الخبز الذهبي المقرمش


         وصفة : منى                 2013/04/24                 11 تعليقات
الخبز الذهبي المقرمش

الخبز في البيت واحدة من اكتر الاشيا الي بستمتع فيها في المطبخ , تحضيره , ملمس الطحين الناعم , و ملمس العجينة الطرية و هي عم تشد و تتجمع تحت ايدي و كل ما عجنا أكتر و تعبنا أكتر رح ناكل أطيب , ريحة العجينة بعد التخمير و الوقت الي أخدته العجينة لحتى تتحول من طحين و مي لعجينة مخمرة , بتقلك كل شي طيب بده صبر , ريحة الخبز الدافية و هي عم تسبح في البيت , لونه الأشقر الي عم يحكي عن التفاؤل و الشمس و أخر شي لما طعمته بتقلك ما نستنى شي من برة , كلو بايدنا أبرك و أطيب ..


خبزي اليوم مختلف و فيه مكون جديد وكمان شغلة جديدة بالخبز . هل الاشيا خلت قلب الخبز طري كتير و هش , و خلت قشرته مقرمشة و كانك جايبتيها هل الدقيقة من أحسن مخبز بالعالم ..شو السر ؟


.اول الشي رح استعمل مع المقادير شوية خل , هل الاضافة الصغيرة الي ممكن الواحد ما يقتنع فيها , رح تخلي الخبز طري طري طري , بياخد العقل و طراوته باليوم التاني ما بتتغير , كانه تازة و هل الدقيقة مخبوز , ما بعرف ليه الخل بيعطي هل النتيجة , بس بمجرد ما تجربي اضافة شوية خل لمعجناتك ما عاد تغيري هل العادة ابداً لكل انواع المعجنات , و لحتى تقتنعي بالفكرة اكتر فكري كيف اللبن بيخلي المعجنات خيلة , الخل رح يعطي ذات النتيجة و هي بالنسبة لقلب الخبز .


تاني شي وقت الخبز رح نجيب علبة من علب البخ الي منستعملها لبخ الزرع أو بخ الكوي , أو حتى علبة بخ بلور قديمة و منضفة كتير منيح . الفرن بيكون حامي و عم يستنى الخبز المخمر ليدخل فيه , منحط الرغيف بقلب الفرن و منبخ حيطان الفرن و أرضه بشي عشر بخات مي على السريع و نسكر باب الفرن , رح تشوفي انو طلع بخار و ملى كل الفرن , بعد شي عشر دقايق منرجع منفتح باب الفرن بلطف و بسرعة و منبخبخ الحيطان و الارض و منطبقه بلطف و حنية … خطوة البخبخة رح تخلي هوا الفرن رطب و هل الرطوبة رح تطري وج الخبز باول عملية الخبز و لهيك رح ياخد الخبز راحته و ينفش على مهله و هو عم ينفش رح تتشكل على وجه طبقة رقيقة و مقرمشة كتير و لونها حلو . و اذا مو جاي على بالك تبخبخي فيكي تكتي شي ربع فنجان مي بأرض الفرن باول الخبز و ترجعي تدلقي ربع فنجان تاني بعد عشر دقايق ..



كيلو الطحين على القياس رح يكون حوالي 8 كاسات من الكوب المعياري او كاسة النسكافيه الحمراء , و حوالي 6 كاسات و نص من الكاسة الفرنسية الي بيعيروا فيها امهاتنا , كاسة ام البصمة , و اذا عندك ميزان بيكون أسهل الشي ..


بالصحة و الهنا

شو لازمنا ؟

ملعقة كبيرة خميرة
2 ملعقة كبيرة سكر
2 كوب حليب دافئ
كيلو طحين عادي
نصف ملعقة كبيرة ملح
ربع كوب حليب بودرة
ملعقة صغيرة خل أبيض
طريقة التحضير

