المعروك السوري


         وصفة : منى                 2012/07/20                 110 تعليقات

آخر تصويت


آخر تعليق

المعروك السوري

هي الوصفة كنت عم دور عليها ما بتعرفوا من اديه , و كنت جرب و جرب و جرب و كمان جرب و يطلع معي بالاخير شي طيب , خبز حلو بس مو معروك ابدا الي كلنا منعرفه . المعروك الي بيزين سفرة رمضان , المعروك الي ما بينوجد الا في رمضان لهيك كتير من الغربتلية انحرموا منه , المعروك الي لما كنا صغار كنا نستنى رمضان مشانه , المعروك الي كتير كتير انطلبت وصفته مني و من دون ما ااقدر ساعد ..

لهيك لما السنة الماضية اجتمعت مع شيف حلواني , و كان في مجال انو اساله و يجاوبني اجوبة صادقة و حقيقية , طلبت منه وصفة المعروك السوري . الوصفة الي عطاني ياها كانت كتير بسيطة , بس كتير منطقية . بس مشكلتها انو كان فيها محسن عجين و كان فيها خميرة فريش , و انا بدي وصفة نقدر نعملها كل يوم بمقادير متوفرة دوما و بمراعاة اختلاف افران البيت عن افران المحلات . المهم . جربت و كل مرة عدل شي من هون و زيد شي من هون , و كنت حاطة براسي انو يطلع معي معروك يتفقوا عليه الكل , النقاقين و الحبابين

لهيك هل الوصفة من اكتر الوصفات الي اخدة معي تجارب بهل الموقع اليمي لحتى وصلن لنفس المعروك , على الضبط , ريحته الرائعة , طعمته الحلوة المميزة , نعومته و لونه الابيض الي يتشبه القطن . الله يديم النعم و الرزق الحلال .

استعملنا لتنكيه المعروك يانسون و شمرة و محلب , ظاهريين بالصورة على التسلسل , بكمية قليلة لأن المطلوب نكهة خفيفة و غامضة لحتى ما تطغى على كل الطعمة

بمناسبة الحديث عن الخميرة الفريش , اذا كانت متوفرة , رح تخلي الوصفة روعة ,عواض الخمبرة الحبيبات استعملي مقدار بيعادل نص حبة جوز لهل الوصفة , بتدوبيها بالحليب و بتعجنيها مع بقية المقادير . و اذا مو متوفرة عندك رح نستعمل خميرة حبيبات عادية بكمية قليلة و منعطيها وقت طويل لتتخمر على راحتها , و هي خطوة بسيطة بس مهمة .

أخر الشي هل المقدار رح يعطينا قرصيين معروك كبار , أو ضفيرتيين متل هي ,

ضفيرة

او 14معروكة صغيرة متل هل الشباب الطيبة

إذا حضرتي القرص الكبير ممكن بعد ما يبرد تقطعيه بالنص و تحشيه الي بدك ياه , شوكولا دهن , جبنة مشلشلة , كريم باتيسير و شرايح موز , و ممكن تقدموا صادة و انا هيك بحبه اكتر الشي .

رمضان كريم على كل امة محمد و يا رب سوريا الحلوة الحزينة تمسح دموعها و تفرح قريب

بالصحة و الهنا

-المقادير:

نصف ملعقة كبيرة خميرة حبيبات
ثلثي كوب سكر
ثلاث ارباع الى كوب و نصف حليب سائل أو ماء . فاتر
4 كوب طحين
ربع كوب زيت عادي
ملعقة كبيرة زبدة , طرية
نصف كوب حليب بودرة
ملعقة صغيرة بيكنغ بودر
أقل من ربع ملعقة صغيرة من كل من , محلب مطحون, يانسون مطحون, شمرة مطحونة
ربع ملعقة صغيرة فانيليا
نصف ملعقة صغيرة ملح

الوجه :
صفار بيضة
ربع معلقة صغيرة نسكافيه
بضع نقاط زيت
سمسم و حبة بركة
القطر :
ربع كوب سكر
ربع كوب ماء
- طريقة التحضير :

• تقلب ملعقتان من السكر و الخميرة و نصف كوب من الحليب الفاتر و نصف كوب من الطحين في وعاء كبير , يغطى الوعاء بشكل محكم و يترك جانباً لمدة ساعة أو حتى تنتفخ و تظهر فقاعات على السطح .

• يفرك الطحين بالزبدة و الزيت جيداً في وعاء كبير .

• يضاف باقي السكر و الحليب البودرة و البيكنغ بودر و اليانسون و الشمرة و المحلب و الفانيليا و الملح على الطحين المفروك , تضاف التخميرة الأولية و تعجن , يضاف باقي الحليب السائل بالتدريج حتى الحصول على عجينة طرية و لينة , تعجن لمدة عشر دقائق و يضاف المزيد من الحليب السائل كلما تشربت العجينة الحليب حتى تصبح العجينة ناعمة .

• تغطى العجينة بشكل محكم و تترك حتى تختمر و يتضاعف حجمها , يختلف الوقت حسب الجو .

• تقطع العجينة حسب الرغبة و تشكل اما بهيئة قرص او ضفيرة او خلية نحل او بشكل المعروك العادي و توضع في صينية غير لاصقة



, • تغطى بشكل محكم و تترك حتى تتخمر مرة ثانية و يتضاعف حجمها .



