براونيز بكريما الخمس دقايق السرية
متل اليوم من أربع سنين الساعة 12 تمام , بدي موقع لقمة طيبة . بدايته الحقيقة كانت بشهر شباط , بس فيكن تقولوا كان لسى جنين ببطن امه كانت الوصفات عم تنطبخ على نار هادية و ب 5 – 5 تم افتتاحه و قصته حكيتلكن ياها من سنتين بالتمام و الكمال , اذا ببتذكروا , سبحان الدايم
للسنة الرابعة حضرت هل الكاتو النممي , طيب و ألوانه حلوة و سهل و شكله مختلف عن ايا قالب كيك عادي الي بيكون مغطى من كل جوانبه بالكريما , هل القالب حلو و الي بقلبه على اطرافه , متل قلبي 
بهل القالب رح تكون طبقة الكريما أسمك شوي من القوالب العادية , و الكريما نفسها مو كريما عادية , خالطتها مع شوي من كيك الشوكولا , قطعت طبقة رقيقة كتير من الكيك و فتتها و خلطتها مع الكريما بعد ما جهزت , و طلعت طبقة جديدة بنكهة جديدة بطريقة بسيطة كتير , و الكريما الي استعملتها هي كريما حلويات سائلة , خفقتها حتى نفشت , و هي في الها سكر , بس انت ممكن تزيدي كمية السكر اذا بتحبيها تكون أحلى
كل سنة و نحنا مجموعين على اللمة الحلوة و العيلة الي عم تكبر اكتر و اكتر و نبقى مجموعين بالخير و على ما يرضي رب العالمين
بالصحة و الهنا
وصفة الكيك الاسفنجي , على شوكولا
شرائح فريز طازج , حسب الحاجة
2 كوب كريم سائل خاص بالحلويات
سكر بودرة حسب الحاجة
السيروب :
فنجان و نصف ماء . ما يعادل 90 مل
ربع كوب سكر عادي
مزيج التلميع :
ملعقة صغيرة جيلاتين بدون نكهة أو جيلاتين بنكهة فريز
ربع كوب ماء مغلي
• يحضر الكيك الاسفنجي قبل يوم لسهولة تقطيعه و التعامل معه , يقطع إلى اربع شرائح احداها شريحة رقيقة .
• تخفق الكريما السائلة حتى تنتفخ و تسمك , يضاف السكر البودرة حسب الحاجة . بالنسبة لي استعملت كريما برافو التي لا تحتاج لاضافة السكر .
• تفتت الشريحة الرقيقة من كيك الشوكولا و تقلب برفق حتى تتجانس . تترك جانباً حتى اعداد شرائح الفريز .
• يغسل الفريز و يجفف ثم يقطع لشرائح متوسطة السماكة . تمزج مقادير السيروب و تقلب حتى يذوب السكر .
• توضع أول شريحة من الكاتو الاسفنجي في طبق التقديم تسقى بلطف بالسيروب , توزع ثلث كمية الكريما على الكاتو ثم تصف شرائح الفريز فوقها بحيث يظهر جزء منها خارج الشريحة , بالشكل الظاهر بالصورة .
• تكرر العملية مرتان و تصف شرائح الفريز بشكل جميل في الطبقة الأخيرة .
• يذوب الجيلاتين بالماء المغلي حتى يذوب تماماً و يترك حتى يفتر , تدهن شرائح الفريز بالمزيج .
• أصبح الكاتو جاهز , يفضل تقديمه خلال ساعتين أو ثلاثة لتبقى الفواكهة محافظة على رونقها .
يسلمو ايديكي يا رب……
ولله انك طيبة وما بيطلع منك غير كل شي طيب.. وهاد مبين من طريقة الكتابة والتوضيح اللي دايما عرفناكي فيه……..
يسلمو كتير وما يحرمنا منك ومن وصفاتك
مزبوط كلامك أول مرة ماتكون فرحتنا كاملة ميه بالميه , وسبحان الله مافيه أحد يصدق الأحداث الأليمة يلي بتصير ببلادنا كلها , وفعلا نعمة الأمن والأمان بالدنيا وما فيها …..
