عزيمة خالو تقي 2009


         وصفة : منى                 2009/05/19                 65 تعليقات
عزيمة خالو تقي  2009

قالت لي واحدة من أعز رفقاتي في يوم من الأيام , لو حابة حط عنوان لحياتي فبيكون صدفة , و أنا رح أعمل متلها و لو حابة حط عنوان لحياتي فبيكون ….

طيب خليها سر و خليني طبق الفكرة ع نطاق أضيق , و لو حابة حط عنوان لعزيمتي فرح يكون طيران !

ليه طيران ؟

لأن في كتير أشيا طارت وقت تحضير العزيمة و قبل العزيمة و نحنا بالعزيمة , اشا مو المفروض تطير , بس بيومتها طلعلها جوانح و مو بس طارت , طارت و علت كمان
متل السنة الماضية و كل سنة قبلها , خال أبو الشباب , خالو تقي , المغترب بفرنسا من 55 سنة , بيجي زيارة ع سوريا بالربيع و بتكون زيارته اسبوعين , و بهل الاسبوعين بيزور كل العيلة , و نحنا بالمقدمة .

هلأ رح ابدأ بالأخبار المنيحة , العزيمة كانت بتجنن , و الوصفات كلها طلعت ناجحة الحمد لله و هل المرة ما نسيت شي متل عادتي .

الوصفات من فوق و نحنا نازلين


يالنجي

سلطة الجبنة و الزعتر الأخضر

أوزي

شاورما دجاج

و معها بطاطا مقلية قليلة السعرات الحرارية

جنب الأوزي فريكة , محضرتها بالدجاج , الصورة راجة شوي





تحتها شوكي غراتانن



سلطة الدجاج بالكاري

الفول المدمس على الطريقة الحلبية و هي على طلب أبو الشباب

كبة مبرومة

سلطة الجرجير الملونة



لقمة تشكن


فخدات الدجاج



كبة صينية بس نيو لوك


سلطة الزيتون

محمرة , طلعت حدة لأن دبس فليلفلتي لهل السنة ناار




بازلاء

و سلطة الجرجير بالفطر , حضرته بالفطر المعلب لان ما لقيت تازة




كلو الحمد لله كان ناجح , بس أكتر الشي حبوه هو اليالنجي , عم يدوب بالتم دوباان , و الشوكي لان تغير شكل و ملون و طعمته يمم , و سلطة الدجاج بالكاري عملت ضجة و كانت أول طبق خلص , و أكيد لقمة تشكن طار عقلهن فيها و طارت كل الصينية , فخدات الدجاج , يا دوب أنقذتلي كم واحدة من ديات الكتاكيت لحتى خلي الكبار يدوقوها , و أخر شي الكبة المبرومة لان الظاهر ان خالو تقي أول مرة بيدوقها . !

أما الحلويات :

ترايفل بشوكولا مارس , الصورة مو واضحة بس هي الصورة الوحيدة للترايفل



كيك الكراميل



تارت الفريز



أطيب كاتو شوكولا



كمان الحلويات كانت طيبة كتير كتير بس كان الي غصة واحدة : ما كان عندي وقت و لا كنت مرتاحة وقت تزيين كيك الكراميل لهيك صار شكله شوي مخربط بس طعمته بتجنن

الي حضر السلطات , طبعا تحت اشرافي , و للمفاجأة هي بنوتي جودي زينة الصبايا , اتفاجأت من همتها خليلي عينها و لقيتها يوم الجمعة فايقة بكير و يا ماما شو ساعدك ؟

هلأ الأخبار الي مو منيحة أو بالأحرى بعد ما خلصت العزيمة فيني قول الأخبار الي بتضحك , المنيو اتغير كذا مرة و لقبل بيوم حتى استقريت على كل الوصفات , قبل بيوم من العزيمة الصبح اتصل فيني زوجي و خبرني أن اللحام ما فيه يعطينا قطع لحمة طرية للكويسات بنفس اليوم و كان القصة بدها توصية قبل بيومين على الأقل ..

أنا هون ما بعرف شو صار الي , انعبطت و ما بقى اعرف رتب أموري , وصيت مباشرة على هبرة للتعويض عن الطبق الرئيسي و قلت بحضر كبة مبررومة و كبة بصينية و حضرت معهم أطباق كتير و النتيجة ان كان كمية الأكل كانت زيادة عن عدد المعزومين


كمان أخبار من وراء الكواليس , كنت ناوية حضر كيك على شكل كرة القدم لمروان و فرحه فيها , بس الكيك ما نجح معي مع ان المقادير عاملتها قبل هلأ كتير , عدت المحاولة بمقادير تانية و نفس القصة , و زوجي عم يدخل و يطلع للمطبخ و عم يقول الي الا ما يجيني يوم و اعمل فيه موقع مضاد للقمة طيبة و احكي فيه الحقيقة و الي عم يصير في المطبخ , بعد المحاولة التالتة قلت اكيد في مشكلة في الفرن . الحمد لله على كل شي المحاولة التالتة للكيك صاحبتها اول حالة طيران غريبة من نوعها في مطبخي , بعد ما حطيت البيض في وعاء الفود بروسسر و بعد 5 دقايق طار الوعا بالي فيه و انا فاتحة عيوني و تمي و عم اتفرج متل أفلام كرتون و البيض صار على الحيطان و على خزن المطبخ و على الارض كمان , يلا لميت البيض و بديت الفرك بصابون الغار لحتى نضفوا متل ما بدي ... ما فكرت بالقصة , أصلا ما كان عندي وقت دوبي كنت عم اشتغل و عقلي مشغول بالتخطيط للخطوة التانية .. و الي كانت تحضر الكيك و خبزه عند أية على اعتبار ان بيتها قريب كتير علي .




نقعت البرغل للكبة , رن التلفون و كان على الخط رفيقتي منال ,

- منى بتروحي تتمشي ؟

طبعا ضحكت و شر البلية ما يضحك , قلتلها ما الي فاضية حك شعري شو اتمشى و ما اتمشى ؟

طيب انا حابة احكي معك , عندي شغلة لازم تعرفيها و مو جاي على بالي احكيها بالتلفون , بستقبليني عندك ؟

- ايه تفضلي مية السلامة بس الاستقبال بالمطبخ و بشرط لازم تنتفيلي الجرجير و الزعتر الأخضر .

