كب كيك الخمس دقايق


         وصفة : منى                 2011/03/12                 34 تعليقات
كب كيك الخمس دقايق

يعني لسا ما لقفتها بس على وشك ..


أخدناها للمسكينة لعند الدكتور , و كانت القصة على اساس قسطرة , شغلة بسيطة , بس بعدها طلعت الشغلة معقدة كتير و بدها فتح و تغيير شبكة , و ما منعرف شو رح يصير معها , ااايه


عم احكي عن خفاقتي الكاتو , الله وكيلكن نشفتلي عيوني , بتكون شغالة متل الصلاة على النبي , فجاة بتصير تعن , قام شو قال الدكتور , قصدي المصلح , قال انو عم نخفق عليها كمية كبيرة , قلتله الله وكيلك كل عياراتي كاستين او ااقل , بنظرة تانية و متفحصة , الحقها بنظرة العارف ببواطن الامور , قالي طيب معناها عندك حل من تلاتة , اما بدك تكبيها و تخلصي منها , أو خليني جرب فيها بس ما بوعدك بشي , او اذا متمسكة فيها اتركيها عندك …قلتله اتركها عندي شو بدي اعمل فيها لا خليها عندك , يا بكبها و برتاح يا بتصير خلق و عالم ….


و بعد ما كانوا الجيران يتعزلوا بروايح كاتوياتي , اعلنا القحط العام . قالي ابو الشباب اي الغزالة بتغزل على عود , طبعا احمروا داناتي و خدودوي و ارتفع ضغطي و كنت رح ….. , بس بعدها قلت اي عن جد , خليني حضر كيك من دون خفق , لشوف شو بيطلع معي . و الي طلع شي بيجنن . سهل كتير لحتى بنتي الصغيرة صار حضرت الوصفة اكتر من مرة لحالها و الطعمة طيبة كتير و الحلو فيه انو اذا بقي لتاني يوم قطعة الو قطعتين , لان عم حضر ضعف المقدار المذكور , اي اذا بقي شي عم يطلعوا اطيب من اول يوم , و هلا احلى شي انه ما بده جلي , يعني طبقين كبار و مضرب سلك و معلقة للقياس و كاسة شرحه و قوالب الكب كيك و بس , المطبخ نضيف بعد الكيك , اي شو بدي أحسن من هيك , هادا كب كيك احلامي … لا و الالذ انو لما جربت اخفق البيض نظامي ما طلع بطيابة و لذة الي ما خفقته , ادامي هل الزلمة . يا جماعة كتابة هل الوصفة اخد وقت اكتر بكتير من تحضيرها . يلا ادامي على المطبخ و عيروا الساعة و رح تشوفوا انها رح تاخد 5 دقايق او ااقل لتصير بالفرن

بالصحة و الهنا

2 بيض
فانيليا
نصف كوب ( 125 غ ) زبدة سائلة
نصف كوب ( 125 مل ) لبن
نصف كوب ( 125 مل ) حليب
ملعقة كبيرة عصير ليمون
كوب و نصف ( 200 غ ) طحين
كوب سكر عادي
2 ملعقة كبيرة كاكاو بودرة
نصف ملعقة صغيرة بيكربونات الصودا
نصف ملعقة صغيرة بيكنغ بودر
ربع ملعقة صغيرة ملح





• يحمى الفرن على درجة حرارة 160 درجة مئوية .

• يخفق البيض و الفانيليا بمضرب سلك لمدة دقيقة , يضاف اللبن و الحليب و الزبدة و عصير الليمون و يقلب حتى يتجانس المزيج .

• ينخل الطحين مع بيكربونات الصوديم و البيكنغ بودر و الكاكاو و الملح ثم يمزج مع السكر و يضاف لمزيج البيض و يقلب بلطف .

• يصب المزيج في قوالب الكب كيك بحيث يملئ ثلثي القالب و يخبز في الفرن لمدة 20 دقيقة تقريباً أو حتى ينضج .