وكلنا بصراحة حاسين بالفتور ومش متخيلين إنا نفرح وغيرنا بيتألم.
بس الحلو بالموقع حتى لو مافي وصفات جديدة حاليا,إنه يعطي دفعة تفاؤل وأمل , وبكل مرة أفتحه وأنا محبطة أقول في نفسي لأ.. لسا الدنيا فيها خير وإلا مارب العالمين يحسن الأحوال ويجمل الحال .
وهالوصفة الحلوة إن شاء الله تكون فال خير على الجميع , لأن منظرها كثير بيفرح العين والقلب.
ويااااااااااااااااااااااارب تنهي الأمور بسلام وخير, وتسلم إيديك يارب وطول العمر تكوني وعيلتك وكل أحبابك بخير ونعمة وصحة وأمان.
4 لـ 4
كل سنه و انتي و الموقع من نجاح لنجاح و من تقدم لتقدم…
و الله يا رب يصلح الاحوال و ويفرجها من عنده يا رب
شكلها كتير بشهي وحلو,وانشاءالله كل سنه وانت والموقع بألف خير والسنه يلي جايه بتكون همومنا مفرجه ومنحتفل كلياتنا وكل وحده تعمل قالب كيك وناكله مع بعض بس بقى كل وحده ببيتها :grin
انشاءالله تكوني بخير,
والله هالكم يوم بصراحه انشغل بالي عليكي قلت لحالي خيرانشاءالله ليش غاطه منى
دعائنا للاهل كلن بسوريا.
يسلموا إيديك يا منى على الجاتو إن شاء الله رح اعمله عن قريب بس ما تتحسن نفسيتي بالفعل يا منى بسبب الوضع بسوريا انا كتيير متدايقة ومخنوقة حتى صدف من إسبوعين عيد ميلاد إبني الأول وشو كنت مشتهية على حفلة غير شكل بس طبعا لغيت الفكرة وإقتصر الحفل يللي دام ربع ساعة على إبني وابوه وانا وصورنا كم صورة وخلصت الحكاية الحمد لله على كل حال الله يفرج الهمة عن بلدنا ويحميلنا ياها من كل شر
كل عام وانت وموقعك وكل اهل الموقع بمليون خير والامن والامان ببلدنا ان شاء الله غيمة وبتمر على خير يا رب ويسلم هالايدين اللي رتبت وعملت فعلا تغيير شكل وان شاء الله على التجريب القريب شكرا ميمو
يسلمو هالايدين الحلوين الا ما بيعملوا الا كل شي طيب وحلو وفنان يا ست منى
كل سنة وأنتو والموقع سالمين وعقبال المية سنة ان شاء الله
والله يفرج الهم والغم وبينجلي الظلم والفتنة بجاه رب العالمين وياخد كل واحد جزاته جراء جرائمه ويحمي بلادنا ويعافيها من شر الفتنة :sigh
وان شاء الله دايمآ منورة الموقع ولا بقى تطولي الغيبة علينا ولا منشان تعرفي غلاتك عنا
مع أني جديدة عالموقع بس بأكدلك أنو غالية والكل مستفقدلك يا ست الستات
ورح جرب هالكيك اللي مبين أنو شي كتير طيب
بس سؤال هلق السيروب بس مي وسكر ليش ما يكون جيلي بالفريز مذوب ؟؟ما بعرف حسيت ممكن يكون أطيب وأنكهه :p
السلام عليكم كيفك يا ست الكل “منى”الله يسلم ايديكي ع كل شي ويعطيكي العافية يارب بالمناسبة انا اسمي خلود وكنت كل ما سجل اسمي يرفضو الموقع لان شكلو مستخدم فحترت شو اكتب فقلي زوجي كتبي بنت دير عطية ما بكون حدى مسمي هيك وفعلاً زبط انا بحب اتواصل معكم بس مشكلتي انو ما بحب facebookمع اني عاملة حساب