و بعد ضحكتها الحلوة قالتلي موافقة

شربنا القهوة و انا عم دير البرغل و كنت حطيت اللحمة على النار لأسلقها و هديت النار و كان الأمن لساعتها مستتب , بعد شي ساعة صرت شم ريحة حريق اتفقدت الفرن و شفت ان كل عيون الغاز مطفية , رجعت لشغلي , بعد شي 5 دقايق قالتلي رفيقتي: منى في شي عم يحترق , طلعت على الفرن مرة تانية قلتلها ما في شي , النار كلها مطفية أكيد هدولة جيراننا عم يشوى لحمة أو كبة , طيب !


بعد نص ساعة اكتشفت ان الشوي من عندي و من طنجرة اللحمة تحديداً و اللحمة احترقت حيف عليها و احترق معها دمي


في نفس يوم العزيمة , و قبل ما يجي الضيوف بشوي , طلبت من بشورة أخي يستلم التصوير و بعد كم صورة خبرني ان الذاكرة مليانة , لان كان صار الي اكتر من اسبوع ما فرغتها و كان لازم ضحي بشي و الضحية صور الخطوات المصورة لكتير وصفات على الطاولة , يعني هدولة طاروا بس بايدي و ما كان عندي حل غير اني طيرهم ..


الموعد كان الساعة 3 و الساعة 3 تمام كان كل شي جاهز و على الطاولة , طلعت نظرة أخيرة فشفت ان الفولات زيتهم قليل , و كانت قنينة زيت الزيتون خالصة فطالعت القنينة الكبيرة اللترين و نصف و ما كنت بوقتها فاضية فضيها على قناني أصغر , المهم حطيت شوية زيت على الفول و كانت جودي جنبي , عطيتها القنينة و قلتلها الحقيني لنلحق الصلاة قبل ما يجوا الضيوف . و لسا يا دوب درت ظهري و بعدها اسمعت صووووت طش .....

سادت بعده لحظة صمت و اندرت و اذ بالزيت في كل محل .على الحيطان و على الكراسي و على الشوفاج و على الأرض

الحمد لله اتأخروا الضيوف لعشر دقايق و بهل العشر دقايق تم حشد جميع القوات المسلحة البرية و البحرية و الجوية لمكان الاصابة و لميت الزيت و ليفت كل شي بصابون الغارشي 200 أو 300 مرة و بعدها غسلنا الأرض و راحت كل أثار الزيت

أخر فصل صار وقت خلصنا الأكل و لمينا الطاولة و خالة حسونة جابت البازلا من غرفة السفرة للمطبخ و هونيك حدا من دون ما يحس دقر ملعقة السكب ...

أكيد عرفتوا شو صار , طارت المعلقة مع البازلا على حسونتي أول الشي و بعدها على خزن المطبخ الي صارت على الموضة و منقطة بالأحمر ..

هادا كان كل شي لعزيمة اليوم و ان شاء الله عقبال العزيمة التانية بسلامة و هي سفرتنا من الطرف التاني و بكاميرا خالو تقي


  • وصفات تانية ممكن تعجبك


التعليقات

  1. ميسونو 19 May 2009

    يحرق حريشك يا منى خبطت ع وشي كذا مرة وأنا عم أقرأ شو صار معك.
    بكل الأحوال الله يعطيك العافية.
    وعندي اقتراح صغير:
    مادام خالو تقي يللي ما منعرفو متعود يجي كل سنة ويخليكي تطلعي هالسفر الخطيرة يللي الواحد بيتفرج عليها وبيبلع ريقو طول الوقت .. فيا ريت يصير العنوان مرفق بتاريخ السنة منشان التمييز بين هالعزايم .. وهيك بيكون صار عندنا عزيمة خالو تقي 2008 وعزيمة خالو تقي 2009
    والله يطول عمر هالخالو وكل أحبابك ودايما تتحفينا بهالصور الحلوة.

  2. منى 19 May 2009

    فكرة ممتازة ميسون و انا ما كان عندي فكرة للتميز بين العزيمتين و لسا الخير لادام :zzz

    الله يعافيك و نورتي يا قمر

  3. ام فايز 19 May 2009

    الله يعطيكي الف عافية شي بشهي وياريت دايما تعطينا فكر مشان العزايم خصوصا انو انا هلق رح اترك دبي وانزل استقر بالشام ولازم اتعلم كلشي على اصولو العزايم وكلشي ومشان دلل حماتي واعمللها عزايم فياريت ياحبيبتي تكملي معروفك وتعلمينا شغلات كتيرة مشان بين ست بيت شاطرة قدام بيت حماي من الاكل والترتيب وتنظيم الوقت وياريت ازا في ايميل نقدر نتواصل فيه معك لوقت الزنقات ياريت تقدميلنا نصائحك تجاه كلشي لانو انا اكلة هم الرجعة على الشام بعد هالغربة ماني عرفانة شلون بدي مد سفر ولا نظم ولادي ولا اهتم ببيتي مابعرف ياريت تساعديني بنصائحك انا بحاجة لمين ينصحني بعد هالغربة الطويلة هي انا بتامل منك مساعهدة وياريت تعمليلنا منيو لرمضان كل يوم بيومو مشان اعرف شوبدنا نعمل بقصة العزايم هي وبدي بيض وج جوزي وحماتي قدام هالعالم يارب تكوني حسيتي في وتساعديني
    شكرا

  4. ميسونو 19 May 2009

    سلام مرة تانية منى
    نسيت أسألك .. ما هي الكويسات يللي اللحام ما قدر يأمنلك لحمتها ؟

  5. تورتاية بالكريز 19 May 2009

    تسلم ايدك منمون ياقمر الله يعطكي الصحة والعافية يارب من كل قلبي عزومة غير شكل فعلا مبهرة والترتيب والنظام رائع واسعدني جدا انك اشركتيينا معاكي خلف الكواليس والاحداث الكرتونية اللولبية اللي دايما بتضبط وقتها على توقيت اخر لحظة مجهود كبير منك بجد الله يقويك ويجعل مناسباتكم كلها فرح وسرور وسعادة :zzz بجد نفسي ازور سوريا الله يكتبها ليه في يوم من الايام يارب بجد بلد رائع واهله رائعين ماشاء الله عليكم يسعدك ربي ع هالسفرة الملوكية الرائعةو يديمك يارب لكل حبايبك احلى ست بيت منورة ومبدعة دايما ان شاء الله ويحميك من عيون شياطين الانس والجن قادر ياكريم ( عوذتك بكلمات الله التامة من كل شيطان وهامة ومن كل عين لامة يامنى ياغالية )

  6. سارونات 19 May 2009

    السلام عليكم و رحمة الله و بركاته

    اختي منى انا احتج و اعارض :cry ))) فاصل – ما شاء الله السفرة كتير حلوة كالعادة بيضتي وشنا )))
    و نعود بعد الفاصل اختي منى مو قلتيلي بدك تحطي وصفة كيكة جوز الهند خليتيني شوف صورتها و انتظر :cry كمان وصفة الشوكي مبيتها كتير حلوة و ناطرتها منك قريبا يسلم ايديك :grin

    بالتوفيق
    سلام

  7. بشرى 19 May 2009

    منوشة القمر .. يسلم إيديكي ربي .. شي بياخد العقل وكلو فن وذوق وترتيب .. تعيشي وتعملي عزايم والله يخليلك أهلك كلون ويديم المحبة والألفة ..
    ذكرتيني بالعزايم اللي بعملها كمان بيكون في طيارات :grin بس على مستوى أخف .. والله أنا عم اقرأ وقول واخخ وييييي ويعلى قلبي .. لو كنت محلك كنت قعدت ابكي من قهري :cry :sigh ..

