كيك الفواكة


         وصفة : منى                 2009/03/28                 55 تعليقات
كيك الفواكة

اليوم وصفة مميزة كتير بالطعم و الشكل و كمان بالرقم , وصلنا للوصفة رقم 600 على لقمة طيبة بعد حوالي سنة و عشر شهور من افتتاح الموقع و ربي يزيد الوصفات و يزيد الحبايب كمان و كمان .

الوصفة هي أول وصفة من عدة وصفات رح استخدم فيها الكيك الاسفنجي و زينه بطريقة بسيطة و لكن بنفس الوقت بنتائج احترافية و جميلة جداً سواء من ناحية الشكل أو الطعم . حابة شجع كل الأخوات الي بيخافوا يجربوا الكيك الاسفنجي أن يجربوا طريقتي , بإذن الله مع إتباع الخطوات بالتفصيل مستحيل ما ينجح الكيك معك .

الكيك بحضره على مرحلتين , في اليوم الأول بحضر الكيك و بتركه لليوم التالي و بهل الطريقة ممكن يتقطع بكل سهولة و يسر .

الوصفة بدها كريما اسمها كريم موسلين و هي كريما لذيذة جداً عبارة عن كريم باتيسير ممزوج مع الكريم الشانتيه . الكريم الشانتيه ممكن تحضريه بالبودرة الجاهزة و ممكن تحضريه بالكريما الفريش السائلة و هي إذا انوجدت بتعطي طعم أطيب و أغنى . أنا عني هو دائما موجودة لهبك اغلب الأحيان استعمل كريما دانيا أو كريما دريم ويب . رح نزل وصفة كريما باتيسير بكرة إن شاء الله .

بالصحة و الهنا




قالب كيك إسفنجي

كريم موسلين :

مقدار من كريم الباتيسير
مقدار من كريما الشانتيه

للحشوة :

عصير أناناس
فواكهة مشكلة مفرومة ناعماً

للتزيين :

برتقال أو أناناس
كيوي
فريز
موز

للتلميع :

نصف كوب من قطر خفيف نوعاً ما محضر من دون ماء زهر


• يحضر الكيك الاسفنجي ويترك حتى يبرد على مشبك سلك . يفضل إعداد الكيك قبل بيوم لسهولة تقطيعه .

• تحضر كريما باتيسير و تغطى و تترك حتى تبرد , تغطى كي لا يظهر قشرة على الوجه .

• تحضر كريما شانتيه , و يمكن أن تحضر بطريقتين : إما تحضر باستخدام الكريما السائلة أو بالكريما البودرة .

• تمزج كريما باتيسير مع نصف مزيج الكريما الشانتيه و تقلب بلطف للحصول على كريما ناعمة و غنية تسمى كريم موسلين .

• يقطع الكيك إلى قسمين أو ثلاثة بشكل عرضي , يقطع باستخدام سكين عريض و يرفع باستخدام طبق مسطح تماماً .



• تقسم الكريما الموسلين لثلاثة اقسام . توضع أول شرحة من الكيك على طبق التقديم ثم تسقى بعصير الأناناس بشكل لطيف . يدهن بأول قسم من كريما الموسلين و تنثر الفواكة على الكريما .



• توضع تاني شرحة من الكيك على الكريما و تسقى بالعصير بشكل خفيف ثم تدهن بالقسم التاني من الكريما و تنثر فوقها الفواكة .

• أخيراً توضع أخر شرحة من الكيك و يدهن كل القالب بباقي الكريما .



• يدهن القالب كله بالكريما الشانتيه باستخدام ملوق كبير و مسطح للحصول على شكل مستوي قدر الامكان . اذا كانت هذه أول مرة لك لتغطية القالب بالكريما قد لا يكون الشكل مستوي تماماً , لا يهم مرة بعد مرة ستتقنين العملية . و اذا كانت الكريما باردة سيساعد ذلك على سهولة الفرد و التشكيل .



