فتة اللحم المصرية


         وصفة : منى                 2011/11/03                 20 تعليقات
فتة اللحم المصرية

كل سنة و انتو سالمين و السنة هي رح ييكون احتفالنا على الطريقة المصرية , بوصفة من التراث المصري , سهلة , طيبة و مقاديرها قليلة و متوفرة بكل بيت .. و هل الوصفة قريبة على زوئنا .

صار في نقاش بالفيس بوك بجروبنا انو في صبايا ما بتثق في شيف مصري مثلاً عم يعمل كبة و في شيف سوري عم يحضر كبسة و في شيف تونسي عم يحضر فتة . هلا انا مو كتير مع هل الحكي , دوما بالوصفات التقليدية ما في مجال للتفنن , بس ما في مانع ابدا انو نقدم وصفات من مطابخ تانية و خصوصا لما بيكون الواحد متعلمها من مصدر ثقة و مو ضايف و لا لمسة من لمساته ..

ما بقدر انسى مثلاً لما بدي الشيف اندرو اول برنامج اله و كان من وصفاته , كبة ستروغونوف و شي تخبيص من هل النوعية , وصفاته كانت منفرة لان وصفة تقليدية بطريقة غريبة و نحنا ما كتير منتقبل هل الوصفات , منتقبل الجديد الجديد , بس الي اتربينا عليه اتركوه على طرف و لا حدى يزيد عليه .. متل كمان وصفات في النت , بتلاقي وصفات عن جد بتوقف شعر البدن على اد مو غلط و على اد انها مو راكبة و مو زابطة و بعدها بيلزقوها بالمطبخ السوري ….

منرجع للفتة , ان شاء الله محضرتها على اصول اصولها و من دون ادنى تفنن مني , متل ما تعلمتها من رفيقتي المصرية و متل ما صرت حضرها و قدمها لعيلتي .. و سرها انك تستعملي سمنة طيبة لان رح تخلي الطبق كله طعمته غير شكل . اتمنى تجربيها و تكون نممي

بالصحة و الهنا




نصف كيلو لحم غنم
2 كوب رز مصري , منقوع

صلصة البندورة :

2 كوب ماء
3 ملعقة كبيرة معجون بندورة
3 ملعقة كبيرة خل أبيض
4 فص ثوم
ملعقة كبيرة سمنة
1 رغيف خبز كبير , مقطع مكعبات و مقلي بالزيت أو السمنة

الباقة العطرية :

بصلة صغيرة مقشرة
3 فصوص حب الهال
بضعة حبات قرنفل
ورقة غار
بضعة حبات فلفل أسود
نصف ملعقة صغيرة بهار مشكل




• تقلب اللحمة بالقليل من السمنة على نار قوية حتى تحمر من كل الأطراف , تغمر اللحمة بالماء المغلي و تضاف الباقة العطرية و يغطى القدر و يترك حتى تنضج اللحمة .يضاف الملح باخر ربع ساعة ثم تصفى المرقة.

• تحضر الصلصة , يحمر الثوم في السمنة لبضع ثواني حتى تظهر رائحته و يصفر قليلاً , يضاف معجون البندورة و يقلب لمدة دقيقة أو دقيقتان , يضاف الماء و الخل و الملح و الفلفل و تترك الصلصة تغلى حتى تسمك قليلاً .

• يصفى الرز جيداً ثم يحمص بالسمنة لبضع دقائق , يغمر بكوبان إلى كوبان و نصف من مرق سلق اللحمة المغلية ( حسب نوعية الرز ) , بعد أن يغلي مجدداً تهدى النار و يترك حتى يمتص كل المرق . يترك في القدر لمدة ربع ساعة حتى يتهدى و تتفلفل حباته .

• في طبق عميق قليلاً يوزع الخبز المحمص , يوزع القليل من مرق سلق اللحمة المغلية و تترك لبضع دقائق حتى يمتص الخبز المرق .

• يوزع الرز على الخبز ثم اللحمة ثم الصلصة , و يمكن أن يزين بالمكسرات . توزع باقي صلصة البندورة في أطباق صغيرة و تقدم مع الفتة فوراً .


التعليقات

  1. غيث 3 November 2011

    يسلم ايديك منى والله رح اعملها بعد العيد اذا راد الله تغيير شكل وسهلة وما فيها شي غريب الله يجزيك الخير طالما انت مجربتيها اكيد رح اعملها قريبا يسلم ايديك وكل عام وانت وكل احبابك بالف الف خير :)

  2. ام نبيل 4 November 2011

    كل عام وانت بخيروعيلتك وكل الأخوات هون
    تسلم ايدك يافنانة شكلها بجنن وان شاء الله رح جربها كل المقاديرعندي بس اليوم الجمعة مابطبخ باخد اجازة وبعدها العيد كمان باخد اجازة بس ناوية هاد العيد اعزم سلفتي وما بحب اجرب شي جديد بالعزايم فيمكن بعد العيد
    ومعك حق الاكلات التقليدية بحبها على طريقة امي وبس وما بحب اي اختراع بس اذا في وصقات من غير بلاد منجربها ليش لأ المهم اللقمة الطيبة :zzz

  3. مدام الصن 4 November 2011

    شكرا منا على الوصفه الجديده وانا كمان رح اعملها اذا الله راد بالعيد بس ما بعرف اذا رح تعجب جوزي لانو نقاق بالاكل وما بيحب الا الطبخ الحلبي الاصلي التقليدي