    منوشة مشان تارت الفريز أنا اشتريت القالب وجبت اكتر من وصفة لتحضير العجينة بس مشتهية اعرف وصفتك انتي يا أم الذوق مشان جربها عالمضمون لانو زوجي كتير بيحب التارت بكافة أنواعه وأشكاله وأنا مسافرة بعد شي عشر تيام عسوريا بقى حابة فاجأو فيها قبل ما روح
    وإذا بتوصيني شي من هون من عيوني بجبلك ياه .. لو تعرفي شو متمنية شوفك 8) .. بكل الحوال جايبتلك معي مفاجأة رح تعجبك والله وقت كنت عم اشتريا قلت يمكن منى بيعجبا هيك شغلات وجبتلك وحدة :zzz

    طولت عليكي حقك علي بس والله مشتهية احكي معك كتير .. :zzz

  8. ام كريم 19 May 2009

    مرحبا والله ياست الستات الله يعطيكي الف عافية رغم المأسي يلي صارت معك شي اكتر من بشهي بس الحقيقة شكلو بالك طويل انا بدالك اكيد ما رحقلك شو كنت ساويت بس اكيد الهوايل واول شي بعتت البيت عند المبيض بتعرفي وقت الواحد بكون عندو عزيام بينعبط لا يكون منقص وببلش يتلبك مشان هيك بتحصل الكوارث بس المهم شي ببيض الوجه والله يعطيكي الف عافية يارب والصحة دايما

  9. رنا 19 May 2009

    الله يعطيكي العافية ياست الستات يعني سفرة 2008 كانت بتجنن بس سفرة 2009 اروع واروع وماشاء الله حولك من تقدم لتقدم ;)
    بس بتعرفي لحقتي حالك قبل مايعمل زوجك موقع مضاد للقمة طيبة وحكيتيلنا شو صار وراء الكواليس ..بس الله يعينك بيض = زيت …وبازلاء وزفرررررررر يعني ماحدا خطرله يكب كاسة ماء بس :grin
    بس شو بدك بالحكي عزيمة بتشهي والله يقويكي يارب كمان وكمان ..بس بدنا التارت يامنى …التارت ياعزيزتي :p ولا بيجي من قلبك تاكليه ونحنا عيوننا عم تطلع :sigh
    اكيد صرتي تبكي ..عم بمزح معك …بصراحة كل الحلويات الي عاملتيهن بيجننوا ومامنعرف طرق تحضيرهن بقا خليكي على راحتك وحسب وقتك ومزاجك :zzz

  10. رنا 19 May 2009

    بس وين صورة الشاورما كنت مشتهية شوفك كيف مقدمتيها :zzz

  11. غيث 19 May 2009

    يا على قلبي يا منى مأساة والله وجعتي لي قلبي على العموم الحمد لله النهاية على خير وصحة وهنا على قلوبكم كلكم شي بيشهي الله يعطيك العافية هي دوما بتصير بالضد وقت العزايم بتطلع كل الفصول ولحقي اذا بتالحقي انا من اسشبوعين كنت عازمة اختي وبدها تجي من السفرحوالي ست ساعات بيني وبينها المهم حضرت كل شي بقي اخر شي عملت صحن كباب المفاجات وانا عم اقليه طافت السيفونة(عفوا)بجنب الغاز والاهم انهم دخلو الرياض ورح يوصلو كل الاكل جاهز وساخن بقيان الكباب عبعمله وخدي فيضانات بارض المطبخ للمر والابشع التصريف مرتبط بسيفونة الحمام وبديت تطوف والممر موكيت عندي وخدي حرات ويوم جمعة ما بتلاقي سباكين فاتحين الاحلى تعلمنا السباكة بعد اختصاص الطب عملنا تحت اختصاص بالسباكة وظبطنا االامر انا وزوجي ويا مستعجل وقف لقلك هو عبيصلح السيفونات وبالجمع وانا عبقلي الكباب من طرف والسطل والمساحة عبعصر من طرف حتى ما توصل على الممر والماء ينابيع كانت حرة غير شكل وعذاب الحوسة النظيفة كله اعدته مرة تانية والحمد لله مشي الحال ومع دخول الضيوف كنت مخلصة بس شو تعب وشو حرة اركض ما اخلص وعفوا على اطالتي بس يعني مقدرة وضعك بس هيك دايما العزايم بتكون اما بفصولة او حتى بعدم نجاح اكلة بيكون الواحد عاملها ميت مرة وناجحة وقدام الناس بتطلع عادي يالله الحمد لله على السلامة :grin

  12. لين 19 May 2009

    الله يسلم اديكي اكلك بيجننننننننننننن انتي ساعدتيني كتير وخصوصا تزوجت زغيرة وسافرت وانا سورية عايشة بي بريطانيا و ما بعرف اطبخ كتير شكرا وشكلك مهضومة ودمك خفيف وفنانة بل طبخ الله يحميكيthanks

  13. لين 19 May 2009

    يسلم اديكي والله لا يحرمنا خفة دمك و اكلك يلي ييفتح النفس

  14. منى 19 May 2009

    هلا ام فايز :)
    ردك و كلامك خلاني حس بهمك , بس و الله ربي بيسر و الامور ان شاء الله كلها بتكون تمام التمام باذن الله بس كل شي باوله صعب شوي :)
    نصيحتي الك اول الشي تصفي النية و يكون قلبك مع الله و باذن الله رب العالمين بيسر الامور كلها , و تاني الشي ان تبدي بكل امورك و شغلك الصبح بكير لان ربنا مبارك لامة محمد في بكورها ..

