محشي الباذنجان بالكماية


         وصفة : منى                 2011/10/04                 6 تعليقات
محشي الباذنجان بالكماية

رب العالمين خلق شي جوات الارض متل الحجر بس بياكلوه البشر , شو هو ؟

هي تحزوره قديمة و جوابها

الكماية

و ما ادراكم ما الكماية عشقي و غرامي و اكتر اكلة بحبها في الدني كلها , يعني يمكن زمرة دمي كماية ايجابي , الله اعلم .. بحبها حتى نية بقى كيف اذا كانت بقلب محشي البتنجان و كيف اذا كان المحشي شغل ماما المشهورة بمحاشيها المفلفلة المتبلة الي على اصول اصولها .

خبرتكم اني بزمناتي ما كنت حب البتنجان و لا ايا شي بيقرب ناحه , حتى المحاشي المشكلة اذا كان في بينها بتنجان ما عود قرب عليها ,, البتنجان كله كله كله , الا هل المحشي كان و لا يزال و سيبقى من الذ و اطيب المحاشي الي بتحضرها امي الله يخليلي ياها و يديمها بصحتها و عافيتها , امين . بيطلع معها غير شكل , يمكن اطيب محشي في العالم هو محشي ماما . حتى جميع أحفاد ال الصابوني ما بياكلوا محشي بتنجان في بيوتهم و من تحت ديات امهاتهم , و ما صاروا ياكلوه االا عند نانا مها ..

هل النوع مو كتير مشهور , بس الي بيجربه ما بيعود ينساه ابدا .. الكماية رح تعطي نكهة بتاخد العقل للمحشي كله .. و في حال كانت الكماية خلصانة عندك او ما مونتي فيكي تحضري نفس الوصفة بس بالحمص , يعني تنقعي كاسة و نص او كاستين حمص و بتسلقيهم تلات ارباع سلقة و بعدها بتحضري الحشوة فيهم , طيبين , بس مو متل الكماية .

بعد ما تقراي الوصفة رح تكتشفي انو وقت الطبخ قليل مقارنة بالمحاشي الي فيها حمض , هون رح يستوي المحشي بسرعة متل محشي الكوسا بلبن , انتبهي احسن ما يفتحوا الحبات و يروح تعبك على الفاضي .

بالصحة و الهنا





2 كيلو باذنجان حجم متوسط , محفور

الحشوة :

2 كوب و نصف رز مصري
4 – 5 كوب كماية , مفروكة و منظفة جيدا و مقطعة شرائح سميكة نوعاً ما
نصف كيلو لحمة غنم مدهنة
ملعقة صغيرة بهار حلبي
ربع ملعقة صغيرة قرفة
ملح




• تخلط مقادير الحشوة مع كوب من الماء و تترك جانباً لمدة نصف ساعة أو حتى اعداد الباذنجان . في حال لم تكن اللحمة مدهنة تضاف ملعقة او ملعقتان من السمنة .

• يغطى قاع قدر كبير بعظام خاروف , تحشى حبات الباذنجان بالحشوة و تصف فوق العظام بترتيب ثم تغطى بطبق و يوضع فوقه ثقل . تغمر بالماء مع القليل من الملح و البهار فقط .

• يوضع القدر على نار متوسطة حتى يغلي , تهدى النار و يترك حوالي نصف إلى ثلاث ارباع الساعة أو حتى ينضج .

• يرفع من المرق و يقدم مع اللبن المثوم أو مع مخلل الخيار حسب الرغبة .

التعليقات

  1. غيث 4 October 2011

    يا ستي ان كنت الاولى او الاخيرة رح اعلق لاني ما عبقاوم اكلاتك منى عن جد هي اكلة ملوكية الله يسلم دياتك وديات والدتك ويخليلكم اياها ويخليك لاولادك والله كل وحدة فينا بتلاقي اكلات امها هي القمة لاني بالفعل رائعات بالنفنفة ما شاء الله عليهم الله يديمهم عز النا يا رب وشكرا على الاكلة الاكتر منن رائعة وبنصح الكل يعملوها لاني مجربتها متل طريقتك الله يعطيك الف عافية ورائعة بكل معنى الكلمة

  2. farah 5 October 2011

    بصراحة هالاكلة جديدة عليي انا كتير بحب الكمة بس بساويه مفركة لحاله مع اللحمة او مع الرز يعني مثل الرز بفول بس مع الباتنجان هي اول مرة بسمع بالوصفة
    عندي استفسار بالنسبة للمحشي ما بتضيفوله حمض بالمرق؟؟
    يعني نحنا المحشي الشامي اولا بالتتبيلة بنحط كمون مع البهارات وبنحط حمض للمرق اما تمر هندي او حصرم او ليمون يعني اي حمض على ذوقك ولما بتنضج الطبخة بنضيف بالآخر ثوم مدقوق ونعنع يابس مدة دقيقتين وبنطفي النار وبيطلع محشي غير شكل.
    يا ترى بحلب غير شكل المحاشي؟؟
    وعلى كل تسلم ايديكي دائما بتأتحفينا بشي جديد

  3. منى 5 October 2011

    هلا غيوثة :)
    ما في اطيب من طبخ الامهات , اطيب لقمة لقمتهم , مغمسة بالحب و الحنان

    الله يخليلنا امهاتناو يقدرنا على برهم :)

    ان شاء الله يتشجعوا البقية ما دامك شهدجتي بهل المحشي ;)

  4. منى 5 October 2011

    هلا فروحة :)
    هل النوع الوحيد الي بينطبخ من دون حمض و لا توم و لا نعناع و لا ايا شي بس ملح و بهار , قريب على طريقة الكوسا بلبن . بقية الانواع بتنطبخ متل ما قلتي , يمكن هل النوع منطبخه هيك لحتى تظهر طعمة الكماية ;)

    ان شاء الله تجربيه و يكون على زووءك و اكيد مستاهل :)

  5. um hadi 25 May 2013

    بس نخبص الرز معي شوي وربي يسرر

    • منى 26 May 2013

      بيكون معناها الحشوة قليلة , كتريها نتفة بيمشي الحال

تقييم الوصفة
عاديةقد أحضرهاجيدةممتازةأكثر من رائعة (1 votes, average: 5.00 out of 5)