كرات الريكوتا على الطريقة التركية


         وصفة : منى                 2011/07/31                 17 تعليقات
كرات الريكوتا على الطريقة التركية

اللهم سلمنا لرمضان و سلم رمان لنا و تقبله منا سالما .


سبحان الله رمضان السنة عم يمرق بأصعب أيام بالسنة ! شوب و النهار طويل و الليل قصير , اليوم سمعت حديث ” من صام رمضان إيمانا و احتساباً غفر له ما تقدم من ذنبه ” , مع انو هل الحديث حافظاته عن ظهر قلب , بس اليوم كأنو عم اسمعه لأول مرة , إن شاء الله رح نصومه إيمانا و احتساباً و إن شاء الله رح نكون من عتقائه , أمين


من صام رمضان , غفر له ما تقدم من ذنبه , يعني رمضان الي صمناه بالشتي , حسابه متل حساب رمضان الصيف . بتحس انو في خط واحد و مكيال واحد و مبدأ واحد , مو المهم الظرف المهم انت شو , الخط الي ماشي عليه شو , فوق و الا تحت انت نفسك بأخلاقك و مبادئك و تربيتك , اختبارك مو بس فوق , اختبارك فوق و تحت , بالرخاء و الشدة , و هون بيبان الدهب من التنك .


ما هي الدني يوم فوق و يوم تحت , الثبات و الاستقرار و دوام الحال , بعد التفكير الواقعي , هو فعليا ما بيتحقق الا بالموت الي هي نقيض الحياة و الحركة . و لما الانسان بيعرف انو هو موجة صغيرة بهل الدني , بيعود يفكر انو هو ما بيقدر يغير البحر , بس بيقدر يشتغل على حاله يكون صح و الباقي رح يتصلح لما بيكون أغلب الناس عندها هل التفكير , بس هو يكون صح , فوق و تحت ..


لما الواحد بشوف كل الاسى الي مارق علينا , ممكن يقول وين العدل ؟ هون في مقولة بحبها كتير , نسيت مين صاحبها ” ليس هنا ظلمة و لكن هناك قصور في الرؤية ” . لما الواحد بيشوف الصورة كاملة بيعرف انو الظلام هو اساسي لاظهار النور , الشغلة بدها صبر و عمل و امل و الباقي خليه لرب العالمين .



من المطبخ التركي وصفة طيبةةةة و سهلة و خفيفة و مناسبة لرمضان و شوباته , هي الوصفة حفر و تنزيل لتلات اسباب , اول شي حلو و الحلو حلو برمضان , تاني شي اسهل حلو رح تعمليه بحياتك , وقت جهزته اول مرة , قلت لا مو معقول , خلص يعني !! اخد ااقل من 5 دقايق . تالت شي خفيف كتير و رح يكون مناسب بعد وحبة الافطار .

اللهم اعنا على الصيام و القيام و غض البصر و صلة الأرحام , امين امين


بالصحة و الهنا





2 كوب ريكوتا , مجهزة في المنزل , أو عبوة جاهزة 500 غ
2 ملعقة كبيرة مليئة طحين , 40 غ
زبدة لدهن الورق

القطر :

كوب ماء
أقل بقليل من كوب سكر
بضع قطرات عصير ليمون
بضع قطرات ماء زهر فاخر




• تمزج الريكوتا و الطحين في وعاء كبير حتى تتجانس . تغطى صينية فرن بورق زبدة و تدهن بالزبدة . يحمى الفرن على درجة حرارة 160 درجة مئوية .

• يقطع المزيج لكرات متوسطة بحجم الجوزة و يرتب على الصينية المجهزة . تخبز الكرات في الفرن لمدة 45 – 60 دقيقة حتى تحمر و تنضج .

• يجهز القطر , يوضع السكر و الماء حتى يغلي , تهدى النار و يترك لمدة 15 دقيقة , يبعد القطر عن النار و يضاف عصير الليمون و ماء الزهر و يقلب .

• ترفع الكرات بلطف على طبق التقديم , تغمر بالقطر الحار , الكرات ساخنة و القطر ساخن . و تقدم باردة أو فاترة مع القيمر او القيمق .

التعليقات

  1. imabeer77 31 July 2011

    الله يبارك فيك ويسلمك
    من فترة كنت بدور على وصفة”راسمالاي” اللي هو نوع من الحلويات الهندية اللي كتير بتشبه وصفتك هي. المهم انه وصفتك اسهل و أطيب
    الله يجزيك الخير على الحلو وعلى التذكير بالحديث

  2. aboura.n 31 July 2011

    انشالله الله بيتقبل منا ومنك يا منى الطاعة والصدقة والعمل الصالح وبيغفر ذنوبينا لانو كتيرة ..بس الله كريم عفو..ويم يممممممممممممممممممممممممم منظرا بيشهي ..انا عايشة بالسعودية وما بعرف هي الركوتا شلون بتجي بقى اذا في حدا بيعرف ماركة او نوع او حدا بيحويا يقللي ..ويسلمو …رمضان كريم