• باستخدام كيس الحلواني الرأس الصغير نرسم سلسة صغيرة لتحديد جوانب القالب . نرتب الفواكة حسب الزوق أو كما ظاهر بالصورة . تغمس شرائح الموز بالقطر قبل استخدامها و ذلك لمنع تغير لونها .



• تدهن الفواكهة باستخدام فرشاة بالقطر و ذلك لاكسابها مظهراً لماعاً و جميلاً ثم يقدم الكيك مع الشاي أو العصير .

  • وصفات تانية ممكن تعجبك


التعليقات

  1. سمسمة 28 March 2009

    الله يسلم هالأيدين شكلها بيجنن
    حبيبة قلبي منى ليش طولتي الغيبة علينا والله بحس حالي ناقصني شي وقت بطولي :sigh
    مشان هيك الله يرضى عليك مابدنا غياب ولاتأخير كل يوم طلي علينا وطمنينا عنك

  2. رنا 28 March 2009

    وااااااااااااااااااو بياخد العقل
    خلص رح وصي جوزي عالاناناس ورح ساويه اكيد يسلمو ايديكي عالخطوات التفصيليييييية
    بس شو مشان الليدي فنجرز …بعرف غلبتك معي :zzz

  3. souha 28 March 2009

    هلا منونة كيفك
    تسلم دياتك شي بيشهي ياريت مد إيدي ع الشاشة و أخد شي قطعة :)
    هلأ إنتي غطيتي القالب من برا بالكريما الموسلين و فوقها كريما شانتيه :? يا ترى مزبوط متل ما فهمت
    كمان بدي إسألك بعتلك إيميل عن طريق إتصل بنا يا ترى وصلك :?
    الله يعطيك العافية
    سلام :zzz

  4. ام نور 28 March 2009

    واخيرا
    :) مشكورة منى شي كتير بيشهي سلم هالديات عالتجربة السريعة باذن الله

  5. سوسنة 28 March 2009

    واوو

    شكلو كتير حلو وواكيد طعمو كتير طيب

    مشجع جدا للتجريب :eek

    يعطيكي الف عافية منى

  6. منى 29 March 2009

    هلا سمسمة :)
    الله يخليكي و يحفظل يا حق , و الله كنت مشغولة كتير الاسبوع الي فات بس بالخير الحمد لله ;)
    سالت عليك العافية و الخير دايما و ان شاء الله تجربيه و يعجبك

  7. منى 29 March 2009

    هلا رنونة :)
    ان شاء الله تجربيه و يعجبك :) و الله مو نسيانة الوعد , بس على التيسير ;)

  8. منى 29 March 2009

    و عليكم السلام ام السوس :)
    اتفضلي يا قمر و الاكل على قد المحبة , متل ما قلتي غطيت القالب بالاول بالكريما موسلين و بعدها بالكريما العادية
    الايميل وصلني الله يعطيكي الف الف عافية عليه ;)

  9. فرح 29 March 2009

    وصفة شهية جدا
    كنت اخاف من التعامل مع الكريما بس شكل الكيكة شجعني الله يعطيكي العافية

  10. منى 29 March 2009

    هلا ام نور :)
    ان شاء الله تجربيه و يعجبك و سماح للتاخير :zzz

  11. منى 29 March 2009

    هلا سوسنة :)

    الله يعافيك اختي و ان شاء الله تجربيه و يكون مستاهل :zzz

  12. منى 29 March 2009

    هلا فرح :)
    لا ان شاء الله بتزبط معك من اول مرة و ما بدها خوف , ما في اطيب و لا اسهل منها , ان شاء الله تخبريني شو بيصير معك و اي سؤال من عيوني

  13. سلاف 29 March 2009

    سلم ايديكي منى الصوره عم تحكي عن حالها
    استفقدتلك بغيبتك00 الحمد لله المانع كان خير
    :)