    بالنسبة للعزايم عندك الموقع الحمد لله فيه افكار كتيرة و ممكن تستفيدي منها و تكون عون و ممكن تحاكيني عن طريق اتصل بنا و اي خدمة أو سؤال عن ايا شي بيخطر ببالك انا تحت امرك .و فصة منيو برمضان فكرة حلوة بس بتاخد وقت كتير , ان شاء الله بحاول نفذها لرمضان الجاية

    بدي ياكي تكوني قوية و متماسكة و ان شاء الله ربنا بيبارك بعيلتك كلها و بتكوني احلى ست بالعالم بعيون جوزك و بيت احماكي ;)

  15. منى 19 May 2009

    هلا ميسونة :)
    الكويسات هي وصفة حلبية فخمة عبارة عن قطع لحمة طرية و ممتازة تنحشى لحمة و مكسرات و تقلة و تطبخ بمرقة البندورة , وصفتها مو صعبة بس شي مفتخر ;)

  16. منى 19 May 2009

    هلا ام ياسمين :)
    بتعرفي دعائك ليا و ردك بيدخل لقلبي فوراً ربي يبارك بكل عيلتك و احبابك و انا كمان اتمنى تزوري سوريا و حلب و لافرشك الارض ورد و فل و ياسمين يا احلى ام ياسمين
    منورة و الف الف شكر الك للتواجد الطيب و الكريم دوما

  17. منى 19 May 2009

    هلا سارونات :)
    وصفة كيك جوز الهند بدها صور تفصيلية لهيك لسا ما نتزلتها بس مو نسيانتها ;) و كل الوصفات في السفرة رح نزلها واحدة وراء التانية باذن الله ;)

  18. منى 19 May 2009

    هلا بشرى :)
    و الله و انا بعد ما خلصت و راحوا الضيوف قلت , شو هل الأعصاب القوية يا منى , عيني ما تصيني الهي ربي :grin
    بشورة حبيبتي القلب على القلب , ريتو خليلي الزوء و اللطف كله , ان شاء الله بتوصلي سالمة و غانمة و نشرب قهوة مع بعض شي يوم :)

    تكرم عيونك الوصفات رح نزلها كلها باذن الله و ما رح اتاخر فيها متل كل مرة :roll

  19. منى 19 May 2009

    هلا ام كريم :)
    ما انا جبت المبيض لعندي :grin و فركت الأرض و الحيطان بايدي لحتى قالوا ارحمينا مشان الله :grin
    الله يخليك و يسلمك و نورتي مرة تانية ام كريم و ربي يخليك كريمك و كريمي و يباركالنا فيهم و في اخواتهم يا حق

  20. haya 19 May 2009

    السلام عليكم ورحمة الله وبركاته

    ياعيني يا عيني يا منى ما شاءالله شو هالسفرة المشهية هي والله صار بدها الواحد ينط عليها ويأكلها عن جد انا كنت كثير جوعانة ولما شفتها اشتهيت اني اكبس على الزر فيلطع لي هيك سفرة مشهية
    ماشاءالله عليك وتسلم هالايادي يارب بس بدي اسألك في كم من وصفة انت مو منزلة طريقتهم صح ولا انا غلطانة مثل سلطة الدجاج بالكاري وشوكي محشي باللحمة والخضرة غراتان والحلويات ياريت تعطينا الوصفات ومرة ثانية تسلم ايديك يارب

  21. سمسمة 19 May 2009

    ان شاء الله بيعيشوا ايديكي الابداع مو غريب عليك سفرة بتجنن ومنيح أنك مسكتي أعصابك لأن يلي صار معك مو قليل بس دائما بالعزايم بيصير هيك فصول ومشان تكمل لازم وقت بيقرب وصول الضيوف تكوني لابسة ومجهزة حالك وعم تضحكي وباين عليك أنك سعيدة وما صار معك شي بيفور القلب

  22. منى 19 May 2009

    هلا رنونة :)
    هادا بس من زووءك يا عسل و الله حضرت تارت الفريز خصوصي لعيونك لنفذ وعدي الي اكل عليه الدهر و شرب :roll

    و انا كمان قلت لحالي للحق حالي قبل ما يطلعوا الفضايح و كل شيء يبكشفن و يبان :grin اتذكرت رية و سكينة

    صورة الشاورما باينة باخر صورة و تكرم عيونك الحلويات كلها رح نزلها الواحدة وراء التانية باذن رب العالمين :zzz

  23. منى 19 May 2009

    هلا غيوثة :)
    وووولي شو هاد , صحي الي بيسمع او بيقرا مصايب غيره بتهون عليه مصيبته , كل شي الا البلاليع ما الها حل :x
    و متل ما قلتي اما بيصير مع الواحد فصل مرتب او بيحرق او ينزع شي وصفة او بينسى شي وصفة .

    الحمد لله كل شي بالخير مشي الحال بعزيمتك و عزيمتي و أخر الشي الف هنا و عافية على كباب مفاجات :zzz

  24. منى 19 May 2009

    هلا لين :)
    نورتي و شرفتي و ان شاء الله جازة الدهر كله أختي و ان شاء الله كمان ترجعي لسوريا سالمة و غانمة باذن الله
    هل الكلام بس من زووءك اختي و شرفتينا مرة تانية

  25. منى 19 May 2009

    هلا هيا :)
    اتفضلي حبيبتي و الاكل على قد المحبة , بتشرفي و يتنوري و الله
    الوصفات مو كلها موجودة و انا رح نزلهم الواحدة وراء التانية باذن الله و تكرم عيونك اختي , من دون سؤال ;)

  26. منى 19 May 2009

    هلا سمسومة :)
    الحمد لله اني نسيت و لما شفت الضيوف و كيف كانوا مبسوطيين نسيت كل تعبي و كل الفصول الي صارت فيني :zzz

    كلك زووء سمسومة و كتير انبسطت ان السفرة عجبتك ;)

  27. freesoul 19 May 2009

    ان شاء الله صحة على قلبك وعلى قلب المعازيم
    ما شاء الله عليك يا منى على هالعزيمة .شي بيرفع الراس , وتسلم هالايدين يللي طبخت ونظمت ونضفت . ايدين بتنلف بحرير. بس زعلت عليكي على التنضيف على وقت جية الضيوف. معلش تعيشي وتعملي عزايم يارب

  28. ميساء 19 May 2009

    ياحبيبة قلبي شو صار فيكي والله العظيم انقهرت وفار قلبي عليكي الله يعطيكي العافية يعني فوق تعبك وعاملة هالسفرة الملوكية كان ناقصك الزيت والزفر على الأراضي بس يلا انكسر الشر انشاء الله منيح يلي أجت على هيك والله يعطيكي ألف عافية وتعيشي يا رب وتعزمي وبيتك مفتوح بالفرح وحبيبة قلبي جودي يخليلي عيونا طلعة متل ماماتا ست بيت وشطورة الله يفرحك فيها وبإخوتها يارب ونحنا بانتظار هالوصفات الطيبة على راحتك وفضاوتك وشكرا ياأحلى ميمووووووووووو بالعالم كله

