مسابقة وصفات من مطبخك لسفرتنا


         وصفة : منى                 2009/08/06                 91 تعليقات
مسابقة وصفات من مطبخك لسفرتنا


بسم الله اتفضلوا و الأكل على أد المحبة

رح نبدأ بالعصير و لارا ضيفتنا أطيب شراب زبيب , وصفة أصيلة

شراب الزبيب ( لارا مينا )



و بعدها الشوربة و عندا تنتين واحدة من أم السوس و التانية من عروستنا الحلوة أمونة

شوربة الفريكة بالخضار (souha)




رشوف (أمونة )




و الي حابب يزين سفرته بشوية سلطات و مقبلات , يختار من هل الأطايب الي بيعجبه



سلطة الخيار بصغار الذرة (souha)





لفائف الفليلفة بجبنة الفيتا(souha)




البيض بالمايونيز (souha)





و الطبق الرئيسي شي جديد و معطر بروايح الهند و توابلها , اتفضلوا على سفرة سهى


كرات الدجاج بالزعفران (souha)



و ما رح ننسى الموالح و الضيافة هل المرة على لارا

باتون ساليه ( لارا مينا )




و هلا وصلنا لمهرجان الحلويات الي كان الها حصة كبيرة على سفرتنا
أشكال و ألوان و من كل البلدان
و الي عمل النا الحلويات , أم أحمد و رنونة و سوما و سهى
يا سلام اتفضلوا يا صبايا و دايما الحلو اله محل




فطيرة التفاح على الطريقة التركية ( souha)




كاتو بشرايح الأناناس ( رنا )





كاتو النسكافييه ( أم أحمد الغالي)



كيكة البسبوسة ( رنا )




تشيز كيك السويسرول (soma)





شبكة العنكبوت ( رنا )





كاتو الفواكهة بكريما القشطة ( رنا )




كاتو الفوريييه نوار (souha)





و هيك خلصنا و ان شاء الله تعجبكم سفرتنا

صيامكم مقبول ان شاء الله و طاعاتكم مقبولة

و ربي نكون كلنا من عتقاء هل الشهر نحنا و كل أمة محمد
  • وصفات تانية ممكن تعجبك


التعليقات

  1. لارا مينا 7 August 2009

    تكرم عيونك أخت منى لاتوصي حريص .

  2. منى 8 August 2009

    تسلميلي لارا :)

  3. رنا 8 August 2009

    شو هالافكار الخطيرة يامنى شي كتير مميز وانشالله رح تعمر سفرتنا بأكلات لذيذة ومن كل النكهات والبلاد والاذواق
    ياستي انا اشتقتلكم كتير واشتقت للموقع انا صرلي زمان ماتفقدت الموقع لانه هداك الشهر مابعرف كيف مر …اجت امي من سوريا وولدت الحمد لله وجبت زينةخانم وصار عندي مسؤولية ولدين ..يلا الله بيعين انشالله رح حاول شارك معكم بالمسابقة والك يامنى كل الحب والتقدير ;)

  4. ام احمد الغالي 8 August 2009

    السلام عليكم
    اختي منى انا عندي وصفه بسيطه ومتواضعه حابة شارك فيا
    بس مو عارفه وين لازم حطها
    وكيف بحمل الصورة بلموقع وشكرا كتير

  5. Iman 8 August 2009

    اهلين منى. شو فكره هالمسابقه الحلوه. عجبتني كتير و ان شاء الله راح اشارك فيها ان الله قدرني. فرصه لنتشارك مع الاخوات بوصفاتنا المختلفه. رمضان كريم و كل سنه و الجميع بخير. :)

  6. soma 9 August 2009

    السلام عليكم أخت منى
    متل ما قالت قبلي الأخت أم أحمد ممكن تشرحي كيف بنقدر ننزل وصفاتنااذا سمحتي
    و تاني شي بقول ألف مبروك البنوتة أخت رنا و انشالله بتربى بعزكم

  7. نور الأسلام 9 August 2009

    السلام عليكماختي منى وجميع الاخوات رمضان كريم وخير وبركه للجميع انشاء الله الف الحمدلله على السلامه اخت رنا وريتو الف مبروك تتربه بعزكم ودلالكم يارب :zzz بقي الشقا علي بقا والله عم اتوحم عن جديد وعم افطم ابني ومعزبني هاليومين شكرا الك منى مابينفع اذا طبقت وصفه من وصفات الموقع وبعثتها برمضان او لازم قبل رمضان

  8. امونه 10 August 2009

    حبيبتي منى انا ايمان من الأردن قبل كل شي بدي ابارك الك و لكل الستات الي معك على سنتين من الجمال و الابداع الي ان شاء الله ما بينتهوا

    انا كنت بتابع مطبخكم المميز من أول أيامه و بصراحه ما بقدر ما افوت هالموقع كل يوم حتى لو مو ناويه اطبخ ;)

    ما بعرف ليه ما فكرت قبل هيك اني اشترك معكم بهالموقع الرهيب و المميز

    بس هيني بالنهايه صرت وحده منكم ان شاء الله و حاسه اني بعرف كل وحده منكم ازا مو بوصفتها بكون بتعليقها الظريف على الوصفات الموجوده

    يا رب تقبلوني بينكم و الله يوفقكم بهالمسابقه الجديده … :)

  9. رنا 10 August 2009

    شكرا كتير ياسوما كلك ذوق ومابعرف قلك عقبال عندك ولا شو لانه ماسبق وتعرفت عليكي …بس رح قلك انشالله عقبال ماتحققي كل الي بتحلمي فيه ;)

    الله يكون بعونك يانور الاسلام والله حاسة فيكي لاني مريت بهالمرحلة …الوحام والفطام …يلا الله بيعين …الوحدة بس تطلع من بيت اهلها بتقول وداعا للراحة :grin

  10. منى 10 August 2009

    سلام عليكم كل الصبايا المجموعة هون , انا كنت غاطة و مو مبينة , بس مو على فاشوش . كان عندي عزيمة لرفقاتي رح نزلكم اخبارها المصورة و اللذيذة :zzz باذن الله