• يمزج صفار البيض مع النسكافيه و الزيت و يدهن وجه المعروك بالمزيج , ترش حبة البركة و السمسم الابيض و يخبز المعروك في الفرن المحمى مسبقاً على درجة حرارة 160 على الرف السفلي لمدة 10 – 15 دقيقة , يشعل الفرن من فوق لبضع دقائق حتى يحمر الوجه .

بعد حمام النسكافيه

• في هذه الأثناء يوضع السكر و الماء على النار و يغلى لمدة 5 دقائق . يدهن وجه المعروك بعد اخراجه من الفرن بالقطر الساخن , ثم يترك حتى يبرد و يقدم .

التعليقات

  1. semo 20 July 2012

    مرحباً منوش رمضان كريم عليكي والجميع الله يعيننا عالصيام والقيام

    اما المعروكات شي بيطير العقل ماشاء الله ما بتصدقي اديش نحن بالغربة مفتقدين هي الأكلات الطيبة ومشتاقين لرائحة رمضان والمعروك مممممممم
    عندي سؤال لوحبيت استخدم خميرة فريش كم بتكون الكمية وكيف استخدامها

  2. Mona 20 July 2012

    و انت بالف الف خير سمسومة و ينعاد على كل عيلتك الصغيرة و الكبيرة و نحنا بالف خير

    سمسومة الكمية لكل كيلو طحين بقدر حبة بيض , رح اتاكدلك من المقدار بالغرام لحتى يكون الكلام ادق , بس هلا وصفة عمو الشيف مو تحت ايدي
    اما طريقة استخدامها فهي انو مندوبها بشوية مي مفترة و منضيفها لبقة المقادير :)

    نور الموقع يا جميل

  3. sweet candy 20 July 2012

    الله يسلم إيديك يارب.. وأنا كمان كنت دايخة نفس الدوخة تبع المعروك من رمضانين مضوا وما كان يطلع معي شي.. أنا بحبه كتير مع التمر ومع الزبيب وجوز الهند… يمممممممممممممي.. هلأ بدي جربها على ثقة.. :sigh :sigh 8)

  4. لبنى الشامية 20 July 2012

    السلام عليكم ورحمة الله وبركاته

    هل هلال رمضان، وهلت معه بشاير الخير والفرحة للشعب السوري… الله يتم فضله علينا يارب …

    رمضان كريم وكل عام وانتم بخير ست منى ولكل أعضاء الموقع الكرام…

    مشكورة عالوصفة اللي بتشهي من منظرها وكتييير بحبها…وان شاء الله عالتنفيذ خلال الايام القادمة…
    عطيتينا كذا طريقة لتشكيل العجينة لكن ما قلتيلنا الطريقة يللي بالصورة كيف ؟انا حبيتها

    سلمت يداكي يارب

  5. laraye 20 July 2012

    منى الغالية اشتقنالك
    كل عام و انت و عيلتك الحلوة و اهلك بخير
    بالفعل المعروك بشهي كتير بس الضفرة شكلا صعبة الا انت شو رأيك؟ رح اجربه عن قريب انشالله :zzz

  6. لارا مينا 20 July 2012

    رمضان كريم للأخت منى الحبيبه , ولكل الأعضاء الأعزاء.

    وكل عام والجميع بألف خير, والله يحفظ لكم هالبلد الكريم , وينصره على كل مين ناوي ياذيه, ويبقى شامخ حتى يرث الله الأرض ومن عليهاجميعا, والله اشتقنا للموقع العزيز, بس الظروف هي إلي بتحكم وما بتنحكم.

    عملت الوصفه من فترة من قناة فتافيت مطبخنا العربي , والمقادير فيها من البريوش , وكانت كمية الزبده فيها كبيره , وفورا عملت ديليت للوصفه من المفضله , حسيتها عاديه ومش واو , وأكيد رح جرب وصفتك شكلها أخف وألذ , وسلمي ع كل الأهل وعيلتك الكريمة.
    باي :)

  7. Mona 20 July 2012

    هلا كاندي :)
    الله يسلمك يا قمر , و انا بحبه سادة أو مع جبنة بيضا مسيخة , يمممم
    ان شاء الله تجربيه و يعجبك و ان شاء الله بتدعيلي دعوة حاوة على الافطار ;)

  8. رنا 20 July 2012

    للللليش لك يسلم ايدكي يارب مارح احكي ولا كلمة لانه قايمة عالمطبخ فوووورا

  9. farah 20 July 2012

    سلم ايديكي يا ست الكل على هالوصفة اللي بتشهي , بدي اسألك عن التمر اذا حبيت احشيه تمر مو المفروض قبل الشوي وكيف فيني مده لأن بيكون متل العجينة القاسية
    انا بجيب خميرة تازة بتكون وزن 50 غرام حطها كلها لهالمقدار ولا كتيرة يا ترى ؟؟

  10. farah 20 July 2012

    نسيت خبرك ما عندي لا شمرة ولا محلب ولا يانسون اللي اصلا ما بحبه شو في حط بدائل ؟؟
    محلب يمكن عندي هاد نفسه اللي بيحطوه للملفوف ؟؟
    هو شكله متل حب اللوز المدعبلة وصغيرة كتييير

