محشي مشكل بحمض


         وصفة : منى                 2009/09/04                 31 تعليقات
محشي مشكل بحمض

·         تحضر الحشوة : تخلط اللحمة النية و الرز و البهارات و دبس البندورة و القليل من الماء و تترك الحشوة حتى الانتهاء من اعداد الكوسا و بقية الخضار في حال استعمالها و ذلك لمدة نصف ساعة تقريباً .

·          تغسل حبات الكوسا ثم تقطع رؤوسها و تغمس بالقليل من الملح و تترك لمدة عشر دقائق , هذه المرحلة هدفها تطرية رؤوس الكوسا كي لا تتشقق أثناء الحفر .

·         تحفر حبات الكوسا بانتباه حتى تبقى قشرة رقيقة و يحتفظ باللب لتحضير المثومة . يزال راس حبة الفليلفة و يتم التخلص نمن البذور .

·         تحشى حبات الكوسا و الفليلفة بالحشوة المجهزة من دون ضغط و يترك مقدار نصف عقدة اصبع من كل حبة بدون حشو لأن حبات الأرز ستنتفخ عند الطبخ .

·         يغطى قاع طنجرة ببضع من عظام الخاروف ثم ترتب حبات المحشي فوقهم .

·         يذوب رب البندورة بالقليل من الماء ثم يضاف الثوم و النعناع و الحصرم و الملح و كمية من الماء تكفي لغمر المحشي , يمكن زيادة كمية الحمض حسب الرغبة .

·         يغطى الكوسا محشي بطبق مسطح و يوضع فوقه ثقل كي لا تخرج حبات الأرز أثناء الطبخ ثم يغمر بالماء و يوضع على نار متوسطة حتى يغلي .

·         بعد أن يغلي المرق تهدى النار و تغطى الطنجرة و تترك لمدة ساعة و نصف أو حتى يبضج الكوسا .

·         يقدم المحشي كوسا ساخناً مع الفجل و النعناع الطازج و الفليلفة الحرّة و بجانبه طبق من المرق الحامض اللذيذ .

فكرة مهمة :

في حال استخدام أكثر من نوع يصف الباذنجان أولا و فوقه القرع و فوقه الكوسا و أخيراً الفليلفة الحمراء . 

 




2 كيلو كوسا حجم متوسط
حبة أو حبتين فليلفة حمراء كبيرة


الحشوة :

نصف كيلو لحمة مدهنة
3 كوب رز مصري
نصف ملعقة صغيرة بهار مشكل
رشة قرفة
1 – 2 ملعقة كبيرة رب البندورة
ملح

المرقة :

ماء يكفي لغمر المحشي
4 فص كبير ثوم مهرووس
ملعقة كبيرة نعناع ناشف
2 – 3 ملعقة كبيرة رب البندورة
فنجان صغير حصرم معصور ( أو عصير تمر هندي )
ملح
عظام خاروف





• تحضر الحشوة : تخلط اللحمة النية و الرز و البهارات و دبس البندورة و القليل من الماء و تترك الحشوة حتى الانتهاء من اعداد الكوسا و بقية الخضار في حال استعمالها و ذلك لمدة نصف ساعة تقريباً .

• تغسل حبات الكوسا ثم تقطع رؤوسها و تغمس بالقليل من الملح و تترك لمدة عشر دقائق , هذه المرحلة هدفها تطرية رؤوس الكوسا كي لا تتشقق أثناء الحفر .

• تحفر حبات الكوسا بانتباه حتى تبقى قشرة رقيقة و يحتفظ باللب لتحضير المثومة . يزال راس حبة الفليلفة و يتم التخلص نمن البذور .

• تحشى حبات الكوسا و الفليلفة بالحشوة المجهزة من دون ضغط و يترك مقدار نصف عقدة اصبع من كل حبة بدون حشو لأن حبات الأرز ستنتفخ عند الطبخ .

• يغطى قاع طنجرة ببضع من عظام الخاروف ثم ترتب حبات المحشي فوقهم .

• يذوب رب البندورة بالقليل من الماء ثم يضاف الثوم و النعناع و الحصرم و الملح و كمية من الماء تكفي لغمر المحشي , يمكن زيادة كمية الحمض حسب الرغبة .

• يغطى الكوسا محشي بطبق مسطح و يوضع فوقه ثقل كي لا تخرج حبات الأرز أثناء الطبخ ثم يغمر بالماء و يوضع على نار متوسطة حتى يغلي .

