كباب هندي


         وصفة : omtasneem                 2009/02/05                 17 تعليقات
كباب هندي

كباب هندي

- طريقة التحضير :

علبة بندورة كبيرة مقشرة ومنزوعة البذور
2فليفلة خضرا مقسمة لاعواد
علبة فطر متوسطة الحجم
2 بصلة متوسطة الحجم مقسمة لشرائح
لحمة غنم تقريبا نصف كيلو
ملح بهار
صنوبر حسب الطلب
ملعقتين زبدة
- طريقة التحضير :

• نخرج اللحمة من الثلاجة قبل تحضير الخضار كي تفك ويسهل دعكها , نفرم البندورة مكعبات كبيرة شوي والبصل ونفتح علبة الفطر ونغسله بالماء ونفرم الفليفلة .

• نقلب الخضار على النار قليلا ليدبلوا مدة عشر دقائق مع ملعقتين زبدة .

• نحمي الفرن عل 200 ثم نضع الخضار في صينية غميقة شوي نضعهم في الفرن ليتعقدوا منيح ويسمكوا .

• ندعك اللحمة بالملح والبهار والصنوبر بالايدي وبلاخر نضغط عليها بالاصابع ليتنطبع شكل اصابعنا , نرتبها فوق الصينية وندخلها حتى تستوي اللحمة وتحمر مع باقي الخضار تقدم مع الارز بالشعيرية والفجل والنعناع .

ملاحظات :

ـ في حال عدم توفر علبة البندورة المقشرة بامكانك سلق 5الى6 بندورات وتقشيرهم .

ـ بامكانك اختي عدم وضع الخضار على النار وادخالهم في الفرن مع مراعاة اطالة الوقت .

ـ اخيراانا معكم في اي سؤال وتحت الطلب وساحاول وضع صورة عن قريب إن شاء الله .
  • وصفات تانية ممكن تعجبك


التعليقات

  1. لارا مينا 10 February 2009

    مساء الخير أم تسنيم وللجميع… وتسلم إيديكي وإيدي سلفتك على الوصفة الطيبة وألف مبروك البيت الجديد وبيت الهنا إن شاء الله .. أنا حابه أعمل هالوصفة أكيد.. بس عندي كم سؤال قبل :
    1) اللحمة بتكون مفرومة ناعم أو خشن ؟
    2) الفطر نقطعه ولا زي ماهو كامل ؟
    3) تقريبا كم الوقت إلي تاخذه الخضار في الفرن لحتى تسمك وتتعقد ؟
    4) آخر خطوة مافهمتها كثير, يعني نشكل اللحمة مثل تشكيل الأخت منى في وصفة كبة نية بزيت الزيتون ؟
    5) لما تخلص الطبخة بيكون فيها سائل شوي ولا نخليها لحد ماتنشف ؟
    وألف شكر لك مرة ثانية وبانتظار ردك والصورة كمان … تحياتي .

  2. omtasneem 10 February 2009

    السلام عليكم ورحمة الله وبركاته. وايديك حبيبتي منى والّله فكرة دبس رمان بدي جربها مرة الجاية وخبرك وتسلميلي على طلتك الحلوة عل الاكلة

  3. omtasneem 10 February 2009

    السلام عليكم ورحمة الله وبركاته. هلا عزيزتي لارا وتسلمي على ذوقك حبيبتي اللحمة بتكون ناعمة والفطر اذا كان كامل نقسمو بالنص والخضار تقريبا بتاخد ساعة لساعة ونص بصراحة ماعيرت عليها بس إن شاء الله مابتاخد اكتر من هيك واللحمة نعملها متل الاخت منى بس نعرّضها شوي لاني رح تكش على الشوي وانا اسفة على تاخر ردي بسبب عطل في كمبيوتري واي سؤال انا بخدمة عيونك الحلوين وبتمنى تخبريني بالنتيجة :roll

  4. omtasneem 10 February 2009

    السلام عليكم ورحمة الله وبركاته. اسفة نسيتلك اخر سؤال ازرعيا بدقني لأ حبيبتي لازم يكون فيها شوي صوص وصحتين وهنا

  5. لارا مينا 11 February 2009

    لكي كل الشكر أختي على الرد وأكيد أول ماإعملها رح أخبرك بالنتيجة ومعليش تحملي أسئلتي شوي …إنتي خبرتيني إن الخضار نطبخها قبل ساعة( تقريبا ) وبعد ماتتسبك نضيف اللحمة وممكن تأخذ كمان نصف ساعة زيادة فسؤالي هو :
    ليش الخضار بتاخذ هالوقت الطويل مع إنهامطبوخة قبل على النار وكمان الخضار المستخدمة من النوع البسيط إلي مابتاخذ وقت بالطبخ ؟
    وعذرا على الإطالة بس دايما أحس إن هذه التفاصيل الدقيقة بتفرق في نجاح الطبخة أو فشلها … ولكي خالص شكري وتقديري .

