لفائف الباذنجان بصوص االكريم فريش


         وصفة : منى                 2011/09/30                 12 تعليقات
لفائف الباذنجان بصوص االكريم فريش

عن جد مو انو مجرد كلام او مدح فارغ , وصفات البتنجان الي نزلتها في الفترة الاخيرة من اطيب و الذ الوصفات الي حضرتها , ما في كلمات توفي كل وصفة حقها و اتمنى انو تحطوهن كلهن ببالك للتجريب في اقرب وقت .

لفائف الباتنجان من الوصفات الي شكلها حلو و طعمها بيجنن , و شفلتها مو صعبة و فيك تحضريها قبل بيوم لهيك كتير كتير مناسبة للبوفيهات و العزومات .
انا حضرتها بحشوة دجاج و هي الحشوة من الحشوات الي كتير استعملها لان بسيطة و مقاديرها قليلة و طعمتها بتاخد العقل , ممكن استعملها كحشوة سندويش أو لحشي سمبوسك او حتى بياكلوها الاولاد بالمعلقة بعد ما تشدهم الريحة للمطبخ . فيكي تستعملي حشوة لحمة اذا بتحبي , و بتطلع طيبة .

شرايح البتنجان لازم تكون مقطعة لشرائح مو رقيقة كتير بتتكسر اثناء اللف و مو سميكة كتير بتطلع طعتها مو طيبة , و انا حضرت شرايح البتنجان بطريقة هجينة لا شوي و لا قلي , هيك بحسها طيبة و سهلة و ما بتشرب زيت كتير , انت فيكي تقليها بالطريقة العادية .

بالصحة و الهنا




3 حبة باذنجان متوسطة , مقطع شرائح
زيت زيتون
ملح و فلفل أسود
جزر مقطع عيدان

الحشوة :

ملعقة صغيرة زبدة
2 ملعقة كبيرة زيت زيتون
حبة بصل صغيرة , مفرومة ناعماً
250 غ دجاج , مفروم مكعبات صغيرة جداً
1 فص ثوم , مهروس
ربع ملعقة صغيرة كاري
ثلث ملعقة صغيرة فلفل أبيض
ملح

للوجه :

كريم فريش حوالي كوب الى كوب و نصف , حسب الحاجة
جبنة موتزاريلا , مبشورة




• نسخن كمية قليلة من زيت الزيتون في مقلاة كبيرة . نضيف الباذنجان و يقلى على الوجهين حتى نحصل على اللون الذهبي , يرفع على ورق المطبخ .

• يقلب البصل بالزيت و الزبدة حتى يصفر , يضاف الدجاج و الفلفل الابيض و القليل من الملح و يقلب حتى ينضج على نار قوية . يضاف الثوم و الكاري و يقلب لبضع ثواني .

• توضع شريحة باذنجان على طبق ثم يوضع مقدار ملعقة من حشوة الدجاج على الطرف الكبير منها و فوقها عود جزر بحيث يظهر خارج اللفافة , تلف و توضع في صينية فرن بحيث يكون الجزء المغلق للأسفل , ترتب اللفائف بشكل متراص بجانب بعضها كي تحافظ على شكلها 0

• تمسح الشرائح بالكريم فريش و ترش بالجبنة ثم تخبز في الفرن حتى تذوب الجبنة و تحمر قليلاً , يقدم فوراً .

التعليقات

  1. om nabeel 30 September 2011

    شو هاد يامنونة افكار بتاخد العقل
    واشكال بتجنن والطعمة اكيد واو
    بس لو سمحتي منونة انا اذا بدي اعملها قبل بيوم بدخلها الفرن بس من دون ما احطلها الفريش كريم والجبنة وتاني يوم عالعزيمة بحطن
    ولا بصفهن بالصينية وتاني يوم كل مع بعضه عالفرن
    اكيد انا هالمرة اول رد :grin :grin :grin
    لا لا لا لا

