ماما غنوج


         وصفة : منى                 2011/10/02                 10 تعليقات
ماما غنوج

مين اصلا سمحلهن يسموها بابا غنوج ؟ يعني ماما هي الي شوت و قشرت و فرمت و نتفت و عصرت و تبلت , و اهما شي جلت كومة الجليات بعدها , و بالاخير بيسموه بابا غنوج … هذا ليس عدلا و اني اعترض و اني منزعج و اني ممتعض و اني ابحث عن حل

على اعتبار اني بحب كتير سمي الوصفات باسماء حقيقية , قررت رد الاعتبار للامهات وتغير الاسم الي كنت مقررته لهل الوصفة و الي كان ” تغميسة الباذنجان و الفيتا ” الى ماما غنوج , بالله مو اغنج و احلى و الذ .

بابا غنوج قريب على وصفة اليوم ” بس هي اطيب على اعتبارها ماما ” . و وصفة اليوم من المطبخ اليوناني , لما شفت رمان في السوق لاول مرة يوم الخميس الماضي قلت لازم جيب شوي و حضر هل الوصفة ما دامنا لسى عم نطبخ بانجان , و بكل الاحوال بغير موسم الرمان بتطلع ماما غنوج طيبة كمان .

بالصحة و الهنا






حبة كبيرة باذنجان , 500 غ
حبة صغيرة فليفلة حمراء , مفرومة ناعماً
حبة فلفل أخضر أو أحمر حرّ , مفروم ناعماً ( اختياري )
1 - 2 فص ثوم , مهروس
2 معلقة كبيرة دبس رمان
2 معلقة كبيرة عصير ليمون
نصف كوب فيتا , مفتتة
2 – 3 معلقة كبيرة بقدونس , مفروم
بضعة ورقات نعناع طازج , مفروم
ربع كوب حب الرمان , في حال توافره
ربع كوب زيت زيتون
1 معلقة كبيرة جوز مفروم أو صنوبر
ربع معلقة صغيرة كمون
نصف ملعقة صغيرة فليفلة حمراء ناعمة
ملح حسب الحاجة




• تثقب حبات الباذنجان بالشوكة أو السكينة ثم تشوى على الفحم أو على عين الغاز أو في الفرن على درجة حرارة 230 مئوية حتى يحترق جزء من القشر و تطرى الحبات و تنضج, تقلب مرة او مرتان أثناء الشوي ,.تترك حتى تبرد ثم تقشر و تفرم .

• تقلب كل المقادير بلطف , يعدل الحمض و الملح حسب الرغبة , تقدم مع الخبز العربي أو شرائح خبز الباكيت المحمص .

التعليقات

  1. farah 2 October 2011

    والله هالتغنيج للماما عجبني بدي جربي اسمه عندي جبنة فيتا ورمان
    الله يعين هالباتنجان بس لجيبه شو رح ساوي فيه شوي وقلي وفرم :zzz وما خلي وصفة من وصفاتك تنفد من ايدي
    مشكورة يا البي

  2. laraye 2 October 2011

    لك يخليلي عينك با منى طاير عقلي ع رجعت الموقع وحكياتك الحلوة… لازم تعرفي انو كتير مننا بيشتاقوا لحكيك قبل ما يفكروا بالطبخة.
    يا عيني ع كل وصفة بانجان اول ما رح يصحلي رح جرب كل وحدة بدورا شوي شوي ;)
    من 10 ايام عملت عزيمة من عندك وقبلا بفترة عملت ميني فطور اتساعدت فيو بافكارك رح اكتبن بالوصفات المجربة عن قريب انشالله 8)

  3. غيث 2 October 2011

    ههههه رح اسبق ام نبيل بالرد بس يا عين ويا ليل ويا—– ويا احلى منى اش هالوصفة اللي كلها غنج ودلع تسلمي يا حق على الابداع والى مزيد من التميز :)

  4. آرام 3 October 2011

    بحبشت في موسوعة حلب المقارنة للعلامة خير الدين الأسدي الله يرحمه عن البابا غنوج فوجدت التالي:

