كابوسكا


         وصفة : منى                 2009/02/05                 16 تعليقات
كابوسكا

أو يخنة الملفوف على الطريقة التركية , طيبة طيبة طيبة كتير هل الوصفة , ملكة الوصفات الشتوية في كل تركيا و أنا بحبها كتير و البيت عندي بالإجماع بيحبها مع أنها حرّة .

الوصفة بتشبه وصفات كتيرة لطبخ الملفوق في روسيا و البلقان و حتى أظن أن الاسم مشتق من اللغة الروسية بس مو متأكدة . و نفس الوصفة بتحضرها كل منطقة بتركيا بطريقة مختلفة , ناس بتطبخها من دون لحمة و ناس بتطبخها مع لحمة مفرومة و ممكن بالدجاج , بس أنا بشوف أنو أطيب طريقة هي باللحمة الغنم أو البقر المقطعة مكعبات و أنا بطبخها بهل الطريقة دايماً .

للتقديم ممكن تقدميها مع خبز البيدا أو مع خبز الباكيت ,نص العيلة عندي بيحبها مع الخبز لأن بيمتص من الصوص و بتطلع و لا أطيب و النص التاني , و أنا منهم , بيحبوها مع الرز المفلفل .

كمية الوصفة اليوم نوعا ما كبيرة و هي ملاحظة على السريع لحتى تقللي الكمية للنصف إذا كانت عيلتك صغيرة أو حابة تعملي شوي كتجربة .

بالصحة و الهنا

شو لازمنا ؟
2 ملعقة كبيرة زبدة
2 ملعقة كبيرة زيت زيتون
نصف كيلو لحمة غنم أو بقر مقطعة لمكعبات
راس كبير ملفوف
2 حبة كبيرة بصل أحمر
حبة كبيرة فليلفة حمراء
4 حبة كبيرة بندورة
1 – 2 ملعقة صغيرة دبس فليلفة
ملعقة صغيرة فليلفة حمراء ناعمة
ملح و رشة بهار
كوب و نصف من مرق سلق اللحمة
طريقة التحضير

• تذوب نصف كمية الزبدة و زيت الزيتون على نار متوسطة , تضاف مكعبات اللحمة و تقلب حتى يتغير لونها و يجف مرقها مع التقليب المستمر .

• تغمر اللحمة بالماء ثم تترك حتى تنضج و تطرى لمدة ساعة تقريباً .

• أثناء سلق اللحمة يقطع الملفوف لعيدان و يتم التخلص من عض الورق إذا كان قاسي ثم يغسل و يترك جانباً حتى يصفى .

• يفرم البصل و الفليلفة لقطع متوسطة , تقشر البندورة ثم تفرم ناعماً و أنا استعملت لوصفتي من البندورة المحفوظ من الصيف .

• يقلب البصل بباقي كمية الزبدة و الزيت لبضع دقائق أو حتى يصبح شفافاً ثم تضاف الفليلفة الحمراء و تقلب لبضع دقائق أخرى .

• تضاف البندورة و الفليلفة الحمراء الناعمة و دبس الفليلفة و الملح و البهار مع اللحمة المسلوقة و ما يقارب كوب و نصف من المرق و يترك حتى يغلي الصوص لمدة خمس دقائق .

• يضاف الملفوف لصوص البندورة و يترك ليغلي لمدة 15 – 25 دقيقة أو حتى يطرى و ينضج و يضاف القليل من الماء المغلي إذا دعت الحاجة لأن الملفوف سيخرج الكثير من المرق و الوصفة أصولها أن تكون كمية المرق قليلة نوعاً ما .

• تقدم الكابوسكا مع خبز البيدا أو الباكيت أو مع الرز المفلفل بالإضافة إلى اللبن لمن يرغب .






التعليقات

  1. أم الهدى 7 February 2009

    أممممممممم يا سلام وصلت الريحة لعندي والله شكلها بشهي وان شاء الله مع التجربة القريبة وخاصة اني بعشق الملفوف
    تسلم دياتك

  2. أم علي 7 February 2009

    شو هادياحضرةالشيف :zzz والله الاكل من ايدك بيشهي ما عم اعرف شو اطبخ منن كلن بيشهو :roll
    تسلم ايدك يا مبدعة والله صرت اعتمد على الطبخ من مو قعك واكلاتك الشهية بس كون محتارة شو بدي اطبخ :zzz الله يديمك علينا على فكرة انا وانت متقاربين بالعمر كتير العمركلو ان شاء الله بس انا ما عندي خبرتكالله يعطيك العافية ;)

  3. منى 7 February 2009

    هلا ام الهدى :)
    الله يسلمك و يخليك و ان شاء الله رح تعجبك , على فكرة ريحتها مو كتير حلوة وقت الطبخ :grin , بس بعدها الكل رح يحبها كتير :zzz

