شوكي بلحمة


         وصفة : منى                 2009/06/13                 40 تعليقات
شوكي بلحمة

شوكي بلحمة واحدة من أطيب وصفات الربيع عندي, و واحدة من وصفات المطبخ الحلبي السهلة , و بما أنو الربيع وقت الشوكي , حضرت هل الوصفة الطيبة كتير بالطعم و الحلو كتيرالشكل , مع اللبن المتوم و النعناع و الفجل , رح يكون اطيب غدى لاحلى فصل .

في أكتر من طريقة لطبخ الشوكي , ممكن عواض ما تقلي اللحمة تشكليها و هي نية على شكل أقراص و ترصيها فوق كل حبة و بعدها ع الفرن , بتطلع شكلها حلو , بس انا حبيت طعمة الطريقة الي ذاكرتها بوصفتي أكتر , كمان شغلة بترجع حسب الزوء

بالصحة و الهنا

-المقادير:

16 حبة شوكي
عصير نصف حبة ليمون
نصف كيلو لحمة غنم مفرومة
1 ملعقة كبيرة سمنة بقرية
نصف ملعقة صغيرة بهار مشكل
رشة قرفة
3 ملعقة كبيرة صنوبر
ملح
2 كوب مرق أو ماء
- طريقة التحضير :

1 - تسلق حبات الشوكي بالماء المضاف له عصير ليمون لمدة خمس دقائق ثم ترفع على مصفاة و تترك حتى تجف تماماً . عملية السلق اختيارية و يمكن الاستغناء عنها و الهدف منها أن يصبح لحبات الشوكي لون مشرق .
2 - تحمى السمنة على نار متوسطة , يضاف الصنوبر و يحمص لبضعة ثواني أو حتى يشقر ثم يرفع على ورق ماص . بنفس السمنة تقلب اللحمة المفرومة على نار متوسطة , تتبل بالملح و البهار و القرفة و تترك حتى تنضج مع مراعاة أن لا يجف مرقها تماماً .
3 - يقلى الشوكي بالزيت حتى يشقر قليلاً , يرفع على ورق ماص . يمكن قلي الشوكي بالسمنة , حسب الرغبة .
4 - تحشى قلوب الشوكي بالحشوة المجهزة ثم تصف في طبق بايركس أو صينية . تصب المرقة في الصينية بلطف .
5 - تغطى الصينية بورق ألمنيوم ثم تخبز في الفرن المحمى على درجة حرارة 180 لمدة 30 – 45 دقيقة أو حتى تنضج .
6 - ينثر الصنوبر على حبات الشوكي ثم يقدم مع الأرز المفلفل و اللبن المثوم و الفجل و النعناع و الرشاد .

التعليقات

  1. ام نور 13 June 2009

    سبحان الله يا منى انا حاسة فيكي لان هالشعور مارء علي بس هادا حال الدني شو بدنا نعمل وبالنسبة لا الوصفة من زمان عم استناها سلم دياتك كتير شكلا مرتب وخرج عزايم

  2. freesoul 13 June 2009

    المقدمة كتير حلوة
    بتخلينا نرجع لايام زمان وذكريات الطفولة وبيت العيلة .رزق الله هديك الايام لمن كنا زغار وما على قلبنا هم .
    ياستي انا صرت اعمل الشوكي بنفس طريقتك . علمتني ياها جارتي اللبنانية . انا كنت بعملها متل امي يعني الشوكي واللحمة مقطعين قطع كبيرة.
    بس ولادي وجوزي بيحبوها بها الطريقة بتشبه يللي بتتقدم بالمطاعم الشامية يسلمو ايديكي حبيبتي

  3. wedadswed 13 June 2009

    منى لما قريت المقدمة دمعو عيوني لأني عندي حنين وما بعرف لمين من كتر الأشياء اللي بحنلها رفقاتي اللي تركتهن من زمان وما بشوفهن إلا كل حين ومين وأخر مرة شفتن كانت من ست سنين لما كنت عمبجهز للسفر للسعودية وكان عندي فحص طبي في حلب والتقينا عند صديقتي غفران وكانت ساعات من أجمل الساعات بس متل ما قلتي الدنيا بتلعب فينا وما منعرف على أي شط بترسينا ,فتحت جروحي وكأن كل كلمة قلتيها بتمس شي بيشبهني ’شكرا كتير على الوصفة بس المقدمة الحزينة ما تركت إلي نفس لأي أكل .

