خل العنب


         وصفة : سها قمند                 2009/10/28                 95 تعليقات
خل العنب

عنب ( الكمية حسب الرغبة )

• تفرط حبات العنب و تغسل جيداً.

• توضع حبات العنب بخلاط الكوكتيل و تضرب ثم توضع في مرطبان و تكرر العملية حتى يمتلئ المرطبان.

• يغلق المرطبان جيدا و يكتب تاريخ اليوم عليه ولا يفتح المرطبان أبدا أبدا قبل 41 يوم و كل ما طول أكثر رح تحصلي على خل أطيب نحن منخلي 3 أشهر .

• بعد مرور 41 يوم يفتح المرطبان و يصب المزيج على مصفاية ألمنيوم و تحتها طشت و يعصر باليدين ثم يصفى العصير بشاشة نظيفة و يعبئ في زجاجات .

ملاحظات :

إذا كان عندك مربى قديمة ما بيحبوها الأولاد حطيها خلطيها مع العنب لأنو السكر بيساعد في التخليل .

  • وصفات تانية ممكن تعجبك


التعليقات

  1. منى 28 October 2009

    انا ممنونة الوصفة سهى , جربتها و هلا هي بالمرطبان ..ما اتوقعتا كل هل الادة سهلة , هلا انا اضفت سكر من دون مربى , ما دامه احسن للتخليل , بقى خللوه :grin

    رح نزل صورة لوصفتك و صورة لمرطباني بس بكرة ان شاء الله :zzz

  2. اماني 28 October 2009

    انا مشتركة جديد معكن :) بس من زمان بتابع الموقع بس بجد يسلمو ايديكي على هل الوصفات والاكلات اللذيذة :) :)

  3. منى 28 October 2009

    هلا اماني :) مية السلامة بهل القامة , شرفتي اختي و اتمنى تبقي معنا على طول

  4. gsm 28 October 2009

    السلام عليكم اخت سهى بس حبيت اسالك انتي قلتي بتتركوا الخل ل 3 شهور طيب يا ترى ما ممكن يتحول لنبيد؟
    بعرف اكتر من 40 يوم ما بصير يبقى والا بيتحول الخل لكحول ؟؟؟ يا ترى معلوماتي دقيقة ؟ :?

  5. DOUHA 28 October 2009

    شكرا سهى كتير سهل

    بجربوا قربيا

  6. بشرى 29 October 2009

    يلا سلام
    تسلم ايديكي يا سهي طريقة سهلة كتير ان شاء الله بجربهاليصير موسم العنب :) بس سؤال خل التفاح بيصير بنفس الطريقة ولا كيف ؟

    منونة صباح الخير حبيبتي ..

  7. سمسمة 29 October 2009

    الله يسلم ايديك ياعسل
    أنا مساوية خل عنب من أسبوعين بس حاطة العنقود كامل ياترى بيظبط ولا لأ
    حبيبة قلبي سهى في سؤال عن الفليفلة الحمراء بوصفتك الفليفلة مع الفيتا شوفي ورديلي ;)

  8. لارا مينا 29 October 2009

    يعطيكي ألف عافية أخت سهى وتسلم إيديكي يارب لأن عطيتينا سر من أسرار المطبخ ,
    وأكيد عالتجريب فورا بس العنب المستخدم هو العنب الأبيض ولا أي نوع بيمشي الحال؟
    لأن أول مرة أجربه و مش شايفته قبل ,
    لأن المتوفر عندنا خل التفاح وخل القصب بس .
    وأتوقع أخت gsm إن فيه فرق كبير جدا بين صناعة الخل والكحول ومش نفس الطريقة أبدا , ودايما الناس بيتلخبطوا بينهم كثير.
    تحياتي للجميع :) :) :)

  9. ام نور 29 October 2009

    السلام عليكم ورحمة الله وبركاته
    سلم دياتك سهى على هالوصفة المفيدة بدي اسالك العنب الموجود عندي كتير حلو في مشكلة يعني ما بيهم الطعم وكمان فينا نخلط عنب احمر واخضر ولا لازم يكون العنب فرد شكل الف شكر :)

  10. منى 29 October 2009

    مسا الخيرات و الورد بشورة :zzz
    و كل الاخوات الغاليات

  11. رنا 30 October 2009

    من كم يوم كبيت شي كيلو عنب للاسف كانوا دبلانين وبديانين ينتزعوا …كانوا خرج خل
    يلا بجربها اكيد ..الف شكر سهى …لانه هالوصفة مهمة لانه خل السوق في مواد كيميائية وحاليا زوجي عم يشرب بعد الاكل كاسة مي فيها خل مشان ينحف …لذلك اذا كان الخل طببيعي احسن واحسن

