براونيز بكريما الخمس دقايق السرية
عبوة من عجينة الباف باستري
حليب لدهن الوجه
الحشوة :
2 – 3 ملعقة كبيرة زيت زيتون
نصف كيلو لحمة غنم مفرومة
رشة زنجبيل
رشة كركم
رشة فلفل أبيض
نصف ملعقة صغيرة كاري
نصف ملعقة بهار مشكل
حبة بصل
حبة صغيرة جزر
حبة فليلفة حمراء
حبة فليلفة خضراء
نصف كوب فطر
ثلث كوب بازلاء مسلوقة
ثلث كوب ذرة
2 – 3 ملعقة كبيرة صويا صوص
1 – 2 ملعقة كبيرة مايونيز
1 – 2 ملعقة كبيرة كتشاب
جبنة بارمزان مبشورة
• تترك عبوة الباف باستري خارج الفريزر لمدة ساعة أو ساعتين حتى يفك عنها الثلج تماماً .
• تفرم كل الخضار بشكل ناعم , يقلى البصل بالزيت في مقلاة كبيرة غير لاصقة حتى يطرى ثم تضاف اللحمة و تتبل بالبهارات و تقلب و تفكك بالملعقة حتى يجف مرق اللحمة و تنضج .
• تضاف الفليلفة الحمراء و الخضراء و الجزر و الفطر و صلصة الصويا و يقلب الكل مع اللحمة حتى تطرى الخضار و تنضج .
• تبعد المقلاة عن النار و تضاف الذرة ثم تترك الحشوة حتى تبرد تماماً , بعدها يضاف المايونيز و الكتشاب و الجبنة المبشورة , أصبحت الحشوة جاهزة .
• تدهن صينية بايركس أكبر قياس بالزبدة ثم يفرد فيها أول رولو من العجينة و تمد الحشوة فوق العجينة .
• يفرد القسم الثاني من عجينة الباف باستري على طاولة العمل و يقطع لأصابع باستخدام سكينة حادة .
• ترتب أصابع العجين فوق الحشوة بشكل متداخل كي يكون منظر الفطيرة جميلاً ثم يدهن الوجه بالحليب .
• تخبز الفطيرة في فرن محمى على درجة حرارة 180 درجة مئوية حتى تنضج و تشعل مشواة الفرن إذا دعت الحاجة حتى يحمر وجه الفطيرة ثم تقدم فوراً .
ياعين شو هل اكله هى هيئتها بتشهى اجت بوقتها من شان اضيفها ضمن الاكلات يلى بدى اعملهم بس بدى اسالك منى عجينة الباف باسترى مثل عجينة البقلاوة يعنى مورقه ولا عجينة سميكه حتى اعرف على التمام اذا سميكه معناته بدى استعين بام نور حتى تحضرلى ياها لانه خبيرة ماشاء الله على كل حال الف شكر الك ولاختك وماشاء الله عليكم اذا انت واختك هيك بقى مامتك كيف ماشاء الله
هلا نداء
بالفعل هي كتير مناسبة للبوفيهات , حضرت هل الطبق بحفلة تخرجي و كانت سهلة و لذيذة
عجينة الباف باستري اسمها بالفرنسي Pâté Feuilletée و هي مؤلفة من رقائق فوق بعضها
بس هي غير عجينة البقلاوة :roll
ان شاء الله تعمليها و تبيض وجهك , و تسلمي يا عسل على الكلام الحلو
الف الف شكر ويسلم ايديك سهلتى على المهمة انشالله بكرا بدى اروح اشتلايها وبدى جربها باذن الله
منى انا عندى وصفة كتير كتير طيبة بس بدى اقلك عليها بجوز بتعرفيها وهى اصابع الفروج وهى عبارة عن رقائق اى نوع رقائق بدك بتحشيهم فروج وجزر وبازلاء وفطر وجبنة قشقوان وميونيز وبعدين بتغطيهم بالبيض والكعك واقليهم يممممممممممممممم شو طيبة بتعقد اذا بتعرفيها خلص انت نزليها اوكيه
على فكرة انا ادب انكليزى سنة رايعة لازم اكون السنة الماضية متخرجه بس بسبب سفرى والاولاد لم استطع النزول الى الامتحان بس بدى اسلك ليقوم انت من دفعتى بجوز منكون منعرف بعضنا على كل حال شى شهرين انا نازله الى سوريا بشكل نهائى وانشالله بتعرف عليك واذا بلزمك اى شى من عيونى بتعرفى هنا فى شى بجنن انت بس طلبى يالله سلامات
تكرم عينك يا ندوش ليش لاء انت امري انا بالخدمة. وسلم ايديكي وايدين اختك يا ست منى على هالافكار هيدي الاكلة بتدخل هون ضمن انواع التارت وفي صاحبتي فرنسية شو شاطرة بهل الانواع وبتعمل العجينة عايدا روعة بتطلع العجينة معا وعلمتني كذا نوع من عجينة التارت وانواع التارت بس العجينة بلاقيها جاهزة فا ما حاولت جربها.