التعليقات

  1. DOUHA 12 March 2011

    بيجننن شكلو
    تسلم ايديك

  2. ام جنى عبيدات 12 March 2011

    يعني بالاول وئتي ألبي فكرت حدن صايرلو شي ( من غير شر ) وماخدينو دكتور…. ياستي تؤوم بالسلامه الخفائه.. وبالنسبه للوصفة مع انها 3:30 فجرا بس اناهلا رايحه اعملها ومعي بنتي اللي عمرها 3 شهور اللي ما بتنام ابدا :( وبخبرك بالنتيجه انشالله .. يسلمو دياتك

  3. أم نوران 13 March 2011

    ههههههههههه و الله ضحكتيني بعد ما رعبتيني …
    والله هالماكينات ما النا غنى عنهن بس و الله اهل زمان كانو يعملو كاتو وما في لا ماكينة و لا خفاقة هه ايه سبحان الله الحاجة ام الاختراع ..
    كتييير الوصفة مبينتا يبةو سهلة يا الله شو بحب الكب كيك بس ما عندي القاالب اهئ اهئ اهئ
    بس بتعرفي شي كتيييير حلو انو بنتك الله يخليلك ياها هم تساعدك كتيير بحب هالشغلة بحسا كلا انوثة و حنان و حب من طرف الام و البنت الله يخليلك ياهن و تشوفيهن عرسان و عرايس يا رب
    طولت عليكي بس قلتلك انا غرارة و ما بشبع من الحكي ههه الله يستر :grin

  4. منى 13 March 2011

    هلا ضحى :)
    الله يسلمك و يخليك , رح استنى تجربيها ;)

  5. منى 13 March 2011

    هلا ام جنى :)
    هي اصول الاكشن اتعلمتها من دان براون :grin
    خبريني كيف طلعوا كب كيكاتك , ستي امرك لله الله لا يحرمك الاجر يا رب , ما بيكبروا الا ليفنى الجسد :roll

  6. لارا مينا 13 March 2011

    أنا مثلك بيحمروا داناتي وعيوني لما يصير شيء ناقص بالمطبخ سواء مقادير أو أجهزة عطلانة :grin

    بس على قولة حورية المطبخ .. ست البيت الشاطرة مافيه شيء بيوقف في طريقهاوتقول ماعندي وماعندي

    وحدة من إخواتي لما يكون البيت فاضي من المقادير بتعمل سفرة مليانةمن لاشيء, حتى مرة عملت مكرونة بالبشاميل بالطحين الأسمر وطلع أحسن من الأبيض.

    الكب كيك واضح إنه سهل جدا ومافيه عذر للواحد مايجربه , عالتجريب أكيد , وتسلم إيديكي 8)

  7. غيث 13 March 2011

    الله يسلم ايديك بكرة على التجريب سبحان الله من كم يوم اشتريت قالب الكب كيك ولسع بدي احضر شي فيه وهلق اجت على رجليها شكرا ميمو :)

  8. gsm 13 March 2011

    يمييييييييي شكلها كتيير طيبة بس عندي شغلتين ما بصير احط الخلطة بورق الكب كيك من غير القالب لأنو ما عندي :sigh والشغلة التانية فيني استبدل الزبدة بالزيت على اساس اخف :zzz

  9. Lost spoon 13 March 2011

    يا ستي، انشالله تقوم بالسلامه إلا إذا عمرا خالص ولازم تعملي مشوار لمحل كهربائيات. أنا الخلاط تبعي ماشي حالو، بس قصة الجلي ولوقت خلتني من زمان أصدقاء انا ومضرب السلك، و مضربي أحمر وغير شكل. ومتل ما بقولو: الفرس من خيالها يا منى….
    Now back to english becuase it is hard to wrok on that yamli.com thing
    :roll :roll :roll
    I had couple of things to ask you: one: do you do rice stuffed chicken? I am dying to make one and always afraid of a the chicken being angry and running away from me! the other thing: since you are so gifted mashalla in the kitchen, what do you think about making differnt lists of foods that would go together for different occasions so we all have ideas what to serve when we have a breakfast gathering, , iftar, or mbarakeh. sometimes my brain goes blank and would love new ideas and suggestions. Sorry I take forever, but you make us feel like long time friends…thanks.