    رنونة الحلوة مبارك ما اجاكم و الحمد لله على قيامك بالسلامة و الف مبروك وصول زينة خانم الحلوة , ربي يجعلها تقية نقية صالحة بارة فيك و بابوها و من المسعدات في الدنيا و الاخرة .
    و انا عم قول لحالي وين هل الغطة , بس الصراحة ما خطرلي .
    هلا اهم الشي صحتك و البي بي و اذ صح الك و طبختي شي فياسلام اذا شاركتينا.
    ديري بالك على حالك اهم الشي هلا , ما بعرف شو قول . بس انا بموووت على القطط بهل العمر و هيك اشتهيت شمها من خدها لهل القطة الحلوة , الله يخليلك ياها ;)

  11. منى 10 August 2009

    هلا ام احمد :)
    الوصفة وصلت , اما الصورة ففيك تحمليها على ايا موقع لتحميل الصور و بعدها تحطي الها رابط و انا ما نشرت الوصفة لان رح نزلها بموضوع مستقل ان شاء الله , بس لا تنسي الصورة يا عسل ;)

  12. رنا 10 August 2009

    الله يسلمك يامنى معقول ماخطرلك اني ولدت :grin بس معك حق انا لهلأ مو مصدقة :grin
    ياستي صرنا رنونة وزنونة وياريتنا جنب بعض لاعطيكي ياها تشميها وتضميها وتنيميها عندك كمان ..والله انتي يامنى عن جد صرتي اختي عن بعد وبحكي عنك بالخير لكل الناس كاني بعرفك من مية سنة وصرت شايفتك بنومي كذا مرة :grin
    انشالله رح حاول شارك بهالمسابقة الظريفة وشكرا الك عالدعوات الحلوة وانشالله الك مثلها يارب ;)

  13. منى 10 August 2009

    هلا امون :)
    يا عين يا عين , رح حضر حالي على وصفتك , و انا بعرف مسبقا انها نغم يا ملكة الكنافة البيتوتية :zzz
    ان شاء الله ينعاد عليك و على كل عيلتك بالخير و البركة و التقوى و الطاعة و يا رب نكون بالاضحى على جبل عرفات :cry , اامين يا رب اميين

  14. منى 10 August 2009

    هلا سوما :)
    الوصفات فيكي تبعتيها كرد على ايا وصفة و انا رح انشرها باسمك باذن الله ;)
    بانتظارك سمسومة

  15. منى 10 August 2009

    هلا نور:)
    كانك رابطة راسك هلا , مو بالله . الحمد لله على الكبر و … :grin
    الله يمرق هل الكم يوم على خير و يا ريت نور لو وصفة جديدة لان الهدف من المسابقة هو التجديد :zzz

  16. منى 10 August 2009

    هلا ايمان :)
    نورتي و مية هلا فيك و بكل اهل الاردن على راسي و الله .
    كبرت هلا عيلتنا و زادت اخت جديدة و غالية , بس تعي لهون . ما في طلعة من المسابقة , بدنا وصفة اردنية على كيف كيفك , يعني خلص علقتي و ما حدش سما عليكي :grin

  17. منى 10 August 2009

    هلا رنونة , لك شو ما عم امزح معك .. هاتيها و انا بحطها بعيوني بس اذا عزبت كتير بالليل رح رجعها بايميل لعندك لان انتي بتفهمي عليها اكتر :grin

    الله يخليلي ياكي رنونة و القلب على القلب و انا رح استنى الوصفة اذا صح الك

  18. امونه 10 August 2009

    اهلا بيكي ست منى و من عيوني راح بحبشلك بمطبخنا على وصفة أردنيه تعجبكم

    بس دخلك بما اني جديده هون مو عارفه ازا في مكان معين بقدر اسأل فيه عن وصفات او هيك اشياء

    بالعربي الفصيح مطلوب مني أكلة مندي و انا ما بعرف عنها شي ساعدوني :cry

  19. Iman 10 August 2009

    اهلين منى. فينا نشترك باكتر من صنف? لانو في عندي طبقين جدا غريبين بحي اشترك فيهم. اما الاخت رنا فالف مبروك على زينه. ان شاء الله تتربى في عزكم. بدي منك جاجه و كماجه لانو بنتي كمان اسما زينه. زينتي صارت 22 و بعد كام شهر بتتخرج من الجامعه ان شاء الله. على فكره انا امونه امريكا (امونه الكنافه) لانو صار معانا امونه الاردن ميه اهلا و سهلا فيها معنا. :zzz

  20. soma 11 August 2009

    السلام عليكم
    بس حبيت قول لرنا أنه الحمدلله عندي بنوتة بتجنن الله يخليلي ياها اسمها ألمى و عمرها 11 شهر و جوزي مو ناوي يجيب غيرها على قد ما جننتنا بس عنجد الولاد أحلى نعمة بهالدنيا الله لا يحرمهم لحدا يا رب و يخليلكم ولادكم
    أما بالنسبة للوصفات فانشالله يطلع بإيدي اكتب شي وصفة لأن أولا ما عندي كتير خلق و تانيا بحس حالي ولا شي قدام طبخاتك و صورك اللي بتشهي بس رح حاول و انشالله يطلع بإيدي

  21. رنا 11 August 2009

    اهلا ياايمان اميركا وشكرا كتير الك عالمباركة اللطيفة …ياستي انا سميت بنتي زينة لاني كتير بحب هالاسم وبحس كل اللي اسمهن زينة حلوات وذكيات …الله يخليلك زنزونتك ويحفظها ..ماشالله حولها صبية معناها بنتك قدي …انا مواليد 1987 الله يخليلك ياها وتفرحي فيها وعلى عيني وراسي اطلبي وتمني …بس شو هي جاجة وكماجة ماعرفتها :grin

    منى العزيزة شكرا كتير على لطفك وذوقك وصدقيني معجبين زينة كتار ولو بتنبعت بايميل كنت ماخليتها عندي بنووووب :grin

