سلطة الفطر الطازج


         وصفة : منى                 2010/12/29                 24 تعليقات
سلطة الفطر الطازج

في هل الدني في مدخن سلبي , و في مشاهد سلبي و في كمان مستمع سلبي , هلا المدخن السلبي كلنا منعرفه , و المشاهد السلبي هو متل حكايتي متابعة كل دوريات الفوتبول في العالم ابتدءاً بدوري الأبطال و انتهاءً بالدوري السوري من دون ما افهم أو حب شي بالرياضة و الفضل لابو الشباب و كمان فرخو للبط , مروان , أما المستمع السلبي فهو الأخ المواطن الي بيفتح الراديو لا اله و لا عليه و اذ بيطلعه شي واحد عم يغني اغنية حب رومانسية :

, وينو الي بيحبك وينو رايح ااقلعله عينه , باخد روحو بشرب دمو . الي بيرميكي بوردة براسو بخرطش فردة . ريتاني تنباك العسل و تحرقيني باركيلة .
أو بتطلعلك شي واحدة او واح عم يخبروك ان طريقك اليوم مسدود سدة ظالمة و رح تعلق مع رئيسك بالعمل و رح تقابل شخص باخر النهار , هل الشخص في احتمال يصير علاقة عاطفية معه , علما بان حضرة فخامة سيادتك ما عندك رئيس بالعمل , و الدنيا برة شمس و قلبك عم يزقزق معها , و مستورة مع ابن الحلال و مو بانتظار فارس من ايا نوع !
و ممكن كمان تطلع شي مذيعة عم تضحك من دون ايا سبب اغير المياعة و بين الضحكة و التانية عم ترميلها كم كلمة أكيد باللهجة اللبنانية و إذا المستمع السلبي نفد من كل ما ذكر أنفاً معناها اكيد هو بفترة الدعايات و الاعلانات و الله كريم تخلص عن قريب !


بصراحة عادي كتير ان يكون في ناس عم تحكي تخبيص و تغني تعفيس , بس الي مو عادي ان يكون في ناس تانية مصدقة علاك اول ناس , شي بيزعل :( ..و أغانينا الارهابية كمان بتسد النفس و ايا واحد بيسمعها رح يفكر ان نحنا مو بس شعب ماشي في دمه الارهاب لا كمان منتنغم و منرقص عليه , أما هي المذيعة الي مفكرة حالها لذيذة و ” مهضومة ” نفسي و منى عيني شوف كيف بتحكي ببيتها أول ما تفيق من النوم …

الاذاعات أغلبها شي معت , و التلفزيون شرحو , كله مركز و هدفه يطلع الواحد بعد ما يسمع شي اربع خمس ساعات , يطلع راسو فاضي … مطروب , مو عرفان وين الله حاطه , و هادا الشي عم يصير عن عمد و قصد , و الفهيم الي بيعرف الفرق و بيعرف ايمتى يطفي التلفزيون أو يدير القناة وقت اللزوم .

منرجع لوصفتنا , سلطة الفطر الفريش . إذا كنت بتحبي الفطر رح تعجبك هل السلطة كتير , هلا انا الفطر بحبه كتير ,و انا عم افرمه للسلطة بكون أكلت نصه يمممم طيبة كتير هل السلطة و الي بيكملها نعنشة الزعتر و النعناع و قرمشة و الجرجير , طيبة كتير و تغير شكل .


بأخر السنة حابة اسالك يا ترى عندك حلم تحققيه للسنة الجاية , او خطة لحلم ممكن يتحقق بعد اكتر من سنة بس انت ماشية اله بخطوات صغيرة و ثابتة ؟ عن جد الحياة من دون هدف ناقصة كتير , و أن يكون عندك حلم فهي اهم وصفة لابتسامة دائمة و وجه مشرق و عيون فيها حياة


كل سنة و نحنا و أحلامنا و أمالنا و قلوبنا و عيلاتنا بخير



بالصحة و الهنا




باقة جرجير , مقطع
حفنة نعناع أخضر طازج , ينزع الورق عن الساق
حفنة زعتر أخضر , ينزع الورق عن الساق
1 حبة بندورة , مفرومة
كوب فطر فريش , قطع شرائح
نصف كوب زيتون أخضر أو أسود , منزوع النوى

الصلصة :

عصير نصف ليمونة
2 ملعقة كبيرة دبس رمان
ربع كوب زيت زيتون
نصف ملعقة صغيرة أوريغانو
ملح






• تخلط مقادير الصلصة حتى تتجانش و تترك جانبا حتى اعداد بقية المقادير .