  14. غيث 29 March 2009

    الله يعطيك العافية منى على تعبك بس شي بيفتح النفس اكيد اكيد على التجريب القريب جربت كل الوصفات اللي سبقو هاوصفة متل البطاطا الشيبس وعصير الكيوي وككلهم طيبات يسلمو ايديك يا حق منى انا من شهر بعتت وصفة ما تزلتيها يا ترى ما وصلتك انا بعثتها على شكل تعليق على احد الوصفات من شهر تقريبا بس ما تكون ما وصلت لاني حاسة همتي على الكتابة قلانة بهالايام كسل وضيق وقت وكمان الموقع احيانا ما عبيطلع عندي يوم كامل ما بيفتح صفحته علما ان النت بيكون شغال على مواقع اخرى ما بعرف شو القصة علما انني اكون حزينة لما ما بيمشي حاله تعودت كل يوم اطل ولو طلة الله يسلم ايديك ويجزيك الخير

  15. souha 29 March 2009

    هلا منونة
    إذا الأكل عقد المحبة لازمني القالب كلو :)
    خطرلي كم سؤال بالنسبة للفواكة لما بدنا نغطيها بالقطر ما بيطلع منها ماء لأنو بعرف الفواكة بس إجاها سكر بطالع مي بالمحلات الجاهزة بشوف بحطو جيلي سميك
    بالنسبة للكريما باتيسير كل مرة بعملي وصفة شكل الحمد لله كلهن بينجحو بس بدي وصفة إذا كان متوفر بالموقع ياريت تعمليها رابط
    و بالنسبة للكريما شانتيه بيكفي علبة كريما دانيا و إذا بدنا نستعمل كريما فريش أديش بيلزم
    بتعرفي منونة مرة خلطت كريم باتسير مع كريما شانتيه و حطيتهن بالفريزر لجمدو صارو متل البوظة و طعمتهن طيبة كتير الله يعطك العافية طولت عليك
    سلام
    :zzz

  16. سارونات 29 March 2009

    السلام عليكم و رحمة الله و بركاته

    شو هالوصفة الطيبة اختي منى و كمان الطريقة بالتفصيل و مبينتها سهلة
    انا عندي وصفة للكريم باتسيير تعلمتها من حورية بس لساتني ما جربتها و اكيد ناطرة تنزلي وصفتك مشان نجربها
    كمان سبحان الله في عندي علية كريم باتيسيير و ما عرفت شو ساوي فيها الحمد لله انك حطيتي هالوصفة مشان استعملها فيها

    بس سؤال قديش كمية الكريم باتيسيير و الكريم شانتييه يعني علبة 40 غ بودرة من كل وحدة راح تكفي او لا

    كمان في عندي سؤال بالنسبة لعلبة الكريم شانتيي البودرة مثلا اذا ساويت كيكة صغيرة و ما كان بدي استعملب كل الكمية شو ساوي :? يعني شيل شوي من العلبة و سكرها و خلي الباقي لمرة تانية او بس افتح الكيس ما بيعود فيني سكره و بعتقد هاد الشي المنطقي اكثر

    ناطرة اجاباتك اختي منى

    كمان كيف لازم تكون الفواكه اللي راح نحشي فيها الكيكة يعني هل في مشكلة اذا كانت كتير مستوية و بعدين راح نفرمها يعني راح تطلع عصير و يمكن تخلي الكيكة رطبة شو رايك يعني نبعد عن الفواكه المستوية كتير او شو :?

    سلام

  17. mayada 29 March 2009

    السلام عليكم عزيزتي مني يسلموايديكي على هل شكل الكاتو اللذيذ ولا طعمو بجنن امبارح كان عندي ضيوف و عملتو طلع بياخد العقل من حيث الطعم وشكل عن جد يعطيكي العافية كتير كتير مشكورا يا احلا مني سسسسسسسسلام ميادة

  18. ام محمد 30 March 2009

    صباح الخيرمنى
    اشتقنالك كتيروالف شكرللوصفة الرائعة
    وان شاءالله التجربةقريبا :zzz