    الاخت سوما ..معناتا عقبال عندك بولد او بنت يصيروا اخوات لالمى واكيد زوجك يبعد كم شهر رح يغير رأيه ويشتهي على صغنون ;)

  22. souha 12 August 2009

    كيفكن يا صبايا يا حلوين لمة حلوة و أخبار حلوة
    كيفك منونة
    جيت بدي أبعت وصفة و كنت كتبتها على الوورد و عم أعمل لصق بس الزر ايمين مو مسموح يا ترى شو القصة على كل حال رح أبعتها باإيميل
    سلام ;)

  23. منى 13 August 2009

    هلا امونة الاردن :) انا عملت المندي مرة يمكن او مرتين , بس هلا نسيانة وين حطيت مقاديرها :sigh ان شاء الله بدور عليها و يا رب لاقيها و الف شكر الك للوصفة ;)

  24. منى 13 August 2009

    هلا أمونة الكنافة , قصدي ملكة الكنافة :)
    يا عيني , اكيد ممكن تشتركي باكتر من طبق و في أخت حلوة معنا , شطورة كتير اشتركت و بعتت منيو كامل :zzz

  25. منى 13 August 2009

    هلا سوما :)
    الف شكر الك للوصفات , شي بياخد العقل , سلمن يا حق ;)

  26. بشرى 15 August 2009

    السلام عليكم يا حلوات .. كيفك منوشة الحلوة؟

    وشي أسود منك والله إنو ما صحلي شوفك هالمرة بسوريا.. بس والله صار معي ظروف ومرض الله يبعده عنك وعنا أجمعين .. بقى سماح مهيك .. :cry

    بقى أنا رجعت وإن شاء الله رح ارجع عالموقع متل أول ..

    بالنسبة للمسابقة أنا مشاركة وفي عندي كم شغلة جديدة كمان رح ابعتلك ياهن آخر الأسبوع ان شاء الله .. ;)

  27. بشرى 15 August 2009

    رنا .. ان شاء الله ألف ألف مبروك زنزون .. لو تعرفي شو بحب هالاسم .. بكرا اذا الله طعمني ولاد رح سمي بنتي زينة كمان ويصيرو رفقة بنتك وبنت منى وبنتي :p

    ألف مبروك عيني ..

  28. منى 16 August 2009

    هلا ام السوس :)
    هل الخاصية منعناها بسبب السرقات و اللطش الي شغال على ابو موزة :roll

    بس فيكي تعملي لصق عن طريق
    ctrl+v
    المهم الوصفات وصلوا و يمممم ;)

  29. منى 16 August 2009

    هلا بشرى :)
    شو وشك اسود و ما اسود , يييي عادي و الله :zzz
    ان شاء الله كان شي بسيط

    يلا رح استنى الوصفات و نورتي مرة تانية بشورة

  30. رنا 16 August 2009

    شكرا كتير بشرى عالمباركة اللطيفة والله يطعمك زينة يارب

  31. امونه 17 August 2009

    منى يا عسل … الي كم يوم ما دخلت الموقع مع اني بفوت كل يوم حتى لو ما بدي اخد وصفه بس مشان أحافظ على حواسي الذوقيه :grin

    جايبتلكم خبر حلو .. يوم الخميس 20/8 راح يكون خطبتي و كتب الكتاب ان شاء الله … و طبعا انا ما تركت هالموقع بكل الواقات الي مرت و الي سبقت هالارتباط…او مره اجوا شافوني اهل العريس عملتلهم كيكة من هالموقع و تاني مره اجى معهم العريس و عملتله حلو برضه من الموقع و تاني مره اجى عملتله التراميسو و يوم الفاتحه عملتلهم كيكة التفاح و غطيتها بالتوفي كريم … و طبعاً سمعوا بالكبب الي بعملها و كلها اتعلمتها من منى جزاها الله خير هي و كل الستات الي بفيدونا هون … و اأول كلمه حكاهى العريس بدنا ندوق عمايل اديكي … جد كتير مبسوطه فيه هو ابن حلال و شاريني … و الحمد لله الي عوض صبري فيه … انا راح أصير بـ 14/2/20010 راح يسير عمري ان شاء الله 29 يعني دوبني لحقت أخرج من ركب العنوسه ههههههه
    سبع صنايع و البخت ضايع … بس الحمدلله الي بعتلي الي يستاهلني و استاهله ان شاء الله
    ادعولي الله يتمملي على خير و يكون وجه خير عليي و اكون و يكون الي عون على ديني و دنياي يا رب آآمين …

    منى ما راح أبطل أخد منك و أتعلم انتي بجد عم تفتحي بيوتنا جزاكي الله خير عني و عن الجميع و عقبال ما تفرحي بحبايبك يا رب

  32. MUNA M 17 August 2009

    السلام عليكم ورحمة الله وبركاته
    لا تعرفي يا اختي منى مدى فرحي بالعثور على هذا الموقع الرائع بعد ان كنت اعمل بحث على شوربة العدس التركيه…. هذا كان يوم امس ليلا . وسجلت فورا واحب ان اشكرك على جهدك الرائع عسى ربي يجعله في ميزان حسناتك
    الله يبارك لكم في رمضان ويجعلكم حميعا من عتقائه وجميع المسلمين
    اختكم منى

  33. منى 20 August 2009

    امونة ان شاء الله الف الف الف مبروك يا رب الخطوبة و الكتاب و يا رب يباركلك فيه و يباركله فيكي و تكوني ستر و غطا لبعض و تكونوا مبسوطين في الدنيا و الاخرة و تعينوا بعض على الحق و الخير يا رب ..

    ما بعرف كل ما بشوف عروسة بدمع عيوني , مرحلة جديدة و مهمة بحياتك رح تبدا , و ان شاء الله تكون خير .

