قوارب الباذنجان


         وصفة : منى                 2008/08/08                 11 تعليقات
قوارب الباذنجان



5 حبات باذنجان اسود مدعبل طويل و الاسود بذره قليل
10 حبات بندورة حمرا مقشرة و مفرومة
نصف كيلو لحمة غنم مفرومة
2 بصلة مفرومة ناعمة
10 سن ثوم مقطع جوانح شرائح
نصف كوب كزبرة خضرا
نصف كوب جبنة بارميزان او موزاريللا
2 ملعقة كبيرة زيت زيتون
زيت لقلي الباذنجان
كوب مرق
ملعقة صغيرة بهارات
رشة زنجبيل مطحون و رشة قرفة
ملح حسب الرغبة

• نزيل القمع الأخضر و نقشر الباذنجان بشكل مقلم و نقطعه نصفين و نملحه مدة نصف ساعة ثم نحفره بملعقة بشكل قوارب و لا نرمي اللب ..ثم نغسله و نجففه .

• نقلي قوارب الباذنجان بالزيت حتى يشقر لونه ثم نجففه من الزيت الزائد و نرصه بصينية بايركس مستطيلة .

• في هذه الأثناء نزيل البذور من لب الباذنجان و نفرمه مكعبات ناعمة .

• نحمس البصلتين بزيت الزيتون حتى تذبل ثم نضيف الثوم و نحمسه من غير ما يتغير اللون ثم نضيف لب الباذنجان المفروم و نقلبه حتى يذبل و يتغير لونه ثم نضيف اللحمة و نحركها حتى تنضج و تجف ثم نضيف البهارات ثم البندورة المفرومة و نتركها حتى تتسبك و تنضج البندورة و آخر شيء نضيف الملح ثم نرفعها عن النار و نملي بها قوارب الباذنجان و نصب المرق فوقهم و ندخل الصينية الفرن مدة نصف ساعة .

• نخلط الكزبرة الخضرا مع الجبنة المفرومة و نخرج الصينية من الفرن و نزين القوارب مع الجبنة و الكزبرة بشكل طولي بمنتصف كل قارب باذنجان ثم نعيدها الى الفرن ربع ساعة او حتى تذوب الجبنة .
ممكن نطبخ جنبها الرز بالشعيرية و تفضلوا الف صحة و عافية .


ملاحظات :

• ممكن تضيفي الفليفلة الباردة الملونة احمر او برتقالي والمفرومة مكعبات ناعمة الى خلطة اللحمة و البندورة لاضافة الوان جميلة .

• ممكن تقطعي حبة بندورة شرائح مستديرة و كل شريحة تقطع نصفين ( هلالين) تزيني بهما جوانب كل قارب قبل ان تخبز بالفرن و عند اضافة الجبنة و الكزبرة تعطي منظر قارب حقيقي ملون بالوان جذابة .

• اضافة الملح أول الطبخ يسبب فقدان طعم الملوحة فيه بسبب الحرارة .. و نضطر لاضافة كمية اخرى من الملح و النتيجة ملوحة أقل و كمية مضاعفة من الصوديوم الموجود بالملح و هذا مضر للصحة خاصة لمرضى الضغط ابعده الله عنكم .
  • وصفات تانية ممكن تعجبك


التعليقات

  1. منى 8 August 2008

    ما شاء الله أخ أحمد طبق مرتب كتير كتير و حاسة انه كتير رح يكون طيب , على التجربة القريبة إن شاء الله و ببقى بحط صورة لتطبيقي , بصراحة أدهشتني بدقة المقادير و طريقة الشرح الواضحة و الي بتحكي كتير عن اسلوبك بتحضير الاطباق

    يعطيك الف عافية , و بانتظار اطباق جديدة منك :)

  2. غيث 8 August 2008

    الله يعطيك العافية اخي والله باين عليها وصفة مرتبة وان شاء الله رح اجربها قريبا وبشكل اكيد لانني والعائلة عندي بيفضلوا طبخات الباذنجان فقد جربت الكارنياك من وصفات منى الله يجزيها الخير ولاقى الكثير من المدح ورح جرب وصفتك لانها من مقاديرها باين انها لذيذة سلمت يداك اخي

  3. أحمد الله 9 August 2008

    الاخت منى الله يعافيك و يبارك فيك ..