  11. مزهرة 20 July 2012

    الله يسلم هالايدين هي الوصفه اللي بدي اياها

    شكرا كتييييييييييير وكل عام وانت وعائلتك وسوريا واهلها بالف خير ان شاء الله

  12. غيث 20 July 2012

    كل عام وانت واحبابك واهل الموقع واسرته وكل المسلمين بالف خير وبلدنا الغالي الحبيب بأمن وسلام وخير وامان يارب فرجك قريب الله يسلم الايدين يا حق والله منظر بيفتح النفس واكيد اكيد على التجريب القريب هلق وقتو برمضان كلك ذوق يا منى وشكرا على الوصفة المميزة اللي ناطرينها من زمان

  13. Mona 20 July 2012

    و عليكم السلام و رحمة الله و بركاته لبنى :)
    و رمضان مبارك على اهل بيتك و عليك و الله يتقبل منا .

    الطريقة لتشكيل المعروكات الصغار انو منقسم العجينة ل 15 او 14 قطعة بنفس الحجم , بعدها منبر كل قطعة لحتى تصير متل اسطوانة طويلة نوعا ما و بعدها منلف الاسطوانة على بعضها البعض

    انا فكرت انو شغلتها سهلة , فما خطراي صورها , بس ان شاء الله رح ارجع حضرهن و ارجع صور طريقة تشكيلهن

    يا هلا فيك

  14. Mona 20 July 2012

    و انت بالف الف خير لارا:)
    و انا كمان اشتقتلك كتير يا قمر :zzz

    لا مو صعبة ابدا , منقطع العجينة لتلات قطع , منبرمهم حتى يصير عنا 3 اسطوانات طويلة و بعدها نحطهن جنب بعضهن و نضفرهن

    رح نزل الطريقة بالتفصيل ان شاء الله ;)

  15. اماني 20 July 2012

    الله يعطيكي الف عافية مدام منى اليوم جربته وطلع كتيير طيب بس العجينة عزبتني شوي اول شي وقت العجن طلع ناشف وضفت شي نص كاسة حليب مع انه مشيت بنفس المقادير بس انتي بشرح الطريقة كاتبة بعد تخمير الخميرة مع الحليب وربعكاسة طحين نضيف الحليب فهل يوجد كمية حليب غير مذكورة بلوصفة والعجينة ماكانت طرية ولينة متل موانتي كاتبة يعني وقت التشكيل تعذبت معها كمان بقا اذا عرفتي شو غلطي ياريت تشرحيلي لانه كتير حبيت طعمته وبدي ارجع عيد التجربة بس اذا كان في شي غلط ياريت تصححيلي وشكرا الك على كل شي والله يجزيكي الخير

  16. Mona 20 July 2012

    هلا غيوثة :)
    و انت كمان بالف خير انت و عيلتك كلها , الله يسمع منك , ان شاء الله بتنزاح هل الغمة قريب :roll

    طعمته متل منظره , نممم . بتستاهل تجربيها , ان شاء الله بتحبيها

  17. Mona 20 July 2012

    شو رنون , خبريني شو صار معك ;)

  18. lilithia 20 July 2012

    تسلم ايديكي يا مدام منى عهالوصفة الرائعة…صرلي زمان عبدور عمعروك متل تبع حلب و شكلو هاد هو.
    بس عندي سؤالين من بعداذنك:
    - أول سؤال أنا ما عندي شمرة, عندي بس محلب و يانسون, و فانيليا بودرة تبع الكيك بيمشي الحال فيون؟؟
    - تاني سؤال اليانسون و الشمرة عندي ياهن عشكل حبوب صغيرة…يا ترى هدول اللي بستخدمن وللا لازم اطحنن؟؟
    و مشكورة على جهودك :) :) :)

  19. lolli 21 July 2012

    وصفة لذيذة كتير و مغرية كتير
    و بصراحة ريحة المعروك برمضان عالافطار او السحور بتعطيني شعور حلو و هادي و باكله و انا مستمتعة كتيييير 8)
    و كنت حابة اسألك عن المنكهات ..الشمرة و اليانسون طحنتيهم قبل ما تضيفيهم للعجين ؟ لانو لاحظت انو العجينة اثناء التشكيل و التخمير ناعمة كتيير من برا
    و تسلم ايديكي الحلوة ع كل وصفة بتقدميلنا ياها
    و بالنسبة للخميرة الفريش انا ممكن الاقي منها هون بس حابه اعرف الوزن اللي لازمني لهالوصفة بالغرام اذا مافيها ثقلة :roll لانو ما بعرف حجم الجوزة :? و البيض عنا الو 4 قياسات كمان :upset

  20. farah 21 July 2012

    هلأ طلعت صورة المحلب تمام هو اللي عندي بالنسبة للشمرة كأني شايفتها قبل يمكن بيحطوها مع خبز التنور هي وحبة البركة ؟؟ يا ترى هي نفسها ؟ منى بدي اسألك المحلب لازم يكون ناعم وكيف بتطحنيه ناعم لأن الكمية اللي عندي قليلة كتير يا دوب ملعقة كبيرة اكيد ما بيدوروا بالمطحنة الكهربائية , انا بالعادة بحطه بكيس وبنزل فيه بالشوبك بس ما بينعم انا بستعمله عادة للملفوف متل ما كتبت فوق ..