    هي مبروك كبيرة و هي بوسة من هل الخد و الخد التاني , و هي زلغوطة حلوة ;)

  34. لارا مينا 20 August 2009

    ألف ألف ألف مبروك أمونة الله يتمم لك على خير إن شاء الله ويسعدك يارب دنيا وآخرة ورح أقولك مثل مابيقولوا بالعامية عندنا أول ماتتملك البنت ( الله يبني بيتك ) – ( وبيتك مبارك ياعروس ) وأنا مثل الأخت منى بفرح كثير لأي وحدة ربي يرزقها بابن الحلال وكأنها أختي بالزبط والله يسعد كل البنات يارب ويفرحهم قريب مين ماكانوا :zzz :zzz :zzz

  35. منى 20 August 2009

    هلا منى :)
    نورتي الموقع و شرفتيه و انستي اختي , مية هلا فيك اخت جديدة كريمة و عزيزة و اتمنى ان تجربي شي من الوصفات و تكون طيبة و على زووءك و كمان اتمنى ان تبقي معنا على طول :)
    الف شكر الك لكلامك و ردك الطيب ;)

  36. ام كريم 20 August 2009

    مرحبا للجميع الاخوات بلموقع اسفة يمكن وصلت متاخرة الف مبروك رنا وتربا زنزونة بدلالك ودلال ابوها ويحفظا من كل شر اما لامونة فالف الف الف مبروك وانشالله وقت الفرحة الكبيرة يارب وبحب كمان بارك للجميع بحلول شهر رمضان المبارك وانشالله بينعاد علجميع بلخير والبركة وانا ناطرة على نار وصفاتكم لاتنقل هههههههه ضحكو علي

  37. أم الهدى 20 August 2009

    أهلا وسهلا أمونة فيك أخت جديدة معنا وألأف مبروك والله يتمم على خير ويسعدك يارب
    منونة الحلوة شو هلأفكار الحلوة ان شاء الله رمضان خير بنعاد عليك وعلى كل الأخوات بالخير والصحة والايمان يارب
    الصراحة كان عندي كم وصفة كنت حابة شارك فيهم بس خفت اذا نزلتهم أغطي على باقي الوصفات وأفوز أنا قلت بترك دور لغيري :grin ههههه
    أكيد عمبمزح بس الصراحة كنت شوي مشغولة وما بقي عندي وقت يلا خيرها بغيرها
    بس حبيت أعايد عليك وعلى الأخوات برمضان وأرحب بالأخت أمونة

  38. نور الأسلام 20 August 2009

    السلام عليكم تحياتي الك منى ولجميع الاخوات :) حبيت اباركلك اخت امونه ويا ريتو انشاالله الف الف مبروك وجمع الله بينكما بالخير وتمام السعاده والفرح والسرور :zzz

  39. رنا 21 August 2009

    الف مبروك ياامونة كتير فرحتلك وهادا لقمة طيبة وجهه حلو عليكي …انشالله تضلي بهالنشاط المطبخي لانه عن جد الطريق الى قلب الرجل معدته ههههههههههههههههواسألي مجربة ;) اللله يتمم على خير يارب وتعيشي حياة سعيدة كتير

    شكرا كتير اختي ام كريم عالمباركة وكل سنة وانت سالمة بقدوم شهر رمضان الكريم انتي وكل الاخوات

  40. ام نور 21 August 2009

    السلام عليكم ورحمة الله وبركاته
    ماشالله على هل لمة الحلوة الله يديم المحبة اسمحولي اخواتي اعايدكم بمناسبة حلول شهر الخير والرحمة واتمنى شهر مبارك للجميع وينعاد عليكم بالصحة والسلامة وربنا يتقبل مني ومنكم امين يا رب
    لا تواخذوني ما رح اقدر اشارك في المسابقة لان سوف ارحل في هذا الشهر الى مدينة اخرى وانا الان كتير مشغولة بتوضيب الاغراض والتحضير للانتقال ادعولي الله يسهلا علي وانشالله مجرد ما وصلت ومشي النت برجع بتواصل معكم :)

  41. Iman 21 August 2009

    اهلين بكل الاخوات هون. بعد اذنك منى دخلت ابارك لامونه الاردن الف مبروك بنتي الله يباركلك و يسعدك يا رب. ياللا ورجيهم الشطاره لبيت حماكي من هلاء. و بقول للكل رمضان كريم و كل عام و الجميع بالف خير و لمنى الحبيبه الله يخليلنا هالموقع الجميل ه الجمعه الحلوه . و لرنا الحلوه ام زينه جاجه و كماجه يعني جاجه و خبزه بيعطوها اذا سموا ابنهم على اسم ابن حدا هههه.
    امونه امريكا :zzz

  42. semo 21 August 2009

    الف الف مبروك امونة

    والله دمعت عيني دموع الفرح ان شاء الله

    الله يبارك لكما ويبارك عليكما ويجمع بينكم على خير

    وهي زلغوطة لللللللللللللللللللللللللللللللليييييييييييش

  43. ام احمد الغالي 21 August 2009

    الف مبروك يا امونة والله يسدكم ببعض يارب ويجعل وجهك خير عليه
    من تجربتي زوجي كان يحب طبخي بس بعد ما تعرفت على الموقع صار يقلي صايرة فنانه
    الله يخليلنا منوشة العسل ويباركلا يارب بولادها ويجزيها كل خير

  44. laraye 22 August 2009

    الف مبروك امونة والله يهنيكي يا رب و يهنيو فيكي.
    و حبيت ابارك للجميع بقدوم شعر رمضان الكريم والله يجعلنا من عتقائه و ينعاد علينا وع اهالينا بالصحة والعافية :)

  45. ميساء 22 August 2009

    أخواتي الكريمات كل عام وانتم بخير والله يعيده عليكم بالخير والعافية ويجعل طاعاتكم مباركة وألف مبروك للأخت رنا على المولودة الجديدة الله يجعلها من أبناء السعادة ويبارك لها فيها وكمان أمونة ألف مبوك الخطوبة ويجعل التمام على خير صحيح هو على سلامته وكمان نحنا أختنا في الموقع ست الستات وشطورة وما في متلها الله يو فقكم حبيبتي و يجمع بينكم لما يحب ويرضى
    ولميمو الحلوة بقول شهر مبارك عليك وعلى زوجك وأولادك و كل أحبابك :)

  46. امونه 22 August 2009

    حبيبااااتي و الله عم ابكي و انا عم اكتب هالرد و دوبني شايفه الكيبورد :cry

    الحمدلله يا ربي ملكتي كانت روعه و الكل بحكي و بتحاكى فيني و في خطيبي الله يحفظنا من العين يا رب و يبعد عنا كل شر و يحمينا

    منى لارا ام هدى رنا ام احمد ام نور و نور الاسلام و الجميع ريتكم سالمين يا رب و الله يبارك فيكم و باعماركم و تشفوا بناتكم و عرايس ان شاء الله ..

