سندويش الدجاج المفروم


         وصفة : منى                 2011/02/26                 14 تعليقات
سندويش الدجاج المفروم

اليوم وصفة سهلة كتير و يممي . حضرتها على العشا من كم يوم و الاولاد حبوها كتير حتى خلصت من قبل ما يدوقها ابو الشباب , راااحت عليه


فكرة السندويشة قريبة على الشيش طااوق بس باستعمال الدجاج المفروم , لهيك رح ناخد كل النكهة الطيبة بوقت قليل و طريقة بسيطة . بصورة عامة تتبيل الدجاج بالمايونيز عم يعطيه طعم مميز و اذا حابة تخففي من السعرات الحرارية ففيكي تستعملي اللبن عواضه . و التبلة حلاوتها بقلة مقاديرها و بساطتها , و زيادة البهارات رح تغير الطعم .


الصورة كانت لاول مرة حضرت فيها السندويش و بالمرات التانية خلطت مع الدجاج بعد ما جهز مايونيز للي بيحب المايونيز بعيلتي و جبنة موتزاريلا للباقي و طلعوا بيجننوا , مو معقول شو طيب و سريع .


هلا وصلنا لمثل اليوم و هل المثل من الامثال المفضلة عندي , لما قراته بموسوعة خير الدين الاسدي لاول مرة بقيت يوميين عم أضحك و صراحة استغربت وجوده بين الامثال الحلبية لان كل الامثال القديمة بتشجع للعيلة الكبيرة الا هادا , ايه شو بيقول المثل :


أول ولد : مبارك ما اجانا
تاني ولد : حاج و كفانا
تالت ولد : شمتوا فينا عدانا
رابع ولد : دخل الجار و عزانا
خامس ولد : راح الحجي و خلانا


بقى مشان الله ديروا بالكم على الحجي و دللوه ياموه , الله يرضالي عليكن


بالصحة و الهنا





نصف كيلو دجاج , مفروم
فص كبير ثوم , مهروس
نصف ملعقة صغيرة زعتر أخضر ناشف , او ملعقة كبيرة طازج
نصف ملعقة صغيرة ملح
فلفل أبيض
2 ملعقة كبيرة مايونيز

للتقديم :

4 صمون
شرائح ملفوف او خس أو جرجير
شرائح بندورة
شرائح مخلل





• يخلط الدجاج مع المايونيز و الثوم و الملح و الفلفل الابيض و الزعتر الاخضر و يترك جانباً لمدة ربع ساعة .

• توضع خلطة الدجاج في قدر كبير غير لاصق و تقلب على نار قوية حتى تنضج , في حال استعمال اللبن تضاف ملعقتان من الزيت على القدر قبل تحميته .

• توزع خلطة الدجاج في السندويشات و يمكن خلطها مع المزيد من المايونيز او الجبنة المبشورة .

• تحمص السندويشات لبضع دقائق في محمصة السندويش ثم تفتح و يضاف الخس او الملفوف او الجرجير مع البندورة و المخلل و تقدم فوراً .




التعليقات

  1. رغد غسان علاء الدين 27 February 2011

    يسعد أوقاتك يا حلو..

    يا ستي العزيزة..أنا كتير بحب صندويش الدجاج وبعتبرو هو المخلص من الأزمات وقت بيشتد الجوع وبيضيق الوقت..بس احزري انا شو بيصير فيني..كل اللي عملتيه بعملو بس شو.؟ مثلا أبو الشباب جاب فروج مشوي..وزاد كتير.زكللو بنتفو وبحط البهارات وهالقصص..وبعدها عالمحمصة وبعدها البندورة والمايونيز والملفوف والمخلل..وبعدها يممممممم غير شكل..والحلو فيها غنو مشبعة..يعني تاني يوم بعمللهن غدا نظامي..يسلم إيديكي يا عسل..