  4. غيث 13 June 2009

    الله يسلم دياتك ميمو وشكرا لك على مشاعرك النبيلة وتفقدك لنا لما شوي بنبعد عن الموقع مع اني ما بقدر اشقد ما انشغلت الا واطل على الموقع ولو بدون تعليق ان كنت مشغولة بس ما بقدر ما اشوف جديدك واشقد ما شفنا مواقع ما رح يجي بيزيق موقعك متل ما بيقولو لا يعلى عليه انا من يومين تصفحت موقع جديد بتعرفيه انت دون ذكر اسامي وشتان يا ستي ابوس قلبك وقلب موقعك ما بيشبهه شي اشقد ما حاولو يقلدوه تعيشي لنا يا منى وتقدمي لنا كل جديد من ابداعاتك وبالنسبة لحزنك الحمد لله هيك ولا غير شي الله يخلي لك امك اللي هي بتزين الدار وحياتك مو البيت معلش مقدرة مشاعرك بس هي حال الدتيا لا شيئ يدوم سوى وجهه الكريم ويا الله بقى نحكي عن هالاكلة الله يعطيك العافية انا بعملها بنفس الشكلل بس الطريقة مختلفة شوية واكيد طريقتك افضل واطيب ورح جربها ان شاء الله واما بالنسبة للشوكي بالمختصر المفيد اكلة الكبد فيه مواد مقوية للكبد بشكل عجيب حتى ان تركيبة الادوية اللي نوصفها لمرضى الكبد لتنشيط عمله تركيبها العلمي نفس المادة الموجودة بالشوكي وشكرا منى على مشاركتنا حياتك فاني اجد متعة في ذلك واسفة على الاطالة

  5. ام فايز 13 June 2009

    بتعرفي هادا شعور انا دايما بحسو بس انا بحسو بحرقة اكتر منك انا روحي لساتها متعلقة بالبيت يلي اهلي تركو وانا تجوزت عمري 17 سنة وكانت كل طفولتي وحياتي الي بحبها هنيك صحيح انو انا عايشة بدبي بس دايما بحس انو روحي عم تتفتل بهداك البيتونشالله بس يصير معي مصاري بالمستقبل رح ارحع اشتري هداك البيت وارجع اسكنو نشالله ممكن حلمي يتحقق نشالله انا حسيت فيكي وبكل كلمة قلتيها وانا معك 100 با100

  6. رنا 13 June 2009

    انا عندي حنين مابعرف لمين …ليلية بيسرقني من بين السهرانين …وبيصير يمشيني لبعيد يوديني …ومابعرف لمين
    دندنت عالغنية لماقريت مقدمتك ..وبصراحة نفسية الانسان كتير بتتعلق بالاماكن وبالفعل بحس انه بيصير اله واصل مع حيطان صماء ..
    ياستي الله يجعل قدوم هالبيت الي انتقلتله امك خير وماتشوف على وجه غر كل سعادة
    اما بالنسبة للوصفة كتير رائعة وطيبة وبحبهااااا لانه امي هيك بتطبخها اما حماتي بتطبخها بلحمة شقف وبتقطع الشوكي …بصراحة التنين طيبات وماعليهن حكي يسلم ايديكي

  7. أم الهدى 13 June 2009

    آآآآآآآه ما بعرف ليش لما قريت المقدمة دمعو عيوني وحسيت حالي عم أسمع شي غنية من أغاني فيروز الدافية يلي بترجعنا لحنيني الماضي وذكرياته الكتيرة يلي منها الحلو ومنها المر يلي ميلانة شغب وحب وأمل ومرح ولعب متل عصافير الربيع ، يا ستي عنجد انت مبدعة ما شاء الله عليك الأوقات يلي بمر فيها الإنسان كلها حلوة حتى المرة فيها وقد ما بعدت النيا ناس وقربت ناس مسير الحي يتلاقى متل ما بقولو وناس بتموت وناس بتنولد وذكريات بتتجدد واحلام بتتبدد بس بيبقى بالنهاية حقيقة وحدة انو دوام الحال من المحال ومهما استمرت الحياة لا بد تنتهي ويبقى الخالق بس
    الله يرحمنا ويجعل خواتيمنا على الإيمان