  21. محبوبة 21 July 2012

    مراحب منووش

    المعروك شكله بيشهي وناوية جربه بلكي بعد بكرة
    كتير بحب المعجنات بكل أصنافها وهي ما بتسمن بنوووووب
    :cry
    كنت في صفحة اليبرق على الطريقة السورية وسألتك عن الحصرم وما جاوبتيني :sigh

    عمستنى اجابتك بعد اذنك

  22. Mona 22 July 2012

    و انت بالف الف خير لاروش , صار الك زمان غاطة هون و على الفيس بوك , ان شاء الله امورك كلها بخير انت و عيلتك الحلوة

    امين امين يارب الله يسمع منك , ان شاء الله لا يصح الا الصحيح

    ان شاء الله هل الوصفة بتعجبك , بسيطة و طعمتها ممممممم , حتى انا صاحبة الضميرالريجيمي الحي , باكل منها و انا مرتاحة :zzz

    رح استنى اخبار طيبة منك

  23. Mona 22 July 2012

    هلا بست الكل فروحة :)

    المر بتعجنيه بشوية زبدة و بعدا بتحشيه قبل الخبز بالطريقة الي بتناسبك , طلعت على وصفة الشيف , ما في مقدار للخميرة و هلا ما في خميرة تحت ايدي لاعطيك الوزن المضبوط , فيكي تقدريها تقدير لان لو ااقل او اكتر شوي ما رح تفرق

    نزلت الصور لحتى تكون البهارات واضحة , اذا شي منهم مو متوفر ما في اله بديل , بس استغني عنه في الوصفة
    ما عندي فكرة عن الشمرة اذا كانوا بيحطوها بخبز التنور , و كمان ما بعرف اسمها بالانكليزي , كنت ساعدتك :roll

    انا عم حط البهارات كلها بالهون و دقها مع شوية سكر , بتطلع تمام :)

    رح استنى تجربتك و يا رب تعجبك

  24. Mona 22 July 2012

    و انت بالف الف خير مزهرة , انت و كل عيلتك و اصحابك و احبابك :)
    ان شاء الله تجربيها و تعجبك و خبريني شو بيصير معك :zzz

  25. Mona 22 July 2012

    هلا اماني :)
    حبيبتي لازم تبقي تضيفي حليب لحتى تصير العجينة كتير طرية و متل القطنة تحت ايدك , مقدار السائل بيختلف حسب نوعية الطحين و حسب الجو , لهيك المرة التانية ان شاء الله ابقي زيدي سائل لحتى تحسي انو العجينة اخدت كفايتها ;)

    صحتين و الف عافية و هنا على قلبك و ان شاء الله المرة التانية رح تطلع معك مية على مية :zzz

  26. Mona 22 July 2012

    هلا lilithia :)

    حبيبتي البهارات الناقصة استغني عنهم , بيمشي الحال بيطلع طيب , س حطي هل البهارات بزهنك و حاولي تامنيهم لغير مرة

    الهارات اطحنيهم ناعم كتير , انا بحطهن بالهاون و بطحنهم مع شوية سكر

    ايا سؤال تاني من عيوني ;)

  27. Mona 22 July 2012

    يا عين لولي على الوصف , فعلا ريحة المعروك بتدفي سهرات رمضان :)

    كل البهارات بطحنها ناعم كتير قبل اضافتها ;)

    ممم ما في بين ايدي هلا خميرة فريش , كنت زنتلك الوزن على الضبط , انت قدري تقدير و ما رح تفرق كتير , اذا نقصتي بتطول اكتر في التخمير و اذا زدتي بتختمر بشكل اسرع :zzz

    اذا جربتيها خبريني يا قمر

  28. Mona 22 July 2012

    هلا محبوبة :)
    ان شاء الله تجربيه و تحبيه , رح استنى رايك و ان شاء الله يطلع معم يممي

    فاتني السؤال هلا بشوفه ;)

  29. ام نبيل 22 July 2012

    السلام عليكم
    كيفك منى رمضان مبارك عليك وعلى عيلتك وعلى سوريا وان شاء الله نقضي العيد بسوريا يارب
    اشتقنالك كتييير كنت كل يومين ادخل وشوف اذا حاطة شي جديد وشفت وصفاتك الرائعة بس ما كان عبيفتح معي غير الصفحة الرئيسية من الجوال اليوم قلت لازم قوماشعل هالكمبيوتر وشوف مقادير المعروك اللي صورته تشهي
    الله يعطيك الف عافية وصفة بتجنن شكلها رائع وحاسة طعمتها بتمي عبفكر قوم هلق جربها لأن كل المكونات عندي
    يسلمو هالايدين وبتوصلك الصورة قريبا ان شاء الله :)

  30. dado 22 July 2012

    الي زمان ما قدرت اكتب شي ولا اعمل اي مداخلة… بس جملتك (يا رب سوريا الحلوة الحزينة تمسح دموعها وتفرح قريب) جبرتني قلك يا منوش انها نزلت مني دموع كتـــــير!!