    أَبو غنّوج: ويسأل السيد وليد فرح فرح عن أبو غنوج:
    أبو غنوج وسموه أيضاً ” المتبّل ” والمخشخش، وسمته الشام بَبَغنوج، كما سمته الأرمنية بابا غنوج وعلي نازيك، نعم أبو غنوج أطلقوه على الطعام التالي: البانجان لاسيما التادفي يشوى بالفرن ثم يقشر ثم يدق بجرن حجري بدقماق خشبي، ويدق ويدق إلى أن ينماع انمياع اللبن الغليظ، وطبيعي أنه بلطمات الدق يهرب من بطش الدقماق لائذاً بالجوانب، الأمر الطبيعي البسيط ولد فيه خيال مسميه الفنان أنه يغنج غنج النساء، ولسان حالهن بهذا الدلال يقول: مابدّي وبدّي، فسماه أبو غنوج، وأبو بمعنى ذو، وصاغ من الغنج على وزن فَعُّول الدال على التلطيف كأَسُّوم بمعنى أسماء، أي الوسماء اللطيفة.
    أما وقد انتهينا من الدق والغنج اللطيف، وجاء دور من يصحبه في سفره إلى الحلقوم، هاهو ذا يصحبه الحامض لاسيما حامض عصير الرمان، ثم هاهو ذا يصحبه ذائب الثوم. ثم هاهي كواكب الزيت تتكوكب في قافلة سيره إلى الحلقوم، كما يذر عليه الكمون ومفروم البقدونس، ونسيت أن أقول ويصحبه الطحينة لمن يرغب فيها. والآن تجهز أبو غنوجنا مسرح الفتنة فتنة الحواس كلها: حاسة النظر إلى جنينة البقدونس على أرض حمراء سوداء يسقيها ذوب عقيق الرمان، وحاسة الشم شم روْح الثوم العجيب لمن يسمونه في معامل الكولونيا بالأنف ذلك الرهيف، وحاسة السمع تنعم بقرقشة الجوز الذي تعربش على السطح سطح صحن الأبو غنوج ووضع يده على خده وصاح: أنا الجوز أنا الجوز، وتسمعه الشهوة شهوة الطعام وتقول: ومِيت السلامات ياجوزي أنا.. أنا. وتضرب بيدها على صدرها، وحاسة اللمس تلمس وتدغدغ أبو غنوج الطفل ويحضنه الرغيف الساخن إلى الحلقوم. وحاسة الذوق تجمع عناصر كل هذه الهناءات المتعاشقة، لتسير بها في موكب بهيج إلى الحلقوم إلى قاعة الحلقوم، أما الكمون هذا الصوفي الشاحب شحوب الغروب، فتكمن فيه كل المزايا شأن كل صوفي، ولكنه متواضع لايدّعي ولايُبين، وأما الطحينة مهجة السمسم الطروب فاسمعها ترسل الهنهونة التالية:
    ها ها صحتين وصحه … وها ها والعافية محّا
    ها ها وجنينة سمسم … ها ها وكل سمسمه بنحّا
    وتزغرد بنات الحي حي الحلقوم وما إليه: لي لي لي ش.
    بقي أن أحدث سامعي عن أني خرجت من داري منذ أربعين سنة، هه، واللا معدّي كاظم الكواكبي ابن عبد الرحمن الكواكبي، وكان آية ذكاء لولا أنه سكير:
    - تْفضل.. تْفضل تغدى عنا.
    - أشو غداك.. ؟
    - غداي أبو غنوج.
    - والله طيب ومقبّل ومغذي وخفيف.
    - لكن يا خير الدين هادا بدّو جنبو .. آه .. بدو خمسينية متلّتْ معبايه بأرمنازيّه دون غيرا لأسمع من حنجرتا الصافية كركعة كيف بلادي.

  5. منى 3 October 2011

    هلا فروحة :)
    ان شاء الله تغنجي بتنجاناتك و تدلعيهم و يطلعوا حلويين متل ما بتحبي :zzz

    رح استنى رايك

  6. منى 3 October 2011

    يعني اخي ارام لو قلتلك اني فاتحة الموسوعة و عم اكتب الي قاله خير الدين الاسدي لحتى عدل وصفة البابا غنوج شو بتقول :grin
    رح فرك عيوني الا شوي لما شفت ردك , شكرا كتير للتوضيح و النقل , اسمحلي رح انقل هل الكلام للوصفة اياها

  7. آرام 3 October 2011

    يا أختي هالزلمة عن جد كنز من كنوز حلب.
    الموسوعة اللي عندك ورقية ولا رقمية؟
    وصلني من فترة نسخة رقمية رائعة بملف أدوب أكروبات PDF حجمها حوالي 23 ميغا، إذا بدك ببعتلك نسخة.

  8. منى 3 October 2011

    عندي ياها ورقية اول نسخة من مكتبة جوز عمتي منذر الله يرحم روحوه , بس اكيد بتمنى انو تكون عندي ياها رقمية كمان , بعود بعطيها لاختي سيما , بوقتها كانت بدها منها
    ممنوتك

  9. منى 3 October 2011

    هلا لاروش :)
    حبيبة قلبي انا الي ما بشبع من حكياتك و كتير كتير بتمنى ارجع شوفك لما رح تجي لهون , انت انسانة عزيزة كتير على قلبي ;)

    ان شاء الله تجربي الوصفات و يكونوا نممم و رح استنى رايك و كمان رح استنى الوصفات الي جربتيها
    بوسات كتيرة

  10. منى 4 October 2011

    هلا غيوثة :)
    راحت هل المرة عليك , انا عم نزل الوصفات الساعة 9 بالليل تقريبا , منكون خلصنا دراسة و عشا و ناموا القطط و اخدة بريك اعلاني لسحب النفس :grin

    شكرا حبيبتي , ان شاء الله تجربيها و تكون على زووءك

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)