  12. سوزان 30 October 2009

    فعلا وصفة مفيدة كتيرخاصة الخل الموجود بالسوق اغلبو مو مضمون شو فيو واذا كان طبيعي ولا لأ :? وفي حديث شريف عن الرسول صلى الله عليه وسلم نعم الادام الخل .لهيك ضروري كل ست بيت تحضر خلاتها بايدها ويا ريت اذا حدا بيقدر يفيدنا بخل التفاح :grin
    شلونك منمن ان شاء الله كل ايامك خير وسعادة وصحة :roll

  13. جمانة 1 November 2009

    مرحباكيفكم صباياوحدة وحدة تسلملي بنات حلب وغير حلب وخصوصا انت يا منى :zzz

  14. جمانة 1 November 2009

    انا جديدة معكم وان شالله منبقى سوا

  15. souha 1 November 2009

    السلام عليكم كيفك منونة
    كتير فرحت إنك جربتي الوصفة و انشاء الله بعد ما تعصري يطلع طيب و يعجبك و انشاء الله صحة و عوافي
    بتعرفي امبارح بعد ما رحتي قلتلها لماما نحن نسينا نضيف منى قهوة بس صار أنو تأخرتي و كانت السفرة جاهزة لذلك هي ما حسبنالك ياها يله الجايات أكتر من الرايحات عفكرة اليوم دخلت على الموقع بالصدفة و إذ الوصفة نازلة بنفس تاريخ عيد ميلادي سبحان الله شلون بتصير الصدف 8)
    بالنسبة للصورة منى لون الخل بالحقيقة أكشف من هيك بكتير بس حطيت ورا الصورة أرتي غامق مشان يعطي أنعكاس حلو على التصوير و خل التفاح أكشف و من بعيد بتحسبي عصير أناناس من كتر مو لونو حلو يالله عم أستنه صورة المرطبان
    سلام

  16. karmen 1 November 2009

    شكرا على هالوصفه بيعش الواحد وبتعلم حتى واو صار عمره 100 سنهشكرامره اخرى

  17. souha 1 November 2009

    هلا بشرى كيفك
    بالنسبة لخل التفاح بتجيبي أي نوع تفاح و ممكن تستخدمي التفاح الناعم و ما ضروري يكون من نوعية ممتازة و بتغسلي منيح و بعدين بتقسمي أربع أرباع و بدون تنضيف البذور بس إذا في مناطق مضروبة بالتفاحات بتنضفيها و لازم تنتبهي أحيانا بعض التفاح بيكون لاحقتو دودة كمان بتنضفي محلها و بتغسليها و بتحطي التفاحات بمرطبان و بتغلي ماء مع سكر و بتصبي فوق التفاح بالنسبة لخل العنب ما بيحتاج ماء لأنو هو فيو عصير بعدين بتختمي المرطبان و بترخي عليه و ما بتفتحي لبعد مرور 41 يوم و بتصفي و إذا نعصر معك بيكون أحسن بس ممكن التفاحات يضلو قاسيات و صحة و هنا

  18. souha 1 November 2009

    هلا سمسة كيفك
    حبيبتي أنا بصراحة مو مجربة أنو حط العنب بالعنقود مع إني سمعانة بهالطريقة لذلك إذا نجحت معك ياريت تخبريني مشان كلنا نستفيد و في شغلة كمان أنا ما جربت بكامل العنقود خفت يعفن و تلحقو دودة و بالطريق يلي ذكرتها بيطلع الخل نضيف
    سلام

  19. منى 1 November 2009

    شايفة ام السوس , بقى لهيك ما حسبتها للعزيمة ابدا ابدا , بدي واحدة تانية و ما تنسي فيها القهوة لحتى احسبها :grin

    ااقلك حل اسهل , انك تعلمينا الوصفات الي عاملتيها , التيراميسو الختيررر و الفطيرة الي بتاخد العقل و كمان الايتش , اما اليالنجي امنت عليه طريقته علمتينا ياها من قبل

    عن جد سهى ما شاء الله عليك , الحكي مو متل الشوف و التصوير مو متل لما الواحد بيشمر عن اكمامه و بيدوق , الله يسلم هل الديات , الله يسلم ايديك و ايدين الماما و انا كتير ممنونة هل الجمعة الحلوة الي اتذكرتيي فيها :zzz

    سهى ان شاء الله رح جرب خل التفاح كمان على طريقتك ..

    بالنسبة لخل العنب ما بعرف انا ما رخيت المرطبان , بالعكس شديت عليه كتير منيح , بقى شو ؟ خبصت و الا ماشي الحال ؟

    سلام خاص لماما :)

  20. DOUHA 1 November 2009

    سها انا سمعت عن الاكلات الطيبة يميميميي
    ماشاء الله عليكي بحس طبخك بيجننن

    وهلا :)

  21. سمسمة 1 November 2009

    مرحبا سها
    شوفي حبيبة قلبي أنا مالي زعلانة أبدا لأنك ماعزمتينا :(
    يعني لافنجان قهوة ولا تيراميسيو مو معقولة على الأقل تعطينا المقادير منشان نحس أنو نحنا معكن ;)