    كل سنة وانت وعيلتك سالمين حبيبتي.

  31. larooo 22 July 2012

    ممممممممممم ياسلام فعلا طلع شي بشهييي جدااا ..اليوم جربتن .. كتير طيبين .. بس شوي طلعوا غامقين ..يمكن كانت رشة النسكافيه زيادة تكة .. بس جدا اعجبت فين ..يسلمو ايديك يارب :)

  32. DOUHA 23 July 2012

    اليوم عملتو كتير ناجح ما توقعت لهد الدرجة لاني مو شاطرة بالمعجنات
    بس يلي صار في طعة شوي للخميرة مابعرف ليه
    سئلت ياي داوقها ما حسوا بهل الشي

    سؤالي غريبة مافي بالمقادير ملح
    منى تقربيا اجمالي ساعات التخمير كام؟؟؟

  33. DOUHA 23 July 2012

    نسيت قول شكرا كتير لو مو منى مجربتوا كنت مارح جربوا :zzz

  34. ام شهلا 1 August 2012

    واخيرا رجع موقعنا لللللللللللللللللللللييييييييييش يسلمو منوشة عملت المعروكات وحشيتن تمر واخدتن معي ععزيمة وبيضولي وشي يسلمو كتير

  35. رهف 2 August 2012

    بالأول ينعاد على الجميع بالصحة والعافية والايمان وـأكيد أنا لازم اكون من أول المجربين وأنا واثقة من النتيجة الحلوةبس كمية الطحين هي واحد كيلو؟

  36. حنان 3 August 2012

    ااخت مني. السلام. عليكم. كيفك. كيف. احوالك ان شاالله بخير. انت. واهل في حلب. وفي. سوريا. كلها. يا. رب. تنصرك. يا. الله طمنيمي عليك

  37. Iman 20 August 2012

    اهلين منى. كل عام و انتي و حبايبك بالف خير. وصفه رااائعه. على التجريب قريبا باذن الله. اتمنى لسوريا الحبيبه و اهلها و لدولنا العربيه الامان و الاستقرار. اهنيء كل الاخوات في الموقع الحبيب و القريب لقلبي بعيد الفطر.

    • منى 28 May 2013

      هلا ايمان , ينعاد عليك بالف خير يا رب ,انت و كل عيلتك و الغوالي على قلبك . شكرا الك لدعواتك الكريمة
      أتمنى تجربي المعروكات و يعجبوك و رح استنى رايك ان شاء الله

  38. لبنى الشامية 22 August 2012

    السلام عليكم
    والله عيدنا مو عيد وكل يوم بسوريا 100 و 200 شهيد!!
    يارب نصرك
    ست منى بالنا عندك وعند كل أهل حلب وسائر المحافظات السورية
    الله يطمنا عنكم قريبا ويرجع الأمن للدار

    • منى 1 March 2013

      شكرا يا لبنى , الله الحامي ان شاء الله , و الله يتقبل الشهدا راحوا لمكان احلى من هون بكتير .

      أمين يا رب , شكرا حبيبتي للسؤال

  39. رانو 3 September 2012

    رح جربه عن قريب …دليت جارتي عالموقع وجربته طلع رووووووعة ..تماما نفس اللي كنا ناكله بسورية

  40. رانو 3 September 2012

    رووووعة جربتها طلعت نفس اللي بسورية

  41. رانو 3 September 2012

    مشكووورة

  42. رانو 3 September 2012

    مرحبا كيفكن [*]null

  43. رانو 3 October 2012

    لك ربي يسلم هالايدين…لو تعرفي اديش كنت مشتهية المعروك وخصوصي اني بالسعودية ومافي متل معروك سويا ..جربته فووورا طلع راااائع شكلو وطعمتو
    الله يجزيكي كل خير
    ;)

  44. إم ترتيل 10 July 2013

    مرحبا منى, كيفك؟ الله يعطيكي العافية ع هالوصفات الحلوة. عندي سؤال إذا بتريدي, المحلب غير متوفر هون فيني استخدم شي تاني بنوب عنو. او استغني عنو نهائيا؟ كل الشكر مقدما

    • منى 11 July 2013

      هلا ام ترتيل , الله يعافي قلبك و بدنك , مية هلا فيك :)
      هلا هو حيعطي الطعم للمعروكة , بس اذا مو متوفر فيك تستغني عنه

  45. إم ترتيل 10 July 2013

    منى, عم حاول سجل بالموقع و ما عم يمشي الحال, في مشكلة بتسجيل اعضاء جدد؟

    • منى 11 July 2013

      في مشكلة هلا , و عم نحلها , ان شا الله ما بطول

  46. إم ترتيل 11 July 2013

    كلك ذوق منى, شكرا كتير ع الوصفة و ع الرد. عملت المعروك اليوم بدون محلب و كان بجنن. طعمتو كانت راح تكون اطيب لو توفر المحلب. بس حتى هيك كان كتير ناجح. يسلم ايديكي

    • منى 11 July 2013

      عوافي و الف الف هنا يا رب ع قلبك :)

  47. heba 11 July 2013

    انا كتير مشتاقة لاكلات حلب وسورية وخاصة المعروك بكرة رح جربو واكيد رح ادعيلك شكرا