بس ما عرفت ليش لا تدهنيا حليب اذا قصدك تشقر ما هي بطبيعة الحال رح تشقر لان عجينة هشة كتير ودغري بتقرمش لان فيا زبدة كتير
هلا ندوشة
انا بعرف شي قريب لهل الوصفة , بس من دون بازلاء و مع خضرة أكتر
بس يا ريت لو تنزلي وصفتك بكون منونة ليك
سبحان الله الدنيا شو صغيرة , أنا دخلت للجامعة سنة 2001-2002 , و كان معي بنوتة بدورة الانكليزي ظروفها بتشيه ظروفك
متجوزة لدكتور رح يروح لفرنسا و هي دراسة أدب انكليزي و دخلت معيي للجامعة و بعدها راحت لفرنساو كمان من مواليد 84
كنا مع بعض عند أستاذ صالح شرابة :roll
شو ؟؟ انت هي ؟
كلك زووء ندا ,ان شاء الله ترجعي بالسلامة انت و أولادك و يفرحك بتخرجك قريباً إذا الله راد
هلا ام نور
يا سلام لو عندي متل صااحبتك , كنت ما خليت منها و لا وصفة الا و علمتني يااهم :grin
هلا انا عندي طريقة للعجينة , بس بصرااحة بحس انها كتير صعبة و مو ممكن تظبط متل الجاهزة لهيك بريح راسي و بجيب جاهز :roll
ما شاء الله عليك ام نور , كل يوم بكشتف عنك شي جديد
العجينة بدهنا بالحليب لان بحس بتطلع شقرة أكتر , و لما كنت ما ادهنها كانت تطلع معي شوي باهتة 8)
نورتي يا عسل
تسلمي يا اخت منى ما بتسدئي اذا قلتلك انو تعلمت الطبخ لما تزوجت وجيت عفرنسا وكل ما شوف اكلة جربا بسنة تعلمت كتير اكلات حتى الماما استغربت كتير لان كنت اكره فوت عالمطبخ وما كان هيدا اهتمامي فسبحان مغير الاحوال
وكمان كتير استفدت من صاحباتي الفرنسيات والمغاربة كتير علموني شغلات 
بالنسبة لا العجينة معك حق صعبة بدا شغل بس بتظبط مع التكرار وبتطلع احسن من الجاهزة وفيكي تعملي فيا الاوزة اذا عرفتيا :p . طيب حاولتي تدهنيا بيض بدل الحليب انا ايا شي بدي يا يشقر بدهنو بيض لان لاحظت الحليب لما تبرد ما بيضل مقرمش
سبحان الله شو الدنيا صغيرة اى فعلا كنت عند صالح شرابة انا وبنت خالى رولا انا نداء عبهجى وبنت خالى رولا شبارق كنا ناخد عنده مواد اللغويات شو عرفتينى ولا لا انا نسيانه مين كان معى سبحان الله
هلا ام نور
ما شاء الله عليك و نيالك على هل الرفقة ..