  19. DOUHA 30 March 2009

    باين عليه خطيررررر ولو شو فخم شكرا منى ممنونة انا

  20. منى 31 March 2009

    هلا سلوفة :)
    ان شاء الله تجربيه و تحبيه و الحمد لله المانع خير :zzz

  21. رنا 31 March 2009

    ياستي رح اعمله اليوم وزينه بكرا
    بس عندي كم سؤال عالكاتو الاسفنجي
    اول شي مادام رح اقسمه واحشيه بحس انه لازم يكون نافش كتير او بمعنى اصح سميك وانا الصواني اللي عندي كلهن عاديات وماعندي ولا وحدة مرتفعة هيك …سؤالي هو انه انا عندي قالب مرتفع بس من يلي بينفك من الجوانب ..ومشكلته انه المنيوم بس من الرقيق يعني مو المنيوم سميك …بصير اذا حطيت الكاتو بالقالب اللي بينفتح بعدين حطيت القالب كله بصينية المنيوم مشان اضمن الحرارة ماتضر القالب يعني بصير القالب سميك نوعا ما ….شو رأيك :zzz

  22. منى 31 March 2009

    هلا غيوثة :)
    يا ستي الف هنا و عافية على كل الوصفات الي جربتيها , الوصفة الي ذككرتيها ما وصلت :roll , ان شاء الله لمن تفضي مرة تانية تيعتيها و ممكن على اتصل بنا اضمن ;)

    الله يخليلي ياكي غيوثة , القلب على القلب و الله

  23. منى 31 March 2009

    هلا ام السوس :)
    اي اتفضلي و الله من عيوني حبيبتي
    ممكن تستعملي الجيلو , و كمان طريقتي بتصير و ما بتطالع مي لان انت رح تدهني دهن خفيف بس لحتى ما تتغير لون الفواكة و كمان تعطي لمعة

    وصفة الباتيسير لسا ما نزلتها و المفروض نزلها هل اليوميين و الكريما بتكفي ااقل من علبة و اذا حابة تحضريها بالكريما الفريش بيلزمك تقريبا تلات ارباع كوب ;)

    معك حق هل المزيج الي عملتيه هو تقريبا نفس طريقة البوظة الحقيقية , يمم قرب الصيف :grin

  24. رنا 1 April 2009

    شو منونة ماجاوبتيني عم بنتظرك ها تعبت من الوقفة :p

  25. منى 2 April 2009

    هلا سارونات :)
    العلبة الي استعملتها للكريم شانتيه بوزن 130 , انا استعملت نصفها تقريباً , الكريم باتيسير بمقدار كوبان و نصف

    انا متلك ما بستعمل كل العلبة , استعمل نصف العلبة و باقي الكمية بخليها بعلبتها بالبراد و بتضاين معي شي اسبوعيين المهم انا ما يجي عليها رطوبة او مي

    الفواكهة الي استعملتها مو مطبوخة , هي تازة كلها و انا فرمتها , بس اذا حابة تستعملي المعلبات بس اتاكدي انك صفيتيها منيح

    اي سؤال تاني من عيوني أختي

  26. منى 2 April 2009

    الف الف هنا و عافية ميادة على قلبك و قلب ضيوفك و كل مين اكل منه لقمة او اشتغل فيه ;)

  27. منى 2 April 2009

    هلا ام محمد :)
    ان شاء الله تجربيه و يكون على زووءك
    لا تنسي تخبريني

  28. منى 2 April 2009

    هلا ضحى حبيبتي :)
    كلك زووءك يا قمر , ان شاء الله تجربيه شي مرة و تحبيه انت و كل عيلتك

  29. منى 2 April 2009

    هلا رنونة :)

    دقيقة لجب لك كرسي و بعدها فنجان قهوة و نكمل دردشتنا :grin

    ممممممم , سؤالك صعب , بس بالاول انت متاكدة انك لمن تحطي مزيج الكيك بالقالب الي بينفتح من اطرافه ما رح يطلع الكيك من الاطراف المفتوحة , انا كل مرة بيصير معي هيك و مهما كانت نوعية القالب الي عم استعمله , لهيك ما بنصحك تستخدمي هل القالب من اساسه :roll

