كاري الباذنجان المشوي


         وصفة : منى                 2011/09/15                 14 تعليقات
كاري الباذنجان المشوي

باخر ايام الصيف الكل مشغول بالاستعداد للمدارس . بحب حضر وصفات سهلة و نباتية و اعتبرها تنفس بين شوطيين . و اليوم رح حضر كاري الباذنجان المشوي على الطريقة الهندية و هي وصفة كتير طيبة و مميزة بنكهة الشوي و بنكهة البهارات الي بتميز المطبخ الهندي و الوصفة جاية من البنجاب , و بتتحضر بالشوي في فرن التندور أو على الفحم و الي رح يعطي نكهة غير شكل للوصفة . بس اليوم عم قلكن اني حابة قلل الشغل لهيك شويت البيتنجانات على الغاز و هي الطريقة براي بتعطي طعم اطيب من الشوي في الفرن .

اكتر شي بحبه بهل الطبق هو نكهة البانجان المشوي لهيك رح تشوفي انو كمية البهارات قليلة نوعا ما مقارنة ببقية الاطباق الهندية و هي عن عمد لحتى حافظ على نكهة الوصفة الاصلية ., الكاري بيتقدم مع النان او الروتي او الشباتي و لحتى ما اشتغل شغلة قدمته مع الرز و الخبز العربي و كان بيجنن .

المقدار بيكفي لشخصين نازيك و طبعا الحر بتتحكمي فيه حسب الراي العام العائلي عندك ,اما اخر شي اذا بتحبي النعناع فيك تضيفي شوية نعناع فريش مفروم مع الكزبرة الخضراء . انا ما بضيفها ..

بالصحة و الهنا




1 حبة كبيرة باذنجان , من النوع المناسب للشوي , حوالي 300 غ
1ملعقة كبيرة سمنة أو 2 ملعقة كبيرة زيت نباتي
حبة صغيرة فليفلة حمراء , مفرومة
ملعقة صغيرة كمون حب
حبة متوسطة بصل , مفروم ناعماً
2 حبة كبيرة بندورة , مقشرة و مفرومة
3 فص ثوم , مهروس
نصف ملعقة كبيرة زنجبيل طازج , مبشور
1 – 2 حبة فلفل أخضر حر
نصف ملعقة صغيرة كزبرة
نصف ملعقة صغيرة غرام ماسالا أو كاري
ملح
نصف ملعقة صغيرة فليفلة حمراء ناعمة

للتقديم :

ربع باقة كزبرة خضراء , مفرومة




• تثقب حبات الباذنجان بالشوكة أو السكينة ثم تشوى على الفحم أو على عين الغاز أو في الفرن على درجة حرارة 230 مئوية حتى يحترق جزء من القشر و تطرى الحبات و تنضج, تقلب مرة او مرتان أثناء الشوي ,.تترك حتى تبرد ثم تقشر و تفرم .

• تحمى السمنة أو الزيت على نار متوسطة ., تضاف الفليفلة الحمراء و تقلب لمدة دقيقة او دقيقتان ثم ترفع جانباً .

• تضاف حبات الكمون لنفس القدر و تقلب لبضع ثواني حتى تبدأ بالفرقعة , يضاف البصل و يقلب لمدة 5 – 8 دقائق حتى يصفر من دون أن يتغير لونه .

• يضاف الزنجبيل و الثوم و الفلفل الحر الكامل و يقلب الكل لمدة دقيقتان . تضاف البندورة المفرومة و الكزبرة و الفليفلة الحمراء الناعمة و الغرام ماسالا أو الكاري . يغطى القدر و يترك لمدة 5 دقائق او حتى يتسبك الصوص .

• يضاف الباذنجان و يقلب بلطف ثم يغطى القدر و يترك لمدة 5 دقائق أخرى . تضاف الفليفلة الحمراء و تترك لمدة دقيقة .

• تضاف الكزبرة الخضراء و تقلب ثم يقدم الطبق مع الخبز الهندي أو العربي أو الرز البسمتي .

التعليقات

  1. آرام 15 September 2011

    شكراً أخت منى، الوصفة روعة من وصفها، للتطبيق بأقرب وقت.
    بالنسبة لنزار قباني أروع قصائده بالنسبة لي (بلقيس) لأنها نابعة من جرح حقيقي، أحس أنه كتبها بدمه وليس بحبره. الله يرحمه.

  2. منى 15 September 2011

    و الله اخي ارام مع اني سمعانة كتير ببلقيس بس ما قراتها الا لما ذكرتها انت هلا ..
    اي عن جد حسيتها مكتوبة بالدم , الله يرحمنا :roll

    ان شاء الله تجرب الوصفة و تكون متل ما بتحب

  3. آرام 15 September 2011

    عن جد روعة، هلأ تعشيت منها، طيبة ومنعشة وخفيفة وما في أسهل منها، ما أخدت أكتر من ساعة.
    طبقت الوصفة متل ما هي بس استخدمت زنجبيل جاف مطحون لأنو ما عندي طازج، واستخدمت كاري بدل الغرام ماسالا، وطبعاً ما حطيت كزبرة خضرا لأنو تجربتي معها كتير مرة. بس ما طلع شكلها متل الصورة، انخبصت وصار قوامها متل المكمور :)

    ألف شكر أخت منى … وبانتظار باقي وصفات الباذنجان.