• بعد أن يغلي المرق تهدى النار و تغطى الطنجرة و تترك لمدة ساعة و نصف أو حتى يبضج الكوسا .

• يقدم المحشي كوسا ساخناً مع الفجل و النعناع الطازج و الفليلفة الحرّة و بجانبه طبق من المرق الحامض اللذيذ .


فكرة مهمة :

في حال استخدام أكثر من نوع يصف الباذنجان أولا و فوقه القرع و فوقه الكوسا و أخيراً الفليلفة الحمراء .




  • وصفات تانية ممكن تعجبك


التعليقات

  1. رنا 4 September 2009

    الله الله عالمحشي وصلت ريحته لعندي
    ياستي يسلموا ايديكي والمحشي من الاكلات الصعبة نوعا ما…خصوصي قصة الفلفلة من شي سنة تقريبا سافرت حماتي وقررت اعمل محشي من اوله لاخره من الحفر للحشي للطبخ والمشكلة انه عمي ابو زوجي بينتزع مرائه اذا المحشي مخبوص .. :upset جربت اشتغل ومع انه طلع عندي مصابين وجرحى كتير بعملية الحفر بس مايئست لانه كمية المحشي كانت خمسة كيلو يعني بيطلع طبخة قد مانقص :grin المهم مع كل كوساية احشيها اقرأ اية الكرسي وقيسها واوزنها وقلبها …بس شو طلع محشي تحفة بالاخير وبشهادة الشهود :grin

  2. gsm 4 September 2009

    يسلموا ايدك يا رب يا منوشة ان شاء الله بكرا بس ما اشتري الكوسايات رح اعمله ورح اخبرك عن النتائج بس في شغلة هلق هون صعب تلاقي لحمة مدهنة بقى معلش اذا كانت عادية وضفتلها شوية سمنة بيمشي الحال لأنو كتيير عم نتعذب لنلاقي لحمة غنم بقى كيف مدهنة وريته يعطيك الف عافية ويعطيك ليرضيك ويفرحك بولادك وتشوفيهن باعلى المناصب يااااااااااارب

  3. نادين 4 September 2009

    امممممممممممممممممم يسلم ايديكي يا منى المحشي بحمض مافي اطيب منو والله كتير كتير اشتهيت عليه بس شو بدي اعمل يا حسرة :cry
    انا اشتقتلك كتير واشتقت للموقع
    و بعتلك وصفه من اسبوع و بعتلك ايميلين واحد رد والتاني سؤال بس حسيت انو ما وصلك شي مني فقلت بسالك هون وبتاكد لانو في كتير عالم عم يقلولي انو ماعم يوصلهم ايميلات مني وقت ببعت
    فوصل شي مني 3 ايميلات ؟؟ 000 حول

  4. semo 5 September 2009

    مممممممممممممممممم

    المحشي لحالوبيجنن كيف لو كانت بحمض الحصرم

    بس انزل عسوريا رح جيب معي عصير الحصرم ان شاء الله

    مشان ما انحرم من هالاكلات الطيبة

    بس بدي اسألك منى مشان التارت انا عملتو من يومين طلع كتير قاسي وصار يتكسر اثناء التقطيع

    وطعمة الزبدة كتييييييييير ظاهرة وكأن عم ناكل زبدة مع اني ما خبزتو كتير بس لحتى صارت اطرافو ذهبية

    يعني حاسة انو ممكن تكون الزبدة كتيرة 200 غرام

    في قالب زبدة 125 غرام قلت ممكن تكوني مخربطة

    وانا عم اعجن ماصار متل الرمل كانت لينة مع انو كل المكونات باردة حتى الطحين والزبدة كانت قاسية حجر من البرودة

    والله بعرف اني تقلت عليكي بس انا كتير بحب التارت وما نجح معي ابدا

  5. غيث 5 September 2009

    الله يمسيكم بالخير وبنفحات عطرة من هالشهر الكريم والله يسلم ايديك منى انا بقى بموت بالمحاشي افخر اكلة عندي هيه المحشي لدرجة لما بنزل عسوريا بتتسابق امي وحما تي الله يخليهم لي بعمل المحشي لي بيعرفوني بموت فيه وحياتك وشي منفنف من تحت دياتك الله يعطيهم و يعطيك العافية والاجر والثواب ويسلم ايديك :zzz