    اذا كانت قوالبك رقيقة ممكن تقسمي الكمية على قالبين و تخبزيهم و بعدها تحطيهم فوق بعض و تحشيهم بالكريما ;)

  30. رنا 2 April 2009

    يعني مابتروح الخمائر

  31. منى 2 April 2009

    :roll شو قصدك ؟

  32. رنا 2 April 2009

    ياستي قصدي اذا قسمت مزيج الكيك لصينيتين واستنيت الاول ليستوي وبعدين حطيت التاني مابتروح الخمائر تبع القالب التاني يعني بيزبط انا هلأ ساويته وخلصته وطلع من الفرن وشكله ناجح بس انا حطيته بصينية صغيرة وحوافها عريضة بس حسيته انه ماارتفع يعني طلع بسوية الكيك قبل الخبز بعدين كأنه شوي لم على بعضه من فوق يعني مالزق بالحواف قرب على بعضه

  33. سارونات 2 April 2009

    السلام عليكم و رحمة الله و بركاته

    جازاك الله خيرا اختي منى

    منيحة فكرة الفواكه الكعلبة اذاما توفرت الطازجة بس انا قصدي لما تكون الفواكه اللي عندي طازجة و ناضجة كتيييييييير فهل راح ينفع نحشي فيها او لا

    كمان سؤال هل ممكن الاستغناء عن عصير الاناناس تماما او استبداله بعصير اخر

    و القطر لما راح نغطس فيه الموز و ندهن فيه الفواكه هل بيكون ساخن او دافئ او بارد

    انا كتير متشوقة جرب الكيك الاسفنجي و هالكيكة الله يستر و تنجح

    بالتوفيق
    سلام

  34. قهوه مُره 2 April 2009

    تسلم إيدك منى شكلها بيشهي…بس شو هوه الباتيسيري..وإذا مالئيته بالسوبرماركت شو إله بديل….وحتى الكريم شانتيه. هل هو الدريم ويب…أتمنى تعلميني الشرحات المطفايه…والبرك بجبنه…وشكرا جزيلا :)

  35. منى 2 April 2009

    هلا رنونة :
    اي اكيد انا قصدت ان تخبزيهم مع بعض , و انا هيك بعمل . بحضر احيانا كمية مضاعفة من مزيج اي كيك و بعدها بخبزهم بالفرن مع بعض

    رنونة الي قلتي عليه ان الكيك طلع معك معناها ما كتير نجح , اسفة ..
    يا ترى عملتي متل الوصفة تمام و الا في شي غيرتيه ؟

  36. منى 2 April 2009

    هلا سارونات :)
    حسب اللفواكهة و شو قصدك بناضجة كتير ؟ لازم تكون اللفواكهة فريش و طيبة لان هي رح تعطي الطعم للكيك
    القكر بارد بيكون و ان شاء الله تجربي الكيك الاسفنجي و يظبط , هادا هو اساس لاي ست بيت و انا حابة كتير كل الاخوات يتقنوه و يصير سهل عليهم

  37. منى 2 April 2009

    هلا اختي قهوة :)
    الباتيسير كريما نحضرها على ايدنا و انا رح نزل الوصفة حتى لو من دون صور لان لازم لهل الوصفة , الكريم شانتيه هو نفسه الدريم ويب

    حقك علي بالبرك و الله الوصفة جاهزة من الصيف بس حسبي الله و نعم الوكيل ما في وقت كافي , سامحيني و تكرم عيونك على الوصفتين قريب كتير ان شاء الله 8)

