عجينة التارت باللوز على طريقة بيير هيرميه


         وصفة : منى                 2018/11/02                 18 تعليقات
عجينة التارت باللوز على طريقة بيير هيرميه
Pâte sucrée façon Pierre Hermé

Pâte sucrée façon Pierre Hermé

عجينة التارت باللوز على طريقة بيير هيرميه

في سنة 2016 كان في فكرة ان نهاجر من البلد وبالفعل بدينا نرتب امورنا ونظمها على هل الاساس .. كان في عندي خزانة كبيرة بطول حيط وبعرض متر ونص ..كانت خزانتي الي برتب فيها الاشياء الخاصة بالتصوير من خلفيات وقماشات واشياء تانية كنت جامعتها على مدة اكتر من 6 سنين .. هل الخزانة كلها فضيت لما بديت اجهز للهجرة .

الي صار بعدها ان الهجرة ما زبطت لاكتر من سبب ونحن بقينا هون وخزانتي صارت فاضية

هلق لما رجعت اصور للموقع اكتشفت حرفيا اني نسيانة كتير كتير ..ولما ارجع طلع بصوري القديمة عبقول لحالي والله كنت فنانة :D .. ييي هي القطعة الي ورا فرقتها وهي عطيتها لرفيقتي وهي مابعرف وين صارت ..وشو هي ..انا كان عندي هيك شي !! .. يعني هلق بديانة من الصفر ( او تقريبا من الصفر ).

مشان هيك رح تكون الصور حاليا بسيطة حتى ترجع تكبر خزانتي ان شالله .

متل ما شايفين في الصورة البسيطة واحدة من ابسط الوصفات الي ممكن نتعلمها : عجينة التارت .. بس متل كل الوصفات السهلة ..الوصفة البسيطة في الها كتير اسرار حتى تكون ناجحة .يعني الواحد بحاجة يكون عنده وصفة اساس يعتمدها ومن بعدها يمشي وينوع في النكهات ، اذا كان بدك هيك وصفة فهي الوصفة الي كنتي عبتدوري عليها ز. انا معتمدتها في شغلي ومنها بحضر تارت الحروف والارقام ( الاكثر طلبا عند منى )

اليوم رح قدملكم وصفة لشيف من اشهر الشيفات الفرنسيين والي بمجرد ما ينذكر اسمه رح نتذكر الابداع والتجديد واللمسة الراقية ..شيف بير هيرميه Pierre Hermé .. منهم بيسموه مهندس الحلويات .. كتير قدم في مجال الماكرون لان هو واحد من افضل مين خلق وابتكر نكهات جديدة اله . عنده كتير كتب خاصة بالحلويات الشوكولا والتارت والماكرون .. انا جربت اله عجينة تارت اللوز ..وكانت ولا اروع ولا اطيب ولا اسهل ولا احسن . مع تعديلين تلاتة صارت حفر وتنزيل الي .

أسرار الوصفة :
اول الشي استخدام الميزان لقياس المقادير .. انا رح اعطيكم المقادير بالكوب وبالغرامات ، بتمنى اذا حابين تجربوا الوصفة الدقيقة تقيسوا المقادير بالميزان . ارجوكم جيبوا ميزان للحلويات .. هاد اهم قطعة في مطبخ الحلويات بعد الفرن والخفاقة.

تاني شي بعد اضافة السوائل ( الي هو البيض هون ) للازم العجن يكون بلطف وبس حتى تلم العجينة ، بمجرد ما تلم منكتفي . زيادة العجن رح تخلي التارت يصير قاسي ومو هش بعد الخبز.

تالت الشي التبريد التبريد ومن ثم التبريد . يعني منعجن وبعدها منبرد العجينة ومنريحها ، هل الشي رح يخلي العجين يساعدني في المد وما يشقشق اثناء الشغل ، وقبل الخبز كمان التبريد مهم جدا حتى تبقى العجينة محافظة على شكلها وما تنتفخ من هون او هون واخر الشي التبريد مهم بعد الخبز حتى ما تفتت العجينة لما نقلبها من القالب .
.

