بطاطا مشوية , بثلات حشوات


         وصفة : منى                 2012/03/07                 27 تعليقات
بطاطا مشوية , بثلات حشوات

هي البطاطا من اطيب الوصفات عندي , أول مرة دقتها كانت في مطعم تركي صغير على شط البحر في استنبول , المطعم كان مختص بالبطاطا المشوية و بس . و الفرن عندو كان قديم و من الحديد و شكلوا لحاله تحفة ..
ادام الفرن في صحون بيضاء مبردة , نظيفة , فيها أشكال و الوان من الخضار و الحشوات , جرجير , درة , دجاج مدخن , فطر , كولسلو , حتى الهوت دوغ كان شكله حلو .. يا ترى الوصفة طيبة كتير و االا انا كل ما بحضرها و باكلها برجع بالذاكرة لهديك الليلة الدافية

بالعادة بحبها سادة مع رشة ملح و فلفل و زبدة و ممكن جبنة موزاريلا أو بارمجان , بس اليوم رح نحضرها بتلات حشوات , كل واحدة منهم أطيب من التانية .. بتمنى تحطيهم على بالك و تجربيهن بشي يوم من الايام ..

الوصفة الها سريين , لحتى تطلع معك متل بطاطا استنبول , السر الاول انو ما تغلفيها بورق الالمنيوم وقت الشوي لان المفروض انو تنشوى على نار قوية مو تنطبخ على البخار , و السر التاني انو تهرسيها بالشوكة مع الزبدة و البهارات , خفقيها لحتى تصير ناعمة و خفيفة و بتجنن

يا ترى انت كيف بتحضري هل البطاطا

بالصحة و الهنا




4 حبة بطاطا , مفروكة جيداً و مغسولة و غير مقشرة
ملح و فلفل اسود
4 قطع زبدة صغيرة

حشوة البيتزا :

صلصة البيتزا
جبنة تشيدر , مبشورة

حشوة الجرجير :

4 ملعقة كبيرة مايونيز
4 ملعقة كبيرة لبن مصفى قليلاً
جرجير مفروم ناعماً
1 فص ثوم مهروس

حشوة الفطر :


2 كوب فطر فريش
ملعقة كبيرة زبدة
جبنة قشقوان مبشورة
ملح و فلفل أسود



• تغسل حبات البطاطا جيداً و تفرك للتخلص من التراب , تجفف و تثقب حبات البطاطا عدة مرات بالشوكة و تفرك بزيت الزيتون و ترش بالملح الخشن , ترتب في صينية فرن غير لاصقة و تشوى في الفرن على درجة حرارة 180 درجة مئوية على الرف السفلي لمدة ساعة او حتى تنضج و تطرى عند الضغط عليها . تقلب مرتان او ثلاثة أثناء الشوي .

• تشق البطاطا في المنتصف , يخفق اللب بالشوكة حتى ينعم و يصبح خفيفاً , تضاف الزبدة و الملح و الفلفل الأسود و تخفق جتى تذوب الزبدة , يمكن الاستمتاع بها بهذه الطريقة أو يمكن أن تقدم بعد أن تغطى باحدى الحشوات التالية .

• حشوة البيتزا , تصب ملعقتان أو ثلاثة من صلصة البيتزا في كل حبة بطاطا و ترش بالاوريغانو ثم ترش الجبنة تشدر حسب الرغبة .

• حشوة الجرجير : تقلب كل المقادير سوياً ثم تحشى بها البطاطا الساخنة و تقدم فوراً .

• حشوة الفطر , يقلب الفطر بالزبدة على نار متوسطة حتى يمتص مرقه , يتبل بالملح و الفلفل الأسود و يوزع على البطاطا , يرش بالكثير من جبنة القشقوان أو الموتزاريلا و يقدم فوراً .

