مربى اليقطين


         وصفة : منى                 2008/12/16                 45 تعليقات
مربى اليقطين
طريقة طبخ المربى طويلة شوي و بدها صبر بس مو صعبة . و سبب هذه الطريقة في الطبخ هو لون المربى , لان ست البيت الشاطرة ما بيكفي يكون مرباها طيب , كمان لازم يكون لونه أشقر " و عم يضوي ضوي " على قولة الحلبية . بهي الطريقة رح يدخل السكر لقلب المربى من دون ما يتغير لونه و كمان لحتى يحافظ على قرشته و يبقى كريسبي و أخر حلاوة .

بالصحة و الهنا


كيلو من اليقطين المقطع جاهز
400 غ كلس
كيلو و نصف سكر مقسم على ثلاثة أقسام
نصف برتقالة
نصف ليمونة
3 كوب ماء





اليوم الأول :

اليوم إن شاء الله طريقة تقطيع اليقطين و بعدها تكليسه , و هي المرحلة قليل كتير من ستات البيوت اليوم تعملها , الأغلب بتشتري اليقطين مكلس و جاهز و هو متوفر بس المشكلة أن أحياناً بيكون التكليس مو منيح و بيطلع المربى مو طيب و لا مقرمش .

يقطع اليقطين لحزوز كبيرة و بعدها يقشر و يقطع بأدلة خاصة كتلك الظاهرة بالصورة و إذا لم تتوفر الأداة يمكن تقطيعه حسب الرغبة , بعدها يحفر بمحفرة صغيرة حتى يصبح فيه نفق صغير . أداة التقطيع الظاهرة بالصورة هي لأم حماتي الله يرحمها , يعني عمرها على الأقل 60 أو 70 سنة .



بعد تقطيع اليقطين و تجهيزه ننتقل لمرحلة التكليس , نحتاج لما يسمى كلسة أو كلس . و هي متوفرة في حلب في الكلاسة و عند بعض البائعين في الخالدية و كنا من زمان ما نشتريها الا من عند أبو نديم الي بالجميلية قبل ما يتسكر محله , لكمية كيلو من اليقطين بعد تقطيعه , نحتاج لكلسة بحجم حبة البرتقالة الكبيرة , و بعد وزنها طلعت ما يقارب 400 غ .




توضع الكلسة في وعاء كبير بلاستيك و لازم يكون بلاستيك حتى ما ينتزع . يصب الماء المغلي عليها بحذر حتى لا يصل لأطراف الأصابع . ستلاحظين ظهور فقاعات و كأن الماء يغلي بشدة و هذا دليل على أن الكلسة منيحة أو " شاطرة " على قولة حماتي .



نحرك باستخدام ملعقة خشبية حتى يذوب الكلس تماماً ثم يترك جانباً حتى يبرد الماء و يصفى الكلس في قاع الوعاء .

بعد أن يرقد الكلس في قاع الوعاء يصب الماء الأبيض في وعاء أخر بحذر و ببطء حتى لا يمتزج بالكلس الراقد . هذا هو الماء الذي سنستخدمه للتكليس أما الكلس الراقد فيوضع في كيس و يرمى , لا يرمى أبداً في المجلى أو الحمام و إلا فإنه سيسده .

يغمر اليقطين المقطع بماء التكليس و يترك لمدة 24 ساعة مع ضرورة تحريكه كل فترة و أخرى , لاحظي كيف لون المي مايل على حليبي نوعاً ما .


اليوم الثاني :

اليوم التالي هو يوم تحلية اليقطين أي نقعه بالماء للتخلص من الكلس قبل البدء بطبخه . بعد بقاء حبات اليقطين لمدة 24 ساعة على الأقل في الكلس , يغسل اليقطين جيداً و يوضع في ماء بارد و يغير عليه عدة مرات حتى يصبح الماء شفافاً , بالنسبة لي احتاج اليقطين حوالي أربع ساعات مع التغير كل تلت ساعة تقريباً .

يغطى اليقطين بأول نصف كيلو من السكر و يترك لمدة 8 ساعات أو طول الليل حتى ينزل من ماءه .