  22. منى 1 November 2009

    لا لا لا

    شريرة انا :grin

  23. جمانة 1 November 2009

    مسا الخير اناشلون بدي ادخل وصفة معكم ولا مو مسموح :sigh

  24. منى 1 November 2009

    هلا جمانة :) مية السلامة فيك اختي , شرفتي و نورتي الموقع

    هلا سوزان :)

    سالت عليك العافية و الخير دوما يا حلوو

  25. منى 1 November 2009

    لا بالعكس جمانة , رح كون ممنونتك :zzz

    فيكي تبعتي ايا وصفة كرد عادي و انا رح انشرها باسمك ;)

  26. DOUHA 1 November 2009

    نطالب سها بشي وصفة من اختيارها

    يعني مو شرط التيرامسو ;) اي شي كرمال هيك نحس انا كنا مع بعض
    نيالك يا منى

  27. souha 1 November 2009

    هلا gsm
    حبيبتي أنا سألت شخص بيعرف بأمور الشرع و هالأمور وقلي ما لازم ينفتح الخل قبل 41 يوم و كمان سألت أم رفيقتي لأنو والدها الله يرحمو كان يعمل خل و قالتلي نفس الحكي و كمان قالتلي كلما تعتق الخل كل ما طلع أطيب و سألت ناس مسيحيين كمان نفس الجواب لذالك اتشجعت و ساويتو و انشاء الله تجربيي و يعجبك
    سلام

  28. souha 1 November 2009

    هلا منونة
    حبيبتي أنا قصدت بكلمة بترخي عالمرطبان أنو تكتبي تاريخ اليوم يلي ساويتي فيو بس كتبت الكلمة بالعامية أم هيك طلعت :grin
    بالنسبة للأكلات تكرم عيونك بس بدي تصبري علي شوي و ا،شاء الله ببعتهن مصورات خطوة بخطوة

  29. souha 1 November 2009

    هلا لارمينا كيفك
    حبيبتي أي نوع عنب بيمشي حالو حتى أنا بتذكر نانتي الله يرحمها كانت تخلط تفاح و عنب و قشر دراق و فواكه تانية و يطلع خل طيب كتير بس لون العنب أعتقد بيأثر على اللون النهائي للخل بس ما بيهم الأهم الطعمة و بس تجربي خبريني عن رأيك و عوافي مقدما ;)

  30. souha 1 November 2009

    هلا أم نور
    حبيبتي ما بيهم أنو العنب حلو بالعكس السكر بيسرع التفاعل بس أهم شي بالنسبة لخل العنب أنو ما تحطي معو ماء لأنو أنا و ماما عملنا كمية خل كبيرة كأنو رح نشتغل بالتصدير :grin و مرة حطينت ماء و مرة بدون ماء يلي حطينالو ماء طلع سايط بس خل التفاح بدو ماء و فيكي تخلطي أنواع عنب على كيفك ما بيهم
    سلام

  31. souha 1 November 2009

    هلا بشرى :) كيفك
    أنا بتشكرك على الكلمات الحلوة و بشكرك أنك جربتي من الوصفات و إنشاء الله صحة و هنا
    كمان بدي أسألك أنت كنت معنا بنابلس ولا أنت و منى رفقة من أيام الجامعة

  32. منى 2 November 2009

    هلا ام السوس :)
    هلا فهمت :grin , الصراحة ما خطر ببالك ابدا انك قاصدة التاريخ , معناها شغلي في السليم ان شاء الله ..

    هيك المرطبان تمام او في ملاحظات ؟

    على مية مهلك سهى , المهم انك لما بتفضي تعلمينا كم وصفة على زووءك و لو كمان كاتو الفراشات ما منقول لا , شو انتي كريمة و نحنا منستاهل :zzz

  33. بشرى 2 November 2009

    أهلين سهى صباح الخير :)
    إلي الشرف ولمنى الفضل إني تعرفت عهالناس الطيبة :)
    أما كيف بعرف منى بقى لا هي ولا هي والله ياسهى :grin

  34. DOUHA 2 November 2009

    اي سها بدنا كاتو الفراشات اذا مو صعب

    واذا صعب اي نوع بتحبيه

    شفتي شو انا مسايرة هههههههههههههه

  35. souha 2 November 2009

    السلام عليكم
    هلا منى يا ستي شغلك في السليم و هالمرطبانات كتير بشوفون ظراف و بيحفظو الأكل منيح و مو بقيان كتيير لحتى تفتحي المرطبان يعني قبل العيد بأسبوع و على سيرة العيد كل عام و أنت بخير مقدما وكل الصبايا :)
    بشرى تسلميلي حبيبتي بس أنا كنت قاصدة ضحى بهالتعليق بس خطأ مطبعي :roll و أنا كمان إلي الشرف أنو تعرفت عالصبايا و ‘نشاء الله الله بيجمعنا بالجنة متل ما جمعنا في الدنيا آمين
    كيفك ضحى
    تكرم عيونك بس متل ما قلتلها لمنى هالفترة في مذاكرات للطلاب و تصحيح بتعرفي و إنشاء الله بأقرب فرصة و كاتو الفراشات مو صعب بس بدو طولة بال ;)