    عم فكر من هلآ شو بدي أحضر على عزومة النسب الجديد…هنه راح يعزمونا الأسبوع هاد و احنا الأسبوع الي بعده و من هلآ يا منمن الله يهني قلبك دنيا و أخره عن كل وصفه راح أخدها من عندك

    و رمضان كريم على الجميع ان شاء الله و يكون شهر خير و بركه عليكم جميعاً يا رب

  47. منى 22 August 2009

    سلام عليكم يا صبايا , اي شو هل اللمة الحلوة , الظاهر لازم يكون في موضوع دايما للفضفضة و لحتى نعرف اخبار بعض و اخر المستجدات على الساحة العائلية .
    حسيت ان نحنا اليوم قربنا اكتر و اكتر من بعض , مبروك للعروستنا و للأم الصغنونة الحلوة و الحلوة الحامل الجديد و للعسل الي رح تنتقل ..

    انا عني لسا ما صار الي يوم راجعة من السفر و هلا عم حضر الوصفات الي بعتوها و رح نزلها و رح تكتمل كلها ان شاء الله يوم التلاتاء .

    هلا عندي عزيمة لأم زوجي و أمي و أخي ,هي اول مرة بيكون عندي عزيمة في بيتي أول يوم برمضان و انا كتير مبسوطة بالضيوف لان رح أخد ثوابهم باول يوم :)
    حبيت طل على السريع و قول للكل ان شاء الله رمضان مبارك بالطاعات و التقى و يا صبايا ما بدنا نضيع وقتنا بالمطبخ , أو بالمسلسلات و التلفزيون , خلي تكون سفرتنا عليها وصفات بسيطة و سريعة لان هل الشهر فرصة للقرب من الله :zzz

    رح نزل الوصفات كلها بنفس هادا الموضوع ان شاء الله .

    سلامي للجميع و لا تنسوني بدعوة حلوة على الفطور اليوم صبايا ;)

  48. نور الأسلام 22 August 2009

    السلام عليكم كل عام وانت بخير اخت منى ينعاد عليك وعلى عيلتك واحبابك بالخير واليمن البركه وكمان بعايد على كل الاخوات الطيبات انشاء الله كل عام وانتن جميعا بخير وينعاد عليكن بالصحه والخير والبركه ولكل احبابكن يارب ولكل الامه الاسلاميه جميعا :)

  49. رنا 22 August 2009

    احلى جاجة وكماجة وعزيمة مطنطنة لعيونك انتي بس شرفيني ياست ايمان خانم ;) اول مرة بعرف انه كماجة يعني خبزة

    شكرا كتير للاخت ميساء عالمباركة والله يهنيكي ويسعدك يارب

    مممممممم منى خانم شو وين كنتي مسافرة ..ياستي بالهنا يارب وانشالله تكوني انبسطتي
    ياستي بالفعل هالموضوع صار كتير حميمي وفيه الفة رائعة الله يديم المعروف يارب
    وبالنسبة لعزيمتك انشالله بيبيض وجهك يارب انا متاكدة انها رح تكون سفرة غير شكل بس لاتنسي الصور
    اما للمسابقة انشالله يكونوا عجبوكي وصفاتي المتواضعات قدام شغلك الرووووعة
    صيام مقبول وافطار شهي يارب ;)

  50. غيث 22 August 2009

    السلام عليكم منى كل عام وانت بخير وجميع الاخوات اللذيذات اللي تعرفنا عليهم بفضلك ورمضان كريم عالجميع والله يجعل دعاءنا مستجاب ان شاء الله ومبروك للعروسة الحلوة وبالسعادة ان شاء الله ومبروك لرنا بزينة والله يتمم للحامل بالخير ويحقق امنيات كل واحدة فيكم يا رب انا اسفة منى ما قدرت ابعت ولا وصفة كنت جدا مشغولة وما كان عندي وقت يلا بعد رمضان على رواق ببعتهم ان شاء الله صحيح في مننهم بتناسب رمضان بس مالي فاضية ابدا حتى طلتي عالنت رح تكون قليلة بهالشهر بس لاشوف شو الجديدوبسرعة لاني وقتي كتير مليان بالخير ان شاء الله دمتم بود

  51. بشرى 22 August 2009

    أمونة إن شاء الله ألف ألف مبروك .. الله يديم المحبة بينكن ويجعلو من الصالحين يارب ..

    موفقة روحي .. 8)

  52. منى 22 August 2009

    هي كمان اول مرة بعرف ان كماجة معناها خبزة , امونة يا ست الستات , اكيد الخبز من تحت دياتك غير شكل , عندي احساس انك بتعمليه :zzz

    رنونة كيفها البيسة الصغنونة , هي اكيد بعمر بنت اختي او اصغر شوي , بنت اختي اجت بـ 7 – 7 , هواية بالعيلة التواريخ المميزة :grin

    كنت بالجبل , شو سفرة اشتهيت فيها الغوالي , جو و منظر و جمعة بتجنن , الله يديم عيلتي علي و تبقى محبتنا و الفتنا و تزيد يا رب و الكل بالصحة و الهنا

    صورت السفرة , بس ما كتير عجبوني الصور , خطر ببالي ان جمع كل سفري لرمضان و انزلهم فرد مرة , ما بعرف لشوف شو رح يطلع معي :zzz