رابع شي لما نشكل العجينة يفضل استخدام ورق زبدة للرق عواض عن رش الطحين ، لان اذ رشينا طحين وبعدها رجعنا لمينا باقي العجين وعدنا تشكيله رح تتغير مقادير العجينة نفسها وتصير قاسية

هي الاسرار مهمة لاي عجينة تارت بغض النظر عن المقادير الي رح تستعملوها .. وهيك صارت الوصفة واسرارها بين ايديكم .. بشوفكم عل خير اسبوعالقادم ان شالله

لا تحرموني من تواجدكم وردودكم وتفاعلكم وبالصحة والهنا .

المقادير :

وصفة بير هيرميه بتصرف
كمية تكفي لتارتين بقياس 24 سم

ثلاث ارباع باكيت زبدة حيواني ( 50 1غ ) في درجة حرارة الغرفة
كوب وثلثي الكوب طحين حلويات ناقص ملعقة صغيرة ( 250 غ )
2 معلقة كبيرة مليئة لوز بودرة ( 30 غ )
ثلثي كوب سكر بودرة ( 90 غ )
رشة ملح
بيضة صغيرة
الطريقة:

1- يثبت مضرب العجين في الخفاقة الكهربائية ، توضع الزبدة والطحين والملح في وعاء الخفاقة ويضرب الكل على سرعة متوسطة حتى تتشرب حبات الطحين الزبدة ويصبح المزيج متفتتا كالرمل .
2- يضاف السكر واللوز والملح والفانيليا ويقلب الكل بنفس المضرب .
3- تضاف البيضة ويقلب الكل على سرعة متوسطة لخفيفة حتى تلم العجينة وتصبح كرة، لا يعجن المزيج بشكل زائد .
4 – توضع العجينة في كيس محكم الاغلاق ثم تحفظ في قسم التجليد في الثلاجة طول الليل , وانا افضل تريحها لمدة 24 ساعة كاملة .
5- تخرج العجينة من الفريزر وتترك حتى يمكن التحكم بها .
6 - ترق بين ورقتين زبدة حتى سماكة 2 ملم . يغلف بها قاعدة وحواف قالب التارت .
7- تبرد مرة اخرى لمدة ساعة او حتى تبرد تماما.
8 – يحمى الفرن على درجة حرارة 170 لمدة 10 دقائق . يثبت المشبك على الرف الوسط . يخرج التارت من الفريزر على الفرن مباشرة . يخبز لمدة 15 – 20 دقيقة او حتى يصبح ذهبيا.
9 – يترك التارت حتى يبرد ثم يوضع في الفريز حتى يبرد تماما قبل قلبه من القوالب كي يبقى متماسكا .
10 – يحشى حسب الرغبة .

التعليقات

  1. noor 2 November 2018

    ما شاء الله منى تسلم ايديكي وشكراا عالوصفة

    • منى 2 November 2018

      الله يسلمك يا نور شكرا الك ان شالله تجربيها وتحبيها :)

  2. توتة 2 November 2018

    هاي أول مرة بعلق فيها على موقع، بس حبيت أشكرك على أمانتك بعرض الوصفة. أنا متابعتك من زمان وبحب شغلك كتير. وبدي قلك انك محظوظة انك ما هاجرتي لأن البلد بدا من أمثالك مبدعين ومتألقين …إن شاء الله بترجع سورية أحلى من قبل وكل اللي هاجروا حيتمنوا يرجعوا

    • منى 2 November 2018

      شرفتي توتة وهاد حسن حظي انك علقتي هون :)
      كله تيسير من الله ، الحمد لله على ل شي

      يا رب اميين ترجع سوريا منيحة وبخير وهاد رح يصير ان شالله ..بس ان شالله ما يطول
      شكرا مرة تانية