اليوم الثالث
يصفى اليقطين من مائه ثم يمزج مع باقي الماء و يوضع العصير على النار و يترك حتى يغلي لمدة عشر دقائق ثم يترك حتى يفتر . يضاف اليقطين و يترك لليوم التالي مع التقليب بين كل فترة و أخرى .

اليوم الرابع
في اليوم التالي يرفع اليقطين من القطر و يضاف القسم الثاني من السكر و يغلى لمدة 5 دقائق يترك بعدها ليفتر و يضاف اليقطين مرة أخرى و يترك لليوم التالي مع التقليب بين وقت و أخر .

اليوم الخامس
في اليوم الثالث و الأخير من نقع اليقطين بالسكر , يرفع اليقطين من القطر و يضاف أخر قسم من السكر . تقطع البرتقالة و الليمونة لأرباع ثم تضاف للقطر و يترك ليغلي حتى يصبح أرق من القطر العادي بقليل . أضفنا البرتقالة و الليمون لإضافة نكهة مميزة للمربى و بعض صديقاتي يضفن حبات الهال عوضاً عن نكهة الحمضيات و هذه الاضافة تبقى حسب الرغبة .

بعد أن يغلي القطر مع الليمون و البرتقال يضاف اليقطين و يغلى على نار هادئة لمدة عشر دقائق تقريباً أو حتى تختم القطع أي تصبح شفافة و يجب عدم زيادة فترة الطبخ حتى يحافظ المربى على قرشته .

بعد أن يبرد المربى يحفظ في قطره في البراد , و ليس في الفريزر , حتى وقت التقديم و عند التقديم يرفع من القطر و يترك حتى يصفى و يقدم في أطباق صغيرة و يمكن حشيه بالمكسرات حسب الرغبة أما أنا فأفضله من دون حشوة .
  • وصفات تانية ممكن تعجبك


التعليقات

  1. المغتربة 17 December 2008

    والله والله والله

    شاعرة بسعادة لاتوصف بسبب طرب هل الواطي بوش

    والله الجزمة كتيررررة عليه

  2. الدمشقية 17 December 2008

    رائعة كلك يا غالية يا منى وكلامك رائع :grin :grin :grin

  3. سلاف 17 December 2008

    كيفك حبيبتي منى 000 عجبتني مقدمتك اليوم كتير 00 الله يكون معك يامنتظر ويتقبل دعوتك يامنى 000
    والله يخليلك فرح00 وأولادك كلهن ويحميهن يارب‘‘‘ عنجد هالاسم كتير بحبه ** فرح ** اذا الله طعمني بنوته بالمستقبل باذن الله رح سميها فرح :zzz

    هلأ جينا للمهم
    واخيرا رح نساوي مربى القرع 00 اول سؤال منى كيف فيني اعرف اذا القرعا عدي أو سقي ؟؟ نحن عنا القرع متل اللي بالصوره وفيه نفسها بس لونها اخضر اذا كنتي تشوفي افلام كرتون منزمان سالي كانو لما يساوو حفله يستخدموها كقناع هيك شكلها مدور ولونها اخضر غامق 8)
    منتظره الخطوات منك منامينوو على فكره امبارح حضرت مربى السفرجل طلع بجنن كتير طيب ولونه بعقد بس تعذبت كتير بتعيير المقادير لازم اشتري ميزان للمعايير اكتشفت انه كتير بيلزم :roll
    كنت بدي اسألك شغله كمان المخلل لما بكون مرتخي شو بكون السبب هل بكون الملح قليل ؟؟؟ ولا شو برأيك؟
    بعرف اسألتي كتيره الله يعينك بس بدك تتحمليني
    :p

  4. منى 17 December 2008

    هلا مغتربة :)
    كلنا و الله طايرين من الفرحة , لان هل البوش وطى راسوا ادامنا , و لو بشكل رمزي :zzz