  53. منى 22 August 2009

    هلا غيوثة و لا يهمك , المه تكوني بخير و اطمن عليك دوما و لا تنسيني من دعوة حلوة :zzz

  54. لارا مينا 22 August 2009

    أحب أهني الأخت منى وجميع الأعضاء بالشهر الكريم الله يجعله شهر خير وسعادة على الجميع ويعين كل وحدة عندها عزومة بهذا الشهر ويبيض وجهها قدام أهلها وضيوفها.
    والأخت نور الله يتمم لك على خير وتقومي بالسلامة.
    والأخت رنا الله يباركلك في البنوتة الحلوة وإذا كان طفلك الأول ولد رح تشوفي فرق كبير بينهم البنات دايما حلوين وهادين وما تحسي بتربيتهم لأن أمي كان كل خلفتها بنات ومع ذلك تقول عمري ماحسيت بتعب في تربيتكم أو دراستكم حتى أنا كنت من عمر 8 سنوات وأنا وأخواتي نساعدها في المطبخ والبيت … وبعدين جابت آخر شي ولدين طلعوا عينهاوعينا وعين والدي كمان :grin
    الله يخليهم ويحفظهم يارب ونشوفهم ناجحين وموفقين دنيا وآخرة :zzz :zzz :zzz

  55. سمسمة 22 August 2009

    ان شاء الله شهر مبارك ورمضان كريم عليكن :)

  56. امونه 23 August 2009

    صباحكم عسل يا عسولات يا أحلى ستات ببيوتها مستتات :zzz

    و الله متل ما قلتي يا منوش بدنا زاويه لطق الحنك :grin

    منشان ما نخرب الشكل تبع المسابقه

    بجد حبيباتي هون بينكم بحس اني بين اخواتي و انا وحيده على سبع شباب يعني ما عندي اخوات بنات :sigh

    بس هلآ صار عندي عشيرة مو أخت وحده ان شاء الله ;)

    يالله شدولنا الهمه بستنى بوصفات جديده للسفره الرمضانيه انا

  57. عبير 23 August 2009

    كل عام وانت بخير يااحلى طباخة بالعالم انشاء الله ينعاد رمضان علينا وعليكم باليمن والبركات

  58. mayada 23 August 2009

    كل عام وانت بخير رمضان كريم ينعاد عليكي وعلى الجميع بلخير وصحة لو سمحتي بدي وصفة المعروك الحلبي بل اضافة لوصفة شراب اللوز يلي وعتيني فيها سلام ميادة باي

  59. ris 23 August 2009

    السلام عليكم :zzz انا عضوه جديده وكتير عجبتني وصفاتك يا منى عن جد انتي رووووووووووعه بس بدي منك مربي الكستناء اذا ما فيها ثقله :grin

  60. عربية 24 August 2009

    مرحبا يا بنات ومرحبا ياست منى ما بعرف اذا بتذكريني انا سجلت بالموقع من اشهر بس غمت هالفترة كلها شلووونكم وكل عاااام وانتوا بالف خير ورمضان مبارك .موقع يا ست منى كتتتيييييير مميز اتمنالك التوفيق :)

  61. ام دانية 24 August 2009

    مساء الورد على احلى صبايا وتحية خاصة للست منى ورمضان كريم علينا وعليكم بس ياترى وين هل الغيبة يا ست منى انشاءالله على خير والله اشتقنا لجديدك :zzz لا تحرمينا من طيبات دياتك مابقنا نحسن نستغني ;)

  62. امونه 25 August 2009

    السلام عليكم

    كيفكم يا حلوووين … يا رب يكون غيابك خير يا ست منى و انا متأكده انه راح يكون في صور لموائد رااائعه بعد كل غيبه متل هالغيبه

    و متل ما بحكوا عنا يا مطول الغيبات يا جايب الغنايم ;)

    بإنتظارك عزيزتي يا أحلى شيف نسائي بالدنيا :zzz

  63. رنا 25 August 2009

    ياستي لا بنتي اصغر من بنت اختك …انا بنتي اجت ب 127 يعني في شي اسبوع بيناتن…الحمد لله على رجعتك بالسلامة من الجبل والحقيقة شوبات حلب بدها الواحد يطفش على اعلى قمة ….خصوصي بقطع الكهربا والمي :grin

  64. رنا 25 August 2009

    ياستي الخيار التاني كتير ازبط مشان ماحدا يزعل ;)

  65. بشرى 25 August 2009

    الفكرة التانية كإني زابطة أكتر .. :roll

  66. لارا مينا 25 August 2009

    مساء الخير , أنا مع الخيار الثاني مع إن الخيار الأول برضه بيمشي حاله , المهم في المسابقة الجمعة الحلوة وتغيير الجو والفائز أيا كان راح نتجمع ونقوله جميعاألف مبروك وبيستاهل ومن الحين كمان , لأن كل الوصفات حلوه والواحد فعلا في حيرة إيش يبغى يختار والله يسلم كل من طبخ وحضر وصور وأغنى أفكارنا بالوصفات الطيبة والجديدة علينا .

  67. نور الأسلام 25 August 2009

    مرحبا انا مع الاختيار الثاني :)

  68. منى 25 August 2009

    سلامات لكل الصبايا صاحبات البيت و كمان الصبايا الجدد , و بحب قلكم نورتوا بيتكم النتي و ان شاء الله تبقوا مشرفين على طول

    ميادة المعروك اقرب وصفة اله هي [URL=http://www.l2ma.com/content/view/333/2/]البريوش[/URL]ان شاء الله تشوفيها و تعجبك و يا رب يصحلي نزل شراب اللوز قريب

    هلا ris :) الصراحة انا لسا ما جربت هل المربى , بس ناوية حضره هل الموسم اذا ربنا راد و يسر

    هياتنا رح نبقى على الخيار التاني اذا كمان كان راي بقية الاخوات نفس الشي , مع ان كل وصفة حاسستها عروس و بدها تتغنج لوحدها بس هيك صار , معلش :roll