بس ان شاء الله بحاول اتعود استخمو وفوت لان هداك اليوم فتت ع صفحتك بالفيس بوك وعجبتني كتير والله والكلام المتبادل مع الصباياحلو والواحد بيستفاد وبيتسلى وخصوصي اذا كان بالغربة متلي :cryع كل حال طولت عليكي وان شاء الله بنضل ع تواصل وتكوني بخير انت والأهل وكل امةمحمد “ص”وهلأ السلام عليكم 
صح صح نسيت قلك شغلة كتير حلوة انو مبارح وقت قرأت تاريخ افتتاح لقمة طيبة صدف انو نفس يوم عيد ميلاد زوجي :grin فهالصدفة كتير كانت حلوة وان شاء الله كل سنة وعام انت ولقمة طيبة بمليار خير يا رب وكل الأهل والاحباب
وهلأ سلام
الله يباركلك يا منى بهالموقع اللي هو عن جد صدقة جارية و كل عام و انتي و العضوات و احبتك بخير و الله يديم النعمة و يحفظها من الزوال ,,قلبي عليكن بسوريا ان شاء الله هيك يا ربي تهدى الامور و تحقن دماء المسلمين ومتل ما قلتي صعب الواحد يفرح بهالاوقات بس الحمد لله على كل حال …
:zzz
أما عن الكاتو فما لقيت وصف اوصفو جربتو وطلع نمي نمي على قولتك اكلت نصو ههههه بس انا بالسيروب عملت عصير فريو مخفف و طلع كتييير طيب..ما شاء الله عليكي اختي منى الله يديمك و يباركلك بصحتك و عافيتك و يبارك بلقومتنا
كل عام وأنتي بألف خير وكل أهل الموقع لأني عنجد عيلة حلوة وان شاء الله من نجاح لنجاح أكبر
والله يرجع الأمان لوطننا يارب
كيفك منى أنا عاتبة عليكي لهلق مانزلتي وصفة خل التفاح أو السلطة الروسية أوطريقة صنع الكريمة ولارديتي على رسايلي ولا قلتيلي رأيك بطريقة حفظ الزعتر
هلا جمان
شكرا حبيبي , الله يديم الود و المعروف و ان شاء الله تجربيها و يطلع طيببب
منورة
سلام لاروشة
و الله يا لارا حاسة الدنيا صارت عتمة و القلب ميت و كل ما بتجي زيق بسمة لوجي , بخجل و برجعها لمحلها قبل ما تطلع , الله يحمي الكل و يامنا ببلادنا و يحميها من الفتن و يمضي هل الايام السودا على خير
الله يسلمك يا جميل و تبقي منورة الموقع على طول لان انت كمان مساهم كبير و مهم هون
هلا دكتورتنا الحلوة
امين يا رب و يحمي الجميع و لا ياذي احد
و انت بخير و صحة انت و كل عيلتك
هلا foforose
امين امين , الله يفرج عن الكل و لا يترك حدى بهمه
عجبتني الفكرة , هي مشاركة انترنتية متل ما كنا نتشارك بالمدرسة :grin
تبقي بخير على طول و مية هلا فيك
هلا غفران
و الله حبيبتي كلنا ما عدنا اشتهينا شي , بس الحمد لله انا حاسة انو ربنا رح يفرجها قريب باذن الله
كل سنة و كتكوتك سالم , سبحان الله الدنيا مرت بسرعة لسا من كم يوم ولدتي , الله يبارك فيه و بكل عيلتك
هلا غيوثة حبيبتي
امين امين , ان شاء الله تمر و بسرعة
رح استنى رايك بعد التجربة و ان شاء الله تكون على زووءك و تطلع نم نم
هلا ام ريماس:)