• تمزج الخضار و تتبل بالصلصة و يضاف المزيد من عصير الليمون حسب الرغبة و تقدم فوراً ,

التعليقات

  1. آرام 29 December 2010

    مرحبا أخت منى

    هالوصفة اللذيذة إجت بوقتها. سلطات الزعتر الأخضر وسلطات الجرجير من الأطباق الدائمة والمفضلة عندي، وهالوصفة الروعة بتجمع بين الاثنين، فألف شكر إلك.

    وأعتذر عن تقصيري في الفترة الأخيرة في المشاركة بالتعليقات، رغم أني لا أنقطع يوماً عن تفقد الموقع والاستفادة من ذخائره.

    أما عن الإذاعات والتلفزيونات وخلافه، فأنا مريح راسي، ويمكن أنا الشخص الوحيد بالعالم اللي ما بتابع تلفزيون وإذاعة أبداً، والتلفزيون اللي عندي إجاني هدية، وآخر مرة فتحته كانت قبل رمضان بأسبوع بناءً على طلب ضيوف كانوا عندي، والحمد لله على نعمة الإنترنت :)

  2. ميسونو 29 December 2010

    صباحو منى
    وشكراً ع السلطةالشهية
    أنا أيضاً حالي من حال الأخ آرام.. متابعة يومية بس قليلة التعليق

    طولت الغيبة علينا يا منى
    عسى المانع خيراً
    وصباحو مرة ثانية

  3. 7ayah 29 December 2010

    هالسلطة باينتا كتير لزيزة
    و خاصة إني بحب الفطر كتير كتيـــر

    معك حق و الله
    و أحسن شي الواحد يروح عالانترنت
    هيك بيقدر يختار شو بدو يسمع و يقرأ

    بالنسبة للسنة الجديدة
    أنا امنيتي إني كون أم بكل معنى الكلمة لإبني الأول إلي جاي عالطريق ان شاء الله
    الله يقدّرني على تربايتو تربية صالحة
    هاي أكبر أمنياتي هلأ

    و في عندي سؤال
    من فترة بعتلك على اتصل بنا إني عملت مارشميلو مع الصور
    وصلك يا ترى ولا هالخاصية مو شغالة هلأ :?

    7ayah Dayyen

  4. gsm 29 December 2010

    السلام عليكم كيفك منى زمان القمر ما بان كتيير إشتقنالك بتعرفي إمبارح خطرتي على بالي قلت لحالي بس ما يكون حدا من أولادها عنده شهادة يعني بروفيه لهيك عم تغطي علينا وتغيبي كل هل الغيبة وبالنسة للإذاعة انا الحمد لله متل الاخ آرام ما بتابع تلفزيون إطلاقا ولا إذاعة ولا شي يعني من شان الأخبار الله يخليلنا الجزيرة نت :grin نجي للوصفة يا ستي انا كتيير بحب الزعتر الأخضر والفطر الفريش بس ماني صحبة كتيير مع الجرجير :roll بس إن شاء الله رح اجربها للسلطة بلكي بحبه مع الصوص وباقي المكونات ممكن تزبط معي :grin

  5. juman 30 December 2010

    وين هالغيبة ,تسدقي كل يوم تقريبا بفوت عالموقع لشوف شوفي جديد,يسلمو ايديكي ان شالله رح جربا قريب و تعجب اللي عندي بس ما بقى تغيبي كل هالقد, :roll وعندي سؤال قبل هيك عملتي استفتاء عن الكتاب يلي بدك تنزليه , فشو صار فيه ؟يعني في نية والا غيرتي رايك؟؟؟؟

  6. ream 30 December 2010

    صباح الخير منى شو هل الألوان اللي بتفتح النفس
    شتقنا لوصفاتك لا تتأخري علينا
    وانشالله عالتطبيق المسا

  7. karamela 30 December 2010

    كيفكن يا صبايا
    وكل سنة وانتو سالمين
    حبيبتي منى صدقيني شجعتيني راجع احلامي واهدافي اللي اندثرت بانشغالي بالاولاد بس كلمتك بخطوات صغيرة وثابتة هي شجعتني
    يالله يامنى قديش افكارك وطريقة تفكيرك قريبة من تفكيري يعني انت مو بس معلمتي بالطبخ انت كمان صديقة مميزة الله يديم المحبة
    وشو حاططينا وصفة سلطة بعد هالغيبة والله اقل من طبخة منسف ما منقبل :grin
    يسلم ايدك على كل شي انا عم امزح ;)

  8. آرام 30 December 2010

    الأخت كراميلا
    معك حق، لقمة طيبة بيت كريم ومضياف يجمع الناس الطيبة والمحترمة والذواقة. ولو أن الغالبية الساحقة من ضيوفه من النساء نظراً لطبيعته واختصاصه، ولعلي الرجل الوحيد :) المداوم على زيارته لحاجتي إليه، وفي البداية بقيت فترة طويلة أتابعه بصمت لأني كنت أشعر بالحرج حتى شجعتني الأخت الكريمة منى على المشاركة الإيجابية.