  4. farah 15 September 2011

    يا ستي ما في اطيب من الباذنجان بكل احواله وبكل الطرق وشكلها هالاكلة مميزة لأني بموت على البانجان المشوي فكيف اذا كان معه كاري يلي التاني غرامي
    اكيد على التجربة باقرب فرصة لاقي بانجان مناسب
    والف شكر يا قمر يا ذواقة مو بس بالاكل والشعر كمان :)

  5. منى 16 September 2011

    صحتين و هنا اخي ارام , الحمد لله انها عجبتك و كانت يممم

    الزنجبيل فيك تشتري كمية صغيرة منه و تحفظه بالفريزر و كل ما لزمك بطالع منه قطعة صغيرة

    شكرا لثقتك بوصفاتي و عافية مرة تانية

  6. منى 16 September 2011

    و الله يا فرح انا حبيت البانجان من جديد و واحدة من الوصفات الي خلتني حبوا هي وصفتك لفتى الباتنجان ;)

    ان شاء الله تجربي هل الوصفة و تحبيها و تكون نمممم :zzz

  7. غيث 16 September 2011

    هلا ميمو اشتقنا لك عزيزتي والله مشاغل بني ادم ما بتخلص اشكرك على الوصفة اللي من مكوناتها تدل على طيبتها ولذتها شكرا لك عزيزتي بالنسبة لنزار انا لا احب شعره مع احترامي لكل الاذواق ولي وجهة نظر خاصة به اذا جمعتنا الصدفة وتقابلنا بحلب اخبرك بها لان الحديث يطول هنا على النت فاتحفظ به لما بعد بيني وبينك ما بتعرفي الدنيا قرية صغيرة ولربما نجتمع يوما ما

  8. om nabeel 17 September 2011

    مسا الخير للجميع
    كيفك منونة تسلم ايديكيعالاكلة اللي باين عليها طيبة
    وانا كتير بحب اغير واعمل اكلات جديدة
    بانسبة لنزار احانا بتحسي معه حق واحيانا بتحسي بزودها شوي
    بس بالنسبة للصرصار شي ما بيختلفوا عليه اتنين

  9. منى 17 September 2011

    هلا غيوثة :)
    و الله مو قصة مشاغل , بس بهل الاوضاع ما عم اشتهي اعمل ايا شي , انرجي تحت الصفر شي بمية درجة , الله يجيرنا و يحمينا من الاعظم

    اتمنى انو يصير قريب و الدنيا متل ما قلتي صغيرة و انا مقتنعة انو كلنا منعرف بعض او في عنا اصدقاء او قرايبين مشتركيين بس نحكي كلمتين :)

  10. منى 20 September 2011

    هلا ام نبيل :)
    انا بحس انو دما مزودها شي مية حبة بس هون معه حق … للاسف :roll

    ان شاء الله تجربي الوصفة و تكون على زووءك و مية هلا فيك حبيبتي

  11. أم نوران 23 September 2011

    انا قريت الوصفة من كم يوم و معها المقدمة و كتيير انبسطت عليهن تنيناتن بس و انا عم اكت الرد خلص شحن كمبيوتري و ناااام وانا انحرييت :( بس يالله هي انا رجعت اليوم بس ما عم لاقي المقدمة :cry اهئ اهئ
    انا جربت الوصفة بس سمحت لحالي اني بدل الكزبرة بالبقدونس لاني ما بحب الكزبرة الخضرا ابدا مع انو نحن بالمغرب كتييير منستعملا ! :x
    وكمان ضفتلا كاجو محمص بشوية سمنة وطلعت طيبة طيبة جوزي ما رجع هداك النهار على الغدا فطلعت من نصيبي انا و بنتي لحالنا :p وما قصرنا معا هههههه
    يسلمو ايديك و الله يجعلك واهل بيتك من اهل الجنة :)

  12. منى 26 September 2011

    هلا ام نوران :)
    انو في مقدمات صلاحيتها بس كم يوم بقى يا بتلحقي يا ما بتلحقي :grin
    صحتين و الف عافية على البك و الب القطة الحلوة الصغيرة , راحت عليه . مممم الكاجو فكرة بتشهي , يا ريت كانت خاطرتلي , خلص خيرها بغيرها و يسلموا كتير للاضافة
    الله يخليك على هل الدعوة الغالية , ان شاء الله انت كمان و كل غالي عليك

  13. بيان 2 September 2015

    بعد اذنك المقادير مو واضحة
    شو المقصود بحبة فليفلة حمراء
    حدة ولا حلوة؟

    • منى 4 September 2015

      متل ما بتحبي ، بس انا بستعمل فلفل رومي .

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)