  6. منى 6 September 2009

    هلا رنونة :)
    جيبي الفليلفة و الفجل على بال ما جهز الطاولة , بس كتري الفليلفة الحدة , انا بحبها كتيرر جنب المحشي :zzz

    يا ستي انا اول محشي ساويته صار مصافي و بعدها حولت الاكلة من محشي لمتومة :grin

    هنا و الف عافية و الاختبار الي مريتي فيه مو قليل و خصوصا لاول مرة , هنا على قلبك و قلب عمك و كل العيلة واحد واحد , بوسيلي الفتفوتة الحلوة

  7. منى 6 September 2009

    هلا gsm:)
    يا ستي بيصير , هلا بالغنم المدهنة اطيبي بس اذا مو متوفرة فيكي تستبدليها بالسمنة و على فكرة بالربف عنا بسوريا بضيفي زيت زيتون عوض عن الدهن و السمن و انا مجربتها فيه و عجبني :zzz

  8. منى 6 September 2009

    هلا ندوش :)
    لا تزعلي و لا على بالك , خلص هلا رح ابعتلكم طنجرة محشي , و انتي تبقى مزمزيها على كيفك , بس ركزي حمضها قبل الصيام ;)

    وصلوا الايميلات و انا الحق علي ما رديت , بس و الله ما تزعلي مني , رمضان و صيام و عزيمات :roll

    وصلوا الايميلات حول

  9. منى 6 September 2009

    هلا سيمو :)
    و الله ما بعرف شو المشكلة , انا متاكدة من عيار الزبدة , ممكن يكون الطحين الي استعملتيه مو خاص بالحلويات ؟ انا هلا قايمة اعمله بكرة عندي ضيوف و اذا ربنا يسر رح صور الخطوات المصورة للتاكد من كل شي ;)

  10. نادين 6 September 2009

    هلا منوشه و لا يهمك عادي
    انا بعرف انو الكل مشغول يعني تحيلي انا وببريطانيا و مشغوله هههه
    يسلم ايديكي

  11. cmax 6 September 2009

    يا ستي قال لحتى يكون المحشي طيب لازم يكون فبه 3 حاءات :?
    يعني حار و حاد وحامض وهدا السر بطيابة المحشي :p
    يعني على قول ولادي كل يوم بدنا محشي مرقة وهم بيأمروا وأنا علي التنفيذ

  12. semo 7 September 2009

    انا استخدمت طحين ابيض فاخر

    معقول في فرق بينو وبين طحين الحلويات؟؟ :? :?

  13. gsm 12 September 2009

    سلام عليكم منونةبس حبيت اخبرك أنامن يومين عملت هل المحشي هو صحيح كانوا محشيات الكوسا حجم عائلي بس والله هادا يللي كان متوفر المهم طله المحشي كتيير طيب بس اناضفت شغلة يعني بما غنو انا إستعملت حمض الليمون لعدم توفر حمض الحصرم ضفت معلقة صغيرة من السماق للمرقة وكتيير طلعت طيبة يسلموا إيديك يا منى على هل الوصفات والله ينولك مراد قلبك ويوفقلك قطاطك يا رب بهل الأيام الفضيلة

  14. منى 12 September 2009

    هلا سيمو :)
    ما في فرق , الصراحة عصرت مخي كتير ما عرفت وين الغلط , يا ترى نوع الزبدة كان منيح او عادي ؟

    بكل الاحوال اكيد في حلقة مفقودة , صرت متل المفتشين :grin , بس و الله عن جد الوصفة كتير يممي و مستاهلة تعيديها ;)

  15. منى 12 September 2009

    هلا gsm:)
    هنا و الف الف صحة و عافية و هنا يا حق على المحشيات , ما في اطيب منهم و يا ستي الحاجة ام الاختراع , ممم بأى جربتيه بالسماق , فرط ريقي الله يسامحك :zzz

    الله يخليك و يوفق انت و كل الغوالي على البك يا رب

  16. منى 12 September 2009

    هلا غيوثة :)
    اي معك حق المحشي اذا كان على اصوله و حمضه راطز ما في اطيب منه .