    أما بالنسبة لمواقع الإنترنت الظريفة والمفيدة فلا أعتقد أني أستطيع أن أفيدك كثيراً، وليس لدي سوى العزيز جوجل الذي أجد فيه كل ما أحتاج، وبعض مواقع الترجمة التي أحتاجها في عملي، ولا أدري إن كانت تفيدك في شيء:
    http://www.thefreedictionary.com/
    http://www.collinslanguage.com/
    http://www.forvo.com/
    http://www.urbandictionary.com/
    http://www.investing-glossary.com/
    http://www.businessdictionary.com/
    http://www.websters-online-dictionary.org/browse/Arabic
    http://www.wordreference.com/
    تحياتي

  9. منى 30 December 2010

    هلا ارام :)
    ان شاء الله تعجبك و تكون طيبة و على زووءك , رح تخبرني اكيد شو بيصير معك

    هلا تلفزيون مو هل الاد , بس الاذاعات انا بتابعها و خصوصا الفترة الصبحية وقت الشغل بالمطبخ بحب يكون في حدا عم يدوي بادني, بس اكيد المصدر الاساسي للمعلومات عندي هو النت

    شكرا كتير لاضافة المواقع , ان شاء الله يستفاد الكل منها

  10. karamela 30 December 2010

    نحنا تعودنا انو لقمة طيبة هو بيتنا اللي بيجمعنا كلنا وبخلينا نتعلم من بعض بكل شي مو بس الطبخ
    لذلك حابة استعين بارام ومن كل اخت عندها خبرة بالانترنت وحتى الاخت منى ياريت دلوني على مواقع ظريفة بالانترنت وبكل المجالات يعني انا بالطبخ مكتفية وبتمنى لاقي بكل المجالات مواقع ظريفة متل لقمة طيبة مشان هيك بدي مساعدة
    والله صايرة عم ادخل على الانترنت وبضيع كذا ساعة وبحس حالي ما استفدت شي
    على فكرة انا متل منى خريجة ادب انكليزي
    ونحنا رسولنا بخبرنا ان الدال على الخير كفاعله
    شكرا الكن سلفا

  11. منى 30 December 2010

    صباحو ميسونو :)
    و لا يهمك المهم تطلي دوما على الموقع و ان شاء الله بيكون دوما في جديد :zzz

  12. منى 30 December 2010

    هلا حياة :)
    ما دام هادا حلمك معناها رح يتحقق , بس نصيحة مهمة الصبر اول الشي و الثقة بالنفس تاني شي ;)

    ان شاء الله تقومي بالسلامة حبيبتي

    ما وصلني شي على اتصل بنا , شوعم يصير مشاكل على هل اتصل بنا , اذا ما فيها سقالة ممكن تعيدي ارسالها :)

    رح استنى رايك بالسلطة

  13. farah 1 January 2011

    السلام عليكم وانشاء الله العام الجديد يكون عام سعيد على الكل يا عزيزتي منى انا متلك بفتح عيوني بفتح الراديو اول شي على صوت فيروز وتاني شي طول ما انا بالمطبخ الراديو شغال ويوميا بسمع اخبار جديدةعلى الساعة 11 و11دقيقة على الشام fm
    بصراحة بحس اني متابعة الدنيا وانا بالمطبخ
    أما بالنسبة للسنة الجديدة واحلامنا واهدافنا فبحمد الله انا ماشية بخطى صغيرة باتجاه حلمي بدراسة اولادي وسفري القريب وفرحتي اني مهما بعدت او سافرت رح ابقى على تواصل معكم عبر هالموقع الرائع
    وبخصوص طيقك اللذيذ يا عزيزتي منى انت فنانة شو ما عملتي بترسمي أحلى لوحة وانا من عشاق الفطر الفريش لذلك وصفتك رح تكون من اوائل وصفاتي اللي رح ساويها لزوجي بعد حوالي اسبوعين لما سافر لعنده :zzz مشكورة يا عسل

  14. منى 2 January 2011

    هلا غفران :)
    لا و الله السنة هي ما عندي , بس السنة الجاية :cry

    اذا ما بتحبي الجرجير فيكي تجربيها بالخس او بالبيبي سبانخ ;)

    رح استنى رايك حبيبتي و تسال عليك العافية و الخير دوما

  15. منى 3 January 2011

    هلا جمان :)
    تسال عنك العافية و الخير دوما و تبقى دوما و النعم غامرتك بكل شي :)