  36. امونه 3 November 2009

    مرحباااا يا حلوووين

    مشتاقيتلكم كتير كتير لما خطبت ما كنت عارفه انه الخطبه راح تاخدني من احلى ستات بالدنيا و بصراحه الكل عتبان عليي لآني مقصره بالسؤال بس جد دايما بفكر فيكن و بحكي لحالي يا ترى شو الوصفات الجديده الي نزلت و انا غايبه عن هالمكان الحلوا ابو ريحه بتشهي :zzz

    ست منى مافي مجال انه يكون في زاويه تنزل فيها الوصفات الجديده اول بأول ؟؟؟

    لآنه مو دايما بتكون نازله بالصفحه الرئيسيه على ما أعتقد فيا ريت تنتبهوا لهالشغله لآني دايما بفوت و ببحبش بكل السايت و انا بدور شو في وصفات جديده ;)

    مشتاااقيتلكم كتير و بحكيلكم كل عام و انتوا بألف خير لآنه الشتويه دخلت و الحمد لله الأمطار ما وقفت من يومين بالاردن و عمااان ريحتهااا بتشهي بالشتااا بالزبط متل هالسااايت

    و مره تانيه miss u all ;)

  37. رنا 3 November 2009

    يعطيكي العافية ياسهى لسه الوصفة بالصور اروع واروع
    بس شو ضحكت على بترخي …لانه حتى انا فكرت انه قصدك ترخي ايدك عن المطربان مشان يدخل الهوا :grin
    بس شو مشان العزيمة …مو حلوة منكن تشوفوا بعض من ورانا …ع كل حال عزمت حالي لعندك مسبقا …شي شهر وجاية ع حلب والله يعينكن ماتاخدوني :grin :grin
    عم بمزح معكن الله يقويكن وتتحفونا بوصفات كمان وكمااان ;)

  38. منى 3 November 2009

    رنون اي موتكرم عيونك , احلى جمعة لهل العيون الحلوة , بركي انتي و ندوشة و بشورة و كل مشتهي :zzz

  39. منى 3 November 2009

    هلا امونة :) و لا يهمك حبيبتي ايااامك هلا اتهني فيها يوم بيوم , ربي يسعدك و تشوفي من هل الزلمة كل الخير و يشوفك شمس و قمر , انت و بس :zzz

    امونة دايما الوصفات الجديدة بتكون على الصفحة الرئيسية و كل ما نزل وصفة بتروح واحدة قديمة , ما فيني حط كتير على الصفحة الرئيسية و الا بيصير تحميلها صعب على الي بيفوتوا لاول مرة :roll

    هادا بس من زووءك , ربي يبعت الخير و نحنا كمان المطر ما وقف من كم يوم و اجا البرتقال و اعلن الشتي وصوله بشكل رسمي

  40. امونه 3 November 2009

    ربي يسلمك يا ست منى على هالدعوه الحلوه و تشوفي حبيبتك عروس يا رب

    طيب ما بينفع يكون في قسم زي الحلويات و المشروبات تنزل فيه الوصفات الجديده اسبوع زمن بعدين تتأرشف تحت البند الي بتنتمي اله

    ما بعرف بس الفكره انه الواحد يمكن يقعد كم يوم ما يدخل الموقع و يمكن ما يعرف انه في شي جديد

    لووولز غلبتك انا بس يعني بنحاول نعمل شي يرحنا و يغلبكم شوي :upset :grin

  41. امونه 3 November 2009

    هلا بالنسبه للخل ما فهمت في يعني فرق بين خل العنب الاحمر و الابيض؟؟؟

  42. منى 3 November 2009

    امون شوي صعب , رح يصير خريطة و شوربة و مخلوطة هيك :grin

    امين امين , انت و كل الغوالي على البك

  43. آرام 4 November 2009

    شكراً أخت سهى على الوصفة المهمة .. جهزت الخل البارحة وبانتظار النتيجة بعد 41 يوم .. عصرت العنب بإيدي بدل الخلاط حتى ما تنطحن البذور لأني جربت تحضير دبس الرمان بطريقتين .. مرة بالخلاط ومرة عصر باليد وبالطريقة التانية كانت أفضل بكتير.

  44. جمانة 4 November 2009

    مرحبا صباياشلونكموالله اشتقتلكم صايرين انتو سلوتي شلونها حلب صارت الدنيا برد ولا لسه شلونك منى كني ماعجبتك الوصفة ولا لا :cry

  45. منى 4 November 2009

    ايا وصفة جمانة ؟؟ ليكون بعتي شي و ما وصلني :roll

    حلب بلشنا مطر و بررررد و من يومين مديت السجاد و الصيفي و الشتوي ..