    كرم كبير منك ان تتيحي لي فرصة لعرض وصفتي المتواضعةفي موقعك المشهور..
    كما اود ان اشكرك على التشجيع والاطراء .. نحن و لا شي جنب مهاراتك و ابداعك بالمطبخ :)

    اكيد لما بتجربيها راح تطلع اطيب من اللي بعملها انا .. طبعا نفس المعلمين غير شكل 8)

    الف صحة و هنا مقدما

  4. أحمد الله 9 August 2008

    الاخت غيث كلك زوء

    ان شاء الله تعجبكم و تنال رضاكم و تبيض وجهكم..
    انا كمان بحب كتير طبخات البيتنجان بالرغم من انه بيغب زيت و دسم كتير.. بس لا غنى عنه بالمطبخ العربي ..

    ممنون لطفك اختنا الكريمة :)

  5. منى 10 August 2008

    السلام عليكم و رحمة الله و بركاته :

    أخي أحمد اليوم جربت الوصفة متل ما كتبت مقاديرها تمام , و طلعت لذيذة كتير , حبوها عندي الكل ..,
    فكرة اضافة الجبنة و الكزبرة بالخيرة فكرةلذيذة كتير , طعمة صارت كتير طيبة و قوية :)

    الي صار معي اني بعد ما نزلت على السوق لاشتري البانجان , ما بقى اتذكر ايا نوع مذكور في الوصفة , فجبت بانجان صغير .. يعني تغيير غير مقصود بس النتيجة كتير طيبة ..

    سلم ايدك اخي , و الف شكر على الوصفة اللذيذة

    هي صورة لتطبيقي و ان شاء الله يكون تمام

  6. Iman 11 August 2008

    ما شاء الله يسلمو يا اخ احمد شو هالاكله مبين عليها كتير طيبه
    الباذنجان من احب الاكلات لي و لزوجي راح جربا الاسبوع القادم ان شاء الله شكلا بيبيض الوش
    يسلموا ايديك اخي و ادين مبدعتنا منى على التطبيق و التصوير الرائعين كالعاده

  7. أحمد الله 11 August 2008

    و عليكم السلام و رحمة الله و بركاته

    الاخت منى كل الشكر و الامتنان على اضافة الصورة الجميلة فعلا خبرة و معلمية و نفس طيب كما هو واضح من الصورة .. ماشاء الله تبارك الله .. جعله الف صحة و عافية

    هو البيتنجان او الباذنجان المدعبل كله نفس الطعم العادي او المتطاول يعني بيمشي الحال بالمدعبل اذا ما متوفر الطويل..
    تذكرت شغله في ناس ما بتحب طعمة الكزبرة الخضرة فممكن استبدالها بالبقدونس او الروزماري (اكليل الجبل – حصالبان ) كمان طيب و اله نكهة جميلة و مفيد للهضم و تقوية الذاكرة ممكن ينطحن و ينضاف للجبنة.. يعني الوصفة فينك تتفنني فيها على ذوءك

    جعله هنا و عوافي و بتشكرك مرة تانية على اتاحة الفرصة الطيبة لعرض اكلتي المفضلة

    كل التقدير و الاحترام :)

  8. أحمد الله 11 August 2008

    الاخت ايمان ان شاء الله تعجبك و تبيض وجهك :)
    و الف صحة و عافية مقدما

    ممنونك على زوءك و لطفك

    و مية هلا 8)

  9. منى 11 August 2008

    بالعكس اخي الشكر الك على هل الوصفة الطيبة

    الف شكر ليك على الاضافة و الافكار و ان شاء الله بيستفيد منها الكل , أنا حبيتها كتير بالكزبرة

  10. سارونات 14 August 2008

    السلام عليكم و رحمة الله و بركاته

    جازاك الله خيرا اخي و جعله في ميزان حسناتك و تطبيق اختي منى ما شاء الله عليه
    بدي اسأل ازا ممكن المرق هو مرق لحم بما ان الوصفة تحتوي لحمه او ممكن مرق دجاج و هل المرق ضروري او ممكن استخدام الماء
    بالتوفيق
    سلام

  11. أحمد الله 17 August 2008

    و عليكم السلام و رحمة الله و بركاته

    بارك الله فيك اختي الكريمة على دعائك الطيب :)

    فكرة اضافة المرق لحتى ما ينشف الباذنجان اثناء الشوي بالفرن ..انا بضيف مرق اللحم لأنه من جنس البروتين اللي هو لحم الغنم المستخدم بالطبخة ..
    مع انه جربتها مرة بالماء لأنه ما كان عندي مرقة لحم و طلعت طيبة بس بمرق اللحم بتطلع زاكية اكتر..

    مية مرحبا :p

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)