كبة نية بزيت الزيتون


         وصفة : منى                 2008/09/07                 30 تعليقات
كبة نية بزيت الزيتون

·          يغسل البرغل جيداً و ينقع بالماء لمدة 10 دقائق ثم يصفى جيداً .

·          يدعك البرغل مع رب البندورة و دبس الفليفلة و البهارات ثم يدار على ماكينة فرم اللحمة 3 مرات و باخر دور يضاف الجوز و يدار مع الكبة .

·          تفرم البصلة ناعماً جداً ثم تقلى بالزيت حتى تشقر قليلاً .

·          تصب البصلة مع الزيت فوق الكبة و تدعك الكبة باليد لمدة عشر دقائق .

·          تقطع الكبة لكرات ثم يضغط عليها لتأخذ شكل أصابع اليد ثم تصف في طبق التقديم .

·          يرش الجوز أو الصنوبر و المزيد من زيت الزيتون و تقدم الكبة .

 




2 كوب برغل ناعم
2 كوب جوز , يفضل الجوز الشامي لان لونه فاتح
ملعقة كبيرة رب البندورة
2 – 3 ملعقة كبيرة دبس الفليفلة
رشة ملح
نصف ملعقة صغيرة كمون
رشة من بهارات الكبة في حال توافرها
بصلة متوسطة مفرومة ناعماً
نصف كوب زيت زيتون

للتزيين :

المزيد من زيت الزيتون
صنوبر محمص أو جوز مجروش





• يغسل البرغل جيداً و ينقع بالماء لمدة 10 دقائق ثم يصفى جيداً .

• يدعك البرغل مع رب البندورة و دبس الفليفلة و البهارات ثم يدار على ماكينة فرم اللحمة 3 مرات و باخر دور يضاف الجوز و يدار مع الكبة .

• تفرم البصلة ناعماً جداً ثم تقلى بالزيت حتى تشقر قليلاً .

• تصب البصلة مع الزيت فوق الكبة و تدعك الكبة باليد لمدة عشر دقائق .

• تقطع الكبة لكرات ثم يضغط عليها لتأخذ شكل أصابع اليد ثم تصف في طبق التقديم .

• يرش الجوز أو الصنوبر و المزيد من زيت الزيتون و تقدم الكبة .




  • وصفات تانية ممكن تعجبك


التعليقات

  1. Eman 8 September 2008

    يسلمو إيديك ميمي ،أنا وزوجي كتير بنحبها ،وكل فترو بنشتهي عليها ،لهيك صرت أعمل كمية كبيرة وفرزها ..

  2. منى 8 September 2008

    هنا على قلبك و قلبو يا حق , و انا متل حكياتك بضاعف الكمية و بفرزها لحتى تصير سفرتي مرتبة و متنوعة برمضان ;)

  3. غيث 8 September 2008

    لك دخيل الحلبية وطبخات الحلبية ما اطيبها الله يسلم دياتك يا حق لك والله انا مشغولة برمضان كتير الوقت بيمر بسرعة بس الا ما اطل ولو مرة على الموقع لاشوف جديد فنانتنا منى وكمان منها باخد الوصفة اللي ناوية اعملها وبمشي عذرا لازم اشكرك على كل شي عملته بس والله كتير زركة المهم يا عيوني من كم يوم لبين ما اجا زوجي من عمله نزلنا لنتشري بعض المتطلبات للطبخ اللي كاتبتهم او طابعتهم من موقعك اللي كان سر تميزي بهذا الرمضان الله يجزيك الخير كان الوقت مساء لاني ما بقدر انزل بالشوب نهارا وكمان زحمةووو وبلا طول سيرة رحت على هايبر ماركت محلين ما كان في لبن ولازمني لانه فطوري تاني يوم كبة بصينية ومعكرونة بالباشاميل من تحت دياتك قام خطر ببالي اعمل لبن على طريقتك يعني ضروري لازم احل المشكلة المهم عملته وكتير طيب بس طلع مريق واله مطة شوية بس كتير طيبة طعمته وكان صالح لان يكون عيران اكتر من الاكل ومشي الحال مع الكبة والمعكرونة بس عجب ليش كان مريق وماطط بس والله فكرته حلوة وخاصة عند الضرورة متل ما صار معي واسفة كتير كتير على غلاظتي وسامحونا هههه