  29. ام كريم 19 May 2009

    امين يارب العالمين ويحمي جميع الاولاد لان نعمة من عند رب العالمين

  30. ام دانية 19 May 2009

    الله يحميكي من العين ويسلم دياتك بس بيني وبينك تمنيت اكون بدل خالك بالعزيمة :grin لانو والله فرط قلبي من منظر الطاولة :cry ايه مالك علي يمين بدي شي خمسين سنة تانية لاحسن اعمل نص هل السفرة الي عاملتيا :sigh

  31. نور الأسلام 19 May 2009

    السلام عليكم عيوني صاروا هيك :eek :eek لما شفت السفره الله يعطيكم العافيه وريتو الف صحه وعافيه للجميع :) شو هدا الي صاير معكم انا لما اطبخ طبخه بتلبك مية تلبيكه كيف اذا هيك سفره الله مين الاموره الطالعه بالصوره الله يديم عليكم الصحه والعافيه وتحياتي الك :)

  32. zsoukar 19 May 2009

    مرحبا ياست منى والله ماشاء الله لاقوه الابالله انتي متل الزبديه الصيني. متقنه من كلو الله يقويكي ويبارك فيكي ويحميكي ويخليلك عيلتك .بالاسبوع القادم نازله للشام ومابتعرفي اديش فرحانه وياريتني زور حلب لحتى اتعرف على ام الذوق منى وتحياتي لك ولجميع الاخوات بهالموقع

  33. Iman 20 May 2009

    ييييييييي يا منى له له له على هالفصول يلي صارت معك الله يعطيي العافيه. والله انا عم بقراء و صدقيني انو ارتفع ضغطي و تقريبا عرقت و حسيت فيكي و خاصه قبل ما ييجوا الضيوف و الله انو اشي بيكركب بس وينك يالالا هادا خزات العين عنك. بسم الله ما شاء الله. ربنا يحميكي و يقويكي. و الله انو سفره بترفع الراس. بس كلو كوم و البيض كوم و زفاره البيض يييييي. منى عنجد اسم الله عليكي حبيبتي سفره بتشهي و قولي لخالو تقي ما يبقى يطول الغيبه علشان تتحفينا بهيك سفر. و مثل ما بيقولو بالخليج بيض الله وجهك يا منى. و الله يخليلك بنتك انا كتير مبسوطه انو عندها حب للمطبخ الله يرضى عليها. انا بموت و اشوف بنتي زينه داخله معي عالمطبخ بس وين مثل ما بيقولو عشم ابليس بالجنه هههه. على قد ما بحب المطبخ على قد ما هي ما الها خلق. علشان هيك بفرح كتير لما بشوف بنوته صغيره بتحب الطبخ مع مامتها. ان شاء الله بتشوفيها عروس و بتفرحي فيها يا رب. سلام. :)

  34. رندوش 20 May 2009

    يسعدك الله منى والله بكيت وانا بحضر
    قصدي بقرأ الاحداث لانك فكرتيني بعزايمي
    كلها على اعصابي ولازم يتسكر شي
    او يتحرق او امرض اخر عزيمه مرضت
    مرضه محترمه وحولتالاكل من محشي وكبه
    الى مشاوي وسلطه فقط بيعين الله
    لازم شي ينكد على الواحد
    بس بعدها بتضحكي كيف انك متوتره وكل
    شي تمام الحمد لله بس الصراحه اطباق
    رائعه جدا تسلمي وتسلم بنوتك العسل ربي يحميها

  35. منى 20 May 2009

    هلا ام جود :)
    الحمد لله على كل شي و الله يخليلي ياكي و يسلمك أختي , ان شاء الله بتعيشي لحبابك بالصحة و العافية و الهنا و التقى ;)

  36. منى 20 May 2009

    هلا ميوسة حبيبتي :)
    خليلي عينك على هل الرد الحلو و الدعوات الغالية و الكريمة , ربي يفرحك باحبابك و بكل الغوالي عليك و يكونوا الك و تكوني الهم متل ما ربنا بده ;)
    تكرم عيونك الوصفات كلها على الطريق و اولهم الكبة الصاجية :zzz

  37. منى 20 May 2009

    هلا ام دانية :)
    مية السلامة بهل القامة و بتشرفينا و بتنورينا و الله :zzz..

    ان شاء الله بس ما تاخد ايدك على الشغل بتعملي أحلى العزايم , مو 50 سنة حرام عليك , جوعتينا :grin

  38. منى 20 May 2009

    هلا نور :)
    معك حق و الله الواحد بيتلبك و بيصير معه فصول و السبب كله العبطة و الشغل اخر دقيقة :)
    الله يخليك و يحفظك حبيبتي و نورتي و شرفتي ;)

  39. منى 20 May 2009

    هلا ام عمر :)
    هادا بس من زووءك يا عسل , ان شاء الله بتوصلي بالسلامة على الشام و بتشرفي و الله حلب و بتنوريها ;)

  40. لموسي 20 May 2009

    تسلم ايديكي وعيونك واله يقويك

  41. لارا مينا 20 May 2009

    مساء الخير أخت منى …والله تسلمي على الصور وعلى العزيمة وشكرا كثير كثير,, بتعجبني كثير صور العزايم وخصوصا المرتبة ويمكن تفرحني أكثر من الوصفات وأجلس أفتح على نفس الصفحة عدة مرات … و لو غيرك ومع كل إلي صار يمكن يحرم العزايم على نفسه أقل شيء سنة.. بس المهم النتائج في الآخر والحمد لله كانت 100% وربي أعطاكي على قد نيتك الطيبة… وياترى وين يخنة البازلاء هي بالوعاء الأبيض المغطى ؟
    وكمان فيه صينتين بايركس وحدة جنب الكبة المبرومة والثانية جنب الكبة بالصينية, وحدة منهم لقمة تشيكن والثانية شو ؟ ( كأني محقق وعم إستجوب المتهم )
    وشكرا على المقدمة تسلينا كثير وإحنا عم نقرأها وكل سطر بيروح أتحمس للسطر إلي بعده وكأني أشوف مسلسل أو أقرأ قصة وأبغى أعرف نهايته بسرعة . الله يبارك لك في أولادك وعقبال إن شاء الله يارب مانشوف وصفات يكتب فيها فوق الوصفة مباشرة الكاتب / جودي…تحياتي
    :) :) :)

