كاتو على الصوبة


         وصفة : منى                 2014/03/10                 12 تعليقات
كاتو على الصوبة

من امبارحة لليوم المطر ما وقف الحمد لله , و عند كل نزلة مطر في دعوات رب العالمين ما بيردها , يا رب تريح بالنا و تغسل همومنا و تجعل هل المطرة رحمة على كل الناس ..

يمكن أخر مرة رح نشعل الصوبة , لهيك لحقت حالي و حضرت الكاتو عليها , و طلع رااائع متل كل مرة . و للأمانة الفكرة انا شفتها ع جروبات الطبخ في الفيس بوك منتشرة , ما بعرف صاحبتها الأصلية , بس الله يجزيها عنا كل خير , فكرة بسيطة بس مبدعة . بتحضري الكاتو بثواني , بتغطيه و بتحطيه ع الصوبة , و بتفوح الروايح الطيبة عليكن و انتو قاعديين بهل العتمة , ما في ضو غير النار , قعدة رايقة الحمد لله


ع الصوبة عبيستوي , و الريحة يم يم

الوصفة الي بحضر فيها هل الكاتو كمان سهلة و على ايدك بتصير من دون خفاقة , يعني منقدر نتحلى حتى لو الكهربا مقطوعة , انت فيك تحضري ايا وصفة معتمدتيها و تخبزيها على الصوبة , الفكرة بطريقة الخبز , مو بالمقادير نفسها .

لحتى ينجح معك من اول مرة لازم تنتبهي ع كم نقطة بسيطة بس مهمة , اول الشي لازم تغطيه بشكل محكم , و ما تبان منه و لا زيق هل الاد صغير و الا ما بنفش و بيعجن معك , تاني شي لازم يكون عيار الصوبة ع الوسط , لا عالي بيحترق , و لا واطي ما بيعود بيستوي و لا بينفش . أخر شي شفت بعد كذا تجربة انو اذا استخدمتي القالب الي مثقوب بالنص عبيعطي نتيجة احسن . بكل الاحوال هل العيار رائع , فيك تحضريه و تخبزيه بالفرن , إذا ما كان في صوبة عندك :)

بالصحة و الهنا

المقادير :

6 بيضات
2 كوب سكر
فانيليا
2 كوب حليب أو ماء
ملعقة صغيرة نسكافييه
كوب زبدة مذوبة
3 كوب طحين
ثلثي كوب كاكاو
1 ملعقة كبيرة بيكنغ بودر
نصف ملعقة صغيرة ملح
طريقة التحضير :

1 - يدهن قالب كيك بالزبدة , ينخل الطحين و الكاكاو و الملح و البيكنغ بودر و يترك جانباً , تذوب النسكافيه بالماء أو الحليب . 2 - يخفق البيض و السكر و الفانيليا بمضرب سلك لبضع دقائق .
3 - يضاف الحليب أو الماء و الزبدة و يقلب حتى يصبح لدينا مزيج واحد , يضاف الطحين المنخول مع الكاكاو و البيكنغ بودر و الملح . يقلب بلطف حتى يصب المزيج متجانساً .
4 - يصب المزيج في القالب المدهون , يغطى بشكل محكم بورق ألمنيوم , يوضع القالب على الصوبة و يترك لمدة ساعة و نصف إلى ساعتين حتى ينضج .
5 - يترك حتى يبرد ثم يرفع ورق الألمنيوم و يقدم .
بعد ما استوى و برد



التعليقات

  1. Malak Albash 11 March 2014

    يسلم إيديكي منى شهيتيني جربه
    لهيك كم سؤال من بعد إذنك :)
    شو بيفرق كاتو الشوكولا عن البراونيز و لا بس الاسم ؟!!
    و السوائل كاستين ما كتير ؟ و لا بينفش منيح و ما بيأثر ؟

    • منى 11 March 2014

      أهلا و سهلا يا ملك , نورتي يا حلوة :)

      اهما ميزة انو البراونيز هيك طري و بيدوب بالتم , متل كاتو شوكولا بس خيفس يعني :D
      بس طبعا بيكون خيفس بأصول

      كمية السوائل ممتازة , لا تخافي قوي قلبك و ما بتندمي ان شاء الله , رح يطلع معك اتو ع حلب

  2. ORUBA 11 March 2014

    ماعندي صوبة لجربو :P بس فعلا يسلم ايديكي حبيت اتشكرك ع مجهودك

    • منى 11 March 2014

      معلش عروبة بيصير على الفرن و بيطلع راااائع متل كاتويات الخلطات الجاهزة

      شكرا كتير لزوءك , منورة :)

  3. Sahar. joudeh 12 March 2014

    سلمت يداك كل مشكل وله حل عندك ما شاء الله عليك

    • منى 12 March 2014

      و ايدك سارة , يا ريت تجربيها و تكون طيبة و مستاهلة

      نورتي الموقع و شرفتيه :)

  4. suha.hindi 12 March 2014

    اخت منى يسلمو ايديكي بس حبيت اسال عن المقادير بالغرامات

    • منى 12 March 2014

      هلا فيك اختي سها :

      المقادير بالغرامات هي :
      250 غ زبدة
      500 مل حليب أو مي
      480 غ سكر
      450 غ طحين
      70 غ كاكاو

      أيا سؤال تاني من عيوني :)

  5. Malak Albash 13 March 2014

    سؤال تاني منوشة :)
    الزبدة ممكن تكون مملحة متل طيبة مثلا ؟ :/
    ولا رح تأثر على نجاح و طعمة الكاتو ؟!!

    • منى 13 March 2014

      هلا طيبة مملحة ؟ ما الي منتبهة ع هي الشغلة و صار استعملتها اكتر من مرة للحلويات , و كانت تمام :D

      اتوكلي ع الله و استعمليها , انا لو ما الي مجربتها كنت رح قلك ما بتزبط الزبدة المملحة بالحلويات

  6. joud 16 July 2014

    تسلم ايديكي مدام منى و جزاك الله خيرا على كل هالوصفات الرائعة و اللي بطبقها و أنا مغمضة .. بدي اسألك أنا كنت ساوي هاد الكاتو بس كنت حط القالب مو عالصوبة مباشرة ولكن بطنجرة بحط فيا القالب و بغمرها شي إصبعتين ماء و بغطيها و بحطها عالصوبة .. صح و لا غلط .؟؟؟ و شكرا جزيلا مرة ثانية يا مبدعة

    • منى 17 July 2014

      اهلللين جود منورة حبيبتي :)
      انا بحطها ع الصوبة مباشرة بس بحطها ع العيار الوسط لا عالية و لا واطية

      شكرا الك منورة

تقييم الوصفة
عاديةقد أحضرهاجيدةممتازةأكثر من رائعة (1 votes, average: 5.00 out of 5)