  5. منى 17 December 2008

    هلا دمدومة :)
    هادا بس من زووءك يا عسل
    ان شاء الله مبسوطة على طووول :grin

  6. منى 17 December 2008

    هلا سلوفة :)
    انت بيطلعلك تسالي ألف سؤال لان وعدتك و ما وفيت , ان شاء الله تساويها و تظبط معك ;)
    و هلا خلينا بالاسئلة : اليقطينة لحتى تعرفيها عدي أو سقي ما في الك غير البياع هو الوحيد الي بيعرف يقطيناته, سألتها لحماتي نفس السؤال و هيك جاوبتني ;) يعني ما في فرق بالشكل , التنتين الهم نفي اللون و نفس الشكل

    الف الف صحة و هنا على مربى السفرجل و الله زكرتيني لازم نزل مربى السفرجل المبروش , صار محضرته من أكتر من شهر :roll

    اذا ارتخى المخلل معناه ان خله قليل و ممكن يكون الملح , بس الأهم هو الخل , إذا بدك شوفي وصفة تحضير المخلل , كتير بتطلع معي ناجحة

  7. kuwaiti_girl 18 December 2008

    ههههه عجبني هالمجلس وان شاء الله دوم

    لاكون صريحه انا مرح اعمل هالمربى لان اولا لا يتوفر هذا النوع من اليقطين عندنا … وثاني شي لا يتوفر الكلس
    بس بقعد وبراقب الحلقات لانها ممتعه
    سلامي للجميع

  8. منى 18 December 2008

    :grin و انا كنت عم احكي لنفسي هل الكلام أول ما فكرت نزل الوصفة
    ان ما رح الكل رح يقدر يعمل هل المربى ! يلا ما الك غير تزوريني و ببقى بدوقك اياه :zzzلان عن جد روووعة

  9. ميساء 18 December 2008

    عزيزتي منى يسلم فمك ونحن لن ننسى بعد اليوم هذا التاريخ الذي ضرب فيه عدو الله والانسانية وشكرا كتير على هالوصفة من زمان حابة اتعلمها بس بدي اسأل هالخطوات يمكن تطبيقها على مربى الباذنجان ويسلمو يا أحلى مرشدة ومعلمة طبخ والله انا باشعر انك بتعطي الوصفة والمعلومة من قلبك وهذا سر أكلاتك الطيبة :zzz

  10. سلاف 18 December 2008

    8)
    شكرا كتير منى عم عزبك معي بس المخلل اللي ارتخى هو مخلل لفت ومابينحطله خل 00 انا جربت مخلل خضار عطريقتك والله طلع بجنن الاختلاف كان انه انتي بتستخدمي خل التفاح وانا الخل العادي واضافه عنجد كانت روعه بالمخلل هيه حبات الحمص00 كل شيئ باضافاتك عم يطلع بجنن00 انا اللي كنت عم اسأل عنه مخلل اللفت الصراحه لما ساويته كنت صايمه ب10 ذي الحجه بعد 15 يوم فتحته لقيته مرتخي قلت اكيدبدو يكون الملح لان مامنضيف خل مزبوط؟ قلي زوجي ملحه كويس قلت بركي هالمره نوع اللفت :upset
    مابعرف المهم مازبط معي وزعلت كتير مع انه ساويته اكتر من مره ونجح معي بس رح ارجع ساويه مره تانيه ان شاء الله
    بنرجع لموضوع القرعا اليوم رح روح دور على قطاعه للقرع تعمل اشكال حلوه لان ماعندي وبعدها بشتري القرعا وبلش شغل فيها بس بركي مالقيت هيك قطاعه لان بعتقد مافي منها هون00 شلون بدي قطعه ؟؟؟؟؟ :zzz
    شكرا منى ناطره ردك

  11. رنا 18 December 2008

    مابدي مابدي مابدي انا كتير بحبه وحامل والله حرام عليكي :cry شو بدي اعمل ؟؟؟
    على فكرة انا كتير بحبه بس امي كانت تجيبه مقطع باكياس بعدين تساويه بس مو دائما بينجح معها ؟؟؟…
    ياستي ماعلينا الوصفة كتير بتجنن بس هون مافي لا كلسة ولا هي الاداة يلي بتعملهن مزكزكين :grin لذلك بعد اسبوع رح دق بابك واجي اكل منه :grin