  4. omislam 4 November 2011

    السلام عليكم اخت منى
    من يومين كنت عاملة هالوصفة اللي تعلمتها من اصدقاء مصريين من زمان ومن فترة للتانية بعملها ظريفة كتير وتغيير عن اكلاتنا في العيد لانو هنن غالبا بيعملوها لعيد الاضحى.
    في طريقة تانية انهم بيعملو دقة التوم والخل لحالها مو مع الصلصة الحمرة يعني وكمان طعمها ظريف بس لما تضيفي الخل على تقلاية التوم بيطرش كتير كتير على الغاز مشان هيك منهم بيستسهلو وبيضيفوه مع الصلصة الحمرة
    بس حبيت علق على هالوصفة لاني من يومين كنت عاملتها

  5. omislam 4 November 2011

    وكمان حبيت اضيف انو لو حطيتي شوية صلصة حمرا فوق طبقة الخبز بيعطى طعمة طيبة كتير

  6. منى 4 November 2011

    و انت بالف الف خير غيوثة :) و ينعاد عليك و على كل احبابك بالخير و العافية و الصحة

    رح ستنى رايك ;)

  7. gsm 4 November 2011

    شكلها بشهي كتيير
    إن شاء الهل رج اجربها بس بتشبه نوع من انواع الفتات الشامية يللي حكتلي عنها رفيقتي

  8. dado 4 November 2011

    كيفك منوش؟
    كل سنة وانتي وعيلتك وبلدنا بألف خير.
    صرلي زمان ما دخلت عالموقع، كنت مفكرة إنو … ما بعرف شو.. بس الجو الضبابي فكرته رح يضل مأثر عليكي.
    دخلت مبارح حتى شوف وصفة الفريكة، وقمت تفاجأت بكمية الوصفات يلي فاتتني، وكلها فيها باتنجان.. يا سلاااااااام!
    المهم، مبارح رفيقتي مصرية سألتني اذا منعمل فتة بالعيد، قلتلها لأ.. انصدمت.. قالتلي: دا احنا بنفطر فتة ف صبحية العيد.. ايه الفئر اللي انتو فيه!منيح اجيتي انتي وعدلتي الصورة.
    سلامة

  9. منى 18 November 2011

    هلا ام نبيل :)
    و انت بالف خير حبيبتي و ينعاد عليك و انت بين اهلك و حبابك , التنين الي ضى كنا عند هبة و اشتهيت شوفك :zzz

    اكيد بالعزايم ما منجرب شي , لحتى ما يسود وجنا ادام الضيوف , ان شاء الله بعدها تجربيها و تحبيها و رح استنى رايك

  10. منى 18 November 2011

    هلا مدام الصن :)
    كانو كتير شايفة هل الوج :grin
    تقريبا تلات ارباع الحلبية ما بيحبوا غير الطبخ الي كبروا معه و الباقي بيعتبروه نقنقة

    ان شاء الله تجربيه و يكون على زوءك
    هلا حبيبتي

  11. ام نبيل 19 November 2011

    والله انا كمان كتير اشتهيت شوفك
    وهي الأكلة محطوطة بالمينيو تبع التجريب
    أسبوعي الماضي كان كلو لقمة طيبة الطبخات والسلطات وحتى الحلويات
    عملت كوسل مطبق ويهودي مسافر كانو طيبين
    وسلطة الخريف وسلطة الخضار بصوص اللبن رائعات
    وكاتو الشوكولا بحشوة الأناناس والكراميل كتير حبيتو طلع ناجح الحمد لله مع اني ما سمعت الكلمة وقسمتو وهو دافئ ما أجاني صبر :p بس مع ذلك طلع بجنن
    يسلمو دياتك والله يعطيك العافية ومن نجاح لنجاح ان شاء الله

  12. ام نبيل 19 November 2011

    نسيت قلك اني بالعزيمة عملت الكبسة السورية طلعت روعة ومنظرها على السفرة بجنن

  13. منى 22 November 2011

    صحتين و الف الف هنا ام نبيل , الحمد لله انهم عجبوكي و انبسطت تحديدا على الكبسة لان ما كتير جربوها صبايا ;)

  14. منى 22 November 2011

    هلا ام اسلام :)
    شكرا كتير على الاضافة , عملت فتة عدس مصرية و اتبعت طريقتك و كانت بتاخد العقل ;)
    شكرا لاغناء الوصفة و مية هلا فيك

  15. منى 22 November 2011

    هلا غفران :)
    لا ما الها علاقة بالفتات الشامية , بس الاسم مشترك
    ان شاء الله تجربيها و تكون نمممم

  16. منى 22 November 2011

    هلا دالو :)
    انا لسى متل ما بتعرفيني , بس انو قررت انو كل شي اله شي :roll

    فاتك منيو البتنجان , في شي عشخمصطاعش وصفة و كل واحدة اطيب من التانية , ان شاء الله تشوفي و تنقي و تجربي ;)

    انا كل الي خبرته على الوصفة قالي لحمة من عل بكرة الصبح :grin , بقى سبحان الله العادات فيها اختلاف بس كلنا على قلب واحد

    بوسات دالوش الك و لجوجو

  17. omislam 30 November 2011

    العفو ست منى انت اللي ماشاء الله عنك غانية الموقع بالوصفات الرائعة والنصايح والاسرار الاروع جعله الله في ميزان حسناتك

  18. منى 1 December 2011

    امين يا رب :) و اكيد كلنا منتعلم من بعض و كل واحد عنده كم فكرة بيفيد فيها البقية :zzz

  19. علياء 12 February 2014

    الرز منقوع بمي سخنة ولا باردة

    • منى 13 February 2014

      بارد منقوع بمية باردة

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)