امين امين امين , عن جد دعائك رائع , الله يحمي بلادنا و تبقى عالية على طول
شايفة , كيف حسيت علي اني حابة شوف غلاتي عليك :zzz و الحمد لله طلع في مودة كتير الله يحفظ الحب و المودة و الخير دوما
يا ستي بيصير اكيد , ما خطرتلي الفكرة بصراحة و لو كانت اجت على بالي كنت جربتها
بتمنى اذا جربتيها تخبريني , هلا حبيبتي
هلا خلود
منورة هون و هونيك و في كل محل
هلا هون شي و هونيك شي و كله مع اللمة الحلوة حلو , ان شاء الله منشوفك على طول
كل سنة و انت و ابو الشباب بالف الف خير و تبقي ان شاء الله تاج راسه و نور عيونه
السلام عليكم كيفكن كلكن انشالله تكونوا بخير
يسلم دياتك على الكيك
وبدعي ربي يسلم بلادنا ويطمني على اهلي اللي ما بعرف عنن شي
الله يحمي سورية ويامنا فيها
ويبعد عنا الفتنة
ويفرج الهم عن فلوبنا
عزيزتي منى أنا من أدلب والحمد لله مافي شي الكل بأمان وسلام ولا في شي لا تصدقي القنوات الكذابة اللي هدفها نشر الفتنة والخوف والحزن بقلوبنا ونحنا إذا كنا قويين وماردينا عليها وعشنا حياتنا بشكل طبيعي فهادا أحسن شي ممكن نقدمه لوطنا سورية
يا سلام يا نورا لو كان الحل بهل البساطة , انا زعلانة على كل نقطة دم عم تسيل و على كل عين ام عم تبكي و على كل قلب محروق
كل سنة ولقمة طيبة بألف خير أنا حبيتك كتير يا منوشة وخاصة انو اسمك متل اسم حماتي وأنا بحبها كتير وأنا زعلانة عالأوضاع اللي عبتصير للأمة العربية وبالفترة الأخيرة كنت مارح أنزل على حلب بس بعدين غيرنا رأينا وقررنا ننزل وأنا دائما عبدعي دائما الله يحسن أوضاع العرب وخاصة أني عايشة بجوار الرسول صلى الله عليه وسلم وحابة أقلك أني كتير حابة أكلاتك
السلام عليكم اخت منى كيف صحتك ان شاء الله تكوني انت وكل اهلنا بسوريا بخير وسلامة يارب .عم تطولي الغيبة علينا بس معلش معذورة :roll بس ان شاء الله تكوني منيحة انت وكل الاهل ’بالمناسبة انا جربت هالكيكة الحلوة وتعلمت من حضرتك شغلة”اشياء” كتير حلوة ومنها ان كل ما طبقة وصفة من هالموقع الرائع اخدلو صورة ومن كتر ما حبيت هالكاتو حطيت صورتو ع ايميلي وبعدو عملت كروسان وكمان حطيت الصورة ع ايملي 8) 8) فالله يعطيكي العافية ويجزيكي الخير .ومشكورة ع ردودك الحلوة يا حلوة.
السلام عليكم,كيف الصحه ست منى والاخوات انشاءالله بخير,بدي اطلب منك طلب بس انشاءالله ماكون عم تقل دم
لان هالطلب مو مشاني مشان رفيقتي زوجها اخد شهادت الدكتوراه وبدن يعملو عزيمه للصدقات ورفيقتي كتير محتاره شوبدها تعمل طبق تاني لان الطبق الاول هو الكبه المشويه وماعم نلاقي طبق تاني يتوافق معه
ف اذا عندك شي اكله بتتناسب مع الكبه الملكيه(انا هيك بقول عنها) ياريت تساعدينا ومنكون مشكورين الك واذا اي اخت حابه تعطينا فكره كمان زيادة الخير خير والله يعطيكن العافيه.
