محشي كوسا بقلب الفاصوليا الخضرا


         وصفة : منى                 2009/06/29                 22 تعليقات
محشي كوسا بقلب الفاصوليا الخضرا





للفاصوليا :


كيلو فاصولياء خضراء
كيلو بندورة
ملعقة كبيرة سمنة
ربع كيلو لحمة مقطعة رأس عصفور
ملعقة كبيرة كزبرة يابسة
2 فص ثوم مهروس
ملح و بهار مشكل
مرق كافي لغمر الفاصوليا ( أو ماء مع بضعة عظام خاروف )



للمحشي :

2 كيلو كوسا حجم متوسط


الحشوة :

نصف كيلو لحمة مدهنة
3 كوب رز مصري
نصف ملعقة صغيرة بهار مشكل
رشة قرفة
1 – 2 ملعقة كبيرة رب البندورة
ملح

المرقة :

ماء يكفي لغمر المحشي كوسا
2 - 4 فص كبير ثوم مهرووس
ملعقة كبيرة كزبرة مطحونة
1 – 2 ملعقة كبيرة رب البندورة
ملح و رشة بهار مشكل
عظام خاروف





• لتحضير الفاصوليا , تنظف عروق الفاصولياء ثم تغسل و تفرم إلى قطع صغيرة أو متوسطة حسب الرغبة .

• توضع حبات البندورة في خلاط العصير مع كوب ماء أو مرق و تهرس حتى تصبح ناعمة تماماً ثم تصفى و توضع جانباً .

• تقلى اللحمة بالسمنة حتى تشقر و يجف مرقها تماماً ثم تضاف الكزبرة و الثوم و البهار و تقلب لمدة دقيقة تقريباً .

• تضاف الفاصولياء المجهزة و تهدى النار و تغطى الطنجرة و تترك الفاصولياء تطبخ ببخارها لمدة ربع أو ثلث ساعة تقريباً أو حتى يتغير لونها و يصفر قليلاً و يجف مائها مع التحريك كل بضعة دقائق .

• يضاف عصير البندورة و الملح ثم تغمر بالمرق , و بعد أن يغلي المرق تهدى النار و يترك حتى تنضج الفاصوليا و قطع اللحمة تماماً لمدة ساعة الى ساعة و نصف و يمكن إضافة القليل من معجون البندورة إذا لم تكن البندورة مختمرة تماماً و لم تعطنا اللون المطلوب .

• في هذه الأثناء تغسل حبات الكوسا ثم تقطع رؤوسها و تغمس بالقليل من الملح و تترك لمدة عشر دقائق , هذه المرحلة هدفها تطرية رؤوس الكوسا كي لا تتشقق أثناء الحفر .

• تحفر حبات الكوسا بانتباه حتى تبقى قشرة رقيقة و يحتفظ باللب لتحضير المثومة .

• تحضر الحشوة : تخلط اللحمة النية و الرز و البهارات و دبس البندورة و القليل من الماء ثم تحشى حبات الكوسا بهذه الحشوة من دون ضغط و يترك مقدار نصف عقدة اصبع من كل حبة بدون حشو لأن حبات الأرز ستنتفخ عند الطبخ .

• يغطى قاع طنجرة جديدة ببضع من عظام الخاروف ثم ترتب حبات المحشي فوقهم و تغطى ببضع ملاعق سكب كبيرة من الفاصولياء الجاهزة و المطبوخة مع الثوم المهروس و الكزبرة اليابسة و رب البندورة المذوب بالقليل من الماء .

• يغطى الكوسا محشي بطبق مسطح و يوضع فوقه ثقل كي لا تخرج حبات الأرز أثناء الطبخ ثم يغمر بالماء و يوضع على نار متوسطة حتى يغلي .

• بعد أن يغلي المرق تهدى النار و تغطى الطنجرة و تترك لمدة ساعة و نصف إلى ساعتين أو حتى يبضج الكوسا .

