امبارحة يوم السبت , العطلة الرسمية في سورية بعد يوم الجمعة , أخدت أولادي و رحنا لسوق المدينة و هو واحد من أحلى و أأقدم الأسواق المسقوفة في العالم , بالنسبة الي وقت أكون جنب القلعة , في شعور غريب بيغمرني , شعور إني بنت هل الأرض , بنت هل التاريخ , شعور إني إنسانة مو عادية لأن رب العالمين خلاني كون بنت حلب ,. شعور بالعظمة و الجلال . بعشق حلب و خصوصي القسم القديم منها , و بس روح لهونيك لا بحس على الوقت و لا على الناس , بحس بس إني قطعة من تاريخ قديم و مستقبل عظيم إن شا الله ..
درت في السوق و اشتريت كم غرض لازمني , و بعدها وصلت لسوق العطاريين , و هو متل كل الأسواق القديمة , محلات صغيرة كتير جنب بعضها , و كلها متخصصة بالبهارات و التوابل , من هل المحل بشتري أطيب شاي أخضر , و من عند التاني بشتري شاي معطر و ريحتو و طعمتو ما في أطيب منهن , لا تقولولي شاي ليبتون و ما بعرف شو , إلي ما داق هل الشاي ما داق الشاي , و من عند هاد بهارت بطاطا , و من عند هاد كاكاو هولندي فاخر و شي بيتقدم للملوك , و من عند عمو اسماعيل ويس خلطة بهارات حلبية لا يعلى عليها , وقفت عندو و طلبت منه يطحنلي ربع كيلو بهار مشكل , و ببعدها طالعت الليستة و بديت شوف و دوق و أخد الي يعجبني , و هو عبيطحنلي البهارات , خطرلي أسئله إذا كان للبهار الحلبي عيار محدد , قالي طبعا , قلتلو بتقدر تعطيني ياه و إلا سر المصلحة ؟ قال الي طبعا بعطيكي ياه , و طالع كرتونة و أخد قلم من ورا ادنه و كتبلي العيارات , و هيك صار عندي طريقة البهار الحلبي أو الي بيسموه السبع بهارات , و كمان الدقة الحلبية , و كمان الخلطة الحلبية , و إلي هوأهم سر من أسرار مطبخنا الطيب , شكرته كتير , و هو صار يقلي عادي , ما عملت شي , هيك الانسان السوري كريم بطبعه
رجعت على البيت و جربت أحضر ربع الكمية إلي كتبلي ياها , و طلعت رووعة , ريحتها الدافية عطرت مطبخي بأطيب ريحة , ريحة حلب الحلوة
بالصحة و الهنا
500 غرام بهار حلو
200 غرام فلفل أسود
100 غرام قرنفل
50 غرام جوزة الطيب
50 غرام حب الهال
50 غرام أعواد قرفة
50 غرام زنجبيل
• توضع كل البهارات و هي صحيحة في مطحنة البهارات ثم تطحن حتى تصبح ناعمة .
• توضع البهارات المطحونة في مصفاة ناعمة للتخلص من كل الشوائب ثم تحفظ في مرطبان محكم الاغلاق حتى وقت الاستعمال .
• الكمية فوق كبيرة جداً و يفضل تحضير ربع الكمية لان البهار المطحون طازج دائما أفضل .
مصادر الصور:
رشا عبد الكريم
صفحة حارات حلب القديمة
يا سلام يا منوش
حننتينا نرجع على سوريا واسواقها وعطارينها و حاراتها الدافية والمليانة حياة
شكرا عل الوصفة و اكيد رح اعملها
بس شو يعني بهار حلو
ازا الو غير اسم او صورة خبريني الله يرضى عليكي
من عيوني التنتين
هو اسمه فلفل حلو و أنا رح حط صور كل البهارات المذكورة في الوصفة إذا الله راد
السلام عليكم و رحمة الله و بركاته
يعني هادول السبع بهارات اللي بيحكو عنهم اختي منى
بدي اسألك لازم البهارات تكون صحيحة يعني لو الواحدة مستعجلة او شي فيها تخلط البهارات و هي مطحونة كمان بشو منبدلها ازا مو موجودة يعني مثلا بالوصفة في بهار مشكل بس ما عندي فشو بحط بدالو او ما بحط شي
ما تواخزيني على اسئلتي لكتيره
بالتوفيق
سلام
السلام عليكم و رحمة الله و بركاته
اختي منى شو قلتي بسؤالي و كمان ازا قررت حط كل شي ما عدا الهيل تنفع و تصير مقبولة يعني او بلاها
بالتوفيق
سلام
هي هي اختي البهارات السبهة وهي خلطة مميزة و طيبة كتير
الوصفة هيك اصولها , لما تنقصي شي أو تحطي بهار مطحون رح تطلع طيبة بس مو متل هل الوصفة , يعني بتجربيها بس مو على ضمانتي :zzz
السلام عليكم و رحمة الله وبركاته
طيب راح جرب و بشوف كيف بيطلعو
اخر سؤال هو ازا بالوصفة مكتوب بهار مشكل او البهارات السبعةو مانا متوفرة عندي شو ساوي
بالتوفيق
سلام
بتستخدمي الفلفل الحلو , أو تشكيلة من بهارت مفضلة عندك
السلام عليكم ..
