تحضير و حفظ الزيتون المكسر


         وصفة : منى                 2014/12/04                 8 تعليقات

آخر تصويت


آخر تعليق

تحضير و حفظ الزيتون المكسر

لو كان في اكلة بس بتختصر كل شي بحبه في الاكل ، فهي الزيتون .. فيو بركة ، بينحفظ بطريقة سهلة و بيبقى سنين ، بيتحضر بعشرين طريقة كل طريقة أطيب من الطريقة التانية ، صحي و كله فوائد ، أكل الدرويش و الغني .. لو كنت بعرف اكتب شعر ، كنت كتبت بالزيتون
لما كنت صغيرة بيبي كنت كل ما شوف زيتون أضحك ، قام صاروا الكبار يقرصوني من خدودي حتى ابكي و بعدها يورجوني زيتونة ، فاضحك :D يعني بحب الزيتون و هو غرامي بالفطرة . و دايما لما كنا نجتمع انا و خواتي بصلنفة يكون فطورنا كل يوم صحن هل الاد .. انا ما بحب بس طعمته ، بحب كل شي بتذكره معه .
بموسم الزيتون كل سنة منحضره و منكسره و منحفظه بمي و ملح لسنة التانية ، اذا كانت طريقة الحفظ مزبوطة بيبقى سنتين و تلاتة و هو محافظ على حاله من دون ما ينتزع . الزيتون الأخضر بيتكسر بحجرة او مدقة خاصة من دون ما تنكسر البذرة ، و ممكن يتكسر بماكينات خاصة ، انا بشتريه مكسر و خالص و بعدها بشتغل فيه . بالوصفة تحت رح تشوفوا طريقة تحضير و حفظ الزيتون المكسر . بعد الحفظ منتركه على القليل شهر بمية الملح و الافضل شهرين الى تلات شهور و بعدها منحليه ، يعني منغير الماء حتى تروح منه كل طعمة المرار ، هي القصة بتاخد كم يوم حسب نوعية الزيتون و بعدها منتبله تبلات مشكل و ملون و انتوا و الي بتحبوه .
بالصحة و الهنا

-المقادير:

زيتون أخضر ، تختار الحبات الكبيرة
ملح طبيعي غير مضاف اليه اليود ( صخري أو بحري )
شرائح ليمون رقيقة أو ملح ليمون
القليل من السكر
- طريقة التحضير :

1 - يمكن شراء الزيتون مكسر بكسارت خاصة و جاهز للحفظ ، أو يمكن تكسيره باستخدام حجر نظيف . يراعى وضعه في الماء كي لا يسود .

2 - بعد أن تجهز كل الكمية لديك يغسل جيداً ثم يوضع في مرطبانات .في حال استخدام شرائح الليمون توزع الشرائح بشكل طبقات في المرطبانات .

3 - يحضر محلول الحفظ الملحي ، يذوب ماء و ملح كمية كبيرة ، يمكن تحديد مقدار الملح بطريقة تقريبية باستخدام بيضة نظيفة طازجة توضع في ماءالحفظ إذا طفت على السطح فمقدار الملح مناسب و الا فيجب زيادة الملح حتى تطفو البيضة على السطح و نصل للتركيز المطلوب .

4 - يغمر الزيتون بالمحلول الملحي ، تضاف رشة سكر صغيرة لكل مرطبان و في حال عدم اضافة شرائح ليمون تضاف ربع ملعقة صغيرة ملح ليمون ، توضع عدة ورقات عنب أو كيس صغير على الوجه كي لا تطفو حبات الزيتون و يرش المزيد من الملح عليها لمنع ظهور طبقة عفن ثم تغطى المرطبانات باحكام .

5 - يترك الزيتون لمدة شهر على الاقل في المحلول الملحي و يفضل ثلاث شهور لتسهيل عملية التحلية . عندما يصبح لون الزيتون أصفر بالكامل فهذا دلالة أنه اصبح جاهزاً للتحلية ( الزيتون في الصورة غير جاهز بعد ) .