    تسلم دياتك عالشوكيات الطيبين أنا كتييييييييير بحبو شلون ما كان والشوكي بحد ذاته برجعني لذكريات حلوة كتير
    أيام الربيع وامتحانات الشهادة ولمة الأهل
    الله لا يطول علينا الغربة ويرجعنا لبلدنا
    والله كلامك حرك شجوني
    تصبحي على خير

  8. ميساء 14 June 2009

    ما بعرف يا منى ليش دمعت عيوني لما قريت مقدمتك يمكن لصدق المشاعر والحنين اللي بكلامك وعلى كل حال متل ما قالت الأخت أم نور هي حال الدنيا وكلنا ما بيبقى فينا بعد ما نكبر ونبعد غير صور عتيقةو ذكريات يمكن بعضها يضل محبوس جواتنا و يا رب يكفينا شر هالأيام ويعطينا خيرها وهلق يسلمو عالوصفة كتير طيبة أنا بعملها بس بحط مع الحشوة بصل وبتطلع طيبة بس بدي جربها بلا بصلة لأنو من تحت ديات ميمو غير شكل :zzz

  9. آرام 14 June 2009

    اللذيذ بموقع لقمة طيبة مو بس الأكلات الجديدة الي ما بعرفها .. حتى الأكلات الي بعرفها من زمان صرت أشوفها بطريقة مختلفة .. يعني الصورة كانت مفاجئة إلي .. شوكي بلحمة بس نيو لوك 8)
    طول عمري بطبخه مفروم وبلحمة شقف .. وبالطنجرة مو بالفرن .. صحيح أنو طريقة الطبخ نفسها تقريباً .. بس الشكل مختلف تماماً وأكيد ما في مجال للمقارنة بينهم .. يعني الشوكيات الي عندي بالفريزر صارو يتحرقصوا بدهن يطلعوا :zzz

    بالنسبة للمقدمة ما كنت حابب أعلق .. لولا أني حسيت بشعورك تماماً أختي الكريمة .. من سنة ونص مريت بنفس الحالة لما بعنا بيت أهلي .. كمان كان بيتنا جنينة وكل شجرة إلها قصة وكل زاوية إلها ألف ذكرى وذكرى .. شباك غرفتي كان مطل على شجرة الليمون .. ولهيك ريحة زهر الليمون بالنسبة إلي هي أطيب ريحة في الكون .. لما ودعنا البيت أخواتي البنات صاروا يبكوا .. وأنا كابرت كتير حتى ما تنزل مني دمعة .. بس كانت حنجرتي رح تنفجر .. بتصدقي أختي أني حتى اللحظة ما بقدر أروح على حارتنا .. وأحياناً بغير طريقي حتى ما أمر من الشارع .. بس هي حال الدنيا أختي .. شو بدنا نعمل :roll

  10. سمر 14 June 2009

    السلام عليكم كيفك يااخت منى والله ذكرتيني لحنين بيتنا بس الحمدلله انه بعد موجود بس المشكلة انو احنا مو موجودين :sigh واحب على قلبي كان حنينت بيتنا بالياسمينة والنانرجة والكبادة والزيتون والرمان والعنب والمشمشة وكتير منون :cry بس الحمدلله على كل وتسلم ايدك على هالاكلات الطيبة :)

  11. منى 14 June 2009

    هلا ام نور :)
    حال الدني و حالنا نزعل على هل الحال :roll

    ان شاء الله تجربيها و تكون على زووءك و زوء عيلتك و الف صحة و هنا مسبقا

  12. منى 14 June 2009

    هلا ام جود :)
    سبحان الله الطريقة الي ذاكرتيها سامعة عنها سمع و بالصدفة كنت مفكرة كل الناس بتعمل الشوكي متل ما بتعمله امي :roll
    الف صحة و هنا على قلب اولادك و جوزك و ريتو عوافي دايما

  13. منى 14 June 2009

    هلا ام فايز :)
    ان شاء الله يتحقق حلمك و ترجعي و تشتري البيت و تكون كل عيلتك الجديدة فيه
    و انا كمان حسيت بكل كلمة كتبتيها , ربي يسر كل امورك و يتحقق الي في بالك اذا كان خير بحقك يا رب ;)

  14. منى 14 June 2009

    هلا رنونة :)
    صوتك حلو , سمعتك انا ;)
    انا كتير فيني هل القصة , بذكر لما بعت اول كمبيوتر عندي بعد ما صارت طبقة العفن عليه شي 6 سم قديه زعلت و كانهم عم يبعدوا عني اخي الصغير و لما جبت الجديد صرت اعذر بقلبي لاول واحد لحتى ما ياخد على خاطره مني بعد عشرة عمر , هيك كتير برتبط باشيا و هادا شي غلط , يمكن .