    اما بالنسبة لبوش والوداع الحافل يلي صار اله بالعراق …كتير انبسطت بس زعلت عالصحفي وتمنيت لو العرب تصير ايد وحدة مرة وحدة بس وكل الموجودين يشلحوا من رجلهن ويضربوه …بس للاسف …ضربوا الصحفي المقهور واخدوه لما وراء الشمس …بس الله معه

  12. منى 19 December 2008

    هلا ميوسة :)
    اكيد نفس طريقة التكليس نعملها مع مربى البانجان , كنت ناوية نزله هل الصيفية بس ما صحلي .
    ان شاء الله اذا ربنا راد رح نزله الصيفية الجاية :zzz

    هل الكلام بس من زووءك و طيبتك أختي , مية هلا :)

  13. منى 19 December 2008

    هلا سلوفة :)
    معناه أما الملح قليل و ممكن كمان يكون الجو كان حار و كان لازم تحفظيه بالبراد :roll

    اذا ما عندك من هل القطاعة ممكن تقطعيه لمستطيلات بسماكة نص سنتيمتر تقريباً ;)

    يلا خبريني شو بيصير معك

  14. أم الهدى 19 December 2008

    حبيبتي الله يعطيك ألف عافية وتسلم دياتك الحلوة على كل الوصفات يلي بتقدميها شو زاكية
    عندي كم سؤال رح تقل عليك شوي، بع دبوكرا ان شاء الله عيد ميلاد بنتيوأنا ما عندي خبرة كتير بالكاتو ، الصنف الوحيد يلي جربتو كاتو التمر وطلع رائع كتير وناجح من أول مرة ، بس هلق بدي تنصحيني بنوع تاني جربو يكون سهل ومابدو شغل كتير ونجاحو مضمون متل كاتو التمر (شحاد ومشيرط) :grin أعمل (كاتو بسيط ومميز ) ولا في نوع تاني أسهل
    وتاني شي كريما التزيين الأطيب الكريما السائلة ولا كريما البودرة وطريقة تحضيرهم
    عنجد خجلانة منك من كتر أسئلتي بس أنا بوثق فيك كتير

  15. منى 19 December 2008

    هلا ام هدى :)
    الله يسلمك و يحفظك و يخليك و يخليلك كل قططك الحلوة :zzz
    النوع الي ممكن أنصحك فيه هو كاتو شوكولا كولا و في كمان كاتو الشوكولا بتلات خطوات , هدولة سهليين و جاهزيين مع كريماتهم ;)

    الكريما السائلة أطيب أكيد بس البودرة أسهل , السائلة بتخفقيها شوي و بعدها بضيفي سكر بودرة و ممكن رشة صغيرة فانيليا لحتى تجمد , بس ما بتزيدي الخفق و الا صارت متل الزبدة :roll
    البودرة لكل علبة بتخفقيها مع تلات ارباع كوب حليب بارد كتير لحتى تجمد :zzz

    اي سؤال تاني من عيوني و انا تحت الخدمة حبيبتي

  16. منى 19 December 2008

    رنونة مشان الله غمضي عيونك , لتجي على عين البي بي 8)

    مية السلامة بهل القامة , مية السلامة بالحامل و المحمول :grin بتنوري يا قمر

  17. الدمشقية 21 December 2008

    حبيبتي منى نحن ماما بتساوي مربى اليقطين وبيطعلع طيب ومثل المرايا :) وتقريباً مثل طريقتك;) بس حبيت هاأداة يلي عم تقطعي فيها يعني منين ممكن نشتريها أو شو اسمها بعد اذنك يا قمر :zzz لأني كمان حابة هالمرة ساوي المربى أنا وبطريقتك تمام إن شاء الله

  18. منى 22 December 2008

    هلا دمدومة :)
    هل الالة ممكن تشتريها من محلات الادوات المنزلية ,بس ما بعرف اذا في منها بالشام 8)
    فيك تقطعيها باي طريقة و اتمنى انك تجربيه و يعجبك :)