التعليقات

  1. ام نبيل 20 April 2012

    يا سلام والله البطاطا المشوية رائعة اذا الواحد عرف يساويها
    الله يسلم هالإيدين يارب
    بس انا زعلت عبنتظر منك تبعتيلي الايميل مشان شارك بكم وصفة وأول وصفة كنت محضرتها كانت بطاطا مشوية بس طريقتها وطعمتها غير هي
    وان شاء الله رح جرب هالوصفة الحشوات كلها رائعة بس انا مابحب الفطر22ابداً ابداً
    الله يعطيك العافية وتسلم ايدك

  2. منى 20 April 2012

    هلا ام نبيل :)
    ممم انا عكسك , بموت على الفطر حتى باكله ني , بقى كيف مع زبدة و فلفل اسود و جبنة , اي هي هي الحشوة المفضلة عندي بلين هل التلاتة ;)

    حقك علي , بس و الله الهوتميل صار اله اكتر من اسبوع مو فاتح , ما عدت عرفت شو عم يصير

    اذا عندك حساب على الفيس بوك ممكن تبعتيهن لهونيك , و انا رح استناهم ;)

  3. laraye 20 April 2012

    يا عيني يا عيني يا منى
    هلبطاطا بحبها كتير و اليوم تعلمتها منك الله يجزيكي كل خير يا حق
    انا قدمتها عالعشا مع الشرحات و قدمتها متل ما باكلها بالمطاعم هون ….. بعدما خفقتها حطيت فوقها ساور كريم و عشبة ما بعرف شو هي بالعربي بس طعمتها بصل ع توم وهي chives يعني فرمت شوي بس لنحطلها لون ….بس يا سلااااااااااااااام
    الله يخليلنا ياكي يا منى ;)

  4. منى 21 April 2012

    ممممم , و الله لارا طريقتك كتير طيبة , دقتها كمان هيك مرة

    هون ما عنا chive و لا عنا اثره , و حتى الساور كريم ا عاد متوفر :roll

    ابوس عيونك لاروش , يخليلي ياكي , يا لذيذ يا رايق ;)

  5. larooo 21 April 2012

    ياسلام ..شكلها بشهي .. وجوزي كتير بحبها و بناكلها هون بالمطاعم بس كلن كانو نفس الطريقة متل ماقالت لارا ..بس ولا مرة انتبهت انو هي كانت مهروسة من جوا :grin
    هلأ لازم اهرسها كلها من جوا .. ولا على قد مابقدر ؟ .. وفيني استخدم الملح الناعم ما ؟
    ياسلام على وحدة دافية هلأ :)
    يسلمو ايديكي منى

  6. منى 21 April 2012

    اي تجيني و مجهزة و خالصة , ممم ما في اطيب منها
    هلا انا بحبها مخفوقة كتير و عمو البياع بمحل استبول ضل يخفقها لحتى اتشاهدت و انتبهت انو كلهن بيخفقوها كتيرر ;)
    مرة جربتها من دون خفق ابدا , بس عملت فيها فتحة صغيرة قبل الشوي , كماان يمم , بس انا حبيتها بالخفق اكتر
    خفقيها على اد ما بتقدري و المهم انو كلها تتلوت بالزبدة و الفلفل و الملح , الي بيصير ناعم او خشن حسب المتوفر ;)

    دوما عم خربط بين لارا واحد و لارا اثنان :eek

  7. ام نبيل 22 April 2012

    اي الفطر الني طيب وباكله بحطه بالسلطة كتير لذيذ
    بس جربت اطبخه ما حبيته والمعلب ابداً مابحبو
    سبحان الله الناس اذواق في وحدة كانت تقلي ما بتفهمي طعمة تمك

    ما عندي فيس بوك بس بحاول ابعتلك ياهن عالفيس بطريقة ما
    شكراً الك كتير عمنعذبك معنا بس انت كريمة ونحن منستاهل :)

  8. larooo 22 April 2012

    هههههههه والله معك حق تخربطي بين اللارات
    أنا لارا الحصني ..أكلمك من النمسا ..حول حول :grin :grin

  9. بشرى 23 April 2012

    ياي يا منى الله يسلم هالإيدين .. صرلي زمااااااااااان عم دور عهالوصفة وحتى سألت عنها بالغروب .. دقتها أول مرة بمطعم ستيك هاوس كانو حاشينها جبنة بس طعمتها بتجننن .. يسلم هالإيدين :)

  10. laraye 24 April 2012

    هههه حقك تخربطي يا منى عندك تلات لارايات :p
    و التلاتة بيحبوكي كتير
    سبحان الله يا منى …..معقول الساور كريم ما عاد متوفر
    :sigh
    الله يأمننا ببلادنا و يشيل عنا كل فتنة يا رب !