  3. dentamaniac 1 August 2011

    كل عام و انتي و كل احبابك كل خير
    على قد ما بحب وصفاتك …بحب اللي بتكتبيه قبل الوصفه اكثر
    الله يقدرنا على الصوم ايمانا و احتسابا يا رب

  4. منى 1 August 2011

    هلا ام عبير :)
    شجعتيني جرب الراسمالاي , واحد خبرتنبي انو بيشبه حلو هندي اسمه راس جولا , كمان ريكوتا بس من دون طحين و لا خبز و بتتسقط بالقطر و بتغلي شي نص ساعة , مشتهية كمان جربها :)

    يبارك بعمرك و يخليك و يحفظك و الله يتقبل منا و منكم و من كل امة محمد
    ان شاء الله تجربيها و تحبيها

  5. منى 1 August 2011

    هلا سوسن :)
    و انت بالف الف خير , انت و كل عيلتك , الله يقدرنا و يتقبل منا و منكم صالح الاعمال :)

    شكرا سوسن , من زووءك حبيبتي ;)

  6. lolli 1 August 2011

    مممم شكلها كتيير طيبة و لحسن الحظ عندي ريكوتا بالبراد رح جربها اليوم بإذن الله
    و مبارك رمضان عليكي و عكل الامة الاسلاميىة و الله يتقبله منا

  7. منى 1 August 2011

    هلا عبورة :)
    الله يتقبل من كل صائم , و اد ما كان ربنا جبار و عادل , هو بنفس الوقت رحمن رحيم و ان شاء الله بيحاسبنا بكرمه مو باعمالنا :roll

    ما بعرف الريكوتا كيف متوفرة بالسعودية , بكل الاحوال شغلتها بالبيت كتيررر سهلة و هي صورة من عند بابا جوجل :zzz

    [img]http://www.englishforum.ch/attachments/food-drink/8645d1252333224-ricotta-cheese-ricotta.jpg[/img]

  8. منى 1 August 2011

    هلا لولي :)
    مبارك عليك و على اهلك و الله يتقبل الصيام و القيام و صالح الاعمال

    رح استنى رايك ;)

  9. dado 1 August 2011

    كل عام وانت والولاد وزوجك بالف خير يا منوش، وانشالله بتاخدي حسنة بكل لحظة من هالشهر الفضيل. يبدو انو مو بس فيس بوك.. تلفون كمان؟! :roll الحمدلله يلي ضللنا هالموقع 8) هالوصفة حبابة كتير وعالتجريب القريب انشالله.. خاصة انو ما الي خلق اعمل اي شي صعب وبياخد وقت.

  10. laraye 1 August 2011

    رمضان كريم وانشالله بيكون خير وبركة الك ولكل اهللك وعيلتك يارب :) رح اجربا عن قريب انشالله بس بدون قيمق لانو ما عندي :sigh بتعتقدي الطعمة بتفرق؟ ع فكرة من يومين حضرت لازانيا ب باستا فريش و الباستا تبعيت امي متل اللي حاططيها بس بدون زيت. الشكل حلو بس لسى ما طبختا :)

  11. aboura.n 1 August 2011

    يسلمو يا منى شكلي اذا ما لاقيتا جاهزة بدي اعملا بالبيت وبنشوف شو رح بدع :grin وبس جربا رح قلك شو طلع معي

  12. dado 4 August 2011

    منوش
    من شوي حضرت الوصفة.. كتييييييييييير سهلة عنجد. وناطرة ندوقها بعد الافطار انشالله. بس شكلها وريحتها مغريين كتير. بخبرك بالنتيجة لاحقا اذا الله راد.

  13. dado 5 August 2011

    كتيييييييييييير طيبة وخفيفة وسهلة.. يمكن تصير وصفتي الرمضانية بدل القطايف. شكرا منى

  14. laraye 5 August 2011

    و انا جربتا يا منى و فعلا سهلة وسريعة لدرجة ارجعت للوصفة اتأكد انو هي هية بس … طيبة ومنمنمة … بتستاهل التجربة ;)

  15. farah 6 August 2011

    تسلم ايديكي يا منى جد وصفة مناسبة لرمضان يعني مو ناقصنا كتير شغل بالمطبخ هيك من غير تعب بتحلي العيلة بعد الفطور

  16. omtasneem 21 August 2011

    السلام عليكم مباركة طاعتكن وإن شاء الله يجعلنامن عتقاء هذاالشهر الفضيل الله يسلم ايديكي شكلهابشهي بس بدي اسالك وقت تشكيل الكرات القوام بيكون قريب للعجين سهل تشكيلهاولا ممكن يلزق على الإيدين الله يعطيك العاافية

  17. منى 10 September 2011

    هلا ام تسنيم :)
    لا العجينة بتكون سهلة متل ايا عجينة عاديةو كا رح تلزق ;)

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)