    الشوكي شو طيب بكل اشكاله , ان شاء الله ناوية حرب طريقة حماتك و تطلع كمان طيبة ;)

  15. منى 14 June 2009

    هلا ام الهدى :)
    سلامة قلبك من الكرب اختي , و هي ايام حلوة راحت و بقي منها بس خيال و المشكلة ان بوقتها ما كنا مقدرين السعادة الي نحنا فيها , لهيك بتلاقيني بوصي ولادي كل يوم قبل ما يروحوا على المدرسة , انبسطوا و اتهنوا بكل لحظة رح تمر معكم اليوم

    اامين يرحمنا و يطلعنا من هل الدنيا بخير متل ما دخلناها بخير و ربي ترجعي لسوريا سالمة و غانمة انت و كل عيلتك , واحد واحد

  16. منى 14 June 2009

    هلا ميوسة :)
    امين يعطينا خير هل الايام و هل الوقت الي ما عم ينتج منه الواحد الا بلطف و قدرة رب العالمين
    ان شاء الله تجربي هل الشوكي و يطلع طيب و نحنا بحلب هيك منحضره و في ناس بيحطوا مع المرقة سن توم مهروس , كمان طيب

  17. رنا 14 June 2009

    حبيت علق على كلام الاخت غيث بالنسبة للمواقع التانية كلهن فيهن الخير والبركة بس سبحان الله حتى احيانا الاكلة الي بتكوني يامنى اخدتيها من غير موقع وقت بدخل عليه لاشوفها بمكانها الاصلي ببطل جربها :grin بس بينما عندك الصور والذوق بيغريني لجرب اي شي وكل شي ;)
    Go East Go West MOoOnY IS The BeSt

  18. غيث 14 June 2009

    الله يسلمك منى وشكرا على ذوقك وتفضلك بالرد علينا والله مو مشكلة شلون بتريدي انا معك اقتراحاتك كلها حلوة ومفيدة انا تحت امرك اذا عندي معلومة ما اكيد ما رح ابخل عليك بها والجميع بيستفيدو ان شاء الله والاجر على الله نحمده ونشكره اننا عم نفيد ولو عدد قليل من الناس وكيف ما ظبطت الموضوع انا معك ان شاء الله

  19. Iman 15 June 2009

    مقدمه رائعه يا منى لانها من القلب للقلب. الكل تاثر فيها لانك ببساطه عبرتي عنا كلنا. من منا لا يحن للماضي و العيله و بيت العيله. و بكرا بالمستقبل كمان لما ولادك يكبروا و يتزوجوا و ينتقلوا لبيوتهم راح تشتاقي كتير لهاي الايام يلي همه لسه صغار فيها. مرات كتير بيجي شي بيذكرنا بالماضي و حياتنا زمان و بيحسسنا بالحزن لانو ما راح نشوفها بس هي محفوره بالقلب. صحيح انا في مرات ذكريات او لحظات بتمنى انو احفظها في مرطبان زجاج و اسكر عليها و اخبيها في مخرن الذكريات و كل ما احن لها اروح عالغرفه و افتح المرطبان و اشوفها. شايفه حتى في الذكريات في مراطبين هههه. الله يخليلك زوجك و اولادك و ماما و اخواتك. و ان شاء الله الف مبروك بيت ماما ان شاءالله قدمو سعد عليها و عليكم. اما الان فناتي للوصفه الذيذه. كتير بحبها بس بنساها مش عارفه ليش. يعني ما في اخف و اسهل منها. شكرا ذكرتينا فيها يا منى. و من تحت ايديكي بتاخذ العقل. منى لما تحسي هيك كلي حبه شوكولا صغيره بتغير الموود بسرعه.
    كل الحب :zzz

  20. منى 15 June 2009

    هلا فيك اخ ارام :)
    لو شفت الشوكي الي انت متعود عليه رح يكون نيو لوك بالنسبة الي , ناوية جربه ان شاء الله , و متل ما قلت بالطنجرة و مقطع و مع لحمة شقف , كل شي نسبي و حتى بالطبخ
    يلا طالع هل الشوكيات , حرام بيقوا بهل الفريزر زعلانين و ان شاء الله تجرب الشوكي و يعجبك .