  38. رنا 2 April 2009

    ياستي …صارت الكيكة وطلعت لذييييذة بصراحة انا بعد ماطالعت الكيك وجهزته للحشي والتزبيط حسيته مو منيح ومو ناجح لذلك جربت كاتو السفن اب ويالطيف شو نجح يعني تفاجأت انه انا عملت هيك كاتو كان رائع كتير وحسيته كمان سادة وممكن ينحط معه كريمااات ياستي ساويته وصورته بس شكله شلون بدي قلك ماتغطى معي منيح بالشانتيه يعني ضل مبين الكاتو بس طعمته كتير طيبة
    بالنسبة للكاتو الاسفنجي انا كل شي عملته تمام بس في شغلة بظن انها السبب انا بجميع الكاتويات ماعم تزبط معي قصة التحريك بالملعقة يمكن تضحكي علي بس عم خاف حركه كتير يقوم مايزبط …يلي عملته هو انه حركت الطحين مع الصفار كتير منيح وانخلطو كويس بس لماجيت عالبياض حسيت حالي خفقته زيادة بس لما حطيته بالمزيج حسيت حالي ماخلطته منيح يعني ضل شوية بياض مو مخلوطين :upset بس بكاتو السفن اب خلطت الطحين مع المزيج بخفاقة البيض نفسها بس على سرعة بطيئة جدا وكانت النتيجة رائعة متل ماقلتلك
    بدي اسألك ليش بوصفة الكاتو الاسفنجي منخلط الصفار لحاله والبياض لحاله ؟؟؟وفي وصفة لليندا كمان للكاتو الاسفنجي بس بدون فصل :zzz بس ماجربتها
    انا مصرررة انه ارجع جرب الكيك الاسفنجي بس بتلافي الاخطاء اللي عملتها هالمرة
    طووولت عليكي كتير سامحيني بس المدرس بده يتوقع اسئلة مابتخلص من طلابه الكسالى بقا طووولي بالك كتير علي ;)

  39. رنا 2 April 2009

    نسيت شغلة هلأ اذا حطيت المزيج بصينيتين انا بخبز الكاتو من تحت بس وبحطه عالرف الوسط وبهالحالة رح يصير في واحد عالرف السفلي وواحد تحت يعني التحتاني بينحرق والفوقاني مابيستوي شووو؟؟ :zzz

  40. منى 4 April 2009

    شوفي رنونة معك حق بقصة التحريك , هي شغلة لازم تشوفيها شوف العين لحتى تفهميها منيح بس رح حاول اشرحلك .
    بكاتو السفن اب ممكن تستعملي الخفاقة على سرعة واطية اما بالاسفنجي نوو لازم تحركي بالملعقة الخشب باول ايد و بالايد التانية تحركي الصحن لحتى تبرم معك الملعقة و التحريك بيكون كانك عم تقلبي المزيج تقليب و باتجاه واحد و انا بحس حالي م اسبح كل ما عملت هل الخطوة , ما بعرف ليش :grin

    منخلط الصفار لحاله , اولا , مع السكر و المي و بعدا البياض لحتى يصير الكيك هش و طري و متل الاسفنجة اما اذا خفقتيه عادي ما رح تحصلي على نفس النتيجة .
    وصفة ليندا جربتها و ظبطت معي و طلعت طيبة كتير بس انا هي طريقتي و انت فيك تختاري الي بيناسبك :zzz

    و انا كتير مبسوطة بهل الهمة و الاصرار و اتمنى ان ينجح معك لان هو اساس كل الكيك الباقي , شوفي رنونة كيك السفن اب ممتاز و طيب و لا اروع بس لمننجي نحشي بالكريما ما كتير منيح يكون الكيك فيه زبدة و كمان الكريما اي بعدها بيطلع تقيل و بيزعج , بس على المبدا بيصير اكيد