• يقدم المحشي كوسا ساخناً مع الفاصوليا و الفجل و النعناع الطازج و الفليلفة الحرّة و الخبز العربي.
  • وصفات تانية ممكن تعجبك


التعليقات

  1. semo 29 June 2009

    الشكل بياخد العقل
    بس الفاصوليا من الد اعدائي انا وجوزي :sigh
    يسلمو بس الفكرة حلوة وجديدة
    وعلى سيرة الحماية اه من الحماية اه
    قد ما تركنت وتنضفت ولبست وعملت بتقلي اه بس من النصيب
    كان بدي لا بني احسن من هيك بس نصيب
    الله يسامحها يارب

  2. ام نور 29 June 2009

    يا سلام عا شي كوساية هلىء شو هالوصفة اليوم شي كتير بيشهي يا ريت الاقي كوسا متل هيدا لا جربا دغري بس مع الاسف الكوسا عنا غير بس عندي سؤال الفاصوليا الخضرا قصدك فيا اللوبيا مهاك

  3. نوارة 29 June 2009

    شهيتيني عليها يا ميمو مممممممم
    انا مجربة كل وحدة لحال بس مع بعضهن لأ
    يعني انا قبل ما اتجوز كنت ما باكل هيك شي ابدا
    سبحان مغير الاحوال صرت مو باكلن بس وبحبون
    الحمد لله

  4. ميساء 30 June 2009

    ياعيني يا ليلي على هالأكلة هي أكلة ولادي المفضلة بس منى أنا بطبخها من الأول مع الفاصوليايعني بعد ما قلي اللحمة والفاصوليا برتب الكوسا بسفل الطنجرة بحيث تكون تقريبا واقفة بشكل مائل بين الفاصوليا بعدين بحط المرقة وبكمل وما بينزل ابدا رز من الكوسا يمكن كترت حكي لا تواخذيني ميمو يسلمو دياتك الحلوين ويديمك علينا يا ست الكل :)

  5. غيث 30 June 2009

    لك ابوس بنت حلب انا هيه وحكياتها الحلوة اللي بتبل القلب والمقدمات الحلوة لكل طبخة ياي منى انا بموت بكل المحاشي يلي بعب الاكلات خاصة البانجان بقلب مسقعة البندورة وكمان هالاكلة الله يسلم ايديك وتمك على هالحكيات الحلوة اللي ما بنمل منها ابدا ابدا يا ستي انا بعمل هالاكلة مع بعضها من اول يوم دغري بطبخ الكوسا مع الفاصوليا منشان ما افتح ورشة للطبخ تاني يوم وكلي اصابيعك ورا هالاكلة المنفنة شكرا منى على نفسك الطيب

  6. رنا 30 June 2009

    ههههههه كتير ضحكت عالمقدمة وبحب قلك انه احيانا الوحدة بتتفنن بالطبخ مشان جميع الاسباب الي ذكرتيها بالنسبة الي الا انه يجبلي زوجي ضرة لانه مجرد انه يتخيل الفكرة :upset او تخطر على باله رح يكون هو وياها جنب هالكوسايات وفوقهن احلى فاصوليا عيشة خانم وعناااااار هاااادية :grin

    ياستي انا امي كانت تطبخ هالاكلة الوحيدة بعبها محشي وعلى سيرة لفظ العب ياريت نحافظ على لغة اجدادنا ولكنتهن بماانه عم نحكي بالعامية يعني فاصوليا بعبها محشي ياعيني على هالكلمة شو كلها حنان ورقة :grin
    ايوه منرجع للطبخة …انا امي شامية ومابتعمل كانت غير هالنوع بس لما جيت عبيت حمايي كانوا بيعملو جميع الانواع الي ذكرتيهن فوق حتى انا استغرب انه معقول كل الاكل بياكلو معه محشي …بس شو عن جد شي كتير طيب ..
    بس انا حماتي بتعملها بنفس طريقتك بس بتطبخها مع كامل الفاصوليا ولا مرة حسيت انه كان في رز بالفاصوليا من المحشي بالعكس بتطلع كتير طيبة
    بس نحنا مناكلهن اول يوم مع بعض وتاني يوم جنب الفاصولياء رز
    نسيت اتشكرك عالطبخة والله يقويكي ويخليلك هالعيلة الحلوة ;)

  7. منى 1 July 2009

    هلا سيمو :)

    معقول في حدا ما بيحب الفاصوليا , يمكن انتي اول واحدة بعرفها :roll

    يلا ان شاء الله تجربي شي مرة و تغيري رايك بعد هل الأكلة .

