الزيتون المكلس


         وصفة : منى                 2013/12/14                 4 تعليقات
الزيتون المكلس

من كم سنة , أيام ما كنت بدي جرب حضر كل شي بالبيت , جربت كلّس الزيتون على إيدي و نجح و كان كتير طيب , بس راحت و رحنا و ما عدت عدتها للتجربة .


هل السنة كنا بجمعة و حكوا على تكليس الزيتون , قمت ارجعت اشتهيت حضره , الي شجعني اكتر انو ل كم يوم اسمع انو فلانة كلّست زيتون و علانة كمان كلّست , و خالتي و مرت خالي و خالة امي و و و , قمت نفضت غبرة الكسل عني و قلت بدي كلسه أنا هل السنة كمان ..


لما كلّسته من زمان أستعملت الكلسة , بس كل الي جربها هل السنة استخدم القطرونة , قمت قررت استعملها انا كمان , و الطريقة مو صعبة أبداً بس بتاخد شوي وقت , و بدها انو يبقى الزيتون براسنا و نحركوا كل شوي وقت يكون منقوع بالقطرونة و كمان وقت نكون عم نحليه من القطرونة , و هي شغلة كتير مهمة لتكليس الزيتون لحتى تنجح العملية و يطلع الزيتون كلو لون واحد . و كمان مهم أنو نختار وعاء يكون فتحته مو كبيرة و نغطي الوج بطبق كبير لحتى ما نخلي و لا زيتونة تتفلحص من التكليس . منحرك و منرجع الطبق فوق الزيتون لحتى نضمن انو كل الحبات مغمورات بشكل كامل ..


أخر شي رح احكي عن اختيار الزيتون المناسب للتكليس , للزيتون المكلس كل ما كانت الحبة كبيرة بيكون أحسن و رح نشوف كذا نوع معروض , منختار الزيتون الي لونه أخضر غامق . و في شغلة اتعلمتها من سهى قمند أنو نشتري الزيتون بعد بداية موسم المطر لأن بيكون الزيت فيه أكتر و طعمته أطيب و كمان بيحلى بسرعة .


كمان من سهى اتعلمت تتبيلة بتجنن للزيتون المكلس , بالعادة الزيتون المكلس مناكله مع خبز و حلاوة , و التتبيلات بس للزيتون المكسر , مع وصفة سهى تبلنا الزيتون المكلس بتتبيلة غير شكل , كان فخاامة و تغير شكل و شي بينعاد كل سنة .


بالصحة و الهنا

شو لازمنا ؟
5 كيلو زيتون , حبة حجم كبير
100 غ قطرونة
ملح خشن طبيعي , صخري أو بحري حسب المتوفر
طريقة التحضير

1 - ينظف الزيتون من الورق و العيدان و يغسل و يوضع في وعاء ذو فتحة غير كبيرة و يغمر بالماء .

2 – توضع القطرونة في وعاء و يضاف عليها حوالي اللتر من الماء الفاتر , تحرك بملعقة خشبية حتى تذوب تماماً . تصب على الزيتون و تحرك حتى تتوزع بشكل جيد . يوضع طبق على وجه الزيتون كي تبقى حبات السطح مغمورة بشكل كامل في ماء التكليس .

3 – يترك الزيتون لمدة أقصاها 24 ساعة في ماء التكليس و يراعى التحريك الدائم و المستمر للزيتون . بعد مرور 12 ساعة تفحص احدى حبات الزيتون , تقص لنصفين , إذا كان لحم حبة الزيتون بلون واحد متجانس فهذه دلالة أن الزيتون قد تشرب الكلس و أصبح جاهزاً للمرحلة التالية . احتاج الزيتون الذي حضرته هذه السنة لـ 12 ساعة . بعد أن يتشرب الزيتون الكلس ننتقل فوراً للمرحلة التالية و لا يترك لفترة إضافية في ماء التكليس .

4 – يغسل الزيتون و يغمر بماء عادي و يترك لمدة 24 ساعة , يغير الماء كل ساعتين أو ثلاثة للتخلص من كل أثر للقطرونة . سيصبح ماء الزيتون أسود .

5 – يجهز ماء مملح بعيار ملح ثقيل ( عيار البيضة ) . يوزع الزيتون في المرطبانات و يغمر بالماء المملح و يغطى بشكل جيد و يحفظ لمدة أقصاها شهران . عند الاستخدام يتم التخلص من الماء المملح و يغمر الزيتون بماء عادي لتخفيف الملح .

6 – يقدم الزيتون على الفطور أو العشاء مع الخبز العربي و الحلاوة الطحينية لمن يرغب .

زيتون مكلس بالتتبيلة على طريقة سهى

7 - لتحضير الزيتون المكلس بالتتبيلة يصفى نصف كيلو من الزيتون المكلس من الماء و يقلب فوراً مع القليل من زيت الزيتون كي يحافظ على لونه , تضاف ملعقة كبيرة دبس فليفلة و نصف ملعقة صغيرة كزبرة يابسة و فص ثوم مهروس و ليمونة كاملة مغسولة و مقطعة لمكعبات و ملعقة أو ملعقتان زعتر أخضر طازج و يستبدل بملعقة صغيرة من الزعتر اليابس في حال عدم توفره و المزيد من عصير الليمون حسب الرغبة , يوضع في مرطبان صغير و يغمر بزيت الزيتون و يترك طول الليل في البراد حتى يتشرب النكهات , و يقدم .

التعليقات

  1. رنا 14 December 2013

    شي بيجنن بس ممن وين بدي جيب القطرونة انا ههههههههههههه تسلم ايدك يارب لونه بيشهي

    • منى 20 December 2013

      الله يسلمك رنون , ما بعرف دبري حالك :D

  2. لينا 22 December 2013

    يسلم ايديكي انا جديدة بالموقع وحابة كون من هلاسرة الحلوة كتير بس عندي سؤال الزيتون الاسود نفس الطريقة لانو انا بعمله وبيتغير لونه

    • منى 22 December 2013

      مية هلا فيك لينا , و الله منورة العيلة
      انا مو مجربة الزيتون الاسود بهي الطريقة , ما عندي فكرة للاسف , حبيت ساعدك كتير

تقييم الوصفة
عاديةقد أحضرهاجيدةممتازةأكثر من رائعة (4 votes, average: 4.00 out of 5)