  4. غيث 8 September 2008

    سؤال تاني دخيل عينك منى المعروك هنا ما شفته الابالندر بمحل واحد واشتريناه كانت طعمته مالحة وانا بحب معروك حلب سؤال رح جرب البريوش بطريقتك بس رح اكتر له سكر لاني بحب الحلو برمضان كتيروشلون بدي اعمل له على وجهه هاللمعة متل معروك حلب عبيلمع وحلوو لا عندك رأي تاني الله يجزيك الخير يا رب والله تاعبينك معنا صحيح عملت اطيب بين نارين من موقعك على سيرة الحلو والحشوات اخدتها من عندكم وما فيني اقلك الا يسلمو ايديك والله يجعل دعائي لك من نصيبك واسفة كتير كتيرعلى اطالتي

  5. غيث 9 September 2008

    منى اخر تعليق والله التوبة حتى ما اكلها بهدلة مرتبة شو ما بقى حدا بالموقع غيري هلق رح تقولي لي ارجعي لرمضان وانشغلي عنا شوية على ثقالتي بس عفوا انا الان طلعت على البريوش قام وضحتي لنا فيه انه نفسه المعروك مالي خبر والله صراحة انا كنت محسبة اني الميني صمون هو بريوش والمعروك هو الاقراص الكبيرة المدوروة او المطاولة سواء كانت فارغة او محشية لذلك اكيد رح اعمل البريوش مادامه هو نفسه المعروك وشكرا لك للايضاح والله ناقصنا كتير معلومات لنصير ماهرات بالطبخ عموما شكرا لك وتحمليني الك الثواب بهالشهر الفضيل

  6. منى 9 September 2008

    هلا غيوثة حبيبة قلبي :)
    هنا و عوافي على كل شي جربتيه و ان شاء الله الك متل هل الدعوات و أحلى و أغلى يا حق ..

    اللبن , ما عم يخطر ببالي و لا فكرة , يعني مريق كان ممكن ااقل الك من نوع الحليب أو ما خليتيه يتخمر لوقت طويل أما ماطط هي فما خطر ببالي و لا فكرة :roll , ممكن تجبري نوع حليب غيره المرة التانية بركي من نوع الحليب , أو ليكون ما بيصير يتحضر بالحليب المبستر لأن انا بساوي اللبن بالحليب العادي الي منجيبه ;)
    اااحترت غيوثة , يلا الحمد لله ان مشي حاله متل عيران و خيرها بغيرها ان شاء الله

    البريوش الي بالموقع كنت حضره السنة الماضية و يطلع نفس المعروك , هلأ عندي أكتر من وصفة جديدة من دون بيض و أظن أن هي أظبط , جربتها أول واحدة بس طلعت بهدلة , رح جرب غيرها و ان شاء الله بتطلع تمام ,لان بلا بيض أخف و أسهل , جربي هلأ البريوش و رح يعجبك كتيررر ان شاء الله , وصفة البريوش بالموقع سكرها مناسب ما بدها سكر كمان و للوش لحتى يصير عم يلمع أنا بعمل قطر مريق و بدوب معه شوية عسلو بدهن البريوووش, يمممي

    غيوثة حبيبتي رح ازعل منك , انا كتير بنبسط لما بحكي معك و بسمع منك و عن أخباارك هلا فيك أختي :)

  7. muna.g.7 9 September 2008

    الحمد الله انك نزلتي وصفة كبة نية بدون لحمة نية لاني ما اتخيل اكل لحمة نية لاكن هالوصفة شكلها لذيذ انشاء الله في اول عزومة اجربها

  8. منى 9 September 2008

    في كتير ناس متلك , انا بمووت عليها بكل اشكالها , ان شاء الله تجربيها و تعجبك منونة :)