  2. منى 27 February 2011

    و اوقاتك رغودة :)
    انا بالعكس بعتبره وجبة بدها شغل لان غالبا بحضره همبرغر و هادا بياكل معي وقت :roll

    انا عندي ما بيحبوا الفروج لما بيزيد و بتلاقي لو شو ما عملت فيه و لبسته اقنعة و حمرته و بودرته بياكلوه بالزور بس لحفظ النعمة , يا ستي عندي 5 افراد لجنة حكم على الطبخ كل يوم :x

  3. غيث 27 February 2011

    سلامة ميمو الله يسلم ايديك يا ستي كلنا بنعمل هلاكلة او قريب منها وقت الازمات ووقت ما بنكون مشتهين على شي بيخطر لنا هيك انواع من السندويتش كمان لما بعملها الاولاد مع ابوهم بينبسطو عليها يسلم ايديك عجبني المثل كتير منيح انا لسع عبشمت الاعداء ما وصلت لتعزية الجار عافانا الله واياكم من الحزن يا رب هههه الحمدلله على هالنعمة والله يخليلنا ياهم يارب ومين ما بدو يشمت هو الخسران

  4. roroo51 27 February 2011

    تسلم ايدك على هالوصفة .. باين بتجنن

    بس أنا أكتر الشي عجبني المثل :grin :grin :grin

  5. رغد غسان علاء الدين 28 February 2011

    ههههههههه الله يعينك معناها..أنا حاليا لسه ولادي بيمشو بسياسة القمع وكمان لازم يعبرو عن إعجابهنشاؤو أم أبو :grin

  6. أم المنذر 28 February 2011

    ياستي الله يسلم دياتك على هالاكلة الخفيفة اللذيذة وأنا كمان بعملا بغير هالترتيبة بس النتيجة نفسا وانا من مناصري الدجاج بحسو لحم خفيف عالمعدة والاولاد بيحبوا كمان وخاصةلما منكون بطريقنا لسورياسندويشات لذيذة وبتشبع واحسن من اكل المطاعم ومنشان المثل لا تردي عليه ما في احلى من الاولاد الله لا يشمت حدا فينا ههههه :grin

  7. أم نوران 28 February 2011

    مم انا كتييييييييييييير بحب الجاج بكل انواعو و جميع طرق طبخو اما الصندويشات غيييير قصة يا خيتو .. الله يسلم هالديات و يجزيكي عنا خير الجزاء
    ههههههه اما مشان المتل عن حد حلو ناسبني كتيير عندي وحدة الله يخليلي ياها وكل ما يقلي جزوي بدي ولاد كمان بقلو يا دوب عمري عشرين وعندي وحدة اللي قدي لساتن بيلعبو بالحبلة ههههه و بيسكت خخخ
    ان شاء الله عن قريب راح ابعتلك و صفة الدجاج بتتبيلتي الخاصة نص مغربي ونص سوري و ان شاء الله بتعجبك …
    ديري بالك على حالك و على الكتاكيت

  8. رنا 2 March 2011

    الصندويش كتير فكرته مميزة بس قولتك بتتغير الطعمة لو سلقناه ونتفناه …يعني متل صندويش الدجاج بالمايونيز ؟؟؟سؤال تاني بمناسبة الحكي عن الهمبرغر يعني يسلم ايديكي على وصفته من اولى الوصفات الي جربتها ولهلأ بعملها بس سؤالي هو التالي …لحم الدجاج بالهمبرغر ماعم يطلع طري ؟؟في ناس نصحوني احط قلب الصمن بدل الكعك ؟؟انتي كيف بيطلع معك

  9. snow whit 6 March 2011

    دخلت الموقع وانا لسه مااتغديت
    وجوعاااانه كثير
    اشتهيت السندويش :)

  10. violet 13 March 2011

    شكلا كتير طيبة وسهلة وبسيطة
    هلأ أنا طالبة عندي دوام ودراسة لهيك عبدور على طبخات بسيطة وطيبة واذا طولت يومين 3 بكون أحسن
    بتقدري تذكريني بهيك طبخات غير الشوكي والمكسيكانو والفلادلفيا والمجدرة ومسقعة الكوسا والقرع .. رح كون ممنونة كتير
    شو رأيكم تعملو قسم للأكلات السريعة اللي تحضيرا مابطول ساعة :roll ………

  11. مسك الايمان1 8 July 2011

    شكلها طيبة وسريعة راح اجربها البوم انشاء الله

  12. منى 17 July 2011

    هلا سنو وايت :)
    يلا مدي ايديك و اتفضلي :grin

  13. منى 17 July 2011

    هلا مسك :)
    ان شاء الله تجربيها و تحبيها , و بانتظار رايك ;)

  14. Lost spoon 9 February 2012

    منى ، عملت من شوي كريمة الثوم……يعني شو بدي قللك؟ اكلتا بالخبز و ما استنيت الدجاج….هلق صار فيني نافس محلات البروستد مع انو بنتي قالتلي: أنا بحبك بس بدون بوسات اليوم لحتى تروح ريحة الثوم ؛) يسلم ايديكي يا رب. 

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)