ツ تذوب الخميرة و كوب من الحليب الدافئ و السكر في وعاء صغير و يترك جانباً لمدة 5 دقائق , يضاف حوالي نصف كوب من الطحين و يقلب الكل بملعقة حتى يتشكل مزيج دبق , يغطى باحكام و يترك حتى تظهر الفقاعات على الوجه لمدة 20 دقيقة .
ツ يقلب باقي الطحين و الحليب البودرة و الملح سوياً حتى يتجانس الكل , يضاف مزيج الخميرة الدبق و الخل , تعجن العجينة و يضاف باقي الحليب الدافئ بالتدريج و يعجن الكل بعد كل اضافة حتى الحصول على عجينة طرية ملساء و ناعمة لمدة 10 دقائق تقريباً , كمية الحليب تقريبية , يمكن أن تزاد أو تنقص حسب الحاجة .
ツ تغطى العجينة باحكام و تترك في مكان دافئ حتى يتضاعف حجمها .
ツ تقطع العجينة الى اربع قطع متساوية , تبرم كل قطعة حتى تشكل اسطوانة بالحجم المطلوب , ترتب الأرغفة في صينية خبز مغطاة بورق زبدة و مدهونة بخفة بزيت الزيتون و تغطى و تترك حتى يتضاعف حجمها .
ツ يحمى الفرن على درجة حرارة 220 درجة مئوية . باستخدام بسكين حادة تعمل شقوق مائلة على وجه العجينة . تخبز الأرغفة على الرف المتوسط لمدة 25 دقيقة أو حتى تنضج و تشقر و تتحمص القشرة . تطبق تقنية بخ الماء المشروحة بالتفصيل في المقدمة .
ツ ترفع الأرغفة و تبرد على مشبك سلك , تقدم حسب الرغبة .
  • وصفات تانية ممكن تعجبك


التعليقات

  1. souha 24 April 2013

    يمي شكلو كتير لذيذ وبيشهي تسلم دياتك فعلا منونة في تخاطر قوي بيناتنا كتير قريبة من الوصفة يلي نزلتها على الغروب أكيد هادا من المحبة على كل حال مو أول مرة بصير تخاطر أفكار بتذكري يلنجي الملفوف يا الله شو كانت أيام حلوة يا ريتها ترجع

    • منى 24 April 2013

      لا ام السوس يالنجي الملفوف اول مرة بعرفه عندك و من بعدها صار غرام :)
      الله يديم المحبة , و انت ام الزوء و الطبخ المنفنف

  2. souha 24 April 2013

    خجلتيني منونة من بعض ما عندكم

  3. douha 24 April 2013

    تسلم ايديك يا منى
    انا عملتوا اليوم بس لسه ما خبوتو
    هلئ انا مو شاطرة كتير بالعجين وخاصة اذا عم اعجن كمية كبيرة بس انعجنت معي بالاكتر من تلت ساعة يعني طولت شوي بس ما طلعت طرية كتير يا ترى هيك صح ولا انا غلطانة
    حدسي بيقلي اني غلطانة

    • منى 28 April 2013

      هلا ضحى , قصدك طولتي بعجنه تلت ساعة ؟
      اذا ما طلعت طرية معنها ناقصها شي , ممكن سوائل كمان
      هي الوصفة سهلة و ما بدها شطارة … رايدة اعرف شو صارمعك

  4. amura 25 April 2013

    يسلم ايديكي مدام منى … بالفعل اني بدوب معك بالوصف الرائع يلي بتوصفيه ومع كل وصفة بجربا بدعيلك كوووومة دعوات الله يجعلن من نصيبك … يسلم ايديكي وان شالله قريبا رح جربا لانها بالفعل يممممم بتشهي

    • منى 28 April 2013

      الله يسلمك أمورة من زووءك حبيبة قلبي , ان شاء الله الك دعوات غالية و حلوة متل الي عم تدعيهن و اكتر

      رح استنى رايك بعد التجربة

  5. manar 29 April 2013

    كنت بدي اسألك ممكن استخدم خل التفاح ولا حصرا ابيض

    • منى 30 April 2013

      الاحسن خل ابيض و هو متوفر بكل مكان , بس فيك تستخدمي ايا نوعية خل تانية متوفرة عندك

  6. نور من قبرص 16 January 2014

    وصفة رائعة .فينا نكه الخبز باعشاي ونضيف اضافات تانية متل الزيتون اونحشيه اجبان حتى يطلع محشي

    • منى 8 July 2014

      اي فعلا ، انت و ابداعك و فنك و الخيارات ما الها حدود :)

تقييم الوصفة
عاديةقد أحضرهاجيدةممتازةأكثر من رائعة (3 votes, average: 3.33 out of 5)