  69. Iman 25 August 2009

    اهلين منى. انا بعتقد انو الاقتراح الاول عادل اكتر شيء. اي نصوت للاطباق بغض النظر عن صاحبه الوصفه و اللي بيطلعلها اكتر اصوات بتكون صاحبتها هيه الرابحه. و شكرا

  70. Iman 25 August 2009

    منى سوري حبيبتي لما نزلت الرد ما كنت شفت اخر رد لك انك قررتي. يا ستي اهم شيء انو في هيك حركه بالموقع و اكيد كل الستات هون ما دامهم بيحبوا هالموقع لالالازم يكونوا كلهن مزوئين و معدلين. فالغايه من الاشتراك هو روح المشاركه مو الربح. و الف مبروك سلف للرابحه. و صح تخمينك يا منمن اكتر شي بحبه و برتاح فيه لما اخبز معجنات. و كلمه كماجه تستعمل في اللغه اللبنانيه (كميجه) او الفلسطينيه (كماجه) بيكون رغيف مدور و بسماكه انش تقريبا. كانو من زمان (زمن جدتي) يخبزوه ثم يفتحوه و هو ساخن و يدهنوه بالسمن و يرشوا عليه السكر و ياكلوه. و ما كان حدا لا عندو كوليسترول ولا بلوط متل هلاء هههه. طبعا انا سمعت فقط عنه لاني ربيت بالغربه. :zzz

  71. منى 26 August 2009

    امونة كلامك مزبوط اهم الشي المشاركة و ان كلنا نستفيد من بعض و هي اول مرة اسمع بالجاجة و الكماجة .

    سبحان الله , كان جدودنا صحتهم حديد , لان كان الاكل مزبوط كله من خير الارض و كمان ما كان عندهم لا تلفزيون يقعدوا عليه و لا سيارات تنقلهم :zzz و كانت بيوتهم عامرة بالحب , ما بعرف كل شي قديم اله نكهة غير

  72. ام دانية 27 August 2009

    السلام عليكم يا احلى صبايا ماشاءالله بغط شوي عن الموقع بلاقي مسابقات ووصفات بتجنن والاحلى من هيك عنا عروسة كمان انشاءالله الف الف الف مبروك والتمام على خير اخت امونة الصبر مفتاح الفرج يالله ياستي نححن السابقون وانتم لاحقون :zzz وماشاءالله يامنى على هل الموقع قدر يجمع الكل مع بعضوووووووو :grin والله بتستاهلي كل خير وعقبال ما تفرحي بولادك امين

  73. منى 27 August 2009

    اامين ام دانية و انت كمان و بكل حبابك و الوالي على البك يا قمر :zzz

  74. ام احمد الغالي 27 August 2009

    عن جد منى وقت حطيت الوصفه ما بعرف كنت بدي شارك باي شي بيخص موقعك وما توقعت هيك تنزل مع المينو وخاصه انو الطبخ كان عقدتي :upset
    ما كنت فوت عل مطبخ الا نادرا جدا
    :grin
    يسلمو كتير منوشه يا عسل

  75. منى 27 August 2009

    الله يسلمك ام احمد , على فكرة انا عملت وصفتك و زينتها و هلا رح صورهاقبل ما يصير الانقضاض عليها شاملا و كاملا , نفش القالب و شكله غير شكل و ريحة القرفة مع النسكافييه غرام :zzz

  76. mazon 28 August 2009

    الله يجزيكم كل خير…وانا جديدة معكون…
    انا لسى عم ادرس جامعة ما عندي وقت لحتى اطبخ.يعني ما رح فيدكم بشي حاليا..بس حابة جرب كل وصفات الموقع … جد كتير لفت نظري موقعكم..
    شكرا كتير الك منى…واكيد ان شالله لما رح تصحلي فرصة رح جرب كل الوصفات اللي حاطيتها هون…
    مشكورين كلكم…

  77. امونه 29 August 2009

    كيفكم يا حلوووووووووووووين

    عزموني بيت احماي الجدد انا و اهلي و طبعاً كل قرايبهم و كانت عزووومه رووووعه و اكيد عملوا منسف و على خاروفين و سبقونا

    هلآ دورنا بالعزيمه و مو عارفه شو راح اعمل انا و ماما خصوصي انه ما عندنا حد يساعدنا بشي و انا و ماما معنا اسبوع للتجهيز

    بس لسه مو عارفين شو نعمل … بدي افكار معقوله و فيها ابداع …

    يا ريت صنفين او تلات بالكتير لآنه التركيز راح يكون على الكميه

    عدد المدعويين أكتر من 30 نفر :cry

    ميرسي مسبقا :x

  78. منى 29 August 2009

    هلا مزونة :)
    عوافي و هنا مسبقا و ريتو مية صحة و هنا .
    كتير حلو واحدة عم تدرس تمد ايدها للمطبخ , الله يوفقك بدراستك و كمان بالتجارب الجديدة و يا ريت تخبريني شو بيصير معك ;)

  79. منى 29 August 2009

    هلا امونة :)
    ريتو بالهنا يا قمر العرايس , بس و الله هيك مشكلة , نحنا عنا العزومة ما بتصير الا اذا كان في 5 او 6 اصناف على الاقل على السفرة , يعني اذا في صنف جديد و ما حبوه ما بيكون في مشكلة , لهيك ما دام التركيز على الكمية فأنصحك ما تعملي شي جديد او غريب على الزوء العام عندكم احلى ما يحبوه و ممكن يكون التفنن المقبلات و السلطات , هيك بيكون شي تقليدي و بنفس الوقت مودرن , ما بعرف اذا وضحت فكرتي , بس هي نصيحتي :roll