    بعد زمان القمر ما بان , ان شاء الله تكوني مشغولة بالخير دوما , بوسيلي القطط الحلوة

  17. semo 19 September 2009

    انا بعرف انها وصفة بتجنن ونوع الزبدة كان من افخر انواع الزبدة

    رح جربها مرة تانية انا من النوع اللي ما بيأس من اول مرة

    بس المرة الجاية رح قلل مقدار الزبدة رح حط اصبع صغير 125 غرام وشوف النتيجة وخبرك

    اسفة اذا زعجتك باسئلتك :roll

  18. منى 19 September 2009

    له سمسومة شو زعجتيني و ما زعجتيني :roll بالعكس انا دوما تحت امرك و امر ايا واحدة من الخوات .

    ان شاء الله تجربيها مرة تانية و تطلع متل ما بدك ;)

  19. GHADA 23 November 2009

    يسلم دياتك اخت منى شو بيشهي المحشي
    بس للاسف انا دائما بيخبص معي وماكنت اعرف السبب
    مع اني بعملو بنفس الطريقة والمقاييس
    هو بيطلع كتير طيب بس صار حلمي انويتفلفل معي
    وما عم يمشي الحال :sigh

  20. GHADA 23 November 2009

    يسلم دياتك اخت منى على المحشي اللي بيشهي
    انا بعملو كتير وبيطلع كتير طيب بس للاسف دايما بيطلع مخبوص مع اني بعملو بنفس الطريقة والمقادير
    وكل ما بعملوا بيكون عندي امل انو يتفلفل بس مافي فايدة مابعرف اذا المشكلة بالرز :sigh

  21. منى 23 November 2009

    مممم هلا غادة اختي شرفتي الموقع و نورتيه :)
    اختي عم يطلع مخبوص من طريقة الحشي نوعية الرز ما الها علاقة, هادا هو السبب , بقى فيك تجربي مرة تانية و تكون الحبة نافصة شي نص عقدة اصبع و يا رب يزبط معك هل المرة ;)

  22. GHADA 3 December 2009

    شكرا كتير اخت منى وراح اعمل بنصيحتك
    وان شاء الله بيزبط معي هالمرة ;)

  23. منى 4 December 2009

    ان شاء الله و يا رب يضبط ;)

  24. Mays 8 December 2009

    يا ستي ما في أطيب من المحشي الحلبي.
    أنا حماتي يتعمل شغلة صغيرة بتخلي نكهة محشيها غير.
    قبل ما تحطت المرقة للمحشي ، يتقلي التوم و النعناع اليابس مع شوية سمنة شي دقيقة و بتحط معهم معلقة دبس البندورة و بتخيلها شي دقيقة تانية بعدين بتحط التقلاية على المحشي و بتضيف الماي و باقي مكونات المرقة و بتكمل طبخو عادي، و فعلاَ نكهة المرقة بتطلع غير عن لما ينحط الثوم بدون تقلاية.

  25. منى 8 December 2009

    و الله فكرة يا ميوسة , اكيد رح جربها , لان رح اعمل محشي جزر و ملفوف هل الكم يوم و رح الطش الفكرة منك , خليلي عينك الف شكر الك لاغناء الوصفة ;)

  26. Jassy 1 September 2010

    السلام عليكم ورحمة الله

    لك ما حليلو الليميت تبع الدخول للموقع يخلص إلا بنص رمضان ؟؟؟؟؟ .. يا ستي مين قدك، الكل بدو يفوت يعمل من هالأكلات الطيبة :)

    بس تأخر أول الشهر ليرجع يفتح الموقع ههههه عملت محشي كوسا من كام يوم وأخدت الطبخة من ماما، ما كتير بتختلف عن مقاديرك. بس أنا غلللللطت وكترت بهارات بالحشوة وحطيت كزبرة زيادة وووووو … لذلك لما تاني مرة عملت غير محشي تاني يوم، ما حطيت للحشوة إلا متل ما حكيتي … يا عيني على كلامك. وأنا عم اتحزر: يا ترى منى شو بتكون حاطة ؟ ههههههه

    بس بدي اسألك :x حمض أو منقوع التمر الهندي ؟ حمض البندورة ما بيكفي ؟
    عملت غير محشي تاني يوم وما عملتو بالبندورة وإنما بمرقة حامضة. حطيت ليمون ودبس رمان :roll طلعت طيبة ماشي حالها، قولتك انتي بيغنوا ولا إجباري اللي حكيتي عليون ؟ يعني للمرات الجاية …

    الله يعطيكي العافية :)

    والسلام عليكم

  27. منى 5 September 2010

    :grin :grin
    هي على يا هلما لالي , طلعنا منحب نفس الواح , قصدي المسلسل :grin

    شو بدنا نعمل , كل رمضان بيصير نفس القصة , بس هل المرة كانت اكتر بكتير , الحمد لله رب العالمين على كل شي