    ان شاء الله الله يجعل قدوم البيت الجديد خير عليك و على خواتك و كل عيلتك , سبحان الله الناس كلها عندها قصص بتشبه بعضها بس بوجوه مختلفة :roll

  21. منى 15 June 2009

    هلا سمورة :)
    نفس مشكلتي , لان البيت موجود بس صار فاضي من اهله و ناسه , و بعد شوي رح يسكنوه اغراب , ممكن يحبوه متل ما حبيناه و ممكن لا :sigh
    الحمد لله اكيد على كل شي , و اكيد هادا الخير بحق الكل
    نورتي اختي

  22. منى 15 June 2009

    هلا رنونة :grin يعني شو ضحكت لمن قرات ردك , شو تبطلي , عن جد بتكون طلغت شهية ما دام نزلتها في الموقع , بقى اتشجعي و على مسؤوليتي ان شاء الله
    احم , هل المثل الي
    حاسة حالي حلوة هلا
    Thanks Honey for being sOoO SWEET

  23. منى 15 June 2009

    هلا أمونة :)
    و الله كلامك مزبوط امونة , سبحان الله , الله لا يجعل هل الحنين حسرة يا حق .
    احيانا كتير بيخطر ببالي نفس الشي , يا ترى بعد عشر سنين لو اتمنيت ارجع للوقت الحالي الي انا هلا عايشة فيه , شو ممكن احب غير شي اكتشف بوقتها انه كنت عم اعمله غلط

    شو ضحكت على قصة المرطبانات , انا عندي اخت هل الفكرة و هل الحركة, ببقى بحكي عنها غير مرة ان شاء الله :zzz

    يلا ان شاء الله كون ذكرتك فيها هل المرة و تتشجعي ترجعي تعمليها , و الف صحة و هنا مقدما

  24. Dimah 15 June 2009

    بتعرفي أنا ما بحب الأرض شوكي، بس منظر الأكلة بيشهي

    تعقيب على كلام الأخوات عن مواقع الأكل:
    بصراحة بعتقد كل اللي انكتب بيزعلني وبيزعل كل شخص عنده موقع أو مدونة بيكتب فيها عن الأكل (وصفات وصور وغيره)، والأشخاص اللي بيكتبوا عن الأكل هم أشخاص بيشاركوا حبهم واهتمامهم وشغفهم بالأكل ، وهو مجتمع قائم بحد ذاته من أجانب وعرب، وعند تصفح المواقع الأجنبية ممكن تلاحظوا أنه عدد “المدونين عن الأكل food bloggers وصل لأكثر من 5000 مدون. وبس أنا حبيت وضح وجهة نظري، وكل الناس خير وبركة!

    وكلمة شكر خاصة لمنى، لأنها من ألطف الناس اللي تعرفت عليهم “بالعالم الافتراضي”
    :)

    Dimah
    مدونة ماء زهر البرتقال – Orange Blossom Water

  25. منى 15 June 2009

    دمدومة مشان الله لا تزعلي , و الا رح ازعل انا كمان :roll

    و انا اسفة اذا في شي زعلك , و متل ما قلتي , ما دام الشخص عم يشتغل و يبدع فالمجال مفتوح للكل و الكل بيستفيد من بعض و نحنا كلنا عم نكبر مع بعض بفضل بعض ;)

    اما عن الوصفة فاتمنى انك تجربيها و لو لعلتك و تعجبك و تكون على زووءك

  26. wedadswed 15 June 2009

    منى مسى الخير أنا مو فاضية الأيام هاي بس ما بحسن بلا ما أدخل عالقمة طيبة ولو خمس دقايق لأن عنا إمتحانات بس لما دخلت هاي الصفحة وما لقيتك رادي على تعليقي ولو بكلمتين زعلت كتير وتصبحي على خير .

  27. منى 16 June 2009

    هلا وداد :)

    بالاول معقولة رد على الكل و ما رد عليك :?