صرلي ساعة عم اتصفح الموقع وشوي قول سوري شوي تانية قول لاء .. بس لما شفت هالخلطة هي عرفت انك سورية حلبية أصيلة ..
تسلم ايديكي عهالخلطة .. وفعلاً اللي ما بيعرف هالخلطة من البهارات معناتا ما بيعرف البهار اشي هوه ..
سلام عليكم
مية اهلا و سهلا بشرى و عليكم افضل السلام و اتم التسليم
نور الموقع بأحلى عضوة حلبية ,هي كلمة “اشي” ما بتطلع غير من عنا :grin
ان شاء الله يعجبك الموقع و تبقي تزورينا دايما
السلام عليكم و رحمة الله و بركاته
اختي منى حب الهال بيكون بقشوره او من غير قشور
بالتوفيق
سلام
حبيبتي منى هالخلطة خلتني أشتاق لماما لأنو ماما لهلأ بتعمل البهار لحالا وما بتشتري مطحون أبدا متل ما كانت نانتي تعمل الزعتر الحلبي على ايدا ولكل العيلة
بس سؤالي انو هل الزنجبيل من مكونات البهار الأصلية؟ لأني بصراحة بمصفاية تجفيف البهارات اللي كل طفولتي بتزكرا ببلكون المطبخ ما كنت أشوف الزنجبيل بس بنفس الوقت بتزكر انو كانو 7 حزيرة بقاهههه
هلأ عم بجيب بهاراتي من عند امي وبدبر حالي فيون
يلا بلكي بصير بفضلك بعمل وببعتلا
الله يعطيكي الالعافية المقدمة بتطير العقل
السلام عليكم ورحمة الله
سقى الله أيام حلب اللي مضت من سنيييييين، ريحة هالخلطة بحلب عن جد مميزة، وعكل حال فعلا بهارات كل منطقة بتختلف كتير عن منطقة تانية.
ماما ما كانت كتير تحب الخلطات، كانت تحط للأكل فلفل وفليفلة وهيك يعني عالخفيف. ولكن دااااايما كانت علبة البهارات هي موجودة ولما تروح عالمدينة تجيب منون، يعني ما بشوفها تستخدمها بئى وين كانت تروح ههههه ؟
بدي اسألك منى … شو هو البهار الحلو يلي حاتطيه بأول المقادير ؟؟؟
وغير هيك ……. من شي سنتين تلاتة عرفت أن [URL=http://www.saaid.net/Doat/naif/6.htm]جوزة الطيب[/URL] محرمة شرعاً بحسب المذاهب الأربعة ……. فخلصت الكمية يلي كانت عنا (ببيت أهلي) وبطلت جيبها :roll .
بس ان شاء الله يبئى بحضر الخلطة بدونها ما مشكلة 8) . شكرا كتير لمنوش ولعمو اسماعيل.
صحي كان في واحد كنت اشتري من عندو بالمدينة، محلو كتير كتير حلو معلق عواجهة المحل نجوم بحر وشغلات مجففة .. كان كتير طيوب الله يذكرو بالخير. وعفكرة هالمحلات لا تستهينو فيون بنوب بنوب عندون شغلات غريبة عجيبة ما بتخطر عالبال لذلك ممكن أحيانا تسألوون: شو عندك كمان شي غريب ؟ لأن كل مرة كنت روح لعندو كنت اكتشف شي جديد تماما. هههه مرة بدي اشتري بخور، آم سألني البياع: لشو لازمك ؟ .. قلتلو: بدي بخور وبس … قلي : يعني للريحة ولا للسحر ولا شو ؟ …. قلتلو : هات من كل شي عندك. وطلعت مربعات خضرا ودوائر حمرا وبودرة وقطع سودا وما بعرف شو (مو بعيدة تكون لسانات ضفادع وعيون سحالي :grin ).