  19. em layal 22 December 2008

    hi ana amani men venezuela u bys3dny kter eny kon ma3kon be hal mawke2 el ra2e3 kel shy hon tayeb u ne7na ely bl gorba be 7aje la hek mwake3. :p

  20. منى 22 December 2008

    مية هلا أماني :)
    ان شاء الله تعجبك الوصفات و تجربي منها شي و يكون على زووءك

    نور الموقع أختي و انا دايما ان شاء الله بالخدمة ;)

  21. Iman 23 December 2008

    Dearest Muna,
    Im sorry I have to write in English. I couldn log to Lakii to use their Arabic Keyboard. I just wanted to thank you for this wonderful recipe. It has been so long since I had the chance to check out your location . I feel so happy when I check it out. I feel as if I found what Ive been looking for . As for the kils for people who live abroad (bil gurbe) they can find it in home improvement stores where they sell concrete and sand. I love the way you cut them. first i thought this is corn but when I checked the recipe I found your cutter. I really love the way you appreciate everything old. God bless you. Lots of love :)

  22. منى 23 December 2008

    هلا أمونة :)
    بعد زمان القمر ما بان , كتير انبسطت ان الوصفة عجبتكو ان شاء الله تجربيها و تكون على زووءك
    كمان منيح كتير ان عرفتي هل الكلس من وين بينجاب , يا ريت لو تعطيني اسمه بالانكليزي ;)

    حبيبتي القلب على القلب , الك مني بوسات كبيرة و الف شكر الك للرد و التواجد 8)

  23. Iman 24 December 2008

    Dear Muna, Kils is called Lime in English. And its usually available in powder form here in the USA. I don know about other countries. But its called Lime

  24. الدمشقية 24 December 2008

    إن شاء الله حجربها :) وامبارح قلت لماما هي السنة أنا يلي بدي ساوي مربى اليقطين على طريقة حبيبتي منى 8)
    إن شاء الله ينجح معي ما أطلع بخيبة الأمل :cry
    بس حبيبتي ياريت تكملي بقية المراحل الله يوفقك ويقويكي ;)

  25. منى 24 December 2008

    ممم للأسف أمونة هدا الكلس ما بيصير الواحد يستعمله للمربى , قصدي الكلس البودرة , بس ما بعرف ليه ما بينفع :roll
    على كل الف الف شكر الك للمعلومة يا عسل :)

  26. منى 24 December 2008

    هلا دمدومة :)
    ان شاء الله بتجربيه و بتحبيه , انا ام زوجي علمتني اياه و هي مشهورة بمربياتها عالمياً :grin
    و الله عن جد أطيب مربيات بدوقها عندها و هي الله يعطيها الف عافية بتعلمني بقلب و رب

    و الله حقك علي ان شاء الله بكرة بصور المربى بشكله النهائي و بنزل بقية الوصفة ;)

    على فكرة غداي اليوم عندك , عملت ابو بسطي و ياامييي شو انبسطت , بيجنن طلع :zzz

  27. سلاف 25 December 2008

    كيفك منى000 منيح ماشتريت اليقطينه وبلشت شغل فيها 000 كانت لهلأ مسترخيه ومستمتعه بحمام الكلس او كانت مع هالسكر ونشفت ميته :zzz
    عم امزح معك بس ماتكوني مابتلقي مزح :roll
    عم تابعك انا ومستنيتك تخلصي منشان جرب انا باليقطينه اللي عندي
    منى كنت بدي قلك شغله منشان الكلس البودره
    هون ماعنا كلس قطع او حجر بقى كل اللي بعرفهن بساوو مربى القرع او اي مربى بده كلس كانو يستخدمو الكلس البودره ومنهن ماميتي الله يخليلي ياها
    بيطلع المربى بجنن وعم يقرش بس الصراحه مو متل لما يكون حجر
    انا ماما بعتتلي تنتين من سوريا اللي بده بعطيه وحده :)
    والمقدار بتذكر كانت تحط كاسة كلس لكل 6 اكواب مي بعدين بتصفيه وباخد بس المي
    يالله ناطرتك تخلصي هالمربى وشوف النتيجه النهائيه0000