  6. omtasneem 12 February 2009

    السلام عليكم ورحمة الله وبركاته. خدي راحتك حبيبتي بطرح الاسئلة لعيونك ياستي المشكلة بالخضار عنا بتلاقيها بلاستيكية مو متل بلادنا طاز ماتاكلي هم الاكلة كتير سهلة ورح تنجح معك إن شاء الله من اول مرة بالهنا مسبقا ;)

  7. ميساء 17 February 2009

    يسلمو حبيبتي فعلا هي أكلة معتبرة ولكن اسمحيلي اذكر وبما أنه في موقعنا شعارنا الأكل على أصوله فالوصفة الأصلية ما فيها فطر بس هالشي لا يمنع التجربة وأكيد رح تطلع كتير طيبة ويسلمو ايديكي ;)

  8. omtasneem 18 February 2009

    السلام عليكم ورحمة الله وبركاته. هلا عزيزتي ميساء نورتي مزبوط حكيك بس منى بتعملها متل طريقتي تمام وهادا دليل انو في ناس بعملوها بفطر وناس لأ على كل حال حلو الواحد متل ماقلتي يجرب ويشوف بتشكرك على طلتك الحلوة

  9. غيث 22 February 2009

    اهلا بالاخت الغالية ام تسنيم والله يعطيك العافية على طبقك ورح اجربه عن قريب ان شاء الله وحلو كمان بهالموقع التجديد يعني اضافة فكرة جديدة على طبخة ما لا يمنع من ان يكون الاكل على اصوله لاننا جيل اليوم مللنا الاكلات الكلاسيكية وصرنا نحب نغير وعندنا روح المغامرة بينما ستاتنا مثلا ما كانو يغيرو اي شئ بمقادير الطبخة اللي توارثوها عن اهلهم خوفا من ان تنتزع الطبخة كلها على حد رايهم اما نحن عم نجددونضيف والحمد لله شي طيب عبيطلع وتغيير شكل والله يسلم ايديك ام تسنيم وشكرا لمنى ولكل المساهمات والتعليقات اللي عم تغني الموقع بفوائد عظيمة

  10. omtasneem 23 February 2009

    السلام عليكم ورحمة الله وبركاته. مشكورة حبيبتي غيوثة على كلامك وتعليقك وانا معك بكل كلمة قلتيها وإن شاء الله تجربيها وتعجبك سلامي لك :)

  11. mayada 23 February 2009

    السلام عليكم ياعزيزتي الكريمةكيف صحتك ان شاء الله تكوني بالف خير الله يخليلنا ياكي ممكن تساعديني لو تكرمتي علي طلبي صعب شوي ارجوكي تلاقيلي الحل انا وزوجي واولادي كتير كتير كتير مشتهيييييييييين عل مربى القرعة ولكن لا يوجد عندنا بشيكاغو كلس وشو اعمل ارجوكي بدي اكل مربى القرعة يم يم يم سلام ميادة

  12. منى 24 February 2009

    هلا ميادة :)
    ولي على قلبي , كيف هي رح نحلها , و الله لو فيني كنت بعتلك مربى خالص و جاهز :roll

    في وصفة مربى القرعة , ذكرت ايما أن في أميركا كلس خاص بالمخللات , ممكن تجربي بركي بينفع :?

  13. منى 3 September 2009

    سلم هل الديات ام تسنيم على هيك وصفة طيبة , انا بحبها كتيررر كتير و بعملها تقريباً بنفس طريقتك بس بضيف مع الصوص دبس رمان شوي صغيررة بالاخير :zzz

    و قصة الاسم كمان غريبة , لان اسمها كباب هندي بس هي وصفة شامية :grin

    شو بدنا بكتر الحكي بالفعل اكلة معتبرة

  14. منى 3 September 2009

    هنا و ريتو مية الف عافية و صحة على قلبك يا رب ;) بس غريبة ان خضرتك بقيت صامدة على موقفها , المفروض تستوي بسرعة , سبحان الله اتوقع في فرق بالخضرة بين سوريا و السعودية و المهم الواحد تعرف تعدل الوصفة لحتى تناسب ظرفها :zzz

  15. لارا مينا 3 September 2009

    عملت الكباب الهندي وصفة طيبة كثير مع إن الشكل مختلف كثير عن صورة الأخت نسرين في مدونتها :grin
    وخضاري ماشاء الله عليها قوية كثير ورفضت الإستسلام والذبول وحافظت على شكلها, مع إني طبختها قبل على النار وكمان في الفرن أكثر من ساعة… والظاهر إن اللحمة اتحمرت معي زيادة عن اللزوم وعلامات أصابعي إلي عليها ماأدري وين اختفت :grin
    بس مش مشكلة المهم إن طعمها ممتاز وأكيد راح أعيدها مرة ثانية.
    صورة تطبيقي:

    [img]http://up4.m5zn.com/9bjndthcm6y53q1w0kvpz47xgs82rf/2009/9/2/01/z4mjxswho.jpg[/img]

    ألف شكر لك أم تسنيم ومنى .

  16. gsm 1 October 2009

    السلام عليكم إم تسنيم بكرا الغدا عندك إن شاء الله رح اجرب اعملها بكرا وببقى بخبرك عن النتائج :zzz

  17. gsm 8 October 2009

    السلام عليكم إم تسنيم يسلموا إيديك على هل الوصفة عن جد كتيير طيبة وكتيير عجبت الجماهير وهادا اهم الشي بس انا ضفت شغلة صغيرة من عندي بالاول إستخدمت 3 انواع من الفليفة الأصفر والاحمر والاخضر لحتى يعطي لون حلو للوصفة والشغلة التانية هو إني ضفت معلقة صغيرة دبس فليفلة وعطت نكهة ولا اروع الله يعطيك العافية وتبقى على طول نزليلنا وصفات حلوة وشهية

تقييم الوصفة
عاديةقد أحضرهاجيدةممتازةأكثر من رائعة (1 votes, average: 5.00 out of 5)