تيراميسو


         وصفة : منى                 2011/02/03                 16 تعليقات
تيراميسو

حبيت اشارك بهالوصفة لانو كتير طيبة بس الطريقة الايطالية شوي مختلفة و اهم شي و العمود الاساسي بهالوصفة هو نوع جبنه خاص اسمه جبنه ماسكربوني mascarpone
هلء كل ما كنت انزل ع حلب كنت نزل معي من جبنة الماسكربوني حتى اعمل هالوصفة لاهليو بعد سفري ماما جربت تعملها بالكيري و زبطت معها (جبنة الماسكربوني اللي بيميزها انها جامدة متل الكيري و دسمة و مو مالحة لدرجة اني اول مرة افتكرتها زبدة)
هلئ لانو البيض نيئ فلا يفضل انو يبقى اكتر من يومين و ماكسيموم 3 ايام لذلك انا بعمله بس لما بيكون عندي عزيمةو لو لعيلتي بس بقسم المكونات للنص لحتى ما يطول بالبراد هلء رح ابعت صورة لتطبيقي للتيراميسو و انا بفضل اعمله بكاسات صغيرة

ومرة طلبته بمطعم فكان بالقاعدة حاطط شريحة كاتو بسمك سنتيمين تقريبا و فوقه المزيج

بتمنى انكم تجربوه و تعطوني رأيكم و اي استفسار انا بالخدمة

ومقاديرها على الشكل التالي


4 صفار بيض بدرجة حرارة الغرفة
4 ملاعق سكر ابيض
2 كوب كريم فريش
مقدار فنجان قهوة مركزة و محلاة( طبعا لانو الوصفة الاصلية تحتوي على اضافةللنبيذ)
500 غرام جبنه ماسكربوني mascarpone
اصابع الليدي فينغرز
مقدار 4 ملاعق كبيرة كاكاو
فنجان قهوة اكسبريسو (يمكن استبدالة بالنسكافيه)
ظرف فانيلا




• نخفق الكريما حتى تجمد و نتركها في البراد , نجهز نسكافيه مركزة ومحلاة بالسكر و ندعها تبرد . نجهز قهوة اكسبريسو لتغطية اصابع البسكويت .

• نخفق صفار البيض مع الفانيلا و نضيف عليه السكر و نخفق حتى يصبح المزيج كالرغوة و نتأكد من ذوبان السكر .

• نضيف الجبنة و نحرك بالمشبك اليدوي ليتجانس الخليط و بحافظ على قوامه السميك .

• نصيف الكريما و نحرك بالمشبك نم نضيف النسكافيه المركزة على مراحل و بالتدريج
ممكن حسب الرغبة التقلبل من النسكافيه او الكريما .




• عندما يصبح المزيج متجانس و كريمي ثقيل نجهزطبق التقديم مثلا صحن بايركس كبير او صحون او كاسات مدعبلة .

• نصف البسكويت ووجهه المرشوش بالسكر للأعلى بشكل كامل يغطي كل القاعدة و بالفرشاة ندهن البسكويت بقهوة الاكسبريسو او النسكافيه العادية (مسحة عالسريع) .

• نسكب فوقه نصف المزيج و نمسده بالسكين ثم نرش الكاكاو باستخدام مصفاة صغيرةعلى كامل الوجه .

• ثم نعيد صف اصابع البسكويت و ندهنهم بالقهوة و نسكب باقي الكريماو نزين الوجه بالكاكاو البودرة و يمكن التزيين ببشر الشوكولا .