  10. areej 14 March 2011

    تسلم ايديكي بس بدي اسألك القوالب مابتحطي فيها شي قبل ما تصبي الخليط

  11. مريومة 14 March 2011

    كتييييييييير طيبة هالوصفة وسريعة يسلم دياتك يامدام منى على هالوصفة جربتها وكتير سهلة مارديتي علي ماوصلوكي وصفاتي عادي لو ماعجبوكي حابة شارك معك لوبوصفات تانية :sigh

  12. محبةالمصطفى ملك 14 March 2011

    منووشة و قبل ما أقرأ الوصفة..
    بس لما شفت الصورة دخلت لأكتبلك رد فورا..
    لأني شفت صورة الكب كيك على الفيس بوك و ما شفت الطريقة….
    و سألتك عليه بس يمكن ما شفتي مشاركتي :roll
    المهم يسلم دياتك خيت و يلا حطي الباشيه و دوري على مشاركاتي و ردي عليهم :)
    بانتظارك منوش

  13. محبةالمصطفى ملك 14 March 2011

    منووشة انا هلأ قريت الطريقة..
    هلأ انت كنت دائما بتستعملي خفاقة الكهربا قصدك ما..
    بتعرفي أنا ما دائما بعمل كاتو متلك(ما شاء الله)
    بس لما بعمله دائما بالطريقة يعني مضرب سلك عادي لا آلي و لا شي و ما بطول و دائما بيطلع الكاتو طيب كتيير و مرة أرسلتلك الطريقة بس يمكن ما وصلت.
    رح أرجع أجرب أرسلها..
    أنا بعمل كيك السفن أب
    و كيك البرتقال و التنين كتير طيبين..
    حتى منت عم أفكر أشتري خفاقة بس بعد كلامك بطلت :)
    آسفة طولت عليك كتير ..
    آه نسيت أقول لك يسلمو كتير على طريقة الكاسترد طلع طيب كتير و و لا أسهل

  14. محبةالمصطفى ملك 14 March 2011

    منوووشة رح أهلكك اليوم طولي بالك علي :zzz
    أنا قرأت الوصفة بتمعن و اشتهيت أعمل هالكيك اللي منظره بشهي..
    و أنا عملت مرات كب كيك بس بالبرتقال و كان طيب..
    بس مرة عملت كب كيك بالكاكاو..حسيت طعمته خفيفة و كمان لما بنقشر الورقة بيكون لزقان شوي على الورقة…
    لذلك ممكن تقوليلي شو أعمل حتى مايلزق عالورق و ما في طريقة كريمة بالشوكولاتة لأن أكيد بيطلع أطيب..

  15. ream 14 March 2011

    تسلم ايديكي اول ماشفت الصورة كتييييير تشجعت جربن وطيران عالمطبخ وطريقتن كتير سهلة وطلع هش وطري ورجعت فورا عملتن مرة تانية وضفتلن ملعقة صغيرة نسكافيه حسيت انه النسكافيه ضافت نكهة

  16. منى 14 March 2011

    هلا ام نوران :)
    سلامتك من الرعبة يا جميل
    و الله انا مرة حكتلي قرايبة حماتي انهم كانو يخبزوا الكيك بالطنجرة على الفرن من فوق عادي , قالتلي بنتي لكن بدنا ننحرم الكاتو لان ما في عنا افران بالبيوت :eek ما شاء الله عليهن
    على فكرة هي ” اهيء اهيء اهيء ” نقطة ضعفي لانها كلمة واحدة من اعز رفقاتي ;)

