امبارح كان يوم مرهق بالنسبة الي ، عملت شي ألف شغلة و بالأخير وصلت ع التصوير ، كنت تعباانة و ما الي نفس ابداً ، بس لازم صور هل الكب كيكات الحلوات قبل ما يطيروا بعد الافطار ..
كانوا الصور بايخيين ، عبرتب و ظبط و صور و يطلعوا الصور بعدها كالحين مالحين ، قربت الشمس تروح ، و انا صوري ما بيطلعوا حلويين الا ع الشمس ، قلت رح ضبضب و حاج تصوير لليوم ، ملييت .. باخر دقيقة خطرت ببالي فكرة لترتيب الكيكات ، جبت ماغي المفضل و جربت الفكرة و طقة طقتيين ، طلعت معي هل الصورة الحلوة ..
في مشروع اسمه مية يوم من السعادة ، فكرته انو نحاول نكون سعيديين لمدة مية يوم , كل يوم ندور على شي بيعمل سعادتنا ، ما لازم ندور ع السعادة بمنجزات عملاقة ، التفاصيل الصغيرة هي السعادة .. ضحكة ابنك ، شوفة الشمس و هي عبتشرق ، جملة حلوة قريتها بكتاب ، صوت المطر ، ريحة الياسمين ، رسالة حلوة من صديق ، حتى قطعة شوكولا صغيرة مفهوم السعادة الي غير مفهوم السعاة الك ، بس لكلياتنا السعادة هي التفاصيل الصغيرة الي بتعدي و ع كتر مو متعوديين عليها منخليها تمر من دون ما نفكر فيها ، بس بعد ما تمر و نرجع بالذاكرة لورا ، منكتشف انها كانت سعادتنا
هي الصورة عملت يومي حلو ، كل ما شوفها عببتسم ، برج الشوكولا العملاق ، برج ميمو المائل
خلونا نفكر بتفاصيل ، مو باشيا ضخمة .. شو التفاصيل الي بتخليكم حاسيين بالسعادة ؟
منرجع لوصفة الكب كيك , كب كيك الشوكولا الرائع بالمكون السري الي ما بيخطر ع البال , القريشة أو الريكوتا أو حتى الحليب بعد ما بفرط و نصفيه ، كب كيك ايطالي وصفة من اروع الوصفات الي ممكن تحضريها في البيت ، رح تطلع الطعمة متل المحلات المشهورة الي بتبيع الب كيك , و الوصفة سهلللة ، و طعمتها رائعة غنية متل غيمة من الشوكولا ، و فوق هاد كتير الزبدة فيها قليلة ، لكل هل الكمية مستعملة بس ربع كوب ، مممم غراام . و كمان فوق هل الشي , الكب كيك بيطلع منفوخ و شكله بيجنن , باختصار هي الوصفة حاليا من وصفاتي المفضلة الي ما عبشبع منها
بتمنى تجربيها و بتمنى تعجبك و بالصحة و الهنا
1 كوب قريشة , أو ريكوتا , أو كوب من فرط الحليب المصفى
2 بيض
فانيليا بودرة أو ملعقة صغيرة فانيليا سائلة
كوب و ثلث حليب
ربع كوب زبدة طرية جداً بدرجة حرارة الغرفة
-المقادير الجافة :
2 كوب طحين كاتو
نصف ملعفة صغيرة ملح
2 ملعقة صغيرة بيكنغ بودر
ثلثي كوب كاكاو
كوب و ربع سكر
1 - يقاس كوب من القريشة الغير مملحة , يمكن تحضير القريشة في البيت و يمكن استعمال فرط الحليب , توضع في وعاء مع البيض و الفانيليا .
2 - تقلب لبضع دقائق حتى تمتزج المقادير .
3 - تضاف الزبدة الطرية جدا و الحليب ، يقلب الكل مرة أخرى .
4 - في وعاء أخر ينخل الطحين مع البيكنغ بودر و الملح ، يقلب مع الكاكاو و السكر .
5 - تضاف المواد الجافة دفعة واحدة على مزيج البيض و القريشة .