    رجعت الشتوية :zzz

  46. souha 4 November 2009

    هلا رنا :) بتنور حلب بجيتك و إنشاء الله أحلى جمعة بتستناك ;)

  47. souha 4 November 2009

    هلا أمونة :)
    نحن كمان مشتاقينلك بس منعرف إنك مشغولة بس مادام بالخير الله يهنيك و يتمم عليك بالخير و السعادة
    بالنسبة للعنب الأحمر و الأبيض أكيد في فرق باللون بس الطعمة أنا مو مجربة الخل إلا بالعنب الأحمر :zzz

  48. souha 4 November 2009

    السلام عليكم أخ آرام
    شكرا إلك لتجريب الوصفة و بالنسبة للعصر مو مهم لأنو الخل رح يتصفى بشاشة ناعمة و أنا بنتظار رأيك بعد 41 يوم و صحة و عوافي

  49. souha 7 November 2009

    السلام عليكم يا صبايا :)
    بالنسبة لخل التفاح أنا ذكرت أنو مو ضروري ينعصروا التفاحات بس رجعت سألت و دقدست طلع ضروري ينعصروا لأنوا رح يزيدو تركيز الخل و في معلومة عرفتها من شخص كيماوي أنو بعد ما تعصروا التفاح لا تصفوا التفل و رجعوا خلطو العصير مع التفل بنفس المرطبان و عيفوا 3 – 4 أيام بتضمنوا أنو ما يضل في كحول بالخل و أنا شفت المعلومة منطقية لأنو أهل زمان كانوا يقولوا لما بيتعتق الخل بيصير أطيب لأنو الخل بيمر بالمراحل التالية كحول ثم حمض ثم خل و إنشاء الله يكون شرحي وافي و صحة و هنا
    سلام

  50. منى 8 November 2009

    ام السوس يعني نعصرهم على الخلاطة تبعة الكوكتيل و الا شو ؟؟

    انا سمعت في بيدروها على ماكينة الكبة

    شغلة تانية , في ناس قالولي ان الاماية ضرورية , و الاماية يعني خل من مرة سابقة , شو رايك :zzz ؟

  51. souha 8 November 2009

    هلا منى
    نحن عصرنا على عصارة الجزر يلي من جهاز أمي بس بعد نص الشغل مدري شو صرلى ضربت الكهربا فغلقنا على عصارة الكوكتيل و بالنسبة للأماية مو سمعانة بهالطريقة بس بخطرلي مو ضروري لأنو التفاح رح يتفاعل خاصة أنو معو سكر و أنا سألت أكتر من شخص على طريقة الخل و لا حدا ذكر قصت الأماية
    سلام

  52. آرام 14 December 2009

    مرحبا أخت سهى
    أخيرا صاروا 41 يوم .. عصرت الخل وصفيته .. طعمته روعة بس فيها شوية حلاوة .. يا ترى طبيعي هالشي ولا فيه مشكلة .. لأنو خل السوق فيه طعمة حموضة لاذعة أكتر !
    أخت منى جربتي خل التفاح ولا لأ .. يا ريت إذا جربتيه تعطينا ملاحظاتك :roll

  53. souha 16 December 2009

    السلام عليكم
    أخ آرام شكرا لتعليقك و لتجريبك الوصفة
    بالنسبة لطعمة الخل البيتوتي لا يمكن أنو تقارنها بالخل الصناعي لأنو طريقة التصنيع مختلفة و بيعتمدو على مواد كيماوية أما بالنسبة لطعمة الحلاوة فما بعرف أديش أنت حطيت سكر لأنو السكر و ظيفتو تسريع التفاعل و من خلال تجربتي لاحظت أنو السكر بيعطي طعمة أطيب للخل
    جوز جارتي كيماوي و بيعمل خل بيتوتي و ما بيحط سكر بس لما ضيفتون من الخل يلي عاملتو قلي مع السكر أطيب بكتير
    و على فكرة نحن من فترة فتحنا خل التفاح كمان طيب جربوا بالطريقة يلي ذكرتها و إنشاء الله بيعجبك
    سلام :)

  54. منى 18 December 2009

    على فكرة انا ما صفيته بالشاشة لان حبيت هل الاشياء الناعمة الي فيه كتير و كمان اذا لاحظتي في فرق باللون بين المراطبين لان واحد من خل اصفر و واحد من خل أحمر 8)

  55. منى 18 December 2009

    سهى اليوم فقت الصبح و صفيت الخل , المفروض صفيه من شهر , بس بما انك قلتي بتخليه تلات اشهر طولت بالي عليه .