  3. لامي 2 November 2018

    مرحبا ست منى، اشتقنالك و اشتقنا لجديدك..ان شاء الله بجربها و بكتبلك شو طلع معي
    و عن تجربة و لا مرة جربت وصفة و ما زبطت معي بشكرك من كل قلبي ع امانتك و عدم بخلك علينا في الاستفسارات

    • منى 2 November 2018

      اهليين يالامي :)
      ان شالله تجربيها وتحبيها وكمان ان شالله يبقى وجي ابيض دايما معك

      انا الي بشكرك على ردك وتشجيعك ..شكرا

  4. Rim grewati 2 November 2018

    جاري التجريب مع كل الحب

    • منى 2 November 2018

      ريمو الغالية :)
      بانتظار رايك بعد التجربة

  5. ام عبدو 2 November 2018

    جزاك الله خير وبلغك مرادك قريباً عاجلاً إن شاء الله

    • منى 3 November 2018

      اللهم ااامين وانت كمان ..هي دعوة غالية الله يكرمك :)

  6. Haifa alwan 2 November 2018

    واخيرااااً رجعتي لهون….. الله يعطيكِ الف عافية مابتعرفي اديه بستنى اي كلمة منك بتدل على اي سر للوصفة

    • منى 3 November 2018

      الله يعافيك هيفا ياعسل .. ان شالله تكون الاسرار مفيدة وتابدعي اكتر واكتر :)

  7. Nada 3 November 2018

    يسلموا ايديكي
    عندي كم سؤال لو سمحتي
    هلأ اللوز ممكن نطحنو بالبيت؟لان ما عم لاقيه مطحون
    تاني سؤال
    عندي ما منحب الزبدة الحيوانية ممكن اعملو بالنباتية؟ بتزكر شفت حورية المطبخ نصحت باستخدام النباتية بالتارت
    و تالت سؤال
    كمية هالسكر رح تخليه حلو يمكن ما ؟

    • منى 3 November 2018

      اهليين يا ندى :)
      بهي الوصفة ممكن نطحنه في البيت ، بعد اتقشير بتخليه مفتوح لتاني يوم وبعدها بتطحنيه في محضرة الطعام مع السكر( الي ظاخل في الوصفة ) على كذا ضربة حتى ينعم
      ممكن تستعملي النباتي بنفس الكمية ، انا بفضا الحيواني بس اذا ما بتحبيها اعملي الي بيريحك.
      التارت ما حلو بالعكس نكهته معتدلة ، اذا بتخبي خففي السكر ل75 غ ( الكمية الاصلية في الوصفة)

      ان شالله تجربيه ويعجبك وشكرا للاهتمام

  8. abdullatif 10 November 2018

    تسلم ايديكي ست منى ، رايح فورا جربها -_-
    بصراحة زمان كان وصفاتك فريندلي اكتر من هلئ،
    من فضلك بدنا كم وصفة من نوع اللي بتنطبخ بطنجره وحده وسهلة التحضير :)

    • منى 10 November 2018

      اهليين يا عبد اللطيف :)
      ان شالله تجربها وتكون على ذوقك وتصير فريندتك دايما
      بصراحة اظن ملاحظتك في محلها وخصوصي فيما يتعلق بالحلويات .. يعني كنت هاوية تحضير حلويات صرت pro
      فاكيد رح يتغير شي .. بس ان شالله يكون تغير فيو ايجابية
      تكرم بالنسبة للوصفات السهلة
      شكرا لمرورك :)

      • abdullatif 13 November 2018

        الله يكرمك ويحفظك،

        وان شاء الله بتنتقلي من هالمستوى للاعلى كمان وكمان. :)

        • منى 19 November 2018

          اللهم اامين ، وان شالله انت كمان

تقييم الوصفة
عاديةقد أحضرهاجيدةممتازةأكثر من رائعة (3 votes, average: 5.00 out of 5)