    شكرا كتير لردك الطويل, ردودك بتبل القلب و انا بحب هيك :zzz

  17. om nabeel 14 March 2011

    ما شاء الله عيكي يامنى
    عن جد مبدعة انا بخاف اعمل كاتو بخاف من شغله
    رح اجربه قريباان شاء الله مادام ما بياخد وقت
    تسلم ايديكي

  18. mays salem 14 March 2011

    يااااااااي على اكلاتك الطيبين يامنى شي ناهي والله
    من اكتر من سنه وانا بتابعك وبتابع وصفاتك الطيبين وصرت مجربه كتير منن
    واليوم شفت الكب كيك وبتمنى انو يزبط معي من زمااااااان
    وهلأ اجاوقتو مع قرب عيدالام منشان ساوي اصناف كتيره وراح يكون اول صنف

    ويسلمو ايديكي مرا تانيه

  19. mays salem 14 March 2011

    يااااااااي على اكلاتك الطيبين يامنى شي ناهي والله
    من اكتر من سنه وانا بتابعك وبتابع وصفاتك الطيبين وصرت مجربه كتير منن
    واليوم شفت الكب كيك وبتمنى انو يزبط معي من زمااااااان
    وهلأ اجاوقتو مع قرب عيدالام منشان ساوي اصناف كتيره وراح يكون اول صنف

    ويسلمو ايديكي مرا تانيه

  20. ALEA 14 March 2011

    شكلها كتير طيب :zzz
    ست منى شو الفرق بين الكب كيك والمافن :?

  21. منى 15 March 2011

    اخ يا لارا :)
    زعلانة على خفاقتي و كل ما عم انزل للسوق عم احتار و ما عم اعرف شو اشتري .

    بتعرفي انولطحين الاسمر ما منلاقيه عنا الا بطلوع الروح , هلا ما الها هل الشغلة علاقة بالموضوع , بس كمان انا معصبة على اد ما دورت و ما لاقيت و لما لقيت كان السعر مضروب بعشرة يا بعدي :roll

    ان شاء الله تجربيه و يعجبك و سلام لكل العيلة ;)

  22. gsm 15 March 2011

    لا تزعلي منوش سلامة قلبك من الزعل ما بعرف بس لو في عندك حدا بالإمارات فيك توصيه عليها هونيك التشكيلة اكبر وارخص

  23. amoula 15 March 2011

    صباح الخير 8)
    انا شايفة الكل عم يعلق وما حدا جرب فانا رح اقلكم جربوا لانو النتييييييييجة مذهلة لسا هلأ خلصته وما استنيته لحتى يبرد اكلتلي وحدة عالسريع والله يستر شكلها اول وجبة رح تروح على الدواقة :grin
    بس انا هلأ لازم اعترفلك يا اختي منى باعتراف خطير انو انا كنت على طول اقول كل شي بجرب من الموقع عدا الكاتويات بخاف لانو هدول اي غلطة خلص طار القالب, بس من شوي عند صلاة الصبح زوجي فاق وقالي جوعان واكل شو ما كان ونام وزعلت عليه :sigh وانا الي يومين هالكاتو ببالي 8)قلت با بنت ما بدها قمت عملته الساعة السادسة صباحا ههههه والنتيجة بتجنن بس انا يمكن نوع الكاكاو عندي هون غير اللي عندكم فانا بيستحمل كمان معلقة وهاد بكل الاحوال بيضل حسب الرغبة
    عن جد يسلموووووووووا كتير والله يجزيكي الخير ياارب لانو زوجي رح يفيق ويتفاجئ وينبسط ;)
    صحي حطي ميزة من ميزات هالكاتو انا استفدت منها انو ما بيطالع صوت ههههه
    وانا مبسوطة مافي جلي صينية
    عفكرة للصبايا اللي قالو ما عندهم صينية وانا ما عندي بس جبت الورق سيلوفان وثابت وحطيتيه بصينيةبناء علىنصيحة حماتي
    انا حكيت كتير آسفة بس لانو مبسوطة انو تعلمت كاتو جديد غير الكاتوالوحيد اللي بعرفه :zzz