    مو معقولة الطعمة , يعني شي بياخد العقل , بديع و انا مو مسدقة النتيجة , متل ما قال ارام فيه طعمة حلاوة خفيفة بس كتير كتير طيبة ,

    انا السنة الماضية جربت خل بس بغير طريقة و النتيجة هل السنة لا يمكن مقارنتها بالسنة الماضية , بتعرفي شو , طول ما عم ملي القناني عم ادعيلك و عم اشكر ربي , الحمد لله الذي علمنيه من غير حول مني و لا قوة

    الف الف شكر الك و لماما , و بانتظار ايا شي بيطلع من مطبخكم ;)

    اخي ارام لسا ما جربته , بس بعد خل العنب لازم جربه اكيد ان شاء الله :)

  56. souha 18 December 2009

    السلام عليكم :)
    منونة أنا كتيييير مبسوطة لأنو الخل نجح و حبيتوهلأ أنتو عم تحسو أنو فيو طعمة حلاوة شي طبيعي لأنو العنب بالأساس حلو كمان الخل ما بيكون حامض متل عصير الليمون أو الحصرم بتعرفي منونة أنا بحط للسلطة خل و عصير ليمون بس شو بتطلع سلطة دوقي و دعيلي على سيرة الدعوات بتشكرك والله يجعلن من نصيبي و لك مثلهم إنشاء الله
    منونة بدي قلك أنا من فترة بعتلك وصفة شوربة يا ترى وصلت و لأ وإلك عندي مفاجئتين قريبا ;) بس شو هنين …….؟ خليها سر :?
    سلام :)

  57. منى 18 December 2009

    اااامين يا رب , الله يخليلي ياكي ام السوس , رح جرب السلطة مع خلي اللذيذ و الليمون , يييمممم

    الشوربة وصلت , و المفااجاة بس لتكون واحدة منهم صورة جماعية للسفرة الي عملتيلنا ياها :eek

    اخر سؤال ام السوس , كيف رح احفظ الخل , بالبراد و الا شو ؟

    على فكرة هلا عم اشرب من الخل ,عن جد بيااااخد العقل , ابوس روحك سهى :)

  58. souha 19 December 2009

    السلام عليكم :)
    صباح الخير منونة
    الخل ما بدو براد حطي بأي خزانة عادية نحن عنا خزانة على البلكون منحطو فيها ;)
    سلام :zzz

  59. منى 21 December 2009

    مممم , علم , هلا رح طالع القناني على المقززة ان شاء الله ;)

  60. نادين 3 January 2010

    يسلم ايديكي سهى
    انا جربت خل التفاح من يومين على الطريقه الي كاتبتيها لبشرى وبانتظار النتائج… ياريت تنزلي الطريقه بالتفصيل تماما حتى اتاكد انو كلو تمام و ما غلط انا عملت مرتبان بتفس الحجم الي محطوط بالصوورة من شان هيك مااعتقد رح يعطي خل اكتر من فنجان شاي ..

  61. منى 4 January 2010

    ندوشة هل المرطبان الي بالصورة عطاني حوالي اللترين و نص , شلون ما بعرف :zzz

  62. souha 10 January 2010

    السلام عليكم :)
    هلا نادين بالنسبة لخل التفاح هلأ واقع تحت إيدي طريقة جديدة عم يقولولي أنو طيبة كتير لذلك بدي جربها و يلي بتطلع أطيب ببعتها إنشاء الله :zzz بس الموضوع بدو شوية وقت ;)
    سلامي للجميع

  63. منى 11 January 2010

    ام السوس انا رح استنى طريقتك لكن لحتى جرب , كنت موصية على تفاح , هلا رح الغي التوصاية ..

    سهى الخل هلا و بعد حوالي الاسبوعين من عصره صار حامض و اختفت فيه طعم الحلاوة الي كانت اول ما عصرته , يا ترى هيك تمام و الا في شي انا معفسته :roll

  64. swan 11 January 2010

    راح أجرب الوصفة قريبا… شكرا جزيلا

  65. souha 12 January 2010

    السلام عليكم
    هلا منى شغلك مزبوط لأنو الخل كل ما تعتق بيحمض أكتر ;)
    ————–
    هلا swan
    إنشاء الله بتجربيها و بتعجبك و عم أستناه رأيك
    سلامي للجميع

  66. freesoul 14 January 2010

    مرحبا
    من كتر ما صار تعليقات على خل التفاح ضا عت على الطريقة وفتت بالحيط وما فهمت شي
    ياريت لو تنزل طريقة خل التفاح بالتفاصيل لحالها بوصفة او تتوضح من قبل الاخت سهى عن جديد ولكم جزيل الشكر والامتنان

  67. souha 20 January 2010

    هلا reesoul
    حبيبتي متل ما قلتت لنادين عندي طريقة جديدة لخل التفاح بس بدي شوية وقت لأنو التفاح الصغير يلي بينعمل منو الخل مو دائما بيتواجد بقى شو رأيك تنتظري و إنشاء الله الوصفة الأطيب ببعتها ;)
    سلامي للجميع

  68. منى 21 January 2010

    رح استنى ام السوس :)

    سؤال , على جروب لقمة طيبة على الفيس بوك في اخت جربت خل التفاح , قام فار المرطبان , فتحته و حطته بمرطبان جديد و ترخت عليه من اول و جديد , , هيك ما بيصير ما هيك و الا شو رايك ؟