  9. ام دانية 9 September 2008

    تسلم ايدك انا كتير بحب الكبة النية والله وشكلها بشهي

  10. منى 9 September 2008

    اتفضلي ام دانية و الأكل على قد المحبة ;) مية هلا فيك نورتي أختي

  11. ام نور 9 September 2008

    سلم هالديات يا عسل مع اني كتير بحب الكبة نية بلحمة هبرة
    كتير وبرغل قليل بس انشالله رح جربا بلا لحمة بهل يومين عطريقتك لان اكيد طيبة وتغير شكل :p
    بتعرفي منى نحن بلبنان منحط حبق مع البصلة ومنفرمون ناعمين ومنضيفون عالبرغل كتير بيعطي نكهة شهية

  12. ام نور 9 September 2008

    منى انا عندي فكرة جربتا ميشان البريوش يلمع بحط السكر ناعم تبع المعمول مع ماء واذيبهم وبعدها اقوم بدهن وجه البريوش بالفرشاة

  13. منى 9 September 2008

    هلا ام نور :)
    هي فكرة الحبق سمعت ان اللبنانية بيضيفوها, أظن انك قلتيلي عايها شي مرة :roll
    جربتها و متل ما قلتي بتضيف طعمة طيبة كتير , هلا بهارات الكبة الجاهزة فيهم حبق اذا كان الحبق مو متوفر فريش

    فكرة حلوة و سهلة كتير لوجه البريوش , ألف شكر ليك أم نور على الأضافة يا ست الجود و الكرم ;)

  14. ام نور 9 September 2008

    انت الكرم والجود كلو حبيبة قلبي على فكرة صرت عاملة البريوش اكتر من سبع مرات وبيطلع ولا اطيب وكل مرة بموديل جديد وحشوة مختلفة وما حدا اكلوا عندي الا ما حبوا وفكروا جاهز والفضل الك الله يجزيك الخير في الدنيا والاخرة :)

  15. منى 10 September 2008

    هلا ام نور حبيبتي , ريتو هنااا و عوافي , يتعرفي من ايمتى رح اسالك شو صار بالبريوش من وقت حفلة ابنك و برجع بنسى :zzz هنا و يا حق و الك متل هل الدعوات و احلى

  16. Iman 11 August 2009

    اهلين منى. ما بعرف كيف فاتتني هالكبه. قريت عنا بعزيمتك لصاحباتك. شكلا كتير طيب. عندي سوءال منى كيف بتفرزيها? هل بعد ما تشكليها او هيه و عجينه بتحطيها في كيس نايلون بالفريزر? كتير حابه اعملا لرمضان و غيره و حابه فرزها. شكرا كتير

  17. منى 14 August 2009

    هلا امونة :)
    بفرزها متل ما هي بس بحطها بكيس و بالفريز و لما بدي برجع بطالعا و بشكلها اما كتل الصورة , او بمدها و برش المكسرات و الزيت و نممم :zzz

  18. ام احمد الغالي 16 August 2009

    السلام عليكم
    منى اليوم جربت الكبه بس عندي سؤالين
    الكبه ما طلع لونها متل اللي بلصورة
    تاني سؤال في شوية قرطة يا ترى ليش
    انا ما بعرف شي بلكبه واليوم اول مرة بستعمل الماكينه :eek
    الله يعينك علينا وعلى غلاظتنا بس شو بدك تعملي انتي علمتينا عليكي
    :zzz :zzz
    يسلم ديلتك يارب

  19. منى 16 August 2009

    القرطة جاية من أن البرغل ما انتقع لمدة كافية و اللون إما انك استعملتي برغل غامق و اما انك ما استعملتي جوز فاتح ..

