عجة حوارنية ( عجة عمتي )


         وصفة : منى                 2009/11/03                 27 تعليقات
عجة حوارنية ( عجة عمتي )

قرص عجين (ناتج عن عجن كوب طحين أبيض رشة خميرة ورشة ملح ورشة سكر وماء حتى نحصل على عجينة لينة، تترك لتختمر ساعتين أو أكثر ويمكن استعمال طحين الخبز الذي يحوي النخالة وهو أساس الوصفة القديمة).
عدد من البيض من 5 إلى 7 حسب قرص العجين.
ملعقتي طعام زيت زيتون (استبدلت السمن العربي بزيت الزيتون)
بصله متوسطة
ملح
فلفل أسود
ربع ملعقة صغيرة كمون
ربع ملعقة صغيرة جوز طيب
نصف ملعقة بيكنغ باودر





• تقلى البصله بالزيت مع البهارات والملح حتى تذبل بدون أن تيغير لونهاوتترك لتبرد.

• يضاف البيض واحدة واحدة لكمية العجين ويخلط باليد أو باستخدام خلاط كهربائي والهدف هو الحصول على خليط سائل أشد كثافة قليلا من خلطة البان كيك وقد نحتاج لإضافة بيض أكثر أو نحتاج لتقليل كمية البيض .

• يضاف البيكنغ باودر والبصل مع العجين السائل جيدا، ثم تحمى مقلاة متوسطة لا تلصق مدهونة بقليل من زيت الزيتون ويصب الخليط بسماكة نصف سنتيمتر وتخبز كما يخبز البان كيك.

• الكمية تعد ثلاث أرغفة من العجة اللذيذة.

ملاحظة:

من الممكن أن تخبز في الفرن في حال توفر فرن جيد وصينية لا تلصق وبهذه الحالة يجب أن تحمى جيدا وتصب بها العجينة وعندما ينضج الوجه الأول تقلب على الوجه الثاني.
  • وصفات تانية ممكن تعجبك


التعليقات

  1. Amar 3 November 2009

    لقد استفدت كثيرا من موقعك لأن أهم ما فيه كما تقول الأخوات المشاركات أن وصفاته مجربة والنتيجة موثوقة. :)

  2. DOUHA 3 November 2009

    باين طيبة يسلموا بجربا وبخبرك

  3. منى 3 November 2009

    هادا بس من زووءك قمر , كلنا عم نستفاد من بعض و كل واحدة فينا عندها شي جديد بيقدمه للتانية و انا كتيرر محمسة لبقية وصفاتك ;)

    الاسم مناسب و الا شو ؟

  4. Amar 3 November 2009

    شكرا كتير، الصراحة أنا ما بعرف شو اسمها بالضبط لكن لما كنا صغار كنت قول بدي عجه، ولما يعملوا عجه كوسا عادية قلهون لا مو من هي :cry ، يقولولي من الحورانية “اللي بناكلها بالضيعة” قلهون إيه :grin وبما إنو أكلي كان خفيف كتير بالطفولة وما كنت اقبل شي اسمه بيض كانت طلباتي أوامر بس كلي.
    مشان هيك فيكي تغيري الاسم.

  5. لارا مينا 3 November 2009

    الله يسلم إيديكي أخت قمر فعلا مشهية كثير وسبحان الله فيه وصفات في الموقع سواء من الأخت منى أو الأعضاء الكرام لا يمكن إني أصبر عليها وأروح مشوار خصوصي علشان أجيب أي غرض ناقص لها ووصفتك منهأأكيد.
    ألف تحية وشكر لكي :zzz

  6. ام محمد 3 November 2009

    الله يسلم هاالديات :)
    شي بيشهي وان شاء الله بجربها قريبا :zzz
    وينك يامنمون والله اشتقنالك واشتقنا لااكلاتك الطيبة صارلك فترة مانزلتيناوصفة جديدة عسى المانع خير على فكرة انا عم انتظر كتابك بدقيقة وبالثانية ان شاء الله تكوني بلشتي فيه وتكون فيه اكلات سورية وتركية :p وخاصة غريبة استنبول من وقت ما ذكريتها عم انتظرها :roll شايفة شوعيني جوعانة :grin

  7. منى 4 November 2009

    :grin ام محمد بتعرفي هل الوصفة اديه عم تتعسر , لوقت ما جبت لوز منيح اتاخرت كذا اسبوع و لوقت مااتيسر اني احمصه و اطحنه كمان اخد معي ما بعرف اديه و هلا هو ملحوش بالفريزر , كل ما بفتح الفريزر بيقلي بتسلم عليك ام محمد , قومي ساويني غريبة و انا بقله , يا ابن الحلال مو شايفني اليوم مشغولة , بكرة ان شاء الله و على هادا و متله :grin

  8. منى 4 November 2009

    قمر ما فهمت كتير شو الاسم المطلوب , عجة حاف :zzz

    مرة تانية سلمن , بروح و بجي و بتفرج على هل الوصفة , ان شاء الله رح جربها , بس مو هل كم يوم لان مشغوووووولة كتير 8)