هلأ أنا اتعلمت كمان بعد الجازة , لان ماما ما كانت تسمح لنا ندخل على المطبخ :roll
بس من لما كنت صغيرة كنت أقعد جنب ستي و اتفرج عليها و هي عم تطبخ و أهريها أسئلة لحتى تقطع شعراتها مني و من أسئلتي :grin
خليلي عينها شو بالها طويل علي و شو علمتني اشيا
ليكون قصدك [URL=http://www.l2ma.com/content/view/202]الأوزي[/URL], أنا كنت أدهنها بالبيض بس أحيانا صرت حس ان الها من ريحة البيض لهيك ما بقى استعمله ..
رح جرب المرة التانية البيض مع نقطة خل , و خبرك شو بيصير معي
هلا ندا:)
سبحان الله , استاذ صالح شرابة استاذ العيلة كلها و هو من أصدقاء بابا الله يرحمه ..
بس انا الدورة الي عم اقصدها هي دورة البكالوريا
مع اني حطيت عنده دورة لغويات , بس متل ما بتعرفي هي دورة قصيرة و ما بزكر أيا حدا منها ..
على فكرة أنا ماما من عيلة شبارق , يعني احسن من هيك طلعنا قراايبين
اتشرفت بمعرفتك ندا
يالله ماطلعنا منعرف بعض بس طلعنا قرايبين على فكرة انا من اول مادخلت على الموقع دخلت مكان اتصل بنا شفت العنوان وهو ببنيتى يلى انا ساكنه فيها وبيت شبارق بعتلك قلتلك انا انا نانتى رويدة شبارق وامى انتصار بس الظاهر ماوصلتك سبحان الله وانا كنت ساكنة ببناية شبارق يالله لكن سلمى على مامتك واكيد هى بتعرف نانتى لانه ماشاء الله عليها معروفه عند الشبارقية من طيبتها وانشالله بس نزلت بتعرف عليك سلامات
مية أهلا و سهلا ندا:)
عن جد قديه الدنيا صغيرة ..
رسالتك ما وصلت
إذا ما الي غلطانة معناها خالك عمو عز الدين ؟
كان من رفقة بابا الله يرحمه
و عم استنى وصولك لحلب , و أكيد لازم نشوف بعض
بس لا تنسي تجبي معك ام نور و نعمل أحلى صبحية عندي
الله يبارك فيكي ويخليكي يا اخت منى الي الشرف بزيارتك والتعرف عليكي.
لو بتعرف اديش متمناية زور سوريا واتعرف عا حلب بالذات والادقية اد ما سمعت عنون انشالله بس ننزل بالاجازة علبنان وبما انو الاخت نداء رح تكون بسوريا منتشجع هاك لنزورا.
فعلا سبحان الله شو الدنيا صغيرة انا خالى عز الدين وبنته يلى قلتلك رفيقتى سبحان الله فعلا خالو كتير كنت اسمعه عم يحكى على والدك عليه رحمة الله
انشالله عن قريب بلتقى فيك وانشالله ام نور كمان تجى على سوريا وتتعرف عليك سلامات
مية أهلا و سهلا فيك ام نور بكل وقت
ان شاء الله بتعملي لحلب زيارة وبتعرف عليك مع ندا
ااه عن جد ندا ؟
و كمان انا دايما بسمع ماما و بابا بيحكوا عنه .