    رح احكيلك شو صار معي و مع ان ما الي عذر بس اتمنى تعزريني

    بأول مرة كتبت الردود للكل , كنت اوف لاين و بعدها اتصلت و صرت ابعت الردود رد و را التاني بس بعد كم دقيقة جمد النت و ما بعرف شو صار , المهم ان في رد راح و انا فكرت انه بس رد غيوثة لهيك رجعت و كتبته . بس متل ما قلتلك ما الي عزر , كان لازم اتاكد لان طلع ردك كمان ما انبعت , و انا ما بقدر على زعلك و لا زعل أي اخت غالية عندي بالموقع و الله بزعل انا كمان

    هلا بعد ما قرات ردك التاني رجعت كتبت رد و انا رح ابعته انقطعت الكهرباء و كمان راح .

    بس هلا التالتة ثابتة و اذا صار شي قبل ما ينبعت الرد رح قطع شعراتي .

    المهم رح ارجع اكتبلك الرد الي كتبته اول مرة و ما مشي الحال و اتمنى تسامحيني

    اختي وداد اتمنى ترجعي لسوريا و تكون عيلتك كلها بتقى و مودة و الاصحاب كلهم بهنا و الأقراب كلهم بعافية و تكون امورك ميسرة و كل شي تمام و متل ما بتتمنى و احسن باذن الله .

    مشان الله مسحي دمعاتك و اتمنى ان ما تكون المقدمة سبب لان ما تجربي الوصفة لان بتستاهل , و يا ريت تجربيها و تعجبك

    سلام

    • Lina 28 June 2014

      يسلم دياتك يا منى شي بيشهي من دياتك
      هالاكلة ما كتير اكلتها و انا صغيرة لانو كان شائع بين ولاد عمي انو الشوكيات هنن ضهر السلحفة هههههه
      وانا صدقت و ماادوق الشوكي اكل بس رز و لحمة
      هلئ مع كل هالحنين باكل الشوكي و بتمنى ارجع لبلدي و اهلي
      الوصفة تبعة ماما بتشبه وصفتك بس فرق صغير انها كانت تترك ربع كمية اللحمة نية
      وتخللط اللحمة المقلية مع النية و تحطهم فوق الشوكيات… ع نفس مبدأ الكبة المبرومة
      اذا حبيتي جربيها شي مرة
      وتحياتي الك يا ارقى انسانة

      • منى 9 July 2014

        صباح الورد لينا :)
        هههههههههه ابوس روحهن اش بيخطرلهن الاولاد , منيح غيرتي رايك بعدها
        ان شا الله بترجعي و تكونوا كلكن بالف خير و سلامة و صحة يا حق
        و اله حبيت هل الفكرة كتيرررر , بدي جربها المرة التانية لانو فعلا الحشوة مرات بتفرفط و بيصير صعب وقت السكب , شكرا كتيرر للفكرة

        منورة الموقع باحلى ناس و الله

  28. semo 16 June 2009

    ايهشو هالمقدمة الحلوة
    والوصفة الطيبة الله يعطيكي العافية
    ومن زمان حابة اعرف طريقة للشوكي
    فعلا شي بيشهي

  29. Dimah 16 June 2009

    و أنا كمان ما بيهون علي زعلك يا منى :roll ، بس كان لازم وضروري عبر عن وجهة نظري.
    على فكرة نحن ماحدا عنا بياكل الأرضي شوكي
    :grin

    Dimah
    مدونة ماء زهر البرتقال – Orange Blossom Water

  30. منى 16 June 2009

    هلا غيوثة حبيبة قلبي :)
    اذا هيك مو مشكلة ما دامه المانع خير اطمن بالي .

    خليلي قلبك غيوثة قديه بحس حب بكل كلمة بتكون بردك

    يا ستي مين عم يقلد لقمة طيبة :? ؟
    اذا كان في حدا ناوي او عملها يروح يكب حاله :grin . من وين بده يجيب هيك عضاوات منقايات على الصينية

    خليلي عينك غيوثة على هل المعلومات , الصراحة اول مرة اعرف ان الشوكي مفيد للكبد , لو سمحتي غيوثة , ممكن اضيف تعليقاتك الطبية على الوصفة تحت عنوان نصيحة طبيبتنا او هيك شي ؟ شو رايك ؟

  31. منى 16 June 2009

    هلا سيمو :)
    ان شاء الله تجربيها و تعجبك لان عن جد يممي , و اكيد رح اسمع منك بعد التجريب :zzz

  32. منى 16 June 2009

    هلا دمدومة :)