  24. مريومة 16 March 2011

    كيفك مدام منى بيليز بدي اطلب منك طلب بدي اكلة حلو بالمارس تكون مميزة منشان عيد الام انا سويت وصفاتك يلي بالمارس حابي اعمل شي جديد الله يوفقك ازا بتحسني تساعديني :cry

  25. منى 16 March 2011

    هلا مريومة :)
    صحتين و الف عافية يا رب على البك , الحمد لله انهم عجبوكي
    يا ستي الوصفات وصلوا اكيد يسلم هل الديات و بانتظار اشيا تانية منك ;)

    بالنسبة لوصفات المارس ما عندي شي جديد , الوصفات الي منزلتهن هنن الي عندي بس :roll

  26. violet 16 March 2011

    هلأ ست منى بدي أسألك القوالب امستخدمة كيف شكلا يعني بشوف بالمحل قوالب مشكل ملون بس بحسن مابيظبط ولا واحد منهم
    وأديش لازم تكون الحرارة بالنسبة لفرني العالي واطي 8)

  27. غيث 18 March 2011

    اخيرا اليوم لجربتو رائئئئئع والله واخيرااتجرأت وخليت بنتي(8سنوات)الكبيرة هيه عندي طبعا خليتها تعملو وفرحت كتير شكرا منى والله يخليلك الغوالي يا رب

  28. Noora 22 March 2011

    يسلم أيديكي منى على هل كيك السهل وبدي أسألك على طريقة صنع الكريمة في المنزل إذا بتعرفيها يا ريت تفيديني

  29. nisreen1979 12 April 2011

    رووووووووووووووووووووووووووووووعة عملتهم وطلعو جنان

  30. sundusaa 18 October 2012

    السلام عليكم اخت منى

    انا منزمان متابعه لموقعك بصمت وسجلت مره ونسيت الاسم حقي :roll
    وودي اقول الله يبارك لك ماشاء الله موقع رااائع ودائم اسولف فيه على صديقاتي ومن المواقع المعتمده عندي وعلى طول ادور فيه .. لانه جاي على ذوقي وفيه اكلات خفيفه وطيبه جدا ;) ;)

    انا جربت اكلات كثير ولسه باقي اكلات كثيره فخاطري اجربها.. بس هذي اول مره اجرب شي من قسم الكيك او الجاتو
    وماشاء الله حلوه وسهله كثير وسريعه وخاصه للام المشغوله او للبنات المبتدآت بالمطبخ

    انا عملت مثل ماذكرت وحده من الاخوات اظن اسمها ريم وضفت ملعقة نسكافيه لاني احب نكهة القهوه :zzz
    وريحته ماشاء الله .. بس انتظرها تبرد
    وبغطيها بمقدار صغير من كريمة الجبن السهله (جبن كريمي وبشر ليمون وسكر بودره) وبنثر عليها شوي حبيبات ملونه حتى يفرحون الصغار :)

  31. Mona 25 October 2012

    يا عيني سندس على هل الافكار الحلوة , شكرا كتير للمشاركة :)

    منورة الموقع يا قمر انت و رفقاتك , مية هلا فيك :zzz

  32. Mona 25 October 2012

    هلا نسرين :)
    الف الف هنا و صحة على قلبك , عوافي

  33. firyal 7 January 2014

    تسلم ايديك يا منى على هالوصفة عملتها وطلعت شغلي كبيري واكتر شي عجبني انو ما بدها خلاط . انشالله بتضلي على طول منورة وتعطينا من ابداعك

    • منى 9 January 2014

      الف هنا و صحة و عافية فريال , منورة الموقع حبيبتي :)

تقييم الوصفة
عاديةقد أحضرهاجيدةممتازةأكثر من رائعة (3 votes, average: 4.33 out of 5)