  41. رنا 4 April 2009

    ياستي دخيلك طولي بالك علي والله انا حبابة :grin بس عم حاول جرب شغلات جديدة وهادا عذبني هالاسفنجي بس بالنسبة للتحريك انا مرة شفت حورية عم تحرك بالطريقة الي حكيتي عنها بس ماكانت عم تحرك طحين بظن كانت كريما بس متل ماشرحتي واظن فهمت عليكي بس انا مشكلتي لما مابتزبط معي شغلة كتير بتردد باعادتها بس مادام شرحتيلي رح ارجع عيدها والف مليون شكر الك والله بيعلم اني بحبك وبدعيلك الله يبيض وشك لمابيزبط معي وحتى اذا مازبط لانه بعرف انه الغلط مني :grin تذكرت بالنسبة للكاتو تبع السفن اب انا حسيت متل ماقلتي انه الكاتو ماشرب عصير الفواكه كتير وضل هيك سميك شوي بتصور بالاسفنجي بتطلع اخف خلص عالتجريب قريبا
    وشو مشان اذا بدي اخبز الكيك ع صينيتين ;)

  42. أم مــــالــــك 15 April 2009

    تسلم ايدك يا غاليه رووعه
    بالنسه للكيم موسلين انا بصراحه اصبحت احضر الكريم باتسيير الجاهز مش بودره بكون محضر وجالص ومغلف متل الدانو تبع الاطفال وفي منه نكهات يعني الطعم راائع وتوفير وقت وجهد لزوم الكسل ههههههههههههههههه

    اعذريني ادخل بالنسبه للاخت الي سالت عن القالب المفتوح عن الجنب افضل طريقه هي تغليف القالب من الخارج بورق الفويل او الالمنيوم اول حاجه نمنع خروج مزيج الكيك منه وثاني شيء القوالب هذه خفيفه وممكن بسرعه تحرق او تلسع الكيك بس ابطنها من الخارج بتعمل كمان عازل اضافي للكيك

  43. منى 16 April 2009

    رنونة و الله ما بعرف شو صايرلي انا و الردود ,’ يعني بقرأ و بفكر حالي رديت و لمن بدخل للوصفةمرة تانية ما بشوف ردي :upset
    الصينيتين الي رح تستعمليهم المفروض يقياس 22 سم و لهيك رح يوسعوا التنتين بالفرن عادي على الرف الوسط ;)
    ان شاء الله تجربيه مرة تانية و يزبط معك , و الف شكر الك لردك و ثقتك في

  44. منى 16 April 2009

    هلا بالقمر ام مالك , منورة حبيبتي
    و الله فكرة , كتير احيان بيكون الواحد مستعجل او مكسل و بده شي سريع و هي فكرتك دخلتها على الميموري كارد , ان شاء الله ما انساها وقت الزنقات :grin

  45. بدور 22 April 2009

    لك الهي الله يسلم هالديات على هالذوق والتميز والوصفات البتجنن..

    والله حبيت اجرب هالوصفة وبلا خوف بس لسبب واحد… هو بالك الطويل في شرح كل خطوة بخطوتها ومرفقة مع الصور كمان..
    ياسلام عليكي يا ميمو الله لا يضيعلك تعب يارب.

  46. منى 23 April 2009

    هلا بدورة :)
    ان شاء الله تجربيها و تعجبك با عسل و الله يخليلي ياكي علىهل الدعوات الحلوة ;)

  47. سارونات 13 May 2009

    السلام عليكم و رحمة الله و بركاته

    خلاص كملتها من شوي و هي هلأ بالبراد ما بعرف اذا راح اقدر اصبر لبكرا تحتى شوف كيف طلعت او لا

    مع ان صارت معي شويه عوائق و هي اني ما كثفت الكريم باتيسيير كتير لهيك لما ضفتلها الكريم شانتييه طلعت شويه سائلة بس دبرت حالي و بعد ما غلفت فيها الكيكة حطيتها بالبراد تحتى تجمد شوي و بعدها غلفتها باخر طبقة من كريما الشانتييه و حطيتلها الفواكه بس ما حطيت كتير فواكه على السطح لان بدي تضاين لفترة اطول فحطيت بس شوي برتقال و موز اما الحشوة فحطيت فيها برتقال و تفاح و موز بكمية كافية و عندي علبة اناناس بس ما كان بدي افتحها و قلت خليني هالمرة جربها بهالفواكه اللي عندي فبدل قطرت من عصير الاناناس حطيت عصير برتقال