    هيك سديتيها بوجي :roll

    طيب ان شاء الله يكون ابو الشباب المستقبلي يحبها و تجربيها اله و تعجبه , شو رايك :grin
    كيف رح تدبريلها حلة هي

  33. wedadswed 16 June 2009

    السلام عليكم :منى أنا أسفة إذا زعلتك بس العتب على قد المحبة وأنا يمكن حكيت بقساوة لأني مضغوضة هالأيام إمتحانات وريجيم وتغير في مكان السكن وقرارات جديدة تلوح في الأفق وبنتي الصغيرة رغود ما عمتاكل هاي الايام بنوب وهاد أكبر سبب لإنزعاجي فأرجوك اعذريني ولو ما بعزك ما حكيتلك اللي بقلبي بس فعلا حسيت حالي مرتاحة ,الحقيقة أنا ما قلت إني ما رح جرب الوصفة بس أنا عاملته كذا مرة وبموت في هالأكلة بس بعملها مع تغير صغير هو أنو بقليها نص قلي بدل السلق بس طريقتك أكيد صحية أكتر وخاصة هالفترة فترة ريجيمي على كل حال أنا أسفة مرة تانية والله يبعد الزعل عنا وعنك وعن أمة محمد أجمعين

  34. منى 16 June 2009

    هلا وداد :)

    انا كنت كاتبتلك بالرد التاني ان العتب محبة , بس نسيت ارجع اكتبها مرة كمان :grin

    بعرف ان لو ما الي معزة عندك ما كنتي عاتبتيني و حبيبتي انا مو زعلانة , بالعكس انا خوفانة تكوني انتي الي زعلانة , و هلا هيك صافي يا لبن و حليب يا قشطة ;)

    ربي يسر كل امورك , انا مريت بنفس هل الحالة من شي اسبوعيين , امتحانات و ضغط شغل بالبيت و الطقس شوب و انا بكره الشوب , لهيك حاسة فيك و ان شاء الله ما تكون بنوتك مرضانة لا سمح الله لحتى خفان اكلها :roll

    كنت حابة قلك اذا في مساعدة بقدر اقدمها , بس ما رح يطلع بايدي شي غير الدعاء الك بتيسر هل المرحلة و تصويب قراراتك الي رح تاخديها :)

    سلام

  35. JoJo 17 June 2009

    ماشاء فعلا شكلها روعة واول مرة اسمع فيها ان شاء الله راح اجربها لاني باحب التغيير كثير في الأكل ..يسلموو دياتك منى :)

  36. منى 17 June 2009

    هلا جوجو :)
    ان شاء الله تجربيها و تعجبك و تكون يممي , مية هلا جوجو

  37. sahreeg 9 February 2010

    ياسلام عليك رجعتينالهديك الايام بحلوها ومرها
    المكان اللي بتعيشي فيه طفولتك مابينتسى بس بيبقى بذاكرتك لأنو الزمن بيغير كتير فيه وبتحسي صار غريب عن اللي بذاكرتك اناوقت اللي بنزل فيه على حلب وبروح فيه عنداهلي بحس حالي عبدور على الماضي ومابلاقي غير الحاضربحس حالي ضايعة ومابواسيني غير وجود امي واخواتي اللي مابنلحق بالاجازة نخلص حكينا واخبارناوبرجع لبيتي والروتين والغربة بس الحمد لله بعد 10 سنين تعودت على الغربة واكتفيت بالاجازات وما عدت افكر بالرجوع النهائي
    بالنسبة للاكلة امي بتعملهابتشبهابس اللحمة بتبلهاوبتحطها على اقراص الشوكي المقلية نيةوبتصفها بالطنجرة بتحط ماء وملح(انا بضيف ماجي)وبتغطيهاوبتطبخهاعلى نار خفيفة وبعدها بتصفي المرقة وتطبخ عليهاالرزاناكتييييييييييير بحبهاوخصوصا الرز بطلع روعة
    اعذريني طولت عليكي بس اتحملينالأنو قلبك باين كتير كبير وبوسع السلام عليكم ورحمةالله وبركاته

  38. منى 20 April 2010

    هلا غيوثة:)
    انا بانتظار معلوماتكم و نصايحك و الف الف شكر الك مقدما عليها و ان شاء الله ربي يجعله بميزان اعمالك و حسناتك

تقييم الوصفة
عاديةقد أحضرهاجيدةممتازةأكثر من رائعة (7 votes, average: 4.57 out of 5)