  42. منى 21 May 2009

    هلا امونة :)
    خليلي عينك أمولة على هل الرد المزوء و الحلو و الي ما بيطلع الا من قلب طيب ;)
    ابوس عينهم جودي و فرح التنتين بيحبوا المطبخ كتير , و هي فرح من امبارحة لليوم عم تطلب مني ان تعمل خبز , بس بشرط لحالها :grin و عم تقلي و الله يا ماما بعرف أعمله لحالي :zzz

    ان شاء الله تشوفي زينة متل ما بتحبي و تملى قلبك فرح و سرور بالدنيا و الأخرة يا حق ;)

  43. منى 21 May 2009

    هلا أخ أرام
    له له له , رح تبيع الموقع و تكون مع الموقع المضاد مشان صحن فول !
    الله يعافيك أخي و ان شاء الله يكونوا الطبخات عجبوك و تجرب منهم شي و يكونوا متل ما بدك

  44. منى 21 May 2009

    هلا رنوشة :)
    الله يعافيكي حبيبتي كله الا المرض , ان شاء الله معافاية و كانت مرضة معداية :roll
    سبحان الله , الا ما يصير الواحد معه شي شغلة بالعزايم , الحمد لله ان بالخير كانت على خير

    ربي يخليلك اولادك و تشوفيهم شباب و صبايا و يكونوا متل ما بتحبي و بيحب الله :zzz

  45. آرام 21 May 2009

    لا تصدقي أختي .. والله ما ببيع الموقع بكل مواقع النت 8) أصلاً ما بسترجي! بعرف أنو بكبسة زر بترميني برا :upset وساعتها بموت من الجوع .. وبصير أتحسر على أيام الفول :cry لقمة طيبة الو فضل كبير علي .. صار لي أكتر من شهرين عم آكل من طيبات هل الموقع .. وصرت مجرب أكتر من 25 وصفة معظمها جديدة علي تماماً .. وبعض الوصفات الي بعرفها من زمان صرت أعملها على طريقتك!
    بس عندي سؤال أختي .. بوصفة الكنافة أم النارين ذكرت أنك بتعملي النابلسية بنوع مختلف من الكنافة، شو هو هل النوع؟ وشو الفرق بين أم النارين والنابلسية غير الحشوة (جبنة حلوة بدل اللبة)؟

  46. نوارة 22 May 2009

    ما شاء الله عليكي يا منى
    الله يعطيكي الف عافية
    بتعرفي كنت حاطة ماما مثلي الاعلى بالعزايم الهيئة لازم اغير (لا تقوليلها)
    تخيلي بلشت افكر انو حلمي اعمل هيك عزيمة :grin ومشان افلام الكرتون اللي صارت معك بالعزايم ضروري هيك افلام
    وقت بنزل على سوريا بحكيلك على افلامي

  47. منى 22 May 2009

    هلا لارا :)

    كتير انبسطت ان السفرة عجبتك و كمان انك اتسليتي بأحداث ما وراء الكواليس ., ربي يديم الصحة و العافية و يديم نعمة علينا و يديم الحبايب و يبقى الواحد يعمل دوما احلى عزايم

    الطبق المطلوب هو الرز المفلفل و هلا لعيونك رح عدل الوصفات و اذكره مع رابطه و الوعا الأبيض فيه البازلاء

    ألف شكر الك للدعوة الغالية و ربي يبارك باحبابك و الغوالي عليك و جودية محضرة كم وصفة رح تنزلهم بالصيفية ان شاء الله و هنن وصفات خاصة بالأطفال:)

  48. منى 22 May 2009

    هلا اخ أرام
    الله يسامحك اخي , فيك الخير و البركة و الف صحة و هنا على كل شي جربته
    اخي الكنافة النابلسية بتصير بشي اسمه فرك الكنافة و هو بينباع جاهز , بس ان شاء الله ناوية جرب حضره و اكيد رح نزل الوصفة اذا ظيبطت معي ,
    مية هلا فيك اخي و هنا و عوافي مرة تانية

  49. منى 22 May 2009

    هلا نوارة :)
    لا هيك رح يكبر راسي كتيرررر , ما انا بعد حفلة تخرجك ما بقى تعجبي ايا عزيمة بقى كيف تقارنيني بست غيثاء خانم :roll

    ان شاء الله توصلي بالسلامة و تحكيلي كل قصصك , و نحنا عم ناكل همبرغر باباي 8)

  50. آرام 22 May 2009

    سأكون أول من يشارك في الموقع المضاد للقمة طيبة!
    أخت منى والله مالك حق
    يعني صار لك أسبوعين عم تطعمينا فول … وبس إجا خالو تقي بتعملي هيك سفرة ؟؟!!
    نيال قلبك يا خالو
    الله يعطيك العافية .. وتعيشي وتعملي عزايم

  51. alyaman 27 May 2009

    سلامات
    الله يعطيكي العافية
    والله يا منى انا بعد هيك عزايم لما بعملها بروح مرضانة يومين من بعدها لانو شرواكي بالخير ما بترك شي الا وبعملوا
    بياض وش … وبعدين بيقول الكريم خدي على وجع وااهاات
    ههههههههههه
    الله يعطيكي العافية يارب كفيتي ووفيتي
    بس ليش مو حاطة لنا مقادير وطريقة كاتو التوفي
    عجبني كتير كتير
    وانا بموت بالتوفي
    فيا ريت تحطي لنا الطريقة او اذا اسهل ابعتيلي ياها ايميل لانو مستعجلة عليها ولانو بدي سافر بعد يومين
    فحابة اجربها قبل السفر اذا ما فيها تعب عليكي
    والله يسلم ايدك يارب

  52. منى 31 May 2009

    هلا نسرين :)
    الوصفات الناقصة عم نزلهم واحدة ورا واحدة , بعرف اتاخرت عليكي بس لسا اليوم خلصوا الامتحانات وز ما كنت فاضة الا يا دوب شيك على الموقع كل يوم كم دقيقة :roll

    الله يسلمك و يحفظك و ان شاء الله رح نزل الوصفة هل اليوميين باذن الله ;)

  53. wedadswed 8 June 2009

    يسلمو كتير :شو هالحلو هاد والله شهيتيني كون معكن عاللمة الحلوة الله يديمها نعمة يارب ,منى من فترة بعتلك رسالة فيها إقتراح بس ما وصل رد بس يمكن في غلط المهم حبيت أقترح ليش ما بتعلي صفحات خاصة بأطباق الريجيم وإذا ممكن تحولي الأكلات الطيبة بنفس النكهة بس خفيفة للي مريجمة وكمان ياريت تخصصي بعض الصفحات لأكل الأطفال وشكرا

  54. منى 8 June 2009

    هلا وداد :)
    يا ستي بتنوري و بتشرفي , اامين ربي يديم نعمة و يعرفنا اياها بدوامها مو بزوالها , اامين يا رب .