    يا ستي في حموات بيعوفوا الكنة عمرها و كمان في كنات بيعوفوا الحماية حياتها , بقى المهم الواحدة تتقي ربها وين ما كانت و ان شاء الله ربنا ما بيضيع الخير معه ابدا :zzz

  8. Iman 2 July 2009

    شكلا كتير طيبه هالاكله. الفكره كتير غريبه علي بس بحب اجرب كل شي جديد. انا متعوده انو ااذا زاد اكل من قبل بيوم اني حوله لاكله تانيه بس ولا مره دمجت اكلتين مع بعض. هذا الشيء بيعطينا تشكيلات اكثر . لا شك انو المطبخ الحلبي من اغنى المطابخ . تسلم ايديكي يا منى

  9. منى 2 July 2009

    هلا حبيبتي ام نور :)
    الطبق كله تحت امرك و لعيونك و يا رب اذا صح الك تجربيها تعجبك .

    الفاصوليا السورية هي نفسها اللوبيا اللبنانية :zzz

  10. منى 2 July 2009

    هلا حبيبتي نوارة :)
    يا رب تجربيها لان عن جد ما في اطيب منها ..
    سبحان الله قديها الواحدة بتتغير من قبل لبعد , بتصير أرق و قابلة للتغير اكتر ..

    يلا ان شاء الله تجربيها و انا رح استنى رايك بعد التجربة ;)

  11. منى 2 July 2009

    هلا ميوسة :)
    و انا متل حكايتك , بطبخها من الاول للاخير بنفس اليوم و الطنجرة هو الشي الوحيد الي بيبقى صاغ بعد هل الغدوة المحترمة :grin

    و الله فكرة الي قلتي عليها , رح جربها مرة تانية ان شاء الله و ببقى بنزل التعديلات على الوصفة بعد التجربة ;)

    الف شكر الك للفكرة و مية هلا ميوسة

  12. TENDERNESS 15 July 2009

    هاي الاكلة غريبة كتير علينا بفلسطين ، يمكن تداخل الاطعم بيطلع زاكي ان شاءالله بجربها بيوم

  13. منى 19 July 2009

    هلا غيوثة :)
    هادا بس من زووءك و لطفك و زووءك يا قمر , و هياتي المرة الجايو رح اعملهم مع بعض باول يوم لجرب و شوف بنفسي .

    الشكر الك غيوثة و لردودك و تواجدك الحلو و الدائم في الموقع :zzz

  14. منى 19 July 2009

    هلا رنونة :)
    يا حبيبي , يعني رح تقعوريه و تحشيه و تعملي بجنبه مرقة , احسن اله ما يفكر او و لا حتى مجرة فكورة صغنونة تخطر بباله , بس ليكون عيشة خانم هي الي عليها عينوه :grin
    ان شاء الله المرة التنية رح اعملهم مع بعض من الاول للاخر و ببقى بعدل الوصفة بالتفاصيل الدقيقية , نورتي رنونة

  15. منى 19 July 2009

    هلا امونة :)
    جربيها وان شاء الله ما بتندمي لان بتصير كل واحدة فيهم اطيب من التانية , و باذن الله رح تدعيلي :zzz

  16. منى 19 July 2009

    هلا حنونة :)
    ما غريب الا الشيبطان , ان شاء الله تجربيها و لو بكمية قليلة و كمان تعجبك و انا رح استنى رايك أختي

  17. لولو المدريدي 27 April 2010

    اسم الطبخة فاصولية بعبا محشي

    وانا من ال صابوني كمان
    بياضة

  18. منى 28 April 2010

    على راسي حارتك اختي , نورتي و شرفتي :zzz

  19. omislam 22 November 2010

    والله جبتيها ياست منى احلى طبخة كنت ناسيتها رح اعملها بكرا بعون الله

  20. نسرين@ 2 August 2013

    بدي اسألك أخت منى على محشي الكوسا بقلب مسقعة البندورة

    • منى 4 August 2013

      هلا نسرين , هي طريقة المحشي , بس عواض القرع استعملي كوسا

      http://l2ma.com/?p=889

      ايا سؤال من عيوني

  21. نسرين@ 9 August 2013

    شكرآ كتير ألك أخت منى كلك ذووق

تقييم الوصفة
عاديةقد أحضرهاجيدةممتازةأكثر من رائعة (1 votes, average: 5.00 out of 5)