كابوسكا بالدجاج


         وصفة : منى                 2013/12/21                 12 تعليقات
كابوسكا بالدجاج

يخنة الملفوف على الطريقة التركية , من أطيب وصفات الشتي , ما بتتخيلي كيف مكونات بسيطة بتعطيك هي طعمة طيبة , و هي واحدة من الوصفات الي متفقين عليها عندي بالاجماع في البيت من الصغار للكبار ..

بالعادة بطبخها بلحم الغنم , بس هل المرة جربتها بالدجاج و طلعت خيلة , ريحتها بتشهي و طعمتها بتجنن , و سهلة كتير , و قدمت معها برغل و رز مفلفل , و كل واحد أكل من الي على زوقه .

بالصحة و الهنا

شو لازمنا ؟
1 ملعقة كبيرة زبدة
2 ملعقة كبيرة زيت زيتون
1 حبة كبيرة بصل أحمر , مقطع شرائح
نصف كيلو دجاج مشفى من العظم و الجلد , صدر أو أفخاذ حسب الرغبة , مقطع شرائح
2 ملعقة صغيرة فليلفة حمراء ناعمة , حرّة أو حلوة حسب الرغبة
ملح
نصف ملعقة صغيرة بهار
نصف حبة كبيرة ملفوف , مقطع شرائح رقيقة
1 حبة كبيرة فليفلة حمراء , مفرومة ناعماً ( تستبدل بملعقتان كبيرتان دبس فليفلة في حال عدم توافرها )
3 ملعقة كبيرة معجون الطماطم
3 – 4 كوب ماء
طريقة التحضير

1 - تذوب الزبدة و زيت الزيتون على نار متوسطة , يضاف البصل و يقلب حتى يصفر , يضاف الدجاج و يتبل بالبهارات و يقلب الكل على نار قوية حتى يتغير لون الدجاج و يجف مرقه .

2 – تضاف الفليفلة الحمراء و تقلب لبضع دقائق , يضاف معجون البندورة و يقلب لمدة دقيقة . يضاف الماء و يترك حتى يغلي .

3 – في هذه الأثناء يقطع الملفوف لعيدان رقيقة و يتم التخلص من عض الورق إذا كان قاسي ثم يغسل و يضاف للمرق و يترك ليغلي لمدة 15 دقيقة أو حتى يطرى و ينضج .

4 – تقدم الكابوسكا مع الرز المفلفل أو البرغل المفلفل و الفليفلة الحرّة حسب الرغبة .

التعليقات

  1. سلمى 21 December 2013

    يسلموا ايديكي ست منى كثير حبيت الوصفة ورح جربها اول ما أجيب ملفوف ان شاء الله

    • منى 21 December 2013

      الله يسلمك سلمى , ان شا الله تجربيها و تكون على زووءك و رح استنى رايك ان شا الله

  2. duraa nahass 22 December 2013

    من زمان ماعلقت على اكﻻتك الطيبة
    بس صدقيني مالي غنى عن اكﻻتك ونفسك
    ووصفاتك الرائعة
    جزاك الله خيرا على كلشي قدمتيه وعملتيه

    • منى 22 December 2013

      بعد زماان درة , و انا ما الي غنى عن طلتكن على الموقع

      شكرا يا قمر

  3. أم نوران 22 December 2013

    احم احم باسم الله :) اخيرا مشي الحال ورجعت لعضويتي القديمة ♥
    كتييير حبيت الوصفة وخصوصا اني مجربتا باللحمة وكتير كانت طيبة..عندي كل مكوناتا واظن راح جربا يا تنين يا تلاتا باذن الله.
    الله يعطيكي العافية و شكرا كتيييييير ♡♡.

    • منى 23 December 2013

      اهلييييين و سهلييين ست ام نوران خانم

      شو اكسرلك , شو اطبشلك ؟

      ان شا الله هي كمان حتحبيها و يا رب تكون على زوءك و يا ريت شوف تطبيقك

  4. سلمى 2 January 2014

    عملتها ست منى وكثير حبيناها قدمتها مع البرغل بشع يريه الف شكر لك
    عملت كمان لحمة بعجين وسمبوسك بجننوا الله يسعدك

    • منى 2 January 2014

      الف هنا و عافية يا رب ع قلبك سلمى على هل الوصفة و كل وصفة تانية جربتيها و عجبتك , نورتي

  5. بيبو 6 July 2014

    يعطكي العافية على هالوصفات الطيبة.. فعلا احيانا منحس بحاجة لتغير بالاكلات لذلك عنجد بتشكرك للطبخات المتنوعة..

    هلأ سؤالي انو لاحظت في شوية اختلاف بالمقادير بين كابوسكا اللحمة وكابوسكا الدجاج.. يعني لانو دجاج او لحمة صار في هالفرق ولا انو الفرق بسيط كزيادة معلقة زبدة او زيت ما بيأثرو..

    ان شاء الله اليوم رح اعمل ومنكتشف الطعمة بعد الافطار :)

    • منى 7 July 2014

      اهلا و سهلا :)

      الفرف بسيط فيكي تطبخيها بهي الطريقة او هي ، انا بطبها حسب المتوفر عندي , لهيك في هل الاختلافات البسيطة
      بتمنى اعرف رايك بعد التجربة

      مية هلا

  6. رنا 13 March 2016

    شكرا كتير انا دايما بتابع الموقع بس الملفوف يكون مقطع ناعم يعني عيدان ناعمة كتيرر ولا وسط يعني كانو مبشور ولا لا تقطيع خشن وشكرا

    • منى 19 March 2016

      منورة :)
      تقطيع بالسكينة عيدان رقيقة ، بس مو بشر

تقييم الوصفة
عاديةقد أحضرهاجيدةممتازةأكثر من رائعة (2 votes, average: 3.00 out of 5)