    الاقتراح وصل , بس انا ما رديت على الريالة لان كنت مسافرة و لسا امبارحة رجعت , , ان شاء الله وداد , فكرة وصفات للريجيم عم حضر الها من فترة , اما أكل الاطفال لسا ما عندي اله أفكار , ربي بيسر ان شاء الله :)

    نورتي وداد و الف شكر الك للردود و التواجد

  55. ام احمد الغالي 9 June 2009

    يسلمو ايديكي يا منى
    تعيشي وتعملي عزايم بس بخسائر اقل عن جد لو كنت محلك ما بعرف شو كان صارلي
    :zzz

  56. منى 10 June 2009

    هلا ام احمد :)
    ااامممين اختي ,الله يسلمك و يحفظك .
    لو كنت محلي بيعين الله و ما بتعرفي من وين بيجي التيسر ;)

  57. بدور 10 June 2009

    يا سلام على هالعزيمة وهالسفرة الروعة والله هي للنظر مو للأكل..

    عبمزح طبعا مو تصدئي.. هي للنظر وللاكل كمان وين نتركلك كل هالاكلات الطيبة :grin

    بس عنجد ما شاء الله عليكي على هالاعصاب القوية والله لو كنت محلك كنت تركت كلشي و ئعدت ابكي :roll

    وكمان في مفاحئات وبآخر وئت لتحدد نوع الأصناف يلي رح تعمليها؟!

    يا سلام! الله يحميكي و يباركلك بجودي الشطورة أبوس روحها ويباركلك بكل اخواتها يارب.

  58. منى 11 June 2009

    هلا بدورة :)
    شو اعصاب قوية , ما على عينك يا تاجر , كم مرة حرقت صوابعي و انبحتت :grin

    خليلي عينك بدورة على الدعوة الحلوة , ااامين يا رب و اشوف منهم خير كتير و انت كمان من كل احبابك و عيلتط ;)

  59. زيد 13 September 2009

    ياريتني خالو تقي بس لهل سفرة 8)

  60. منى 13 September 2009

    هلا فيك اخي , شرفت الموقع و اتمنى ان تعجبك بقية الوصفات كمان

  61. lolli 28 November 2010

    سلامات اخت منى
    عن جد انا برفعلك الشبو متل ما بيقولو هيك هون ببروكسل لما بيعجبو بحدا و بيقدروه
    و بتشكرك كنير انك مخففة علي الغربة و محسستيني اني بحلب و بين رفقاتي و العزايم و الجمعيات الغير شكل
    بس بصراحة لما شفت هالعزيمة شعرت اني مو من هالعالم و اني بعيدة الاف السنين الضوئية عن اني اعمل هيك سفرة شي يوم حتى لو عندي كل الوصفات

    :sigh :sigh
    بالغربة مافي قرايبين كتير يزورونا و نزورهم لذلك العزايم اللي عملتهم بينعدو ع اصابع اليد الواحدة

    و مع ظلك اخر عزيمة كانت برمضان ل4 اشخاص بس
    بس متل كل مرة …. هنن الضيوف بيروحو من هون و انا بفلت من البكا من هون
    كنت بدي اعمل بايلا بالسمك و شوكي ورز و سمبوسك اللحمة و تبولة و سلطة يونانية و طبعا لانو رمضان فاخترت شوربة الحريرة المغربية

    لقبل الافطار بساعة كان كلشي خالص و بقيان علي
    اطبخ الرز ليكون خالص مع موعد الاذان و تسخين الشوربة ما بدي اطول عليكي
    بس الرز البسمتي ما استوى و علقو بالتالي ما صار في بايلا و شوربة الحريرة علق الحمص و العدس و احترقو و طلعت طعمة الحرق فيها
    و كلنا اكلناها بالزور وكانت عزيمة فاشلة و نهايتها بكا من قلب محروق

    و جوزي بيصير يقلي هي اخر مرة منعمل عزيمة
    ما بكفيني اني مابشوفك يوم قبل العزيمة و يوم العزيمة و يوم بعدها بالتنضيف و الجلي و بالاخير بتكوني زعلانة و بتبكي

    و انا بحس اني مضيعة الحل و ان شاء الله انتي ح تكوني السبب بإنك تعلميني السر او الاسرار للنجاح

    وبينوبك مني الثواب و انا رح ادعيلك الله يوفقك و يجعل حياتك و عيلتك و اطفالك حياة سعيدة فيها من القناعة و الرضى الكتير

    لذلك ياريت تقليلي كيف ترتيب تجهيزك لهالسفرة من اول يوم
    و شو بتتركي لاخر ساعة
    و كيف الاكل بكون كله سخن للحظة وصول الضيوف؟

    اسفة اني عم تقل عليكي بس منتظرة منك الحل

  62. منى 28 November 2010

    هلا لولي :)
    و لا يهمك و لا تزعلي على الي بيصير , لا تفكري ان انا بكون رايقة و هادية كتير قبل هيك عزيمة كبيرة , بصير من عبطتي ما بعرف حالي :roll و مع اني عندي خبرة 14 سنة , بقى انتي هلا لسا جديدة على المطبخ و الا ما تغلطي كم غلطة لحتى تزبط معك ..

    شو بعمل بهيك عزيمة , خليني احكي عن هل الوصفات

    قبل اسبوع , بلف اليالنجي بحطه بالفريزر , قبل بيوم من العزيمة اطبخه و اخليه بمرقه لتاني يوم , بحبه كتير هيك و بحسه بيشرب حمض غير شكل

    قبل يوميين بجهز الكبة و بخليها بالفريزر

    قبل بيوم هو اهم يوم و هو الي بخلص فيه الشغل , بجهز حشوة الاوزي , بطبخ البازلاء كلها خالصة , بجهعز المحمرة , بسلق الدجاج للفريكة و فخدات الدجاج و السلطة و بتبل جاج الشاورما, لقمة تشكن و الشوكي بجهزهم للأخر بس من دون الخبز و على التغليف و على البراد , المحمرة كمان بجهزها . بجهز قوالب الكيك بس من دون تزيين . و بجهز عجينة التارت و بالفريزر . و اخر الشي بجهز كل خضرة السلطة و بكياس نايلون على البراد , بعدها بكون خلص النهار و بكون انهد حيلي :roll برتب السفرة , بمد المفرش و الصحون و الكاسات و الملاعق , خلصنا

    يوم العزيمة الصبح بجهز الكاتو , بحشي الأوزي , و بخبزه , بخبز الكبة و الشوكي و اللقمة تشكن , و لازم احسب حساب كل طبخة شي ساعة بالفرن و فكر ان لازم خلص قبل العزيمة بساعتين . و على هل الاساس بحمي الفرن و ببدى بالخبز .

