سلطة المرتديلا الحلبية


         وصفة : منى                 2011/04/09                 15 تعليقات
سلطة المرتديلا الحلبية

الاسبوع الي مر كان من اكتر الاسابيع الحافلة الي مرت علي بحياتي , تقريبا كل يوم كان في شي ” ضخم ” و مهم و مؤثر كتير . بحس احيانا انو في احدث لو اتوزعت على اشهر بحياتنا لملاها اثارة أو حزن أو سعادة أو ألم .

حضرت مرتديلا حلبية , كل ما بحضرها بتذكر نانا الله يخليلي ياها . و كمان كنت كل ما اكل من المرتديلا ” الحمرا ” بتذكرها . لما كان عمري شي 10 سنين , كنت واقفة جنب نانا بمطبخها عم راقبها و هي عم تحضر المرتديلا و عم نكش بالاسئلة و هي بكل قلب كبير عم تجاوبني و تفهمني و تصبر علي . بهديك الايام كنت موت على المرتديلا المعلبة , بعد ما سالت نانا عن كل التفاصيل , ليش عم تحطي بيض , ليش الكعك , ليش عم تدعكيها كتير , ليش الخل . بالاخير قلتلها اي احسن من هل العذاب جيبي مرتديلا المعلبة , يم يم . طلعت علي بنظرة عتب , و قالتلي له يا منى , بعرفك بتعرفي طعمة تمك . هديك بس لونها بيخليني ما ااقدر حطها بتمي , قلتلها بالعكس لونها الاحمر بيشهي . قالتلي كل هل اللون ليخبوا شي ما بيشهي فيها . الله اعلم شو فيها !!

هلا صرت من رايها , و اخر مرة اكلت فيها مرتديلا ” حمراء ” , قرقش شي تحت سناني و كانت القشة التي قصمت ظهر البعير . من وقتها صار اذا اجى على بالي مرتديلا , اما بحضرها على ايدي او بجيب من الانواع المدخنة الي محضرة من ” لحمة حقيقية ” مو ايا كلام .

برجع لسلطتي , الفكرة شفتها السنة الماضية في مطعم بوابة الشهباء , بصورة عامة الاكل كان مو طيب و تجربة ما بتنعاد , بس في كم فكرة عجبتني و ساويتها على زوءي و صاروا من الوصفات المفضلة و هي واحدة من بيناتهم , بس اكيد هنن كانوا محضرينها بالمرتديلا ” اياها ” , انا استعملت لتحضيرها المرتديلا الحلبية و طلعت بتجنن , ما في اطيب منها . و كل ما بحضرها بتخلص بلمح البصر لو شو ما كانت الكمية كبيرة . قطع الليمون فيها عطتها طعمة بتاخد العقل و هي فكرة اتعلمتها من خالة حسنا , دوما بسلطاتها في ليمون مفروم , كمية قليلة بس بتخلي السلطة يم يم .

بالصحة و الهنا

-المقادير:
1 دقماق مرتديلا , حوالي ربع كيلو , مقطعة شرائح و مفرومة
خسة صغيرة , مفرومة ناعم
2 حبة متوسطة بندورة , مفرومة
2 حبة وسط مخلل خيار , مفروم
نصف ليمونة , مقشرة و مفرومة قطع صغيرة و رقيقة
زيت زيتون و عصير ليمون حسب الرغبة
ملح
- طريقة التحضير :

تقلب كل المقادير و تتبل بالليمون و الزيت و الملح حسب الرغبة و تقدم مع الخبز العربي .

التعليقات

  1. bobo84 9 April 2011

    ما شاء الله عليك ست منى يعني ما ني عرفانة أنو أحلى :? وصفاتك ولا كتاباتك ولا التجديد اللي عم تدلينا عليه انا من عشاق المرتديلا بس بصراحة الجاهزة بس اللي بيجرب وصفاتك أكيد ما رح يندم بتعرفي ست منى حتى اللحمة الفريش هون بالسعودية ما إلها طعم بالمقارنة باللحمة اللي بسوريا يعني لما كنا نحمس اللحمة لشي أكلة متل الكبة أو السمبوسك كان نص اللحمة يطيرمن عالنار أما هون فما إلها هالزكاوة والطعمة متل اللحمة البلدي ما بعرف ليش بس عكل الأحوال بأقرب فرصة ان شاء الله رح جب أعمل المرتديللا وشكرا كتير ألك :grin

  2. محبةالمصطفى ملك 10 April 2011

    يسلم هالديات يا منى…
    منى بدي أسألك انا مرة أرسلتلك وصفة كاتو باتصل بنا و قولتيلي انها ما وصلت..
    طيب هالمرة بدي أرسلك وصفة ألكة تانية غير الكاتو شلون؟؟؟؟؟؟؟؟؟ :?

