لفائف الباذنجان على الطريقة الايطالية


         وصفة : منى                 2011/09/23                 14 تعليقات
لفائف الباذنجان على الطريقة الايطالية

وصفة من ريم الزعيم , رووووعة , طعمة و شكل و ريحة ., الجبنة السايحة عم تدوب مع نكهة البيستو و البتنجان الي اتشربت من الكل و صارت طعمته خيلة .الصورة بتحكي أحسن من مية كلمة و هل الصورة بتحكي لحالها عن الوصفة

بالصحة و الهنا


2 حبة كبيرة باذنجان , مقطعين لشرائح طويلة رفيعة
ملح و فلفل اسود
5 معلقة زيت زيتون
سن توم مدقوق
4 معلقة صلصة البيستو
175غ موزاريلا مبشورة
بعض اوراق الريحان للتزيين

صلصة البيستو :

60 غ بقدونس مفروم
2 فص ثوم , مهروس
2 ملعقة كبيرة ريحان مفروم
60 غ صنوبر مطحون
60 غ جبنة بارميجان مبشورة
فلفل ابيض حسب الرغبة
150 مل زيت زيتون







• نملح الباتنجان ونتركه لمدة 15 دقيقة ثم نغسله بالماء ونجففه جيدا ونضعه على قطعة قماش جافة .

• نسخن زيت الزيتون في مقلاة كبيرة ونضيف الثوم ثم نقلي الباتنجان على الوجهين حتى نحصل على اللون البني الذهبي ثم نرفعه على ورق المطبخ .

• نرشح كل شريحة باتنجان بالملح والفلفل ثم ندهنها بطبقة من البيستو ثم الموزاريلا ونلف الشريحة ونثبتها بعود خشبي.

• نضع اللفائف في صينية وندخلها الى فرن 180 درجة لمدة 8-10 دقائق .

• اصبحت لفائف الباتنجان جاهزة ,توضع في طبق التقديم وتزين بأوراق الريحان الطازجة.

• طريقة صلصة البيستو , توضع كل المقادير في المكسر لمدة دقيقتين .

التعليقات

  1. abcda81 23 September 2011

    بكرة رح جربها انشاالله .. تسلم ايديكون على هالوصفات الطيبة، جربت وصفة كاري الباذنجان و سلطة العدس و الباذنجان بيجنوا يم يم وهي باينتا طيبة كتيييير كمان :)

  2. آرام 23 September 2011

    رهيبة هالوصفة، بتدخل القلب من أول نظرة، باتنجان مع بيستو أكيد رح تطلع شي فاخر. للتجريب بأقرب وقت. ورح جرب البيستو هالمرة على طريقتك طالما شهدت فيه الأخت منى.
    ألف شكر أخت ريم.
    بس سؤالي عن الثوم، ما رح يحترق أثناء القلي؟

  3. ريم ز 23 September 2011

    صحة وهنا كتير انبسطت انك حبيتيها :)
    بالنسبة للبيستو انا كمان هيك حسيت انو البقدونس خفف شوي من نكهة الريحان مع اني كتير صايرة عم حب الريحان هالايام واشتريت زرعة ريحان حطيتها على شباك المطبخ وطاير عقلي فيها
    على فكرة مرة جربت البيستو مع فيليه السلمون بالفرن وطلع كتير لذيذبيستحق التجربة

  4. منى 23 September 2011

    تسلم ايديك ريم الوصفة كتير سهلة و كتير واضحة و كتير طيبة , حبيت كتير البيستو على طريقتك , طعمته لطيفة و مو قوية لهيك بتزبط حتى مع الازواء الصعبة

    شكرا كتير للوصفة :zzz

  5. ريم ز 25 September 2011

    التوم بتحطو بالاول شوي مشان الزيت ياخد النكهة وبعدين منشيلو قبل ما يحترق
    وصحة وهنا

  6. آرام 5 October 2011

    يسلمو ايديكي أخت ريم، الوصفة طلعت كتير لذيذة، وطريقة البيستو مع البقدونس كمان طيبة. بس شغلة اللفائف ما زبطت معي كتير ولاصت الدنيا، آخر شي تركت شرحات البانجان على حالهن وحطيت فوقهن البيستو والجبنة بدون لف. المهم أن الطعمة روعة :)

  7. violet 7 October 2011

    حبيتا للوصفة بس هي وصفة رئيسية ؟؟ يعني بتتاكل بالخبزة ولا كيف
    ولا هي من المقبلات بس رح جربها عن قريب ان شالله
    بس هلأ بصير حط جبنة قشقوان أو موزاريللا بدل البارمجيان

  8. منى 7 October 2011

    صحتين و عافية اخي ارام , انا السنة الماضية عملت لفائف اول مرة و ما زبطوا معي ابدا , شي كان رقيق اتكسر , شي سميك ما انلف , بقى اذا درت بالك وقت التقسيم بيزبطوا بكل سهولة ان شاء الله
    هنا و عافية على الطعمة

  9. violet 10 October 2011

    قلتلو لزوجي عالمقادير بس ورق الريحان من وين بدنا نجيبه أو شو هاد
    زوجي سأل الخضري عنه وقله بحياتي ماسمعت هيك شي
    بقى كيف هي بتنحل ورح يخلص البانجان بقى يابلحق يامابلحق
    وبالمناسبة الكرفس كمان قلتيلي بشوف منه بالمولات .. كل مابدخل على مول بدور عليه مابشوفه لأنه كتير حابه أعمل مكعبات مرق الدجاج
    ياريت تجاوبيني بسرعة ؟؟؟ ويسلمو كتيييييييير

  10. منى 10 October 2011

    هلا حبيبتي :)
    هي وجبة مقبلات , نحنا اكلناها بالشوكة , و انت بتشوفي شو بيناسبك
    فيك تحطي ايا نوع , بس اصولها بالبارميجان ;)

    ورق الريحان انا جبت منه شتلة و عم استخدم منها كل ما بيلزمني , الا ما تكوني شفتي منها بالخالدية او عند اهل الزرع و كتير حقه رخيص , يمكن 50 ليرة للشتلة الي رح تكفيك طول الصيف

    ليكون عم تدوري على الكرفس الي بتشوفيه بالتلفزيون ؟ هادا مو موجود عنا , الي متوفر شكله متل البقدونس بس ورقه كبير و ريحته حلوة كتير , و بس ما شفتي بقدونس ريحته مو متل البقدونس ( و لا الكزبرة ) معناها هادا هو ;)

    ايا سؤال تاني من عيوني

  11. violet 17 October 2011

    تسلمي يارب اي والله كنت متخيلته نفس اللي بالتلفزيون المرة الجاي رح دور مرة تانية
    وبما انو خلص الصيف رح استنى لصيفية الجاي بشتري شتلة صغيرة ويسلم ايديكي يارب

  12. na3oom 23 October 2011

    يعني شتهيت على الوصفة كتير لأني من محبين البيستو
    بس ممكن القادير بدون غرامات يعني بالمعلقة بالكوب بأي شي تاني
    بدي روح اشتري ريحان دغري قصدي لما يصحلي أروح للسوق

  13. منى 23 October 2011

    رح نزل الوصفة بالكوب ان شاء الله , بس قيسها تكرم عيونك ;)

  14. Mona 11 October 2012

    نعومة هي الوصفة بالكوب

    http://www.l2ma.com/content/view/866

    ;)

تقييم الوصفة
عاديةقد أحضرهاجيدةممتازةأكثر من رائعة (1 votes, average: 5.00 out of 5)