    بالنسبة للشكل طلعت حلوة و ان شاء الله بتطلع احلى في كل مرة بس انا كل خوفي من انها تطلع ثقيلة لان كريماالباتيسيير اثقل من كريما الشانتييه لان فيها صفار بيض
    ان شاء الله تطلع خفيفة مثل كيكة البرتقال بكريما البرتقال

    ان شاء الله راح اعطيك التقرير الاخير بعد تذوقتها و الله يستر :grin
    بالتوفيق
    سلام

  48. سارونات 14 May 2009

    السلام عليكم و رحمة الله و بركاته

    تمت العملية بنجاح و الحمد لله و ما في ضحايا :grin

    كنت بدي صورلك الكيكة اليوم الصبح لان مبارح كملتها بالليل فلما فقت الصبح شو لقيت :? لقيتلك اكتر من نص الكيكة طاير فماعاد فيني صورها و انا كمان اخدتلي قطعة و طلعت طيبة كتير و مو ثقيلة بس الكيك الاسفنجي بدي ياه يطلع احسن بالمرة الجاية ان شاء الله
    بشجع كل الاخوات لتجربتها لانها مو صعبة و ان شاء الله تضبط معكم

    اختي منى فيني اطلب منك وصفة الفوريه نوار اذا مجربتيها

    بالتوفيق
    سلام

  49. سارونات 14 May 2009

    المصطلحات

    المقصود بكامة طار ليس انه سافر بالطائرة الى مكان ما هو سافر بالطائرة و لكن الى بطون افراد العائلة :grin

  50. سارونات 14 May 2009

    مصطلحات و معاني :grin

    المقصود بكلمة طار انه طار بالطائرة الى بطون افراد العائلة :grin

  51. منى 17 May 2009

    هلا سارونات :grin
    شة ضحكت و ان عم اقرا المصطلحات , اتذكر مسلسل ضيعة ضايعة :grin , الف الف هنا و عافية و صحة على قلبك و قلب كل العيلة واحد واحد .

    اكيد الكريما ما رح تطلع ثقيلة , بالعكس متل ما شفتي و ان شاء الله المرة التانية بتطلع الكيكة الاسفنجية متل ما بدك و احسن ;)

  52. majdo 30 June 2009

    والله شكلها كتير حلوان شاء الله رح اجربها

  53. منى 1 July 2009

    ان شاء الله تجربيها و تعجبك و انا رح استنى رايك , او اسئلتك اذا في شي مو واضح ;)

  54. em leen 2 August 2009

    كيفك ست منى انا هلأ عملت الكيك الاسفنجي واتبعت الخطوات اللي كتبتيها . بدي اسألك تقريبا وهو بالفرن نفش لكل الصينية وشكله زابط لما قلبته وحاليا مش متوفرة عندي فواكه فاشتريت حشوة التورته الجاهزة فبشو بقدر اشربها من جوه , ياريت ازا بتقدري تردي علي لانو بكرة عندي حفلة . :roll وشكرا كتير لالك من الاردن لحلب .

  55. منى 2 August 2009

    فيكي تشربيها بأيا سائل عندك , ممكن عصير برتقال او شراب ليمونادة أو سفن اب أو ايا ايا شي بيخطر ببالك , مرات بسقيها بحليب مع نسكافيه و بحشيها كريما و على الوج بحط توفي ..

    المهم الفكرة التسقية لتطرية الكيك و على فكرة اذا حضرتيها و خليتيها لكم ساعة بتطلع أطيب لان بتبرد و بتشرب النكهة كتير منيح ..

    لو تعرفي سعادتي ان نجحت الكيكة الاسفنجية معك , انا فخورة فيكي كتير ;) على راسي كل الاردن و اهلها

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)