  3. ام دانية 10 April 2011

    :zzz السلام عليكم ست منى كيفك شو اخبارك ان شاءالله تمام هي رجعة بعد غيبة :cry بس كان عندي ظروف
    ماشاءالله على هل السلطة اول ما شفتا قررت اعملها بس لازم اعمل المرتديلا بالاول تسلم دياتك

  4. آرام 12 April 2011

    أحياناً الأفكار البسيطة بتعطي نتائج عبقرية :)
    سلطة من أبسط ما يكون، وأي سندويشة مرتديلا فيها نفس المكونات (عدا زيت الزيتون، ما جربته مع المرتديلا من قبل)، بس التوليفة طلعت سلطة فخمة غير شكل، مو ناقصها غير مرتديلا حلبية بيتوتية، وللأسف ما توفرت عندي فاستخدمت مرتديلا حبش مدخن من السوق.
    يسلمو إيديك أخت منى ولا يحرمنا منك يا رب
    8)

  5. om nabeel 12 April 2011

    تسلم ايديكي منونة عالسلطة اللي بتشهي
    كتير بحبها المرتيدلا البيتوتية بتذكرني
    بنانتي الله يرحمها وخالي وامي الحبيبة
    اللي هي عندي بزيارة عالسعودية ومو مصدقة امتى ترجع عبيتها الله يخليها ويحميها
    رح اعملها قريبا واقلك النتائج ان شاء الله

  6. منى 13 April 2011

    هلا bobo :)
    من زوءك حبيبتي , مبسوطة ان طريقة تقديم الوصفة عم تعجبك . اذا بتحبي المرتديلا المعلبة , جربيها فيها :roll

    و الله هل الكلام كل المغتربين عم يقولوه , و هادا اله علاقة بالمرعى و نوع الخواريف , الله يديم خيرات بلادنا و يحميها من كل شر , امين :)

    ان شاء الله تجربيها و تحبيها و مية اهلا و سهلا فيك

  7. منى 13 April 2011

    هلا ملك :)
    الله يسلمك و يخليك يا رب

    ملك ابعتيه هون برد او على الفيس بوك , الطريقة الي بتلاقيها مناسبة الك

  8. amoula 16 April 2011

    يااا شكلها كتير طيبة انا بمووووووت على المرتديلا الحلبية اللي شغل البيت طبعاً باذن الله رح اجربها بس قبل رح اشوف اذا فيني ساوي المرتديلا على ايدي :roll

  9. ورد 18 April 2011

    شي بيشهي والله وخاصه المرتديلا يلي عاملتيا الي طلب عندك او فيكي تقولي رجاء انا ناطف قلبي على حبة فلافل من سوريا وبدي الوصفة تبعيتو بس ياريت لو تكون الطريقه لفلافل اللي لونو اصفر يلي منشتري من ابو الفلافل لاني عمشوف وصفات فلافل كلا مو متل فلافل سوريا لهيك بترجاكي اذا بتقدري تحطي الوصفه مع العلم اني حامل وعمبتوحم عليه وشكرا كتير الك ……………….. :cry

  10. نسرين@ 3 August 2013

    عجبتني كتير هل سلطة تسلم الأيادي أخت منى رح جربها بأقرب وقت

    • منى 3 August 2013

      عوافي و الف هنا نسرين مقدماً , رح استنى رايك

  11. ديما 25 March 2014

    يالله شو نفسي دوق المرتديلا الحلبية :) شكرًا كتير عالوصفة

    • منى 25 March 2014

      ياا يا رت فيني ابعتلك دليفري ع الايميل .
      شكرا الك ديما كتير :)

  12. ديما 25 March 2014

    والله هي الميزة لازم بخترعوها بصراحة واوعديني اول ما تنزل عالأسواق تضيفي هالميزة على الموقع :)

تقييم الوصفة
عاديةقد أحضرهاجيدةممتازةأكثر من رائعة (2 votes, average: 5.00 out of 5)