6 - تقلب المقادير بلطف حتى تتجانس .
7 - لا يخفق المزيج بشكل زائد كي لا يقسى بعد الخبز .
8- باستخدام ملعقة البوظة ، يوزع مزيج الكيك في القوالب الصغيرة
9 - الكمية تعطينا 24 قالب من الحجم الظاهر بالصورة .
10 - لافضل نتيجة يملئ ثلثي القالب .
11- يخبز الكب كيك في الفرن المحمى على درجة حرارة 180 درجة مئوية لمدة 20 دقيقة أو حتى ينتفخ ، يترك حتى يبرد و يقدم مع كوب حليب أو حسب الرغبة .
الوصفة مستوحاة من كتاب Mollie Katzen's Sunlight Cafe
تفاصيل أكتر عن مشروع مئة يوم من السعادة
يعطيكي العافية منى شي روعة
هلأ في بالسوق ريكوتا جاهزة فينا نستخدمها ؟؟ ولا قصدك شي تاني
مسا الخير هديل
طبعا فيك تستخدميها , اما ريكوتا او قريشة او حليب تفرطيه , الي متوفر عندك استعمليه
شكلا يمييييي بدي جربها بهالكم يوم
ان شا الله تجربيها و تكون ع زووءك
تسلم ايديك أحلى منی واحلى شيف بالعالم
كل يوم عم اقرأ معك ايام السعادة تبعك
وعم حس انو لحظات سعادتي عم تصير اكتر لما اقرأ
لحظات سعادة الآخرين
الله يحميك منی ويجعلك من السعداء في الدارين يارب
ان شا الله مبسوطة ع طول ، أغلى دعوات ع قلبي يا رب انت كمان ، الله يجمعنا ع خيرررر دوما :
شكرا كتير
السلام عليكم أختي وصديقتي منى ، كيف الحال والأحوال ؟
ورمضان كريم وكل عام وأنتوا بألف خير ، ويارب تزول الأيام الصعبة عنا وعنكم وعن كل إنسان في هاالدنيا …..
الله الشاهد كيف مشتااااااااااااااااااقة لكم ،
ويارب أهلك وأولادك بألف خير ، ويارب تكونوا جميعاً من سعادة في سعادة …
المقدمة كثيييييييير حلوه، والصورة احترافية ،
أحياناً الصحة هي أكبر سعادة ، والمفروض اليوم اللي بيمر علينا وإحنا بصحة هو أسعد يوم ، ومثل ماتفضلتي أحياناً التفاصيل الصغيرة الروتينية والمتكررة هي سر السعادة اللي مابنحس فيها مثل الأمان شوفة الأهل والأحباب والفراغ والنوم والراحة والوظيفة وووو …….. ،
ومجرد ما تروح ، فجأة نلفت نظر لها ونتمنى لو ترجع ، الوصفة بتجن ن وع التجريب خصوصاً أنا من محبي الكيك السادة من دون كريمة أو خلطة أو حشوة .
سلام من الله عليكم .
و عليكم السلام و الاكرام لارا حبيبة قلبي , و الله بعد زمان
اللهم امين , أحلى و أغلى دعوات و الله ..