    و لا يهمك انا تحت امرك حبيبتي و هلا فيكي ترجعي تديري الكبة و تحطي معها شوية مي لتروح القرطة , اما اللون فعوضك على الله ;)

  20. gsm 1 September 2009

    سلام عليكم منونة انا كان بدي اسالك انا كتيير مشتهية على الكبة النية بس المشكلة ما عندي ماكينة كبة يا ترى لو استعملت البرغل الناعم تبع التبولة وبعد ما انقعه احطه على الخلاط بيمشي الحال شو رايك بتزبط ولا لأ عم استنى ردك ويسلموا كتييير على كل شي الله يجزيك الخير على هل الموقع التحفة

  21. na3oom 2 September 2009

    منون يسلمو إيدكي الطعم بجنن
    المهم طلعت معي غامقة وعرفت السبب
    بس كيف ممكن اخليها برتقالي
    أحط دبس بندورة ولا دبس فليفلة

    الله يجزيك الخير مقدما
    نعوم

  22. منى 2 September 2009

    هلا gsm :)

    و الله ما بعرف اذا بتزبط , على كل ممكن تتحضر بالبرغل السميسمي ما بعرف اذا بتعرفي , بيكون حباته كتير صغيره , بعد النقع بالمي السخنة بتصفيه كتير منيح و بتدعكيه مع الهبرة , هلا ما بعرف كيف ممكن نطبق هل الحكي على هل الوصفة :roll

    فيكي تجربي بكمية صغيرة كتير و تشوفي احلىما تتورطي و بتجربي تضربي الكل على مفرمة البصل اذا عندك منها :zzz

  23. Eman 9 September 2009

    أختي gsm،أنا أحيانا بفرم الكبة على الفود بروسيسر، وبحط نص الكمية كل مرة ، وبمشي حالها

    بس سؤال منى إضافة الجوز هل هي ضرورية للكبة أثناء فرمها؟؟ أنا كنت دائما أعملها بدونها بس بخلط شوي جوز مكسر وبشكل الكبة أصابع ، عندي عزيمة بعد يومين ، خايفة أخاطر وأحطه ..شو رأيك؟؟

  24. ام عبد الوهاب 3 April 2012

    تسلم ايدك

  25. ام الحسن 14 March 2013

    مرحبا بالبداية بحب اتشكرك كتير ست منا ع هالموقع الحلو قديش تعلمن منو و صفات و كلها طيبة و فيها زوء عن جد من كل قلبي بدعيلك و بالنسبة للكبة النية انا بعمل متل هالطريقة بس ما بفرم الجوز مع البرغل و بضفلها دبس رمان شي نص كاسة شاي لكاس البرغل الكبيرة طبعا حسب حموضة الدبس بس صدقيني كتير دبس الرمان بيعطي نكهة طيبة

    • Mona 17 March 2013

      ممممم , يا سلام شي بيشهي و الله ام الحسن , دبس الرمان وين ما انحط طيب , شكرا للاضافة

  26. رانو 28 July 2013

    السلام عليكم منونة …انا بحب الكبة النية بالهبرة بس بالسعودية مابأمن اشتري …فرح اعملا بالزيت باعتبار وصفاتك اكيد روعة ..بس. نحنا عنا البرغل الناعم كتييييير ناعم ولما عملت البة المقلية اول مرة درته 3 مرات طلع متل عجينة البيتيفور هههه بقا مشان البة النية بيتحمل نقع و3 مرات اديره ..وعلى اي مصفاية اديره عالوسط ولا الناعمة؟؟ويسلمووو كتير

    • منى 29 July 2013

      و عليكم السلام رانو
      اذا ناعم كتير كتير انقعيه بشوية مي و ديره مرة او مرتين , حسب ما تشوفيه لازمه و ديره ع المصفاية الوسط
      مية هلا فيك يا زووء :)

  27. نور من قبرص 15 January 2014

    ماعندي ماكينة فرم اللحمة فيني اعملا بالبرغل الناعم بدعكه كتيركتير,يالله شومشتهي آكل كبة نية وهي حبيتا لانومابدها لحمة هبرة

    • منى 17 January 2014

      اذا استعملتي برغل ناعم سميسمي بتصير

      يعلى قلبي , يا ريت ااقدر البعتلك صحن اون لاين

تقييم الوصفة
عاديةقد أحضرهاجيدةممتازةأكثر من رائعة (2 votes, average: 3.00 out of 5)