  69. souha 21 January 2010

    السلام عليكم
    هلا منى , ياريتها ما فتحت المرطبان لأنو الخل مو لازم ينفتح قبل 41 يوم يعني هلأ صار على الكب :sigh
    يا جماعة شو رأيكن تستنو لأعمل التجربة الجديدة لشو العجلة :?
    سلامي للجميع

  70. منى 22 January 2010

    و لا يهمك ام السوس , ما في عجلة و لا من يحزنون , على ااقل من مهلك و نحنا بانتظار نتائج تجربتك الجديدة :zzz

    رح خبرها لسنا , حسبي الله و نعم الوكيل , راح تعبها على الفاضي :sigh

  71. Noora 22 October 2010

    مرحبا كيف الجميع أنا عضوة جديدة وكتير بحب هل موقع وعم اتعلم منه كتير شغلات وبدي اسأل على خل التفاح إذا ممكن

  72. tota2010 6 November 2010

    مرحبا منون اسفة عالغيبة بس كنت مشغوووووولة المهم حبيبتي كنت بدي اسألك انا كان عندي عنب بينفع للخل وحبيت اعمله بس كان الخلاط ما بيشتغل فعملت الوصفة نفسها بس بدل ما اخلط العنب قسمته انصاف لكل حبة وحطيت معه شوية سكر وسكرت عليه منيح وصار وقت افتحه وزيادة :zzz
    سؤالي هو بصير هلأ اكمل الوصفة ولا هيك انا غلطت؟ ارجوك منون تردي علي قبل ما صفيهون :x

  73. منى 6 November 2010

    هلا نورا :)
    رح نزل وصفة خل التفاح و هي كمان كتيرر سهلة ;)

  74. منى 6 November 2010

    هلا توتا :)
    اكيد بيصير بس هلا رح تتعزبي شوي بتصفيتهم ولو كنت عاملة طريقة سهى كان رح يصيروا اسهل

    المهم رح يزبط معك كتير باذن الله و تدعيلها لسهى على هل الوصفة المميزة :zzz

  75. tota2010 7 November 2010

    شكرا منون عالرد بس انا هلأ فتحت المرطبان حتى صفيه بس عمل كأني عم افتح قنينة كولا صار يفور شوي لفوق منيح اني ما كان معبى عالاخر وطلع ريحة قوية لما تقربي منه :x
    هيك صار معك ولا انا تحول معي شي تاني :eek
    هلأ انا خليته زي سهى 3 شهور وبهالفترة عملت كمان مرطبان بنفس طريقتها بس حسيت التاني لونه غير بس ناوية افتحه انشالله بعد ما يصيرله 3 شهور :zzz
    ومبارك عليك العشر والله ينولك فضلهم انت وكل الصبايا والمشاركين وزوار لقمة طيبة والله يجمعنا دايما بالخييييير :)

  76. tota2010 7 November 2010

    منون انا صفيته هلأ بس لا تغلبت ولا شي لان العنب كان كتييييير طري وبسرعة تصفوا لون الخل طلع متل اللي باخر صورة عندك الخل الفاتح لان عملته بعنب ابيض :)
    بس الصراحة ما استرجيت دوقه الا لما تجاوبيني عن سؤالي حتى دوق وانا مطمنة مع اني كتير مشتهياه قد ما هو لونه حلو :roll
    اخر سؤال لو سمحتي انه بصير اصب الخل في قنينة خل فاضية بس لسه فيها اثر الخل القديم (يعني قبل ما اغسلها) ولا لازم اغسلها فبل ما اصبه؟
    وسامحينا يا قمررررررررررر :zzz

  77. منى 8 November 2010

    هلا توتا :)

    هلا انا فار معي بعد ما سكرته ’ و لما سالت قال هادا شي طبيعي , و ما دامك سكرتي عليه 40 يوم وما فتحتيه قبل مرورهم معناها باذن الله شغلك بالسليم :zzz

    يلا دوقيه و خبريني كيف الطعم ؟

    اكيد بيصير تمليه بنفس القنينة

    كل سنة و انت بالف خير و ربي يجعلنا اقرب منه بكل يوم عم يمر علينا , و ان شاء الله تبقي انت و كل احبابك بخير :)

  78. Noora 16 November 2010

    زهرة حمرا بعتلك ومن هل قلب قطفتلك حتى تروح وتقلك:
    كل عام وأنتي بألف ألف خير أخت منى
    بمناسبة عيد الأضحى المبارك وإن شاء الله السنة القادمة بتكوني بصعيد عرفة

  79. 666 24 November 2010

    اناجديدةمعكم موقعكم كتيرحلوومفيدعندي سؤال:الخل بدوشمس ولاظل

  80. Noora 8 January 2011

    شو القصة مدام منى ليش ماعم تردي على الأسئلة أنا عم استنى أجوبتك بالدقيقة وكل يوم بدخل عالموقع لحتى اسمع أجوبتك وما بتكوني مجاوبة وألي على هل حالة شهرين وكتير أكلات انتزعت معي ومشي الحال منها مخلل الشوندر يلي سألتك عنه من شهر وما رديتي علي وطريقة خل التفاح ألك زمان واعدتيني تنزلي الطريقة ولهلق ما نزلتيها