  11. iamprettymemo 6 May 2012

    الله يعطيكي العافية ست منى .. كتير طيبة هالوصفة
    بس عندي نصيحة للي ما عندون وقت يستنو ساعة كاملة لتستوي بالفرن ..
    تعلمت هالحيلةمن قناة فتافيت وجربتها وكتير كانت مفيدة
    حطي البطاطا بالميكروويف عشر دقايق قبل ما تفوتيها عالفرن وهيك بتوفري على حلاك تلات رباع الساعة من الوقت
    وخليها تكمل شوا بالفرن

    من الحشوات الطيبة كتير السلطة الروسية يلي هيه خضار مسلوقة ومخلل مفروم ومايونيز
    تسلم الايادي

  12. ام هادي 7 May 2012

    بتطير العئل يسسسسسسسسلمهن يا حئ
    حبيتاااااااااااااااااااااااااااااااا

  13. منولة 11 May 2012

    هي من ألذ الأكلات عندي..بس انبحتت عليها ما بوقفني إلا وصول اللقيمات للحنجرة الصوتية :x

    من الحشوات اللي بستعملها كمان وبتطلع طيبة كتير حشوة الرمان مع الخضار

  14. منى 12 May 2012

    شو هي حشوة الرمان مع الخضار , لحقيني فيها :eek

  15. منى 12 May 2012

    هلا ام هادي :)
    ان شاء الله تجربيها , عن جد مستاااهلة و بتنحب ;)

  16. منى 12 May 2012

    شكرا ميمي لفكرة الميكرويف , كتير بتختصر وقت ;)
    مممم طيبة مع السلطة الروسية , فكرة .
    انا بالعادة بحضرها مع الكولسلو و هلا اذا رب العالمين راد رح جربها على طريقتك , شكرا لاغناء الوصفة :zzz

  17. منى 12 May 2012

    سبحان الله ام نبيل , رب العالمين خلى لكل انسان ذوق و اتوقع انو الشي الي ما بيحبه الانسان بيكون ما بيناسب جسمه ;)
    بالعكس انا الي عم عذبك معي , بانتظار اليمميات

  18. منى 12 May 2012

    هلا لاروش الحمصي , على راسي و الله .. بس صوتك بعيد , كني الاتصالات النمساوية عدمانة ;)

  19. منى 12 May 2012

    هلا لاروش فنصة :)
    و انا كمان بحبهن كتير و الله بيعرف الي في القلب
    امين يا لارا , الله يمضي هل الايام على خير و يخلينا نكون اد المسؤولية الي معلقة برقبتنا

  20. منى 12 May 2012

    هلا بشورة :)
    ان شاء الله تجربيها و تطلع متل الي دقتيها و اطيب و رح استنى رايك حبيتي ;)

  21. um dania 17 June 2012

    السلام عليكم منى انا عضوة جديدة معكم من العراق ومتابعة بكثرة ممكن مافهمت بعد مااعمل شق بالبطاطا كيف يعني ااورها مثل الكوسا ولة شوي ارجو التوضيح يعطيكي العفاية

  22. um dania 17 June 2012

    السلام عليكم منى كتبت تعليق وسوال من الصبح بس ماطلع عجب في شي غلط ؟ يعني تعليقي مابيوصل شكرا كتر

  23. um dania 18 June 2012

    ست منى لو سمحتي مافهمت بعد مااعمل شق بالبطاطا شو اعمل فيها هل اطالع قسم من اللب لبرا يعني اخففها ولة كيف ارجو التوضيح جزاكي الله خير

  24. Mona 21 June 2012

    هلا ام دانية :)
    حبيبتي بتعملي شق على طول حبة البطاطا , بالمعلقة بتطالعي اللب كله على صحن , بتخفقي اللب مع الملح و الفلفل و الزبدة و بعدها بترجعيهلقلب البطاطا ;)

  25. الحنان 21 November 2012

    السلام عليكم كيفك منى انا جربتها وحشيتها لبنه مع نعنع يابس وبصا اخضر مفروم وكانت طيبه لكن هي كيف بتتقدم بقشرتها :?

  26. ريم غريواتي 14 March 2015

    هالموقع أحلى وأروق كتاب طبخ ….يعيشوا ايديكي منمونة العسلة ..

    • منى 23 May 2015

      يخليلي يااااكي ريمو ، أحلا وأغلا أخت

تقييم الوصفة
عاديةقد أحضرهاجيدةممتازةأكثر من رائعة (2 votes, average: 3.00 out of 5)