    • منى 11 July 2013

      ان شاء الله تجربيه و يكون ع زوءك , رح استنى رايك

  48. RINA 11 July 2013

    مرحبا انا اول مرة بشارك بس حبيت اسال الزيت اللي بلوصفه نباتي او حلو وشكرا

    • منى 12 July 2013

      زيت نباتي لهل الوصفة , ايا سؤال تاني من عيوني :)

  49. dima 12 July 2013

    مرحبا منى شكرا عالوصفة بس كانت كتير عبتلزق عالايد واضطريت زيد طحين حتى ادرت اشتغلا فطلعت ناشفة شوي شو الحل حتى ماتلزق عالايد ؟؟

    • منى 14 July 2013

      هلا ديما ,
      المفروض تضيفي مي او حليب ع حسب حاجتك , مدامها لزقت معناها ضفتي سوائل زيادة عن حاجة الطحين ..
      اديه استعملتي سائل ؟

  50. shireen 30 December 2013

    والله رووووعة انا رح درب هالوصفة بعد ما صابني يأس من عمل المعروووووك وكتير ينجح وسلمو وووووووووو سلفا

    • منى 31 December 2013

      ان شا الله رح تنسي الياس كله مع لقمة طيبة , رح استنى رايك

  51. نور من قبرص 22 January 2014

    اناعملت هالوصفة وطلعت زابطة كتيرورائعة وطعمتابتشهي.مع انوماضفت المحلب لانوماعندي,بس غيرت فيها شوي لتطلع متل خبزالعيد ضفت شومر ويانسون مدقوقين شوي وكركم حتى يعطي لون أصفرللخبز وفانيلا ورشق قرفة وجوزة
    الطيب وسمس محمص وحبة بركة,بس مابعرف اذا القطر بدو عصرة ليمون لانوبعدمادهنتو على المعروك صارسكر قاسي.شكرا الك منى ويسلم ايدك

    • منى 16 April 2014

      عوافي و الف الف صحة نور ع قلبك بكل لقمة :)
      لا معناها زدتي عليه على النار و ع كل ما في مانع تحطيله نقطة ليمون
      الله يسلمك و منورة دوما الموقع روح قلبي

  52. تمارين تخسيس 10 February 2014

    شكلها روعة جدا

    • منى 11 February 2014

      من زوءك يا قمر :)

  53. نور طعمة 6 May 2014

    كيفك مدام منى ليش طلع معي المعروك مو هش كتير من جوا واسفنجي مع انو طلع متل معروك سوريا بس مو متل القطن هش .ليش ياترى، بس الطعمة بتجنن والريحة بتاخدالعقل وكل يلي داقو حبو وزعت الطريقة لكل حدا بعرفو وقلتلون هي وصفة المبدعة منى صابوني، يخليلنا ياكي يارب

    • منى 7 May 2014

      صباح الخير نور :)
      صحتين و الف هنا ع المعروك , بدي اسالك يا ترى نفش معك في المرتين و الا بقي على حجمه ؟

  54. ميس الراضي 28 May 2014

    كيفك منى يسلمو دياتك شكله بشهي
    انا اليوم جربته اول مرحلة نجحت كتييير و اتخمرت بس التانية بقيت العجينة ع حالها و انا حطيت تقريبا 3/4 كاسة حليب بالمرحلة التانية هيك صح؟؟
    انا حزينة

    • منى 28 May 2014

      لا تحزني ميس , طولي بالك , ما دام اول مرحلة نجحت , التانية حتنجح كمان ان شا الله , بس بدك تطولي بالك ع العجينة لحتى تاخد وقتها و ترتاح و تنتفخ
      المهم ان الحليب الي ضفتيه كانت حرارته مفترة , مو هيك ؟

  55. ميس الراضي 28 May 2014

    تسلميلي و شكرا عردك السريع بصراحة بالمرحلة الاولى الحليب كان مفتر بس بالتانية عادي بحرارة الغرفة و هلا قسمت العجينة نصين عملت قرص هو بالفرن حاليا و النص التاني تركته قلت بطول بالي عليه وان شاء الله يصير

    • منى 28 May 2014

      اااه , معناها هادا هو الغلط , هلا هو وقت يكون الحليب مو مفتر بيطول أكتر بالتخمير , هلا الي بالفرن ممكن ما تنجح معك تمام , رح تطلع غصيصة شوي و مو هشة , استني ع القسم التاني لحتى يتضاعف حجمه , و بعدها خبزيه

      منورة ميس :)

      • ميس 16 June 2014

        الوصفه قيد التطبيق و صارت بالفرن بس انا ضفتلها لبن و تركتها مرتاحه كل الليل لانه ما صربي خبزتها يومتها
        شكرا الك لانه انا من عشاق المعروك و مقدرها تعبك بالبحث عنها
        و حقك تعترضي لما حدى بحطها تحت اسمه