6 - عند الطلب يغير ماء الزيتون عدة مرات في اليوم على مدى عدة أيام للتخلص من الطعم المر ، يتبل حسب الرغبة .

التعليقات

  1. هوا شامي 10 December 2014

    تسلم ايديك يارب، لا تقولي انك ما بتعرفي تكتبي شعر انت بتقدري تفوتي لقلوبنا وانت عما تشرحي عن وصفتك، بشعر وانا عما اقرا اي شي معك بريحة سوريا بتذكريني بالايام الحلوةيارب تعيدها يارب ونرجع على بلادنا، كنت وانا صغيرة جن وقت يجي موسم الزيتون لانه عنا زيتون بيجي من الضيعة وبيجي بشوالات كتيرة واقعدوا اشتغلوا البيت كله بيتجند للزيتون، هلق بنشتري الزيتون شوية تانية راح يصير بالحبة وبتمنى على شوية يكونوا خضر وانا ساويهم على كيفي، تسلم الايادي ويارب يديم خيرات بلادنا

    • منى 13 December 2014

      يا سلااام و نحنا كان يجينا من الضيعة شوالات شوالات خير و بركة ، يندق الباب و يجي زيتون و كله طعمة ..

      يا رب الله يديم هل النعم كلها و سعيدة كتير بوجودك هون و ردك و كلامك ، منورة :)

  2. جود 22 December 2014

    تسلم ايديكي دائما مميزة بوصفك ووصفاتك و طريقة تقديمك… كتيير باخد من اكلاتك وانا مغمضة وفعلا بتطلع ولا اطيب.. الله يجزيكي الخير ويعطيكي مرادك
    بالنسبة للزيتون مافي اطيب من اكلة زيتون و جبنة و زعتر اخضر هي اكلة عالمية و جنبها كاسة الشاي بس طبعا لازم يكون الزيتون أصولي يعني مكبوس بطريقة صحيحة حتى تطلع الطعمة مظبوطة هلق المشكلة انو انا صار جربت كتير انواع زيتون اكسره و شيل العجو و حليه و بعدها اكبسه مع ليمون و زيت بس المشكلة انو اوقات الزيتون عم يطلع إلو قرطة و اوقات لحتى يحلى عم بيصير لونه غامق و هالسنة حسيت الزيتون ماعم يحلى إلا عم بيضل إلو طعمة مرار ولو شوي.. احترت شو اعمل في شي طريقة معينة اعرف انتقي الزيتون اللي عم اشتريه ولا العذر من التحلية؟؟؟
    لاتواخذيني طولت عليكي وسلمت يداك مرة ثانية

    • منى 26 December 2014

      مسا الخير جود :)
      معك حق ، هل الشي انا صارلي سنتين عبيصير معي و شفت احسن حل انك تتركي الزيتون بمي و ملح و ليمون فترة طويلة ، يعني زيتون السنة الماضية كان هديك السنة عبيعذب كتير ليحلى و لونه عبيغمق ، هل السنة عبيحلا بشي اسبوع و طعمته و لا أروووع

      بالعكس نورتي الموقع و شرفتيه ، مية هلا فيك

  3. نسرين 23 January 2015

    الله يعطيكي العافية مدام منى بس نحنا الزيتون المكسر منحطله صفية افرنجية اما انتي ما ذكرتيها

    • منى 29 January 2015

      ليه بتحطوها نسرين ؟

  4. فتفوتة99 21 June 2015

    مشكورة أخت منى ع كل الوصفات التي عم تقدميها
    بحب ضيف معلومة للسهولة
    بالنسبة لعيار البيضة
    عيار البيضة يعني يكون تركيز المحلول الملحي 20 %
    يعني كل ليتر ماء بحتاج 200 غ ملح
    يعني كل 5 ليتر ماء يحتاج كيلو ملح

    • منى 25 June 2015

      الف شكر للمعلومة ، ما كنت بعرفها

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)