• يوضع في البراد لمدة 6 ساعات على الاقل(لتتماسك الكريما و تطرى اصابع البسكويت ) و الافضل ان يغطى في البراد لتجنب روائح الاطعمة في البراد .
  • وصفات تانية ممكن تعجبك


التعليقات

  1. ريم ز 6 February 2011

    تسلم ايديكي الوصفة بتجنن وكانت على بالي
    اكيد لازم جربها

  2. lolli 7 February 2011

    الله يسلمك و يارب تنجح معك لانو ح تحبيها كتير كتير :zzz
    و فيكي تستعملي نص الكمية و تحطيها بكاسات مدعبلة او صحون البوظة لو عيلتك صغيرة
    و بلكي بنزل صورتها بالكاسة هاليومين
    موفقة ريمو

  3. منى 8 February 2011

    كيف لقطو الوصفة , لسا ما حطيتها على الصفحة الرئيسية و لا خلصت الصور :eek

    يسلم ايدك لينا , اكيد بالماسكربوني رح يطلع غير شكل , انا جربت وصفة قريبة بس من دون البيض و طلعت يمممي

    سلم ايديكي و تعيشي و تعملي و شكرا كتير للتقديم الحلو و المميز ;)

  4. lolli 9 February 2011

    :grin كل يوم او يومين بعمل جولة تفقديه
    و زوجي كل ما شافني حاطة راسي بللابتوب بيقلي لقمة طيبة ما هيك؟؟ :?
    ههههه :zzz بس عن جد شو كنت مشتهية اني اعرف هالموقع قبل شي سنه
    على الاقل كنت بيضت وجهي قدام حماتي لما زارت عندنا شهرين :cry بس الله كريم و ان شاء الله كلشي بيتعوض
    و اليوم عملت اصابع الدجاج المقرمشة شو حبيتها
    تسلم ايديكي و الله يجزيكي الخير لانك بهالاكلات الطيبة عم تسهلي علينا الوصول لقلب زواجنا
    :p :roll

  5. منى 15 February 2011

    الحمد لله انك عرفتيه و هيك كسبنا اخت فنانة و معلمة و كمان لذيذة :)

    صحتين و عافية لينا سلم هل الديات حبيبتي

  6. Lost spoon 15 February 2011

    شكراً على الوصفه، أخيراً راح اقدر غيظ صاحبتي يلي كانت عايشه بإيطاليا وبتعمل ترمسو ديماً بعزايما. هي ما بتستعمل البيض أبداً، بس أكيد البيض راح يعطي الكثافه المظبوطة. يسلمو ايديكي.

  7. أم نوران 15 February 2011

    يا سلام يا خيتو شو هالجخ تسلملنا هالديات و الله يعطيكي العافية..انا بستعمل نفس الطريقة تماما بس بدون كريم فريش و بعمل كاتو هش اللي هو البسكوتشي بدال الليدي فينجرز اما بالنسبة للي طلبتيه بالمطعم غانا كمان مرو طلبتو وعطوني نفس الشي و لما سالت الشيف قال انو هادا موس التيراميسو :upset وما عجبني ..
    الله يجزيكي الخير انتي و الست منى و الله يبارك فيكم ويخليكم للي بحبوكم سامحوني على الاطالة بس انا غرارة مو بايدي :grin

  8. ream 16 February 2011

    من الوصفات الي مابحسن قاومها هي التيراميسو-وكتير قليل لحتى نلاقي وصفة كتييير قريبة من الاصلية ومجربة و واضحة ومن زمان عم دور عليها-تسلم ايديكي بتجنن

  9. lolli 16 February 2011

    مية السلامة :roll :roll خجلتوني :roll :roll
    بحب هالوصفة اكتر الشي للعزايم لاني بساويها قبل بيوم كامل و حتى لو قبل بيومين بلليل و بخلص من هم الحلو باليوم اللي بيسبق العزيمة
    بس اهم الشي تبقى بالبراد و مغطاية و تخلص خلال 3 او 4 ايام
    و بالنسبة للكريم الفريش شفت بأكتر من وصفة بيبدلوه بذلال البيض المخفوق لحتى يصير متل التلج و لكن عالتجربة و للضيوف بفضل اعمله بالكريم فريش لانه بيعطيه دسامة و نكهة اقوى
    صحة و هنا ع قلبكن