        • منى 16 June 2014

          صحتين و الف الف هنا يا قمر :)
          ريتو عافية و بانتظار النتائج الطيبة

          شكرا للتشجيع

  56. duaa 15 June 2014

    هلئ سؤالي على شكل الضفيرة ..كيف اعملو خصوصا انا بدي احشيه تمر قبل الخبز بيزبط ؟؟

    • منى 20 June 2014

      الضفيرة بتقطعي العجينة 3 قطع , و بتبرمي كل قطعة لتصير ع شكل اسطواني طويل , بعدها بتضفري التلات حبال مع بعض متل ما منعمل ضفرة الشعر و بتشيليها بلطف ع الصينية

      اذا بدك تحشيها تمر فيكي قبل الخبز , بس غير اشكال اسهل من الضفرة للحشوات :)

  57. بشرى 18 June 2014

    منوشة يا ست الكل .. المعروك عالتجريب بكرا إن شاء الله

    • منى 18 June 2014

      ان شا الله , رح استنىىىى :)

  58. بارعه 25 June 2014

    السلام عليكم
    انا حبيت ساوي طريقه المعروك وبما انه انا بتركيا فما لقيت حليب بودره
    فالسؤال بقدر استغني عنه او استعيض عنه بشي تاني
    ولك الف شكر

    • منى 26 June 2014

      هلا هو رح يعطي طراوة و هشاشة للمعروكة , بيطلع طيب من دونه , اذا انوجد احسن بكتير :)

  59. نور صباغ 26 June 2014

    لو سمحتي مدام منى الحليب البودرة اساسي الا بصير بلاه؟؟؟

    • منى 26 June 2014

      مسا الخير نور :)
      اذا عندك بيعطي المعروك طرواة و هشاشة و لون بيجنن متل معروك السوق تمام , اذا ما عندك بيمشي الحال بلاه , بيطلع كمان طيب

  60. نسرين 29 June 2014

    السلام عليكم …الصور بتجنن تسلم ايدك ان شاء الله حجربو قريبا بس لو سمحتي عندي سؤال كيف فيي احشيه جوز هند وزبيب متل يلي كنا نشتريه من السوق

    • منى 29 June 2014

      اهلا و سهلا نسرين :)
      لو حابة تحشيه زبيب باخر العجن وقت تجهز عجينتك و تصير طرية و ناعمة , عودي ضيفيعليها زبيب و ارجعي اعجني , و بالنسبة لجوز الهند فيكي اما ترشيه ع الوج مع حبة البركة و السمسم , او تحطي نص كاسة بقلب العجينة

  61. Hadia Ajam 30 June 2014

    منى هلأ عملت العجينة بس لزقت معي كتير بالعجن فضفت طحين
    شو رح يأثر عالنتيجة ؟
    وبيتضيفي بالاول الحليب مع الخمير عالطحين المفروك بالزيت والزبدة ومن بعدها بتكملي الحليب السائل؟

    • منى 1 July 2014

      رح يصير قاسي شوي , ما بيصير نضيف طحين ابدا , لهيك اضافة السائل بالتدريج حتى ما نحط زيادة و تنتزع عجينتنا :(

      ايا حليب عبتقصدي ، ما كتير فهمت السؤال التاني

  62. نوارة 3 July 2014

    ماشاء الله عليكي، الله يبارك بهالنفسية الرائعة وبهالإيدين يلي بينلفوا بحرير.
    كتير ناس بيحتفظوا بالطريقة والمقادير الصحيحة لنفسهم وبس، بس إنت ما شاء الله كريمة بنت كرام

    • منى 4 July 2014

      الله يسلمك نوراة ع هيك كلام مزوء ، شكرا حبيبتي كتير و يا ريت تجربيها و تكون ع زووءك

      منورة و الله

  63. نسرين 9 July 2014

    جربتها وطلعت بتجنن تسلم ايدك بس عندي تصور بتمنى تقوليلي رايك فيه
    اذا قمت السكر يلي بنحطو مع الطحين وحطيت اعشاب مجففه اوريكانو وريحان وهيك او زيتون كمان وزودت الملح تكه بتظبط؟؟؟يعني بتطلع خبز مالح
    لانو العجينه كتيييير عجبتني وانا بحب الخبز بالاعشاب والزيتون كتيير و هون بايطاليا فيه هيك اصناف بس على الاغلب بيدخل الكحول بمكوناتها

    • منى 9 July 2014

      ممممممم ليش لا أكيد بتزبط , إذا خليتي السكر شي 3 معالق بس و ضفتي ايا شي بيخطر ببالك , رح تطلع فخمة ..
      شو مفكرة تضيفي عليها ؟

  64. نسرين 9 July 2014

    تسلميلي يارب ان شاء الله بس لجربها بخبرك بالنتيجه
    حجرب حطلها اعشاب مجففه وزيتون وان شاء تطلع طيبه …ادعيلي
    بالنسبه للزيتون ممكن يكون مقطع واعجنو مع العجينه بالاخر متل ماقلتيلي بالنسبه للزبيب او حضر حشو منو واحشي الخبز قبل خبزه

    • منى 10 July 2014

      ان شا الله بانتظار النتيجة :)
      ما كتير فهمت اخر جملة ، هي سؤال ؟

  65. غنى 9 July 2014

    تسلم ايدك منى ان شاء الله رح جربها و اقلك كيف طلعت
    سؤال لو سمحتي… كيف فيني استعيض عن الخميرة الحبيبات بالخميرة الفورية؟