  28. منى 26 December 2008

    :grin هي عواض ما تقوليلي يااا كسلانة قلتيها بطريقة مهذبة

    خلص ما دامها من مجرب أكيد معناها بيصير , انا هون سألت الخبرات و أقصد فيهم مركز الدعم الفني المتمثل بامي و حماتي و قالولولي ما بيصير :zzz

    غمضي عيونك و لا بقى تدخلي للموضوع الا لما تشوفي الصورة النهائية معلقة على الصغحة الرئيسية :grin

  29. أم الهدى 27 December 2008

    عزيزتي منى يعطيك ألف عافية على الجواب الشافي والوافي والله يجزيك كل خير تأخرت بالرد لأنو النت كان عطلان ولهيك ما قدرت أعمل كاتو الشوكولا وكان عندي مقادير كاتو بسيط ومميز عملتو وطلع روعة وزينتو بالكريما والفواكه وطلع كتير حلو
    تسلم دياتك ومشكورة مرة تانية

  30. منى 28 December 2008

    نا و الف عافية و صحة على قلبك و قلوب العيلة واحد واحد ;)

  31. سلاف 30 December 2008

    منى وين المربى بقى؟؟؟ عالقليلقه بس حطي باقي الخطوات والله اليقطينه رح تخرب :(

  32. الدمشقية 31 December 2008

    ألف هنا وعوافي على قلبك حبيبتي منى ونحن امبارح كان غدانا أبو بسطي والحمص تمر هندي ممممممممم :grin
    حبيبتي أكيد المربى بيطلع ظريف طالما على طريقة الغالية منىوربي يخليلك أمك وحماتك يارب ويمد بعمرهن بقوة وعافية ;)

  33. منى 31 December 2008

    الف شكر الك دمدومة , ان شاء الله تجربي المربى و يعجبك
    و الك ان شاء الله متل هل الدعوات الحلوة و أكتر :)

  34. منى 31 December 2008

    تكرمي

  35. Iman 31 December 2008

    وااااااااااااو منى شو هالشي الفخم ولك يا عيني على حلب و ستات حلب

    يعني بصراحه بتستاهل كل النطره يسلموا ايديكي و ايدين حماتك يلي بينلفوا بحرير
    تاني مره بتشوفيها عطيها بوسه مني و قوليلا هاي جاي من اخر الدنيا من الغربه و طبعا وحده متلا الك حبيبتي
    المنظر و الون اسمالله بيعقد و اكيد الطعم كمان يعطيكون العافيه ويحميكون يا ربي :)

  36. منى 1 January 2009

    هلا أمونة :)
    هادا بس من زووءك يا عسل , خليلي عينك
    ان شاء الله شي مرة يصح الك و تدوقيه لان كتير طيب

    بوساتك بيوصلوا ان شاء الله , نورتي حبيبتي :zzz

  37. Iman 5 January 2009

    يا الله يا منى هالمربى شو اخد عقلي بشكل تقطيعه المميز و لونه البراق الشفاف
    عنجد كل يوم الصبح لازم ادخل و اشوفه بدي قول للستات يلي عايشين باميركا انه لقيت كلس مخصوص للمربيات و المخللات بيلاقوه في السوبر ماركت بجانب ادوات عمل المخلل و ادوات عمل المربيات و المراطبين وهوكلس معالج مخصوص للاكل و اسمه بالانكليزي بيكيلينج لايم و مكتوب عليه لاعطاء قرمشه انا اشتريته و اليوم راح اشتري اليقطينه و راح اعمله على يقطين و نوع من انواع الشمام القاسي الاصفر اللون انشاء الله ببعتلك لصوره التطبيق النهائيه
    على فكره هذه القطاعه تستخدم لتقطيع عده ساندويشات فوق بعض مره واحد لعمل اشكال بالخبز يستعمل كمقبلات ممكن عمل بحث على جوجل عنها وشرائا عبر النت واللي بيلاقيها ارجو ان يقولنا من وين ومره تانيه شكرا يا منى

