سلق مقلى


         وصفة : منى                 2007/03/21                 13 تعليقات
سلق مقلى

هي وصفة بتجنن من وصفات الشتي , خفيفة و شغلتها مو صعبة و مع الليمون او مخلل اللفت شغلة طيبة و غيررر شكل

بالصحة و الهنا

شو لازمنا ؟

كيلو سلق
5 ملعقة كبيرة زيت زيتون
بصلة كبيرة الحجم مفرومة ناعماً
3 – 4 فص ثوم مدقوق
باقة بقدونس مفروم ناعماً
ملعقة صغيرة فليفلة حمراء ناعمة
ملعقة صغيرة نعناع يابس
ملح و رشة بهار مشكل


طريقة التحضير

• ينظف السلق من الأوراق الصفراء و يقشر ضلعه ثم تفصل الأجزاء الخضراء عن الضلوع و تفرم .

• تفرم الضلوع المتبقية ناعماً و تغسل ثم تسلق لمدة 5 – 10 دقائق . يضاف الورق الاخضر و يترك ليغلي لبضع دقائق أخرى ثم يرفع السلق على مصفاة و يترك حتى يصفى من مائه . سلقنا الضلوع أولاً لانها تحتاج لوقت أطول و يمكن استعمال هذه الضلوع لاعداد متبل أضلاع السلق . • يقلب البصل و الثوم بالزيت حتى يشقر البصل ثم يضاف السلق و يقلب و يتبل بالنعناع و الفليفلة الحمراء الناعمة و رشة البهار و يقلب ثم يغطى القدر و تهدى النار و يترك السلق حتى يجف مائه تماماًُ مع التقليب .

• يضاف البقدونس و الملح و يقلب مع السلق ثم يترك حتى يجف مائه .

• يسكب السلق المقلى في طبق التقديم و يزين بالفليفلة الحمراء الناعمة و يقدم فاتراً أو بارداً مع مخلل اللفت أو عصير الليمون .

التعليقات

  1. DOUHA 21 November 2008

    شو هاد ما منى ايسلم ايديك انا هلئ كتير بشجع اكلات الشتي لاني فيا فوائد ونحنا ما مناكلا شو منعمل بنكون حاطين بالفزير اكلات من الصيف واكيد مالا ابدا فوائد
    عنجد شكرا وصفاتك بتجننننن
    :zzz

  2. منى 21 November 2008

    هلا ضحى :) كلك زووء يا قمر
    و انا متلك بحب ااكل كل اكله بموسمها و هلا صار كتير قليل الخضرة الي عم شيلهم من الصيف للشتي الا كم شغلة متل البندورة و الذرة و البازلاء :zzz

  3. ام نور 21 November 2008

    يم يم انا هالاكلة كتير بحبا منعملا كتير بالشتوية بالسبانغ او حتى منسمي خس افرنجي ما بعرف اذا هيك بتسموا كتير مفيد وطيب

  4. منى 21 November 2008

    بسمع فيه هادا الخس بس ما بعرفوا شخصي 8)
    اما السبانخ اله غير وصفات , بس يا عيني كلوا مع العافية طيبة :zzz

  5. ميساء 23 November 2008

    ياسلام شو طيبة هالأكلة تسلم ايديكي أنا كتير بحب أكلات الزيت وما بعرف بس غالبا الخس الافرنجي هو الهندباء بس مو البلدية الثانية يلي ورقها أكبر ومقصقص

  6. منى 23 November 2008

    و انا متلك ميوسة بموت على اكلات الزيت كلها :)
    ممم , عرفتها سبحان الله في كتي انواع من الخضرا معروفة باسما مختلفة بين بلد وبلد :roll

  7. رنا 23 November 2008

    ياستي اهلي ماكانوا يطبخوها بس وقت جيت عند بيت حماي دقتها وحبيتها كتير …اهلي مابيعملوا بالسلق غير اكلة وحدة اسمها طنبورة …اكيد سامعة فيها بماانك حلبية
    بس وقت دقت السلق المقلى جد كتير حبيته وطعمته كتير تغيير شكل والاهم انه مفيد كتير بس حماتي بتحط نعناع اخضر مع السلق طبعا اذا كان متوفر بتفرمه وبتضيفه للطبخة

  8. منى 23 November 2008

    اكيد يعرفها و هي في الموقع من هديك الشتوية ;)
    و الله ما بعرف ان مممكن يتحضر بالنعناع الفريش , اكيد رح يكون أطيب , خليلي عينك رنونة على الاضافة , ان شاء الله ببقى بجربها متل ما قلتي المرة التانية :)

  9. الدمشقية 30 November 2008

    ياستي السلق كتييييييير طيب محشي أو مقلى لوحدة أو مع الفول الأخضر :zzz وطبعاً مفيد جداً لأنه كلها خضرا
    شو رأيك تنزلي طريقة المقلى بالفول مع السلق حبيبة قلبي :zzz

  10. منى 30 November 2008

    الله ما بعرفه دمشقية :eek
    شو رايك انت تبعتي الوصفة و انا جربها ؟

    انا بموت على اكلات الشام يلا عم استنى الطريقة من بعد اذنك :zzz

  11. NOUR27703 11 February 2010

    هلى الوصفه كتير طيبه بس انا عندي ملاحظه صغيره انو ليش نسلق السلق ونصفي ميته هيك عم نروح كل الفائده انا جربت انو بعد ما اغسلوا بحطوا فورا بالطنجره من دون مي وبخليه ينسلق بميته لتنشف وهيك ضلت الفائده والشكل والطعمه نفسا شو رايك اخت منى

  12. منى 11 February 2010

    كلامك مزبوط اختي , و عن جد الطعمة ما رح تفرق , بس ما بعرف ليش جرت العادة اننا نسلق السلق و السبانخ قبل استعمالهن , انا ناوية غير هل العادة ان شاء الله .

    الف شكر الك للاضافة ;)

  13. ocean7 20 January 2011

    الفول المطبوخ مع السلق اسمه فولية
    اكلة شامية قديمة و مفيدة
    بيسلقوا للحم الموزات و بيضيفوا اليها الفول و السلق و ملح و بس
    و بيتركوها تنضج
    بياكلوها بالخبزة

تقييم الوصفة
عاديةقد أحضرهاجيدةممتازةأكثر من رائعة (3 votes, average: 3.67 out of 5)