    • منى 9 July 2014

      اهللين غنى منورة حبيبتي :)
      الخميرة الحبيبات الفورية نفس الشي , و هي بتختلف عن الخميرة الجافة , انتي شو حتستعملي ؟

  66. غنى 10 July 2014

    هلا انا اختلطت التسميات عندي
    رح استعمل الفورية الي بتنحط مع الطحين
    مو الي بتنحط مع ألمي الدافية و بتنترك لتتخمر فيها

    • منى 10 July 2014

      طيب هي اسمها خميرة جافة :) المهم انو بهي الحالة بتتجاوزي مرحلة التخميرة الاولية و بتقلبي المقادير كلهن مع بعض

  67. Raz 12 July 2014

    بشهي المعروك شكلووووو
    بس شوفينا نستخدم بدال حليب البودرة؟؟؟

    • منى 13 July 2014

      أهليين رزان :)
      ما في بديل عنه هيك الوصفة بتطلع برفيكتو , البدائل بتطلع طيبة بس مو معروك معروك

  68. الدمشقية 17 July 2014

    السلام عليكم ورحمة الله وبركاته
    تسلم أيدك بالفعل الوصفة ناجحة 100% وأطيب من السوق أنا عملتها وحشيتها شوي قشلميش وجوز هند وشوي حشيتها عجوة والكل داقوها وقالو أنها طيبة كتيييير
    وعلى فكرة ما خليتهم يشتروا معروك من السوق وقت بدهم أنا عم ساويه وبطير عقلهم فيه طبعاً والفضل كله بيرجع ألك ست منى
    الله يجزيك كل خير

    • منى 18 July 2014

      و عليكم السلام و رحمة الله و بركاته
      ان شا الله مليون صحة و الف الف هنا و عافية و الفضل لرب العالمين و لثقتك في الغالية كتير ع قلبي , شكرا كتير ع ردك و كلامك :)

  69. Nezar 21 July 2014

    ألف شكر للوصفة الرائعة
    بصراحة جربتها من اول مرة وعملت معروكتين كبار وكانت النكهة ولا اشهى من هيك
    شكرا جزيلا :)

    • منى 21 July 2014

      هنااا و الف الف صحة نزار , مبسوطة كتير انك جربت الوصفة و انها كانت ع زوءك و انها نجحت معك من اول مرة , نور :)

  70. أم كرم 23 July 2014

    السلام عليكم ورحمة الله وبركاته
    تسلم ايديكي عهالوصفة باين عليها طيبة كتير
    صرلي من أول رمضان عم دور لهلأ حتى لقيت هالوصفة وعجبتني :)

    هلأ بس سؤالين بعد اذنك
    اول شي نصف كوب حليب بودرة يعني استعملو وهو بودرة ولا دوبو بمي؟
    تاني سؤال القطر لازم استعملو كلو ولا دهنة خفيفة ؟؟
    ويسلمو ايديكي مرة تانية

    • منى 24 July 2014

      اهلا و سهلا ام كرم نورتي و شرفتي
      الحليب بتستعمليه متل ما هو من دون تدويب , و القطر دهنة خفيفة بس رح تخلص كمية القطر على كمية المعروك , ما رح يبقى نقطة زيادة

      ان شا الله تعجبك و ايا سؤال من عيوني

  71. Sahar. joudeh 30 August 2014

    العجينة رائعة سلمت يداك خلص رمضان وما زلت اعملها
    ﻷنها ﻻقت استحسانا وقبوﻻ شكرآ لجهودك

    • منى 7 September 2014

      صحتين و الف عافية و هنا سهر :)

  72. Nezar 11 December 2014

    ما شاء الله هالوصفة ما بينشبع منها
    اليوم رجعت ساويتها :)
    احلى شي عملتها بالغربة واخدتها مرات معي كضيافة برمضان
    الكل صار بدو هالوصفة
    يقول والله معرووك سوريا :)
    الله يعطيكون العافية
    دوما بالتوفيق

    • منى 13 December 2014

      مية هلا نزار شرفت الموقع و نورته و ما بتعرف اديه هل الكلام بيسعدني ، الف عافية ع قلبك و قلب كل مين داقهن

  73. amal 31 December 2014

    hhhhhhhhhhhhhhhhhhhhhhhhh

  74. ام احمد 15 May 2016

    يسلموا ايديكي عن جد منظرو بيشهي رح جربو اليوم اأن شاء الله ومتأكدة رح ينجح بتمنى تقبلوني معكون

    • منى 23 May 2016

      مية هلا نورتي وشرفتي :)

  75. ميرنا 11 June 2016

    من اروع الوصفات والله شفت حالي ع بيت حماية بهل الوصفة وصرت مشهورة فيا كمان الله يسلم هالايدين ست منى ست الستات بالمطبخ موقعك من مواقع معتمدة عندي ومين ما يسالني عن مطبخ سوري ركض بدلو ع هالموقع وانا مطمنة من نتيجة شكراااا

    • منى 1 July 2016

      شكرا يا ميرنا الله يكرمك وان شا الله وجهك ابيض دااايما داايما

تقييم الوصفة
عاديةقد أحضرهاجيدةممتازةأكثر من رائعة (32 votes, average: 4.09 out of 5)