  38. منى 6 January 2009

    هلا امونة :)
    لو تعرفي ردك قديه فرحني و اتمنيت من جوى قلبي دوقك هل المربى

    ان شاء الله تشتري اليقطينة و تجربي هل المربى و يضبط مع الكلس الي لاقيتيه , ان شاء الله لازم يظبط و بانتظار الصورة حبيبتي

    الشكر الك أمونة و ان شاء الله حدا يشوفها و يخبرنا لحتى يستفاد الكل ;)

  39. Amar 21 October 2009

    جبت قرعة اليوم وصارلي فترة عم دور على حدا ببريطانيا يعرف شو هوه الكلس ما عرفت، أنا حابه أعمل مربى القرع مع انو القرع هون لونه برتقالي. السؤال هوه كيف بدي أعمل مربى بدون تكليس؟؟
    ويا ترى قديش بدي حط سكر وللمعلومة هون بيحطوا زنجبيل للنكهة مع انو مو حابه الفكرة وفكرة الليمون والبرتقال حابتها أكتر، يرجى الإجابة على سؤالي بسرعة قدر الإمكان.

  40. منى 23 October 2009

    هلا قمر :)
    وصفتي للمربى بدها كلس و اذا حابة تجربي تحضيره من دون كلس فانصحك تحضري وصفة مربى القرع على الطريقة التركية [URL=http://www.l2ma.com/content/view/527/2/]هون[/URL]

    بالعكس فكرة الزنجبيل مميزة , انا دايما احب اجرب شي جديد بس مو لكل الكمية لحتى اذا ما وافق الراي العام ما يكون راح تعبي على الفاضي ;)

  41. gada 20 August 2014

    أذا بتريدي بس بدي أعرف ليش المربی بعد مايصير بيطلع عليه حبات سكر

    • منى 27 August 2014

      اهلا و سهلا غادة
      بيكون كمية الليمون قليلة ، ممكن تنحل بانك ترجعي تغلي المربى بالقطر شوي و تضيفي عصرة ليمونة باخر كم ثانية من وقت الغلي

  42. هوا شامي 10 December 2014

    تسلم ايديك منى، عملت مربى اليقطين وهي اول مرة بعمله بعد وفاة والدتي الله يرحمهم جميعا ويحفظ الامهات كلهم هلق طفيت عليه وما تحملت ما دوق واحدة رفعتها ودقتها بيجنن تسلم ايديك، انا ممنونة الك كتير صعب تتخيلي قديش بفتح موقعك هون طبعا عملت معمول المد بالصينية وطلع بيجنن وعملت مربى الورد وهلق نفسي رايحة للمربيات بدي اعمل الشوكولا تبع البرتقال وبدي جرب الزنجبيل طريقتك صحيح انا عايشة باميركا وكل شي هون بس بصراحة يلي بعمله على طريقتك وبحاول اقرا كل التعليقات لانها بصراحة تجارب روعة للكل، على فكرة عملت الكنافة الفرك وطلعت شي ناهي تمام، لو سمحتي عندي سؤال، انا بعد ما غليت البرتقالة والليمون شلتهم قبل ما اضع اليقطين، ما كنت كاتبة حبيبتي بعرف انه ممكن يكون سؤال بسيط بس انا بحب امشي معك كلمة بكلمة يارب يحفظلك هل الايدين ويبارك لك بصحتك، وتبقي منارة للشيفات الرائعات.

  43. رندة 23 November 2018

    عزيزتي منى ..انت مرجعي دائما بالطبخ والحلويات ..جزاك الله كل خير
    لو سمحتي هل يفشل مربى اليقطين اذا بقي حوالي ٣٠ ساعة بالكلس؟
    لأنني انشغلت وماقدرت احليه بعد مرور ٢٤ ساعة ..
    مارأيك دام فضلك

    • منى 14 December 2018

      اهلييين يارندة
      اظن اتاخرت عليك :(

      اي بيزبط ست ساعات زيادة ما بتعمل شي .. يا ترى شو عملتي ؟

تقييم الوصفة
عاديةقد أحضرهاجيدةممتازةأكثر من رائعة (3 votes, average: 4.33 out of 5)