    ان شاء الله اذا جربتيها تبقى تخبريني ;)

  4. منى 7 February 2009

    هلا ام علي :)
    ما بدها حيرة , جربي ل الوصفة لان موسمها هلأ و ان شاءالله رح تعجبك ;)

    الله يديم المحبة و المعروف يا عسل و ان شاء الله العمر كله بالف صحة و الف عافية و بايمان يملى قلبك و بيتك كله نور

  5. أم الهدى 8 February 2009

    يا سلام اليوم جربتها تسلم دياتك طيبة ولذيذة وخفيفة وبتشهي
    يعطيك ألف عافية

  6. نور الأسلام 10 February 2009

    :pانا اخاف ان اطبخ شي وما يزبط ولكن ساجربه ان شاء الله

  7. منى 10 February 2009

    الف هنا و عافية ام هدى :) ريتو صحة و هنا

    الظاهر صار معنا تبادل بالوصفات لان انا كمان اليوم جربت وصفتك للقرنبيط و طلعت ما اطيبها , سلم دياتك ;)

  8. منى 10 February 2009

    لا تخافي نور , كلنا لما نكون جدد على المطبخ بيطلع معنا اشيااا عجيبة , بس ان شاء الله اذا جربتي الوصفة متل ما هي رح تعجبك ;)

  9. سارونات 13 February 2009

    السلام عليكم و رحمة الله و بركاته

    شو هالوصفة ما شاء الله الالوان شو حلوة و مبينتها طيبة كتير )) على فكرة اختي منى عندي صحن بيشبه صحنك :grin ))

    انا بدي ساويها بلحمة مفرومة فهل فيكي تقوليلي كيف بساويها و شو بيتغير
    كمان هل ممكن استعمل فلفل اخضر بدل الاحمر
    اخر شؤال عن الملفوف هو راح يطلع طري منيح صح لان عادة بوصفات تانية بينسلق لهيك خفت بس كمان فكرت لانو مقطع غير ما راح ياخذ وقت تحتى يستوي

    ربي يوفقك اختي منى و جميع الاخوات

    سلام

  10. mayada 15 February 2009

    السلام عليكم كيفك ياست منى لوتكرمتي علي بدي منك طريقةعمل شراب اللوز والف شكر لك ياعزيزتي

  11. منى 15 February 2009

    هلا سارونات :)
    لما تستعملي لحمة ناعمة بتقليها مع البصل حتى تستوي بعدها تضيفي الفليلفة الحمراء و الحمراء هي النوع المطلوب للوصفة , لان فيها شوية حلاوة ما بعرف كيف رح تطلع من دونها ;)

    اختي الملفوف بيطلع مستوي على الأخر و اذا بتحبي ممكن تتركيه لوقت اطول لحتى ينضج متل ما بتحبي :)

    اي سؤال من عيوني و مية هلا اختي و انتيهي على صحني :grin

  12. منى 15 February 2009

    هلا ميادة :)
    تكرم عيونك , انا دايما بساويه هلى ايدي , ان شاء الله ناوية نزل وصفته بعد المنيو التركي :)

  13. نادين 16 April 2009

    امممممم ياعيني يا منى
    الاكله لذيذه جدا
    وانا برشحها كافضل اكل مغذيه اول اكله بقائمه اكلات الريجيم وخصوصا انو الملفوف بيحرق الدهون وهي خفيفه كتير
    زوجي الحمد لله حبها وقلي انو اكتر شي مميزها هو الحر والدبس بالفليفله
    شكرا الك

  14. منى 16 April 2009

    الف هنا و الف عافية على قلبك و قلب جوزك و انا متلك , كتير بحبها و مغذية و ما بتاخد شغل

    على فكرة متل ما قال زوجك الحر هو الي رح يخلي هل الوصفة غير شكل ;)

  15. شفاء 15 September 2011

    فعلا هالكلة زكرتني بروسيا
    لانن كتير بيطبخوا الملفوف(لانن ماعندن شي غيروا هو والبطاطا
    بنفس الطريقة لحمة مكعبات وملفوف
    وكل مرة بيزيدو او بينقصوا شغلة
    وبيعملوها مريقة وبياكلوا معاها خبز التوست
    خاصة ايام الشتا
    في عندي اكلة روسية اتعلمتها لما كنت هنيك
    بلكي ببعتلك اياها اسمها بلوف

    اخدني الحكي ومسيت احكيلك اني جربتها
    وكانت لزيزة وخفيفة
    واهم شي انها زكرتني بأول ايام زواجي
    ;) ;)

  16. منى 15 September 2011

    تعيشي و تتذكري شفا و الله يخليلك زوجك و اولادك و تبقوا بالف صحة و عافية على طول ان شاء الله

    ممم اكيد اتمنى تشاركي بالوصفة

    صحة و الف الف على البك و ممنوة ثقتك في

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)