الله يعطيك العافيه ست منى ويبارك بعمرك وعملك
استفدنا منك كتير جدا
بارك الله فيك
لي عندك طلب :
انا مسافره وتاركه زوجي لحاله وبدي ساويله شوية طبخات وأفرزها , ممكن تفيديني شو بقدر فرزه من الطبخات وممكن يقعد الاكل قد ايه سليم بالفريزر وهل الاطباق مثل المكرونه بالباشاميل وكفتة داوود باشا ممكن يتفرزوا
بانتظر ردك الله يجزيك الخير
لأخت اللي حابة تعمل كبة مشوية نحنا عادة نعمل معها متبل الباذنجان المشوي وبابا غنوج وشوربة عدس هي بتكون مقبلات مرافقة للطبق ولذيذة معه واذا حابة طبق تاني رئيسي ممكن تعمل الكبة اللبنية هي كمان أكلة مفتخرة انا شخصيا بحشيها نصف مقدار دهنة مطحونة مع بصلة فريش والنصف الثاني لحمة مفرومة مقلاية مع بصلة اخلطي هالمزيج مع جوز مفروم واحشي الكبة بتطلع كبة روعة :zzz
وعادة العزيمة اللي معتمدة على أكلة كبة بنحب نعمل اصناف الكبة التانية معها يعني حتى المقلية بتكون صنف لذيذ وبتطلع العزيمة معتبرة ولا تنسي التبولة اذا ما ساويتي البابا غنوج لأن الاصتاف بتحتاج نوع سلطة مميز
انشاء الله كون فدتك برأيي ومبروك عالدكتوراه
شكرا كتير على مساعدتك وانا اسفه لهلق لحتى قرأت تعليقك, معك حق والله هالافكار كتير لذيذه وطيبه الله يعطيكي العافيه.
على فكره انا اسمي فرح كمان بس وقت سجلت بالموقع قالولي انو في اسم فرح فحطيت اسمي الدلع :roll
يسلمو ايديكي شكلو طيب بس بدي اسألك عن شغلات انا لساني صغيرة ومابعرفهن شلون بساوي وصقة الكيك الاسفنجي؟ وشو هاد الجلاتين
:upset
شكلوو كتييير طيب
بس انا عندي مشكلةانو مابيظبط الكيك معي ابداااا ولا مرة غيربعيدميلاد اخي بسسسسس
وانا كتير بحب الكيك ولحلوياات
شكر الك وتحيتي
سلمت يداكي يا منى…
تسلم ايديكي على هالوصفه السهله بالاول كنت متردده اني اعملها لانو كنت مفكره انها صعبه وكمان الخلاط تبعي خربان بس بالخلاط اليدوي ماشي الحال هلق بقوم وبطبق الوصفه وشكرا الك منى على هالموقع الرائع
أنا كتير زعلانة منك يا منى لأنك ماعما تردي علي ولا حتى بتعليق صغير ولانزلتي ولو أنه وصفة وحدة من يلي وعدتيني فيهن الحقيقة خاب أملي فيكي وبالموقع ومابقى رح أدخله مرة تانية الوداع
هلا ام نوران
يبارك بعمرك و بنوران , و بكل غالي على قلبك
امين امين , و الله عم اخجل ابتسم او اتهنى بعيلتي , الله يمضي هل الايام على خير يا رب
صحة و الف الف عافية يا رب , مممم فكرة بتجنن , ما شاء الله شو نفسك طيب و افكارك كتير بتضيف للوصفة
منورة على طول حبيبة قلبي
هلا نيسو
و انت بالف خير و تبقي منورة و فرد بعيلتنا
يا هلا
هلا نورا
لا تعتبي حبيبتي و لا تزعلي , معك حق عم اتاخر بالردود و الطلبات و مقصرة بالموقع , بس ما بقبل تعتبري انو انا ما عم رد عليك انت حصراً :roll
بكل الاحوال الموقع مفتوح الك دوما و بتمنى ما تزعلي
هلا ام لطفي
الله يسلمك حبيبتي , صحتين و الف الف هنا , انبسطت انو عجبك
منورة 8)
و عليكم السلام و رحمة الله و بركاته تالا
من زووءك حبيبتي , الله يسلمك و يحفظك من كل سوء
امين امين , الله يطمنك عليهم قريب :roll و ابقى طمنينا
هلا ام عابد
و انت بالف خير حبيبتي و بصحة على طول , الله يخليلك حماتك و تبقى العلاقات حلوة و يبقى الود دايم
امين امين , الله يمرء هل الايام على خير
الله يهنيكي بهل الجيرة , اللهم صلي على النبي , ادعليلي