    المحشي بده حمض , و ما بيكفي حمض البندورة , ممكن تستعملي الحصرم او منقوع التمر هندي و اذا مو متوفريين عندك فيكي تستعملي شوية ليمون , مع انه ما بيطلع تمام و متل مو متعوديين بس لا جود الا بالموجود :zzz

    هلا شوفي كل شي و اله شي , محشي الكوسا بيصير باكتر من طريقة , اما بندورة و بصل و ملح و بهار , هي مسقعة البندورة , و اما متل مو كتوب بهل الوصفة و ما فيكي تغيري فيها شي والا بتنقص الطعمة , و اما مع ثوم و ملح و بهار و هادا من دون بندورة و بيتقدم مع اللبن و إما مع الشوكي او الكماية و ملح و بهار و بس و كمان هادا مع اللبن :zzz

    الله يعافيكي و انا ممنونة كتير ردودك الحلوة الطيبة

  28. Jassy 6 September 2010

    السلام عليكم

    حيوتي اتّى منوشة

    ممممممممم طيب، المرة الجاية بعمل معناها بمنقوع التمر الهندي. وما ححيد عن الوصفة نهائي .. (لو تعرفي لما كان ما عم يفتح معي الموقع شو دورت بالنيت وشو طلعلي شغلات وبيحطوا شغلات وعملات للمحشي تشيب شعر الراس) .. :roll بس أنا ما بثق ولا بشي بقرا طريقتو بالنيت العربي غير هون ….. حاحكيلكون قصة بس لا تضحكوا علي .. مرة أول ما حماتي بعتتلي فول يابس مو سوريا جوزي قلي اعملي: “فول مقلّى” … قلتلو :x شو هادا فول مقلى كمان ؟
    ولقيت وصفة باحدى المنتديات الزاخرة العربية، أن بينتقع بالمي بعدين بيتصفى وبينحط بالزيت عنار قوية ليستوي … :roll … وأنا شو بيعرفني كيف بينعمل الفول اليابس ؟
    ومع إني اتبعت الوصفة بشكل دقيق بس اكتشفت بعدين إني وقعت ضحية عبث أحداهن أو حتى أحدهم قاعدين وعم يشتغلوا بهالعالم عالنيت :roll ومصير الأكلة طبعا كان قريب عالزبالة. يا حرام :cry

    شكرا منوشة إلك على ردودك على ردودنا اللي بتجنن :zzz

  29. ام شهلا 26 March 2012

    انا بدي محشيييي جوعتيني وانا مرضانة مو قدرانة ساويه الله يسامحك وانا حاولت اعمل محشي من فترة ومع انو الكوسا اللي بهالبلد بتشبه كلشي الا الكوسا عملتا وحشيت بطاطا وبندورة وطلع وللأمانة ماشي حالو لانو دبس البندورة اللي عندي معو دبس فليفلة فما طلعت المرقة طيبة بس لما بنزل عسوريا بدي اترك شنطاية السفر واطالع معي شنطاية طنجرة المحشي :grin

  30. ام شهلا 21 July 2012

    مراحب منون ياستي هلا حطيت طنجرة المحاشي عالنار وشتغلت متل مو مكتوب خطوة خطوة بس بدل الحصرم ليمون لانو ماعندي :sigh وجوزي الحباب قرر يساعدني قام جبلي اللاب توب عالمطبخ وحملي ياه قلي حاج تروحي وتجي وانتي عم تطلعي عالوصفة خدي تاكدي هون وقعد يعطيني تعلميات على كتري المرقة ومدري شو المهم بس يادن وادوقو بقلك عالنتيجة ويسلمو ايديك يااحلى منى :)

  31. ام شهلا 21 July 2012

    مراحب منون ياستي هلا حطيت طنجرة المحاشي عالنار وشتغلت متل مو مكتوب خطوة خطوة بس بدل الحصرم ليمون لانو ماعندي :sigh وجوزي الحباب قرر يساعدني قام جبلي اللاب توب عالمطبخ وحملي ياه قلي حاج تروحي وتجي وانتي عم تطلعي عالوصفة خدي تاكدي هون وقعد يعطيني تعلميات على كتري المرقة ومدري شو المهم بس يادن وادوقو بقلك عالنتيجة ويسلمو ايديك يااحلى منى :)

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)