    الفريكة بطبخها بكير و بتركها بطنجرة الضغط لحتى تتهدى و بتبقى متل النار

    القلي كمان قبل ساعتين على الاقل من العزيمة لازم يكون خالص , اخر الشي تتبيلة السلطات ..

    بهيك عزايم ما بكون لوحدي ابدا , على الاقل في ماما و واحدة من خواتي عم يساعدوني , ما عدى واحدة بيومها خاصة للجلي و التنظيف , اكيد ايد وحدها ما بتصفق

    شو كمان , ايه , بالنسبة للرز دوما خليه يكون خالص قبل ساعة من الموعد , منها بتكوني رايقة و منها بيتفلفل

    اخر ساعة بس تسخين بسيط للأطباق و انا ما بحب تسخين الميكروويف لهيك بتغلب شوي لان كله بده شي عشر دقايق تسخين من اول و جديد

    هادا كل شي , لا تزعلي ابدا لان صار معك فلم ناقص , انا برمضان الي مرق عزمت ام زوجي على لحمة بالصينية مع شوربة و سلطة , في اسهل منها , ما زبطت و لا استوت و كانت طعمتها سايطة , بقى وصفة واحدة و شخص واحد معزوم و ما كانت العزيمة ناجحة , بتصدقي بحس ان كل شي توفيق من رب العالمين . طبعا التخطيط المسبق مهم , بس كله بالاخير توفيق :)

    ايا سؤال من عيوني انا دوما بالخدمة :) و الف شكر الك للدعوات الحلوة الكريمة من اخت كريمة

  63. lolli 1 December 2010

    صباح الخير اختي منى

    انا مو حابة اني اتقل دمي و حل ثقالتي بس حابة اني اعرف شو رأيك باقتراحاتي

    مافيني اقلك غير انو ماتنسيني و انا ناطرة ردك :?

  64. منى 6 December 2010

    لا مو نسيانتك , بس انشغلت شوي :zzz

    بس بدي خبرك شي , ان انا بس بجهو الخضرة تبعة السلطة من دون فرم , يعني بنضف الخس و الزعتر انتفه و اجهز الجرجير , و يو العزيمة بقطعهم لحتى يبقوا فريش و تازة

    طبخ الرز موجود بقسم اساسيات , فيك تشوفيهم بالتفصيل

    رح ابعتلك ايميل لحتى ترجعي تبعيلي الوصفات , شو رايك هلا شيل ايميلك من ردك :roll

    بالنسبة للموقع , هلا في شي لتحديثه و ان شاء الله منحط الميزة الي ذكرتيها فيه

    شكرا كتير لدعواتك و ايا خدمة تانية من عيوني ;)

  65. lolli 6 December 2010

    عن جد
    (( منى و بس و الباقي خس ))
    ما اتوقعت انك تجاوبيني بهالسرعة و ترديلي الثقة لنفسي

    اكيد اتعلمت كتير شغلات جديدة متل انو السلطة بتنفرم قبل بيوم و بكياس عالبراد

    و انو حتى بتجهزي مفرش السفرة و لوازمها قبل بيوم
    بالنسبة للرز ما عرفت شو قصدك يتفلفل اكيد حابة اعرف طريقتك لطبخ الرز

    هلء عندنا بكارفور في رز باكياس صغيرة و مثقبة بتحطيه بمي عم تغلي و بتشيليه بعد 12 دقيقة و بيكون مستوي ومو مخبوص و بتشقي الكيس فوق الصحن و بكون جاهز و حباته مو ملزقين
    هو بيكون اغلى من الرز العادي بس بتوقع انو للعزيمة اخف لبكة
    اما بالنسبة للاوزي : اتعلمت من رفيقة ماما اني اعملهم اصابع و بسموهم ميني اوزي رول
    هيك الضيف بياكلها برشاقة و بيتني منها قد ما حب و الصغار ممكن وحدة تكون كافية احسن ما ياخدو قطعة كبيرة و ما يكملوها
    ويمكن لاني لوحدي و عندي صبي هلء عمرو سنة و نص الله يخليه كتييييييير بيساعدني بالمقلوب عم تكون عزايمي فاشله و محبطة جدا

    لذلك متل ماقلتي لازم اخطط قبل و احسب وقتي
    و حتى طناجري و اخلص اكتر شغل ممكن قبل بيوم
    ع كل حال ان شاء الله بالفترة القادمة رح تشوفي مني رسالة اني عملت عزيمة و نسبة نجاحها
    خصوصا اني طبقت كم اكلة رائعة من الموقع و نجحو و نالو اعجاب زوجي
    طيب انا طولت عليكي بس بقيان طلبين من بعد اذنك

    الاول: في كتير عندي وصفات مصورة لمعجنات و حلويات و غالبا عالايميل و لكن ما عندي الوقت اني اجربهم و تاني شي زوجي زوقه بالاكل صعب و خياراتي غالبا محدودة . هلء انا حابة اني ارسلك ياهم بالايميل لو ما عندك مانع
    عن جد اكيد رح تحبي كم وصفة لذلك رح حط ايميلي و لتبعتيلي عليه طريقة ارسلك فيها الوصفات المصورة
    الطلب التاني :
    مرة باحد مواقع الطبخ كان لما بفتح ع اي وصفة و بتعجبني كان في زر طباعة و لما بضغط عليه
    بتطلع بس صفحة فيها الوصفة بقاديرها وطريقتها بس بملف صورة و ارضية الصورة كلها شعار الموقع
    متل مابتعرفي معظم ستات البيوت بيكونو مستعجلات
    و انا اولهم و حتى ابني ما بهنيني بقعدة كومبيوتر و يا هو يا اللابتوب
    لهيك ياريت يصير في هيك خيار يسمحلي اطبع الوصفات و احتفط فيهم بسهولة لانو غالبا ماعندي وقت انقل و اكتب
    هيك بتكوني فضلتي ع راسي من فوق متل ما بيقولو بالمسلسلات ههههه :grin
    و بعتذر للاطالة و للاخطاء الاملائيةو الله يوفقك و يلبسك توب العاقية و يهدي بالك

تقييم الوصفة
عاديةقد أحضرهاجيدةممتازةأكثر من رائعة (1 votes, average: 5.00 out of 5)