برغل بكوسا على الطريقة التركية


         وصفة : منى                 2010/10/03                 21 تعليقات
برغل بكوسا على الطريقة التركية
كوب برغل خشن
5 - 6 ملعقة كبيرة زيت زيتون
1 حبة كبيرة بصل , مفروم خشنا
ً 1 حبة متوسطة فليفلة خضراء , مفرومة ناعماً
3 حبة متوسطة كوسا , مقطعة مكعبات صغيرة
2 حبة كبيرة بندورة , مقشرة و مفرومة ناعما
ً1 كوب و نصف مرق دجاج أو ماء مغلي
نصف ملعقة صغيرة بهار مشكل
رشة قرفة
نصف ملعقة صغيرة فليفلة حمراء ناعمة
ملعقة صغيرة دبس فليفلة
نصف ملعقة صغيرة ملح أو أقل حسب الرغبة

1 – يوضع البرغل على مصفاة ناعمة و يغسل بالماء البارد حتى يصبح ماء غسيله شفافاً ثم يترك ليجف حتى إعداد الخلطة .
2 – يحمى الزيت على نار متوسطة ثم يضاف البصل و يقلب حتى يبدأ لونه بالتحول للأشقر , تضاف الكوسا و الفليلفة المفرومة و تقلب لمدة خمس دقائق .
3 – تضاف البندورة المفرومة مع عصيرها و دبس الفليفلة و تقلب على نار متوسطة لمدة دقيقة . يفضل استعمال النوع الحرّ من دبس الفليلفة لنكهة أطيب .
4 – يضاف المرق المغلي و يترك حتى يغلي مجدداً ثم يضاف البرغل و بقية البهارات و يقلب بلطف باستخدام شوكة و بعد أن يغلي مرة ثانية يغطى و يترك على نار متوسطة لمدة عشر دقائق ثم تهدى النار و يترك لمدة 15 دقيقة أو حتى يمتص البرغل كل السوائل .
5 – يترك البرغل في القدر المغطى لمدة 15 دقيقة قبل التقديم حتى يهدأ و تتفلفل حباته ثم يقلب بشوكة و يسكب في طبق التقديم و يقدم مع اللبن العيران أو السلطة حسب الرغبة .
  • وصفات تانية ممكن تعجبك


التعليقات

  1. غيث 3 October 2010

    الله يسلم ايديك يا ميمو بتعرفي امس لما كنت بحلب سمعت من وحدة انو بيت احماها بيعملو البرغل ببندورة معه كوسا بقلبه قلت لها اش هالتعفيس (عدم مؤاخذة الحكي لها كان) بس الان اكيد طالما انت حكيت عن هالاكلة اكيد طيبة واكيد رح اجربها واقول للي سمعتها منها تجربها والله مالي خبر بقى بهيك اكلة بعرف البرغل ببندورة شكرا منى ورح اجربها بالاسبوع القادم ان شاء الله ورد لك خبر :grin

  2. dado 3 October 2010

    منوش.. بذمتك هالأكلة لمين؟
    عنجد على مزاجي بكل شي فيها.. ومتل العادة عم شوف الوصفة وانا بالشغل وعم اتحسر. عندي كم حبة كوسا وكان جاي عبالي جرب شي أكلة جديدة.. وهي عز الطلب. شكرا يا أحلى منوش

  3. منى 3 October 2010

    هلا غيوثة :)
    لاااا و الله مو تعفيس و لا شي , جربيها و قويلها تجربها , حاكم في ناس بس ا كان شي اله علاقة ببيت الاحمة ما بيعود يخرط مشطهن :grin

    عم استنى ردك غيوثة , و اشتقت كتير لطلتك بالموقع ;)

  4. منى 3 October 2010

    هلا دلوش :)
    و الله الك الوصفة و الله بيعرف ان كل ما بعمل اكلة نباتية بذكرك و بشتهيك و بتنغم فيها لو تدوقيها :zzz

    لا تتحسري , هلا بكرة بعشر دقايق بتساويها و يا رب تعجبك

    دلوش ايميلي فيه مشاكل , رح ابعتلك ايميل من بيتي الجديد :cry

  5. farah 4 October 2010

    يسعدلي هالمسا زمااان مشتاقة للموقع من رمضان لليوم لصحلي ادخل واتصفح براحتي يعني كنت فوت خطف وما يصيرلي فرصة سلم عليكم
    اشتقتلكم كتير وبالنسبة لطبختك اليوم عزيزتي منى روعة هي من أكلاتي المفضلة والمنقذة عند ضيق الوقت
    وعلى فكرة انا كتير أوقات بطبخها بلب الكوسا بعد تعصيره من ماءه لأن بعد طبخة المحاشي هيك أكلة بتطلع لذيذة وخفيفة بزيت الزيتون بس الفرق الوحيد اني ما بحط فليفة خضرا و احيانا كمان بدون بندورة وعن جد بكل أحوالها كتيير طيبة
    خلص الطبخة الجاية بدي جربها مع الفليفلة على طريقتك سلم دياتك يا قمر :)

  6. juman 5 October 2010

    يا ستي شو هالاكلات الطيبة,, انا اول مرة بسمع فيها باينتا طيبة,,بجربا وبحكيلك :)