التفاصيل التفاصيل دوما هي السر ورا سعادتنا و كمان تعاستنا , لهيك مرات بتلاقي ناس عندها كل شي و مو سعيدة و ناس عايشة ببساطة و مالكة الدنيا
هل الكيك أكيد بيعجبك و بيكون ع زوءك , وصفة من اروع ما يكون ، يا ريت لو شوف شي صورة الها منك
منوررة حبيبتي
خيييييييييله
الصورة خيله فعلا حلوة و الكب كيك مبين بيجنن انا بحب الكب كيك وبحب الشوكولا كتييييير
بالنسبه للقريشه او الريكوتا مافي اي تفضيل بيناتهن في حال تواجد عندي الاتنين؟؟؟
أهلييين نسرين
و الله خيلة و الطعم رائع رح تحبيها ان شا الله كتيررر
ما ي فرق , المتوفر استعمليها و كلو بيطلع طيب
سؤال تاني معلش اتحمليني شوي
ماعندي صينيه الكب كيك فيني ساويها بجاط بايركس مثلا؟؟؟
اي طبعا فيكي تحضريه بقالب كيك او بايركس او الي بيريحك
يعطيك الف عافيه مني ياليت تخبريني اذا عندك صغحه بالانستقرام واذا مافي ياليت تعملي انت شيف شطوره الله يسعدك
صباح الخير لموس
الله يافيك نورتي يا جميل
اي عندي بس ما الي متبعتها كتير , رح حاول زبطها اكتر
هي الرابط
http://instagram.com/monasaboni
شكرا ع الاهتمام
الله يعطيكي العافية وصفاتك كلا بتجنن ما شالله عليكي كتير مذوقة بكل شي بحكيك و بتصويرك ما شاالله ..
بدي اسألك بس كوب القريشة .. كم ليتر حليب لازم اعمل حتى تطلع كوب قريشة ؟
و يسلمو كتير
شكرا نور من زووءك يا قمر كل كيلو حليب بيعطيكي كوب او ااقل شوي بيختلف مرة عن مرة حسب الحليب اذا كان مزبوط او مغشوش
منورة
كيف فيني افرط الحليب؟؟؟؟؟؟؟ لأن ما عندي لا قريشة و لا ريكوتا و لا حليب فارط
هلا رزان
هون في طريقة فرط الحليب لنعمل منه ريكوتا او قريشة
http://l2ma.com/%D8%AA%D8%AD%D8%B6%D9%8A%D8%B1-%D8%A7%D9%84%D8%B1%D9%8A%D9%83%D9%88%D8%AA%D8%A7-%D9%81%D9%8A-%D8%A7%D9%84%D8%A8%D9%8A%D8%AA/#.U7UiSLHOxW8
هلا في الفرن و لنشوف النتيجة. ريحة الخليط كتير لذيذة. ألف شكر على الوصفة
يم يمممم يا رب يعجبك يا جميلة
يعطيك العافية اخت منى ….. ♡♡♡كتير مشتهية جرب هالوصفة بس ماكان عندي غير الاكواب الورقية وماعندي الصينية فقلت اكيد مارح يزبطوا بس اليوم اشتريت متل الاكواب الي عندك سيلكون فممكن استخدمهم من دون الصينية ولا مابيصيرررر:’(
اهلا ام محمد معتز
ممممم ما جربتهن من دون صينية ، ما بعرف اذا بيتحملوا او بيميلوا ع الخبز
شكرا عالرد السريع اخت منى …بجرب وبشوف شوبصيرر ان شاء الله بيمشي الحال من دون الصينية .♧
ان شا الله
يا ريت تخبريني النتيجة لحتى استفاد من خبرتك
السلام عليكم اخت منى …الله يعطيك العافية على الوصفات الرائعة جربت وصفتين للكب كيك ( كب كيك الخمس دقايق والايطالي) وكانوا ناجحين وطيبين …جربتهم بقوالب السيلكون وحطيتهم بصينية عادية مشي الحال من دون مشاكل .♡♥
صحتييين و مليون عافية يا قمر ، و شكرا جزيلا لمشاركتك تجربتك ، شجعتيني جرب انا كمان
صفيتيهم ع صينية المنيوم و الا كيف ؟
عملت الكب كيك طيب مع الشاي والحليب ، وقت الصبح والعصر ..
وسكره قليل ومناسب ،
لأَنِّي ما أحب أي حلو أو شراب ، سكره زايد …
والصورة صارت بالفايس بوك
يمممممم تعيش دياتك لارا وانا ممنونة ثقتك في والصورة اليمي الي نزلتيها
وبعد زمان يا غالية
من عيوني حبيبة قلبي منى ، وصيت على الري كوتا ، وأول ماتوصل إن شاء الله بعملها ، وبنزل صورتها في صفحتك عالفايس بوك .
بالاتظار لاروش