي الذي كان سببا في التعرف على أخت رائعة مثلك .. 8)

  16. منى 29 November 2008

    القلب على القلب يا عسل ;)
    ربي يديم المحبة و الالفة دايما و بانمتظار النتائج الي بتفرح القلب ان شاء الله :zzz

  17. الدمشقية 22 December 2008

    سلم ايدك حبيبتي منى :grin بس ياريت لو تحطيلنا طريقة الشوكولا بدون الشكولا الجاهزة يعني باستخدام الكاكاو والزبدة والحليب أو شيء أخر 8) وايضاً طريقة عمل الشوكولا بنكهات يعني فريز أو موز أو ما شابه 8)

  18. منى 22 December 2008

    هلا دمدومة :)
    يعني قصدك الشوكولا الي بتنباع بالمحلات :roll
    اذا هيك كأنها صعبة كتير , الصراحة ما عندي و لا فكرة عنها :zzz

  19. الدمشقية 24 December 2008

    لا حبيبتي يعني قصدي شوكلا السندويش أو يلي بتغطي فيها الحلويات

  20. منى 24 December 2008

    كمان الشوكولا تبعة السندويش ما بعرفها , اما الحلوياتى فانا استعمل نفس هل الوصفة :zzz

  21. سارونات 30 June 2009

    السلام عليكم و رحمة الله و بركاته

    اختي منى يعني فينا نستعمل سكر عادي مع شوكولا سوداء لان السكر البني مو متوفر عندي

    و كمان قديش وزن علبة القشطة

    بالتوفيق

    سلام

  22. منى 1 July 2009

    هلا اختي , بيصير السكر العادي بس بالبني اطيب بكتير ..

    القشطة بوزن 170 غ :)

  23. سارونات 2 July 2009

    السلام عليكم و رحمة الله و بركاته

    اختي منى بالنسبة لهالكمية من الصوص هل بتكفي لتغطية كيكة الزبادي بالشوكولا او بيكفي نصها بس :?

    بالتوفيق

    سلام

  24. منى 3 July 2009

    هلا مو متاكدة منيح بس اتوقع الكمية كلها لازمة ;)

  25. roroo51 14 April 2010

    [img]http://img130.imageshack.us/img130/1100/dscn0919.jpg[/img]

    و الله متل مل قلتي عملتها و منظرها بيشهي بس لسه ما دقتها :grin
    حبيت بس أحط الصورة
    و شكرا

  26. roroo51 14 April 2010

    اه عفوا حطيت بالمكان الغلط و بعد ما حطيت الصورة لاحظت :sigh
    كان بدي احطها محل السويسرول :upset

  27. laimuna 16 May 2010

    وصفة لذيذة وعجبني انو فينا نحتفظ بالصوص بالبراد يسلم دياتك بس سؤالي لو بدي استخدم شوكولا نوتيلا كصوص كيف بدي خليها سائلة ؟؟ ومشكورة اخت منى

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)