  2. غيث 1 October 2011

    احييك ام نبيل مع صفقة حارة لانك بالفعل هالمرة صابت معك هههههه يا ستي دبحتينا منى هلق لاني محتارة بايش أبدا بطلت ابدا ابداهههه عبمزح الله يعطيك الف عافية ويجزيك الخير يا رب بس رح جيب كمية من الباذنجان كبيرة واوزعها على اكلاتك وبخبرك النتائج والله امبارحة كنت بالماركت ما كان متوفر باذنجان كويس لذلك لاخر هالاسبوع ان شاء الله عموما على تيسير الله بس اعمل اي شي من اكلاتك بخبرك ان شاء الله هلق صار عندي تشكيلة اكلات ما رح اضل محتارة شو اخترع لاولادي طبخات جديدة الله ييسر امرك متل ما عبتيسري علينا

  3. farah 1 October 2011

    الله لا يحرمنا من وصفاتك اللذيذة والحلوة للعزومات انا كتير احيانا بحتار لما يكون عندي عزومة بدي اطباق جديدة وغير تقليدية وبنفس الوقت موصعبة فهالوصفة عز الطلب بالذات انها بتتحضر قبل بيوم ومع غرامي الباذنجان اكيد تحفة مشكورة يا عسل

  4. أم نوران 1 October 2011

    يمممممي كماان جاج 8) شي طيب و الله ..بس عندي سؤالين صغنونين :grin عود الجزر بتكوني سالقتيه قبل و لا هيك على الطبيعة ؟؟والكريم فريش بتدهنيها بالفرشاي و لا شلون؟ :?
    بدك الحقيقة كتييير مشتهية هالأكلة وعم قول هالشي و انا شبعانة :) مع انو مالي بالعادة ادخل الموقع الا و انا جوعانة خخخخخ :grin
    قد كا دعينالك ما منوفي حقك علينا الله يجزيكي عنا خير الجزاء و يباركلك بأهلك و كتاكيتك :roll

  5. آرام 2 October 2011

    أخت منى … الثوم مو مذكور ضمن المقادير :)

  6. منى 2 October 2011

    هلا ام نبيل :)
    و الله اول واحدة نورتي و شرفتي الصفحة :zzz

    ان شاء الله تعجبك يا رب
    اللفائف نجهزها و نرتبها بالصينية بس من دون الصلصة , منغلفها بنايلون و على البراد و باليوم التاني بتغطيها بالكريم و الجبنة و بتخبزيها ;)

  7. منى 3 October 2011

    شكرا اخي ارام , تم التعديل

  8. منى 4 October 2011

    هلا غيوثة :)
    سلامتك , خلص لا تحتاري جربيهم كلهم :grin اوعا تقولي بطلتي تبدي , كو بطالع دفتر العلامات و ببدى بنقص بالشفهي ها :x

    خليلي عيونك الله يخليك لولادك و بيتك و جوزك و تعيشي و تعملي و تبقى خبريني رايك ;)

  9. منى 4 October 2011

    هلا فروحة :)
    ان شاء الله تجربيها و تبيض وجك ادام الضيوف , اكيد هيك اكلات بتفيد كتير في العزايم, التجهيز قبل بيوم بيسهل العزيمة علينا نحنا المعترات ستات البيوت :grin

    رح استنى رايك

  10. zahra.93 30 May 2012

    بدي اسأل لما رح طالعها تاني يوم لحتى احطها بالفرن احطلها كريم فريش مقدار كاسة ولا كيف
    ارجوكم حدا يردلي جواب بسرعة

  11. zahra.93 30 May 2012

    بدي اسأل لما نطالعهم من البراد مشان نحطهم بالفرن بدنا نحط الكريما الفريش والجبنة بس سؤالي كريم فريش مقدار شقد حط مكتوب فوق من كاسة الى كاسة ونص يعني بعد ما صف البانجان بالبيركس حط فوقن كاسة كريمة فريش وإذا احتاج اكتر احط النص ولا كيف
    ارجو الرد بسرعة

  12. Mona 31 May 2012

    اي تمام أختي متل ما قلتي , اذا كانو ملزوزين على بعض ما كتير بياخدوا كريما , و ممكن انت تزيدي الكمية اذا بتحبي يطلع معها صوص ;)

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)