    يا ستي ما بقى في غيبة ابدا ان شاء الله , اما عن الكتاب فنا عم اشتغل عليه و أخد مني كل وقتي بس بقي منه قليل و بيجهز باذن الله لان المرحلة الاولى منه قربت تنتهي و هلا عم اختبر الوصفات مرة تانيةو تالتة انا و خواتي و رفقاتي لحتى اتاكد من نجاحها باذن الله ;)

  16. منى 3 January 2011

    هلا ريم :)
    تشتاق الك العافية حبيبتي , رح استنى رايك يا ترى شو ؟

  17. منى 3 January 2011

    هلا كرميلا :)
    و انت سالمة و بخير , صدقيني اذا كان تصميمك قوي فرح تحققي حلمك , المهم ان ما تنسيه لان المشكلة ان كل الناس عندها احلام بس قليل عندها تصميم يناسب الحلم :roll , رب العالمين دوما مع العبد اذا صدق نيته

    تكرم عينك شو سلطة و ما سلطة , لاحقتكم بمنسف يليق باحلى خوات :grin

    انا اكتر الشي بفوت على مواقع طبخ , بس بصراحة ابدا مو مواقع عربية لان قليل لاقي شي يعبي المزاج , في foodnetwork , في كمان
    allrecipes.com
    .finecooking.com

    هادا اكتر الشي , اما المواقع العربية فبدخل كل فترة على لك و عالم حواء ;)

    اما اذا بتحبي مواقع ادبيه فموقع مميز كتير هو الساخر , بغرق فيه بالساعات

    بس , يا ريت كون فدتك ;)

  18. منى 3 January 2011

    هلا فرح :)
    ان شاء الله بتتحقق كل احلامك عن قريب و تتوفقوا بهل السفرة و تشوفي اولادك باحسن و اعلى المراتب في الدنيا و الاخرة

    يا ستي انا بحب ارابيسك الصبح , حكي شو , برنامجعم لذيذ و الحلو فيه انه من اكتر من مذيع و مذيعة و دوما في اشيا جديد و مواضيع بيناقشوها ما بين التقيل و الخفيف ;)

    خبرينا عنك فرح , رح استنى اخبارك الطيبة ان شاء الله

  19. emerald 4 January 2011

    السلام عليكم أنا عضوة جديدة كتير حبيت موقعكن وبشكرك كتير يا ست منى لأني الموقع فيو كل شي بتحتاجه الوحدة مننا وخصوصا اذا كان زوجها بيحب الطبخ حبيت اسلم عليكن وارجو ان تقبلوني باسرتكم الكبيرة :)

  20. منى 5 January 2011

    مية اهلا و سهلا فيك اختي , نورتي بيتك :)
    ان شاء الله تجربي شي و يكون على زووء العيلة و ان شاء الله تبقي معنا على طول :zzz

  21. gsm 6 January 2011

    السلام عليكم منونة اليوم واخيرا جربت هل السلطة الخطيرة وطلعت كالعادة يمي :p بس انا عملت متل ما قلتي بدلت الجرجير بالخس على إجعتبار إني بموت بشي إسمه خس ذاتي هون عنا ما بتلاقي لا جرجير ولا سلق وحتى البقدونس بس بالمحلات العربية بقى هيك زبطت معي كتيير يسلمو إيديك مرة تاني وبوسيلي قطاطك

  22. emerald 9 January 2011

    مرحبا: شكرا الك يا مدام منى وان شاء الله رح ابقى معكن على طول بصراحة انا كنت دائما ببحث عن مواقع طبخ بس هلأ والحمد لله ما عاد في لزوم لاني هالموقع الرائع أغناني والحمد لله جربت طبخات منه وطلعت كتير طيبة ( قدرة قادر-قوارب الباذنجان-لحمة بكرز-معكرونة بالبشميل)اسفة على الاطالة بس عندي فكرتين:1-شو رأيك نسأل سؤال وهو ما هي أول طبخة طبختيها وكيف طلعت معك؟ وكل عضوة بتدخل وبتحكيلنا تجربتها حتى نستفيد 2-عندي طبخةمعكرونة بجبنة سهلة كتير حابة أشارك فيها اذا ممكن …….. اسفة على الاطالة صارت جريدة :grin يسلمو كتير الك يا أحلى منى وأنا اسمي مرام

  23. lalosh 13 October 2011

    مدام منى عندي سؤال .. هلا الأوريغانو مو نفسه للزعتر؟؟

  24. منى 14 October 2011

    لا مو نفسه , بس فيكي تستعملي واحد عواض واحد اذا ما كان واحد منهم متوفر ;)

تقييم الوصفة
عاديةقد أحضرهاجيدةممتازةأكثر من رائعة (1 votes, average: 5.00 out of 5)