  81. منى 9 January 2011

    هلا نورا :)
    حقك علي حبيبتي , بس بتعرفي كل يوم عم ااقعد حوالي الساعة لحتى رد على الاسئلة و الاستفسارات و الردود و احيانا ما عم لحق للكل , بقى مشان الله لا تزعلي و لازم تعزريني :roll

    مو نسيانة وعدي بوصفة خل التفاح , رح نزله كتير قريب ان شاء الله , و هلا رايحو لوصفة المخلل :zzz

  82. منى 9 January 2011

    هلا اختي 666:)

    هلا بعد ما منعصره منخليه بالخزانة , يعني لا شمس و لا ظل ;)

  83. 666 22 January 2011

    اختي منى شكراكتيرالموقع مفيدورائع نقدرجهودك

  84. منى 23 January 2011

    مية هلا فيك نورتي :)

  85. Noora 3 February 2011

    معذورة أخت منى والله يعطيكي ألف عافية بس متل مابتعرفي لكل شي موسم ووقت محدد بقى يا ريت ما تتأخري علينا بالرد

  86. القانتة لله 16 October 2011

    سؤال منى
    اناهلا ساويتوبدي اسالك البيت عندي دافئ لان شتاء بيناسبو هيك ولا حطهن بالبرندة ابرد بيكون ؟؟؟؟
    الله يخليكي جاوبيني مستنيتك لانو ما بدي اخسرهن
    حاكم فرحانة انو ساويتهن وكانو سهلين :zzz

  87. منى 17 October 2011

    انا بحطهن بالبردنة صيف شتي و ما بتفرق وين ما حطيتيهم ;)

    بالهنا حبيبتي , ان شاء الله بيزبطوا معك تمام

  88. القانتة لله 17 October 2011

    تسلملي عينك يا منى :)
    ان شاء الله بيزبطو ;)

  89. القانتة لله 12 July 2012

    منى بدي اسالك ساويتو بس في كم مطربان لهلا ما فتحتهن يعني فيكي تقولي صار لهن قريب 7 شهور
    منظرهن بتفكريهن معفنين وحالتهن حالة منظرهن مقرف كتير يعني ؟؟؟
    زوجي عم يقلي انو انتزعو كبيهن :(
    يا ترى فيهن شي انتزعو !!!
    ولا افتحهن واستعملهن ؟
    مع العلم انو ما فتحتهن بالمرة ؟؟؟
    الله يخليكي جاوبيني منشان يا كبهن يا استعملهن :x

  90. Mona 12 July 2012

    بتصير معي دوما , انا بفتح المرطبان و برمي الوج الي ما بيشهي و الباقي بصفيع عادي و بيطلع ممتاز متل باقي الخل

    بس مرة او مرتين حسيت انواتغيرت طعمته و نفسي ما قبلته فرميتو , لهيك دوقيه و شوفي , ان شاء الله شغال نظامي :zzz

  91. القانتة لله 12 July 2012

    يسلمو ايديكي يا حق
    ان شاء الله يكونو متل ما قلتي :roll

  92. غير معروفى 16 November 2013

    يسلمو ايديكي

  93. غير معروفى 16 November 2013

    يسلمو ايديكي اخت سها بصراحة انا كل سنة بعمل خل هي تالت سنة وبنفس طريقتك وبيطلع وقت بفتحو مو كتير حامض بس بعدين بيحمض بعد ما افتحو سألت عن السبب قال لازم ما يتغطا بس بشاش وانا بأحكم الغطاء عليه شو رأيك بصراحة انا خفت يكون كحول ازا تغطا منيح

  94. souha 19 November 2013

    السلام عليكم أختي
    أنا وقت عملتو كتير استفسرت عن الموضوع بس يقطع المدة المطلوبة خلص بإذن الله ما في شي بس سمعت عن طريقة الشاش رح استفسر عنها و إذا أحسن رح جربها و ببقى بنشرها إنشاء الله

  95. ابومحمد 1 July 2016

    اخت سها ارجو الرد
    انا عملت طريقتك ولكن بالتفاح ولكن ما صار طعم الخل لاذع
    مع اني تركته لمدة شهرين كاملين
    فهل بعد فتحه وتصفيته لازم يبقى مدة والا كيف
    وسويت طريقة ثانية حاب اعرف رايك فيها وهي نفس طريقتك
    ولكن تركت العبوة مفتوحة ومغطاة بقطعة قماش
    وبعد مدة ستين يوم رفعت العفونة اللي تكونت فوق
    وطلع طعمه لاذع بس فيه رائحة عفونة ولا اعرف
    هذا الشي طبيعي او لا
    ياريت تعطيني اراءك واقتراحاتك ووجهة نظرك

تقييم الوصفة
عاديةقد أحضرهاجيدةممتازةأكثر من رائعة (1 votes, average: 5.00 out of 5)