عم أحكي مع رفيقتي بالتلفون , كانت عم تتنغم بشيء عم تاكله و عم يقرمش تحت سنانها ، بالعادة لما بحكي بالتلفون و بيكون التاني عم ياكل شي و عم اسمع انا بادني صوت ” الخش الخش ” ، ممكن كتير أني اعتذر بشي شغلة و خلص المكالمة , و إذا حدى بمون عليه بقله انو شو هل الزوء حبيبي , خلص الي عم تاكله و بعدها احكي معي ..

أما رفيقتي مياسة كانت عم تنمنم و عم تقول امممم حامضة , طيبة … نسيت تعصيبتي الصغيرة الي بتطلع بهيك حالات و صار عندي فضول أعرف شو عم تاكل , قلتلها شو عم تاكلي مياسة خانم .. قالتلي ورق الشوكي , بتحبيه . قلتلها شو هاد ؟ قالتلي ورق الشوكي مع عصرة ليمونة ..

مممم , هلأ أنا الشوكية كاملة و شخصية ما شفتها بصغري و لا كبري , دوماً بيوصل على البيت مقشر و جاهز , و لما كنت صغيرة كنت فكر انو هو هيك بيطلع شكله على الشجرة , بس شوفهن أنو عم يجيبوه بكيس فيه مي و بيحطوه بمي و ليمون فوراً , فكانت فكرتي عن الشوكي انو هو نبات اله قشرة شفافة بس سميكة , متل قشرة البرتقالة بس على شفاف , و بقلب هل الثمرة في مي و قلب الشوكي , يعني شي بيشبه البيضة …

منرجع لورق الشوكي , قلتلها كيف يعني ورق الشوكي , ما فهمت . قالتلي هلأ انت مو بتجيبي الشوكية بتقشريها ,, قلتلها مممم ( بقلبي لا بحياتي ما جبت الشوكية و قشرتها بس … ) اي , قالتلي طيب بتكبي اول كم ورقة لان بيكون ورق خشن , و بعدها بيطلعلك الورق الطري , بتقطفيه و بتغطسي طرفه بالليمون و الزيت و بتاكلي لقمة واحدة بس من كل ورقة , لقمة بيضا و طرية بس مقرمشة , لقمة طيبة يا منى خانم ..

امممم , حبيتها لهل الشغلة و حطيتها براسي , ما انا ام الخضرة النية , بقى لما كنت رايحة لأقضيلي شي شغلة و شفت شوكي كامل و حقيقي لأول مرة على البسطات الي ملت الشوارع , جبت 5 شوكيات لجرب وصفة مياسة خانم , قعدنا أنا و قطاطي على البلكون , جهزت عصير ليمون و حطيت معه زيت زيتون كردي جاينا طعمة من عفرين , و صرنا نقشر و نغمس و ناكل , يممم فعلاً لقمة طيبة
بالصحة و الهنا