  80. لارا مينا 29 August 2009

    أهلين أمونة .. الللللللللللللللللللللله يعينكم ثنتين بس وما فيه حد يساعد ..أنا مع منى بتكثري من السلطات والمقبلات واختاري الأنواع إلي مافيها شغل كثير مثل تقطيع أنواع كثيرة من الخضار وكمان نوع مكرونة ونوع رز والخبز الجاهز مثل العربي إلي ممكن تدهنيه بأي خليط طيب وتقطعيه مربعات لأن ممكن تسوي منه كمية وبوقت قليل وممكن نوع ساندويش محشي بحيث كل وحدة نقطعها عدة أجزاء ومن هالأفكار وانا مع المعجنات إنك تعمليها من الحين وعلى الفريزر لوقت العزومة وأي شيء ممكن يتفرزن وكمان بوفيه الحلو الأفضل تعملي كل حلو بينكب بالصينية ويتقطع لأن أسهل من الحلو إلي على شكل قطع أو وحدات لأن بتأخذ وقت ومجهود وعلى الفكرة فيه بعض الحلو ممكن ينحط بالفريزر لوقت التقديم مثل بسبوسة رنا إحنا نعملها ونحمرها ونخليها تبرد تماما ونحطها في الفريزر بصينيتهاومغطاة ولما يجي الموعد نصب عليها قطر ساخن مباشرة وتغطى ونخليها ساعتين ثلاثة برا وبعدين بتقطيعها وتقدميها وكأنها معمولة بوقتها – وكمان كل الفواكه المتوفرة عندكم قطيهعها واخلطيها وصبي عليها عصير برتقال مخلوط بسكر بس وصارت أطيب سلطة فواكه وسريعة كمان .

  81. ام احمد الغالي 30 August 2009

    صباح الخير منى ما قلتيلي عجبتك الكيكه ولا ماااا :sigh ؟؟؟
    ياريت تنزلي الصورة

  82. عربية 30 August 2009

    مرحبا يا صبايا شلووونكم وشو اخباركم انشا الله يكون بقية شهر رمضان مبارررركة عليكم كلكم والله انا على قد ما طبخت من اول رمضان لليوم مليت فاليوم ما بعرف رح اخذ استراحة قصيرة واعمل شي سريع من شان هيك يا اخت منى دخلت اشوف قسم اطباق الزيت :zzz ،،،سلااااااااااااام يا حلوات والله بتفائل وقت بدخل وبشوف كتاباتكم

  83. منى 30 August 2009

    ما شاء الله عليك لارا كفيتي و وفتي و افكارك كلها مفيدة , عجبتني كتير البسبوسة و طريقة تفريزها , فكرة حلوة ;)

    ام احمد طلعت طيبة كتير , ان شاء الله بحط صورتي اليوم , قصدي صورة التطبيق :grin

    هلا عربية :)
    مم , ما في اطيب من طبخات الزيت , لو تحضري فاصوليا بزيت او بامة بزيت بتطلع طيبة كتير :zzz
    ان شاء الله مبسوطة و متفائلة دوما بالخير , و عوافي نقدما

    انا اليوم معزومة عند خالي, و امبارحة معزومة عند امي و الي قبله معزومةعند خالي التانية و بكرة كمان معزومةعند اية :grin , لهيك انا ااخر ورقان و استرخاء , بس الدور جايني الاسبوع الي جاية 8) بيعين الله

  84. بشرى 1 September 2009

    انتي قدها وقدود منوشة ..

    بس بدي إسألك سؤال فني سقافي , ورق السبرينغ رول شو منقدر نعمل فيو شغلات , كنت عم ساوي منو الأوزي وطلع طيب بس مو جعبالي أوزي بقى شو عندك أفكار يا أم الأفكار الحلوة :zzz

  85. منى 2 September 2009

    لك تقبشني السقافة كلها :grin

    يا ستي انا بسوي فيح شي ناهي و قطايف , بسلق فروج بعدها بقلب بصلة و ثوم و فليلفة خضراء و حمرا و بيف الفروج المسلوق مع مكعب ماجي و شوية مي بس ما نشفت المي تمام التمام التمام بخلي الحشوة لتبرد و بقلبها بالمايونيز و بحشي الورقات فيها و بحط مع الحشوة جبنة , بعدها بلتهم ببيض و كعك و على القلي و بعدها الله اكبر شو طبق بيطلع :eek

  86. souha 3 September 2009

    السلام عليكم
    كيفك منونة شو الأخبار إنشاء الله بخير
    عجبني السؤال السقافي كمان أنا عندي سؤال سقافي وين يا ترى بلاقي سور كريم لأنو في شغلات لما بروح بسأل عنها و خاصة إذا كان إسمها أجنبي و غير قابل للترجمة بتلاقي البياع فتح تمو و اندهش :eek :upset و فكر شي خمس دقايق و بعدين بقلي ما عندي :sigh
    و شغلة تانية يا ترى بينقام السور كريم بالفريزر بدون ما يخرب :?
    سلام :)

  87. منى 4 September 2009

    هلا ام السوس :)
    شو قصة السقافة اليوممين دول:grin

    انا بجيبه من المولات , اظن اخر مرة كانت من كارفور , بس انامو متاكدة لان مشكلتي ما بحفظ اسماء :roll

    اما للفريزر ما اتوقع ممكن ينحفظ , بس انا عني مو مجربة لحتى قلك على الاكيد

  88. رنا 29 September 2009

    شكرا كتير الك منى على هالمسابقة …وبصراحة كلنا ربحنا عن جد ..وبحب بارك لسها وسوما وام احمد ولارا لان عن جد وصفاتهن كانت رائعة وطبعا بشكر كتير كل الي صوتولي (حاسة حالي بسوبر ستار ) :grin
    وعقبال مانشارك بمسابقات تانية ;)

  89. ورد الياسمين 30 September 2009

    مبروك رنا
    انا واحدة من الي صوتلك كان وصفاتك حلوة

  90. رنا 30 September 2009

    شكرا كتير الك للتصويت ولتجريب الوصفات ;)

  91. souha 2 October 2009

    السلام عليكم
    بحب بارك للجميع يلي شاركوا بالمسابقة فردا فردا رنا و أم أحمد و أمونة و سوما و لارا بصراحة الوصفات كلها كانت مميزة أنا بحب المشاركات الجماعية لأنها كتير بتغني الأفكار و أنشاء الله المسابقات التانية بتكون أحلى و أحلى ;)

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)