يلا ان شاء الله توصلي بالسلامة
منى الغالية.. بكرة عندي سهرة ورح اعمل هالفطيرة ،بس سؤالي بصير تنخبز سلف وبعدين تتسخن،اوتترتب قبل كم ساعة بدون خبز
وكمان ممكن استبدل جبنة البارمزان بجبنة قشقوان 
ودمت طيبة 
هلا ريومة
حبيبتي هي الاكلة فيك تحضريها قبل بيوم أو حتى أكتر و تحطيها بالفريزر , أما الخبز فنصيحتي الك انك ما تخبزيها الا قبل التقديم لأنها اذا انخبزت قبل رح تصير طرية و مو مقرمشة و طيبة :roll
الجبنة فيك تستخدمي اي نوع من الجبنة الصفرا المتوفرة عندك
اي سؤال تاني من عيوني
كتير حلوة هالوصفة
بس بدي اسأل …لما رح نحط اول طبقة رح نمدها كأنه بيتزا ولا نرفعها عالجوانب يعني على اطراف البايركس لانه مابعرف تصورت انه رح تطلع الجبنة من الاطراف ؟؟؟يعني طريقة عملها متل الكبة بالصينية (باستثناء الطبقة التانية لانه بتكون مختلفة ).
هلا رنونة
لما منمد أول طبقة ما بيهم , اذا بتحبي فيك ترفعيها أو لأ حسب مزاجك يعني
مرحبا منى..
أمانة أمانة سلمي على سيما وقوليلها شو هالتحفة
عنجد مع إني ما باكل لحم ولا بعرف كيف طلع طعم الطبق… بس تلقيت عليه إطراء من الدرجة الرفيعة 8)
لما كنت عم حضرها حسيت إنو ريحتها بتاخد العقل، ولما طالعتا من الفرن تحسرت لأني ما باكل لحمة… بس بعدين لما جربها زوجي وأغدق علي من كلمات التقريظ والمدح ما عدت زعلت :zzz
باختصار… هي وصفة تحفة
هلا دالو يا عسل
الف الف هنا على قلب زوجك , و الله اعصابك قوية ما دقتي و لا لقمة , انا لو محلك ما فيني..
يلا يا ستي كتير كتير انبسطت انها عجبتك و هلا كنت عم خبر سيما بس ما لقيتها , سلامك بيوصل اكيد حبيبتي , و دعواتك الحلوة الي و لسمسومة :zzz
مرحبا اخت منى وكل عام وانتم بخير . سؤالي عن عجينه باف باستري:هون مالقيت هالعجينه .بينفع استخدم الجلاش امfillo dough
لا و الله اختي ما بتصير , او على الاقل انا مو مجربتها فيها لهيك بخاف قلك جربي و بعدها ما تزبط معك :roll
انا عندي اكله طيبه تعلمتها من رفبقتي مصريه بيقولها باتيه دجاج رقائق البقلاوه نفردنص كميه الباكيت بصينيه مدهونه سمنه نحط فوقه الدجاج اللي محضرينه سلفا بالطريقه التاليه فيليهدجاج يقطع ناعم و يقلل بالسمنه مه شويه بصل وتوم حتى يستوي نضيفله البهارات المعتاده مع شويه كركم وزنجبيل المهم نحطه فوق الرقائق بعدين نضيف الكميه الباقيه من الرقائق ونقطعها مربعات بعديننحمي سمنه ونصبهافوق حدود التقطيع بعدين نخفق كاسه حليب مع بيضه وملح وبهار ونصبها فوقهاوننتظر نص ساعه وندخلها للفرن حتى تتحمر وصحه وهنا اكله لذيذه جدا خرج بوفيهات
انا في شغله مافهمتاانو ليش الطبقة التانية نقطعا على شكل اصابع ليش مانمدها كاملة ولا في مغزى من هالطريقة؟؟
ما ضروري تقطعيها , هي هيك بس للديكور و فيكي تمديها كاملة
عندي سؤال مهم .. عجينة البف باستري ما بتستوي معي دائماً بالسواء ولو متل هي فطيرة بيستوي الوجه وبيضل القسم السفلي بدون سواء وبيتشتش كمان .. ودوقي هالعجينة النية المتشتشه من تحت ايدي هههههه