  9. ام محمد 4 November 2009

    لاه لاه والله مالك حق تكسري بخاطر اللوزات وخاطري :grin ياالله ان شاء الله بتفضي شئ نهاروبتعمليها :p
    منمون شفت على صفحت صوري اكلات جديدةعجب هدولةبس للواحديتفرج عليهم ويشتهي :sigh ولا ناوية تنزليهم :roll

  10. منى 4 November 2009

    وين ام محمد ؟ بعلمي كل شي منزلة صوره عم نزله بقى شو قصدك :roll

  11. DOUHA 4 November 2009

    صورة الكشري مثلا مثلا ;)

  12. ام عون 4 November 2009

    يسلم دياتك ياقمر على العجه اليوم اعملتها لابني عون عمره سنه وتلات اشهر بالخص لانه فيها بيض وهو اكله يادوب لانه بطلع اسنان والحمد لله عجبته.وسلامي لاخت منى بتمى لها من كل قلبي التوفبق 8)

  13. نور الأسلام 4 November 2009

    السلام عليكم تحياتي منى ولكل الاخوات كيف حالك انشاء الله تمام :) اخت قمر يسلم دياتك تفاجئت لما شفت عجه حورانيه :eek انا من حوران انت من وين من حوران شكرا كتير الك

  14. منى 4 November 2009

    الف صحة و هنا و عافية ام عون بكل لقمة على البك و الب ابنك , الف شكر الك حبيبتي :zzz

  15. ام عبدو 4 November 2009

    شكرا كتير لجهودك المبذولة ربي يديم نشاطك وصحتك
    عنجد عبتعلم الطبخ منك لانه نفسك متل نفس امي وانا بعيدة عنا
    مشكورة كتير كتير :

  16. منى 4 November 2009

    ااايه , صح ..”

    لا هي الصورة بس للتعذيب :grin , لان …

    بعدها بقلك , او انت لحالك لازم تعرفي :)

  17. منى 4 November 2009

    الله يسلمك يا ام عبدو هادا بس من زوءك و هل الكلمة بالذات هي احلى كلمة سمعتها اليوم , الله يديم الماما فوق راسك و لا يحرمكم من بعض ;)

  18. لارا مينا 4 November 2009

    على فكرة أخت منى اسمها مكتوب عجة حوارنية وأظن إنها حورانية .

  19. Amar 4 November 2009

    مرحبا منى، بالنسبة للإسم بتمنى يكون “عجة عمتي”، ما لقيت أحسن من هالإسم وهوه تكريم لكل عمه قريبه من أولاد إخواتها، ولإنو عمتي هيه أشطر وحدة بتعملها على أصولها ومنها اتعلمت الوصفة.
    وأنا بالمناسبة من حوران ومن قرية اسمها “بصير” بتبعد عن دمشق حوالي 50 كم. مشان ما تخلطوا بينها وبين بصرى.
    تحياتي لمنى الرائعة ولكل الأخوات في سوريا وفي المغترب.

  20. ام عبدو 4 November 2009

    انا اسفة كتير كلامي بالرد الاول كان موجه للست منى
    ماقرات اسم صاحبة الوصفة من شدة اعجابي بالست منى
    فحسبتا هي حاطتهاعنجد بعتذر منك يااخت قمر وصفتك حلوة وباين من شكلا انها لذيذة يعطيك الف عافية

  21. ام محمد 5 November 2009

    السلام عليكم :)
    البارحة جربة العجةكتير طيبة يسلم دياتك اخت قمر
    منمون بالنسبة للصور اول ماتفتحي الصفحة بتطلع صورة اكلةبتشبه الاوزي وعليها فستق حلبي ومالها رابط
    ونفس الشئ الصورة يلي جنبهاوكمان صورة الكشري :)

  22. منى 5 November 2009

    و لا يهمك ام عبدو , بتصير و هون نحنا منحب بعض و ما منقيد ;)

  23. منى 5 November 2009

    تكرم عينك قمر , على راسي و الله انت و كل اهل حوران ;)

  24. ام احمد الصغيرة 6 November 2009

    يسلمو كثيير يا قمر شكلها بيشهي انا كمان حورانية بس شفت كلمة حورانية وررررررر بوجهي عالصفحة يعطيكي العافية

  25. ام احمد الصغيرة 6 November 2009

    ايه والله يسلم هالديات شهيتيني اياها الله يعطيكي العافية عفكرة انا كمان حورانية بالامارات سشهيتيني الرجعة

  26. منى 7 November 2009

    شرفتينا اختي ام احمد و نورتي بيتك و مطرحك :)

  27. منى 11 April 2012

    يا عيني عليك يا قمر على هل الوصفة المميزة , شي بيشهي و كنت رح قلك ان الوصفة جديدة علي لولا اني اتعرفت من فترة بسيطة على وصفة الها نفس المبدأ و اسمها كبة زنكلية , علمتني ياها رفيقتي غادة , المهم انها عجين مع سبانخ و حمص ,
    طيبة و تغير شكل ..

    الهي سلم هل الديات و ما انحرم من هل الوصفات الاصيلة و اتمنى تشاركينا كمان بوصفات تانية من حوران ..

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)