  7. اماني 5 October 2010

    الله يعطيكي العافية على الوصفات المتميزة انا كمان اول مرة بسمع بهل اكلة بس اكيد رح جربها وخبرك عن النتائج باذن الله

  8. dado 7 October 2010

    منوشة.. كيفك اليوم؟
    هلأ شو مشان هالأكلة؟ أنا طار عقلي بالوصفة، بس ما بعرف ليش كل ما حكيتها لحدا بيقلي: إي شو هالتعفيس؟؟ :roll
    قلتلها لرفيقتي عليها ، قال مو ناقص غير تفقشي عليها بيضة وتعمليها “جظ مظ”* عالطريقة التعفيسية :grin
    شو بدنا بهالحكي، أنا الأكلة عجبتني كتير، صحي ما تهنيت فيها، بس ناوية عيدها بأقرب فرصة. ما بعرف شو صرلي يوم عملتها، أول ما حطيت السفرة بلشت نفسي تلعي وما أكلتها لتاني يوم.
    منوش .. ادعيلي.. انشالله عشر تيام وانا كمان ببعتلك من بيتي الجديد يلي حكيتلك عليه.

    * جظ مظ: أو جز مز.. بيض بـ بندورة!

  9. منى 7 October 2010

    لك شو دلوش , الحمل ماثر عليك الحمل تمام الظاهر ,

    مممم , انا بحبها كتير , بتعرفيني انا و البرغل و الكوسا و و الاكلات الي ما فيها لحمة اديه صحبة :zzz

    يلا رح استنى ايميل منك بس تستقر اوضاعك :roll

  10. منى 7 October 2010

    هلا فروحة :)
    رمضان كريم عليك و على كل عيلتك و منيح هلا فضيتيلنا شوي

    مممم , اكيد رح تطلع طيبة كمان بلب الكوسا , شكرا كتير للفكرة الطيبة . ان شاء الله تجربيها بالفليلفة و تحبيها

    شكرا كتير فرح لوصفة فتة المكدوس , خطيرة جربتها من كم يوم , طلعت كتيررررر طيبة ;)

  11. منى 7 October 2010

    هلا جمان :)
    جربيها و ان شاء الله بتحبيها , و خبريني رايك ;)

  12. منى 7 October 2010

    هلا اماني :)
    رح استنى رايك و اتمنى انها تكون على زووءك :)

  13. farah 8 October 2010

    يا ستي جربتها من يومين كنت عند أختي وكنا عم نساوي كبة لبنية ومقلية وخطرت لبالي هالأكلة سألتها عندك كوسا قالتلي لأ بس عندي لب كوسا سألتها وفليفلة خضرا قالتلي موجود يا ستي وبربع ساعة كنت رافعتلها هالطبخة عالنار وهي تقول مين رح ياكلها مع الكبة ما بتصدقي شو طلعت لذيذة وخفبفة وسكبتها للأولاد قبل الكبة ونالت الاعجاب والحمد لله وعن جد نكهة الفليفة مميزة سلم دياتك يارب

  14. منى 9 October 2010

    الف الف صحة و هنا على ابك و الب اختك و ااولاد الحلويين فروحة , كتير مبسوطة انها عجبتكم و كمان ممنوتك كتير لثقتك في :roll

    هنا و الف عافية حبيبتي ;)

  15. رنا 24 October 2010

    ياعيني ياعيني ……بس قولولي مين قال تعفيس …حبيباتي …الحلبية عندهن برغل ببندورة اكلة عريقة ومعروفة وكتير بتشبهه بس بلا كوسا …واعزائي الشوام عندن اكلة كمان عريقة وهي برغل وكوساية كمان من اكلاتي المفضلة بس بدون بندورة بتكون
    ياستي يسلم هالايدين …صح انه وصفة نباتية ودرويشة بس رائعة جدا وانشالله رح جربها هاليومين ;)

  16. na3oom 4 November 2010

    الصراحة كتيييير حبيتها بس صارت حدة شوي وانا عم آكل وزوجي بقول وقفي أكل مشان الصغير عم رضعو ولا كنت نسفت الصحن كلو

  17. منى 9 November 2010

    رنوش جربيها و خبريني لان عن جد يم يم يمي , هيك اكلة خفيفة و نظيفة و حبوبة :zzz

  18. منى 9 November 2010

    صحتين و الف عافية نعومة على البك , الحمد لله انها ظبطت معك و كانت على زووءك . عوافي ;)

  19. mayada 12 November 2010

    سلام ياعزيزتي كريمة شلونك ميمو وين وين هل غيبة بصراحة كتير اشتقنة لاكلاتك اللذيذة وحلويات شتوية وين ماعمنشوف شيءجديد والله من يومين قال لي زوجي وكمان اولادي وين حلويات جديدة شو ما عم بتشوفي لقمة طيبة عل نت بقا الله يرضا عليكي بدنا شي جديد وطيب الله هم هم هم الله لايحرمنا انتي موفقة باي

  20. منى 14 November 2010

    تكرم عينك ميادة , ان شاء الله في اشيا طيبة على الطريق :zzz

  21. سارونات 22 July 2011

    السلام عليكم و رحمة الله و بركاته
    منوش يسلمو عالوصفة
    انا في عندي برغل احمر و كان بدي اسألك اذا بينفع للوصفة

    سلام

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)