آخر مرة زرت فيها سوريا بالعيد الماضي ما نزلت عحلب، ضليت ببيت حماي بالشام فأخدتني بنت حماي عالبذورية ، وهي نفس سوق العطارين عنا … وكمان طلع شغلات غريبة عندو، وشو ما قلو: في عندك ؟ .. يقلي: في … ومدري من وين شي من تحت الأرض شي من عالسقف بيطالعلي. آخر الشي قلت بدي أعجزو …. ووالله اخترعتها من عقلي قلتلو: عندك زيت كركم ؟؟؟؟؟؟
قلي: ايه أديش بدك ؟
طولت عليكون :zzz يله ناطرة اعرف شو هو البهار الحلو وشكرا …..
والسلام عليكم
البهار الحلو هو نفسه الفلفل الحلو و طالعة صورته بالصورة الجماعية للشباب فوق
بالنسبة لجوزة الطيب انا سالت المفتي و قال لي مو حرام , بقى ما بعرف مين المزبوط :roll
شوضحكت على زيت الكركم :grin :grin , الي بيعيش بيسمع , بس و لا مرة خطر ببالي اسال عن اشيا غريبة , في كذا نوع بهار رح جرب دور عليه , ما دام لاقيتي زيت للكركم فمن باب اولى لاقي زعتر فارسي , الزعتر الي ما لاقيت منه عند المحلات الي بتعامل معها
شكرا كتير jassy دوما ردودك مو بس ردود , فيها شي اكتر و انا انبسط كتير و انا عم اقرها
هلا فيك
يعني اذا بدنا نحط خلطة السبع بهارات مع شاورما الدجاج سوف يصبغ لون الدجاج بالأسود و بكون لحم غامق مع طعم حد شوي شو رأيك
وصفتي لشاورما الدجاج ما بدها سبع بهارت , فيكي تشوفي الوصفة هون
http://l2ma.com/?p=1013
بس اكيد ما رح يكون اللون ابيض , و الطعم و لا اروع , جربيها
سلام
انا شاب مغترب وعجبني الموضوع انشاء الله اجربو
الله يعطيكم العافية كللكم
مية هلا فيك
الله يعطيك العافية
الله يعافيك يا قمر , منورة
و الله العظيم بكيتيني و أنا عم أقرا عن حلب و أسواق حلب و القلعة و عظمة حلب. بس هلأ ما عاد في حلب، ما عاد في شي حلو بحلب إلا أهلها. قتلو و حرقو كل شي حلو فيها. الله يحميها و يحمي أهلها و يرجعلها ماضيها اللي محفور بالقلب. و يسلم إيديكي كتير على هالوصفات الرائعة دوما.
ان شا الله بترجع حلب و منعمرها حجر على حجر
اللهم امين يا رب
منورة نورا
الله بارك فيك انا من القدس الشريف وربيت فيها وما في زيها بلاقي الدنيا ذكرتيني وانت عم تحكي عنها والبلده القديمة داخل السور سوق العطارين والخان والواد وريحتها غير هواها غير بقول لهم لما بدخلها بحس الهواء تغير بحس كاني بعالم تاني والحلو كل الابواب وكل الطرق بتوصلك لابواب المسجد الاقصى بطريقه او باخرى كانه قلب القدس الي عم يبكي بس شو نقول ربنا يرجع سوريا وفلسطين لعزهم الي بيستاهلوا ويفرح قلوبنا
الللله يا ام محمد ، الله
هي بلادنا العربية بتشبه بعضها ، اصالتها و ريحتها و طيبة ناسها
يا رب الفرج القريب ع الجميع و نورتي يا ام محمد
تسلمي يا رب ومنوره الدنيا بوجودك انا كثير انبسطت لما لقيت المدونه تبعتكم وان شاء الله بنظل على تواصل فيها للخير
ان شا الله
استاذة منى بجد بشكرك اوي على مواضيعك وبجد اانا استفدت كتير بس سؤال لو ممكن هو صابون الغار ده بيتعمل ازاي لو تعرفي يا ريت ما تبخلي علينا وشكرا عزيزيتي
اهلا و سهلا رنا ، شرفتي الموع و نورتيه
صراحة ما بعرف ابدا كيف بيتحضر ، الي بعرفه انه ع مميز عن بقية انواع الصابون لان مواده طبيعية مية بالمية ، غير هيك ما عندي فكرة
نورتي الموقع و شرفتيه
شكراً كتير عالوصفة
عندي سؤال بخصوص حب الهال السؤال انسأل مسبقاً بس ما شفت رد عليه. منضيفو بقشره و الا مقشر؟
مو رح ننخله بعدها ، بقى انا بستخدمه بقشره
شكرا كتير انا حمصي
كنت أنزل بالشهر مرتين لسورية ولحلب بالذات
بحكم العمل .
سوق المدينة
كنت اشتري البهارات من عند قريب الي من بيت الططريق
رجل طيب وصالح
شكرا للوصفه
والاه يفرج على هل البلد
اللهم اممين ، نورت اخي
حبيبتي سوسن يخليلي ياكي يا سكرة