  10. Iman 16 February 2011

    واااو لولي. يسلموا ايديكي وصفه رائعه و تنفيذ اروع يعني تطبيق احترافي ما شاء الله. منى و الجميع اتمنى ان تكونوا بخير. اشتقت للموقع بدخل بسرعه من وقت لاخر للانشغال. ولكن لا استغني ابدااااا عن هالموقع الرائع. تحياتي للجميع :zzz

  11. رنا 17 February 2011

    شكرا الك لينا وشكرا لمنى على تعبها معنا وسرعتها بتنزيل الوصفات …عن جد حياتي بلا لقمة طيبة عذاااااااااب ….وصعبة كتير
    الوصفة مدللة يالينا …عن جد المدلل مابيعمل غير المدلل …بس انتي ذكرتي انه مسحة خفيفة من النسكافيه فوق البسكويت …السؤال انه لازم يضل البسكويت قاسي ومايشرب النسكافيه …علأ هو رح يقعد بالبراد كذا ساعة بس قولتك بيتشرب البسكويت …طلع تيراميسووي مابيقرب تيراميسووكي بالمرة …انا بلت البسكويت بالحليب والنسكافيه …والكريمة عبارة عن كيري وحليب مكثف وكريم شانتييه …هون بوصفتك في بيض ..السؤال كيف رح يكون وضع البيض النئ ؟؟مارح يعطي زناخة
    وشكرااااا الك …انا بحب الكر كتير وكل ماحاولت اطالع ردي قصير وعامل ريجيم مابتزبط معي :zzz

  12. lolli 17 February 2011

    هلا رنون
    تسلمي يا رب وانا بشاركك نفس الشعور و هلء مافيني اتخيل حالي بلا لقمة طيبة
    اما بالنسبة للنسكافيه اصابع الليديز فينغرز رح تطرى من رطوبة الكريما و رح تصير لينة متل شريحة الكاتو
    و النسكافيه دوره اكتر للنكهة و من قبل كنت غط البسكويت من طرف السكر بالقهوة المركزة او النسكافيه بسرعة و مع ذلك بيطلع البسكويت متشتش و شكلو مو حلو لهيك شفت انو بفرشاية السيليكون او اي فرشاية مطبخ مسحة سريعة بتعطيكي النتيجة المطلوبة و بصراحة انا ما جربتو ببسكويت عادي و بالنسبة لصفار البيض طالما في فانيلا ما ح يزنخ و بقترح عليكي تجربي نص المقدار كتجربة
    و بتوقع انو الحليب المكثف مع كريم شانتيه رح يكونو قريبين من الكريم فريش
    :zzz

  13. لارا مينا 18 February 2011

    ألف ألف شكر للوصفة يالينا

    أنا مرة من زمان كثير عملت التراميسو وحرمت أعيدها, وأخذت الوصفة من مجلة وكرهتني فيه ,

    بس ناوية أعيد التجربةأكيدلأن طريقتك مميزة جدا ومبين طيبة ,وواضح من كلامك إنك مجربتهامرات كثيرة يعني احتراف .

    وعندي سؤال بتنفع بجبنة فيلادلفيا؟ لأني شفت في أحد الوصفات حاطينها بدل الماسكربوني.

    تحياتي الكبيرة :zzz :zzz

  14. lolli 21 February 2011

    هلا لارا ياستي و انا حامل بابني كنت كتير حب شكله بالمحلات و فتلت ع اكتر من وصفة و خلطت كم شغلة لحتى زبطت معي هيك و مين ما داقها حبها باستثناء اللي عاملين ريجيم ما يكملو حصتهم هههههه
    بالنسبة للفيلادلفيا ما جربتها بالتيراميسو كنت جربها للتشيز كيك و بصراحة صار عندي فضول جربها و خصوصا انو في منها لايت يعني بالناقص نتفة دسم :grin رح جربها هالكم يوم و بخبرك
    بتوقع انو الطعمة رح تختلف و رح جرب زيد السكر و ممكن تطلع طيبة رغم اختلافها :roll

  15. ورد 23 February 2011

    كتير باينة هالوصفه طيبة الله يسلم هالايدين :zzz

  16. رانو 3 September 2012

    يسلمو

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)